ຮອງປະທານສພຊຢ້ຽມຢາມແລະມອບອຸປະກອນກິລາໃຫ້ກອງຮ້ອຍທະຫານຊາຍແດນ 327
06/05/2019

(ສພຊ) ວັນທີ 19 ເມສາ 2019 ທ່ານ ພົທ. ແສງນວນ ໄຊຍະລາດ ເລຂາທິການສູນກາງພັກ, ຮອງປະທານ ສະພາແຫ່ງຊາດ ທັງເປັນສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 13 ແຂວງສະຫວັນນະເຂດ ພ້ອມດ້ວຍ ທ່ານ ສົມເພັດ ອິນທະທິລາດ, ທ່ານ ພັອ. ອິນໂຮມ ຈັນສີນາ, ທ່ານ ພັທ. ສົມພອນ ສຸດທິສົມບັດ ສສຊ ປະຈໍາເຂດເລືອກຕັ້ງແລະທ່ານພັອ. ຂັນທະວີ ທາທິລາດ ຫົວໜ້າກອງບັນຊາການປ້ອງກັນຊາດ ແຂວງ ສະຫວັນນະເຂດ ໄດ້ຢ້ຽມຢາມກອງຮ້ອຍທະຫານຊາຍແດນ 327 ບ້ານ ແກ້ງຄອກ ເມືອງ ສອງຄອນ ແຂວງ ສະຫວັນ ນະເຂດ; ໂດຍການຕ້ອນຮັບຂອງທ່ານຮອ. ບັນດິດອິນທອງທິບຫົວໜ້າການທະຫານກອງຮ້ອຍທະຫານຊາຍແດນ 327ພ້ອມດ້ວຍນາຍແລະພົນທະຫານ.

ພາຍຫລັງ ທ່ານ ຮອ. ບັນດິດ ອິນທອງທິບ ໄດ້ຕາງໜ້າໃຫ້ຄະນະພັກກອງຮ້ອຍທະຫານຊາຍແດນ 327 ລາຍງານສະພາບໂດຍຫຍໍ້,​ ທ່ານພົທ. ແສງນວນ ໄຊຍະລາດ ໄດ້ມີຄໍາເຫັນໂອ້ລົມເຊິ່ງ ທ່ານໄດ້ເນັ້ນໜັກໃຫ້ສືບຕໍ່ເພີ່ມທະວີຄວາມສາມັກຄີພາຍໃນ ໃຫ້ແໜ້ນແຟ້ນ; ພ້ອມດຽວກັນນັ້ນ,ກໍໃຫ້ສືບຕໍ່ປັບປຸງກໍາລັງທາງດ້ານການເມືອງແນວຄິດໃຫ້ໜັກແໜ້ນ, ຮໍ່າຮຽນວິຊາສະເພາະການທະຫານໂດຍສະເພາະວຽກງານຊາຍແດນພາສາຕ່າງປະເທດໃຫ້ເຂັ້ມແຂງ, ຮັກສາລະບຽບວິໄນໃຫ້ເຂັ້ມງວດ, ເອົາໃຈໃສ່ກໍ່ສ້າງຮາກຖານການເມືອງອາໃສປະຊາຊົນເປັນຫູເປັນຕາຊ່ວຍໂດຍສະເພາະບັນຫາຄ້າຂາຍເຖື່ອນ, ຜ່ານຜ່າອຸປະສັກນານາປະການປຸກລະດົມແນວຄິດກຸ້ມຕົນເອງເພິ່ງຕົນເອງສ້າງຄວາມເຂັ້ມແຂງດ້ວຍຕົນເອງໂດຍການເຮັດກະສິກໍາປູກຝັງລ້ຽງສັດແລະອື່ນໆ.

ໃນໂອກາດດຽວກັນນີ້, ທ່ານຮອງປະທານສະພາແຫ່ງຊາດພ້ອມດ້ວຍຄະນະໄດ້ມອບເຄື່ອງບໍລິໂພກແລະອຸປະກອນກິລາຈໍານວນໜ່ຶງລວມມູນຄ່າ 7 ລ້ານກວ່າກີບໃຫ້ນາຍແລະພົນທະຫານກອງຮ້ອຍທະຫານຊາຍແດນ 327.

 

(ບຸນເກີດວົງໄຊຍາ)