ຮອງປະທານສະພາແຫ່ງຊາດ ຕິດຕາມກວດກາຢູ່ແຂວງເຊກອງ
23/08/2019

(ສພຊ) ວັນພະຫັດ ທີ 15 ສິງຫາ 2019 ທີ່ສະພາປະຊາຊົນແຂວງ (ສພຂ) ເຊກອງ, ທ່ານ ພົທ. ແສງນວນ ໄຊຍະລາດ ເລຂາທິການສູນກາງພັກ, ຮອງປະທານສະພາແຫ່ງຊາດ ພ້ອມດ້ວຍຄະນະ ປະກອບດ້ວຍ ທ່ານ ນ. ວັນເພັງ ແກ້ວນະຄອນ ຮອງປະທານກໍາມາທິການບັນດາເຜົ່າ, ທ່ານ ພູມີ ວັນດີໄຊ ຮອງປະທານກໍາມາທິການ ປກຊ-ປກສ ສະພາແຫ່ງຊາດ, ບັນດາທ່ານຫົວໜ້າກົມ-ຮອງຫົວໜ້າກົມ ພ້ອມດ້ວຍວິຊາການທີ່ກ່ຽວຂ້ອງຈາກ ສະພາແຫ່ງຊາດ ໄດ້ເຮັດວຽກກັບຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 16 ແຂວງເຊກອງ, ສພຂ ແລະ ບັນດາພະແນກການຂອງແຂວງເຊກອງ, ໂດຍການຕ້ອນຮັບຂອງທ່ານ ດົງເພັດ ພະຍົນ ກໍາມະການພັກແຂວງ,​ຮອງປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ; ເຂົ້າຮ່ວມມີ ທ່ານ ຖາວອນ ພົມມະໄລລຸນ ຄະນະປະຈໍາພັກແຂວງ, ຮອງເຈົ້າແຂວງໆເຊກອງ, ມີຮອງປະທານ ສພຂ ເຊກອງ, ສະມາຊິກສະພາແຫ່ງຊາດປະຈໍາເຂດເລືອກຕັ້ງ, ສະມາຊິກສະພາປະຊາຊົນແຂວງ, ຕາງໜ້າພະແນກພາຍໃນ, ອົງການໄອຍະການປະຊາຊົນ,  ພະແນກພົວພັນຕ່າງປະເທດ, ແລະ ພາກສ່ວນກ່ຽວຂ້ອງຈໍານວນໜຶ່ງ.

ຈຸດປະສົງ ແມ່ນເພື່ອຕິດຕາມກວດກາ ການຈັດຕັ້ງປະຕິບັດກົດໝາຍ ແລະ ລະບຽບການທີ່ກ່ຽວຂ້ອງ ຜູ້ເຊື່ອຖືສາສະໜາຕ່າງໆ ແລະ ການເຄື່ອນຍ້າຍພົນລະເມືອງຂອງປະຊາຊົນສອງຟາກຊາຍແດນທີ່ບໍ່ຖືກຕ້ອງ ຕາມກົດໝາຍ, ຕະຫລອດຮອດການປະຕິບັດໜ້າທີ່ ແລະ ຄວາມສະດວກ-ຫຍຸ້ງຍາກ ຂອງກໍາລັງປ້ອງກັນຊາດ-ປ້ອງກັນຄວາມສະຫງົບ ແລະ ເຈົ້າໜ້າທີ່ດ່ານຊາຍແດນ.

ທ່ານ ດົງເພັດ ພະຍົນ ໄດ້ກ່າວຕ້ອນຮັບ, ລາຍງານສະພາບລວມ, ຈຸດພິເສດຂອງແຂວງ ແລະ ຜົນສໍາເລັດຂອງ ສພຂ ເຊກອງ; ໃນໄລຍະຜ່ານມາ  ຄະນະສະມາຊິກສະພາປະຈໍາເຂດເລືອກຕັ້ງ ໄດ້ເອົາໃຈໃສ່ໃຫ້ທິດຊີ້ນໍາຄະນະປະຈໍາ ສພຂ ຢ່າງໃກ້ຊິດ ແລະ ການປະກອບສ່ວນທາງດ້ານວັດຖຸ, ທຶນຮອນຈໍານວນຫນຶ່ງ ເຂົ້າໃນການພັດທະນາເສດຖະກິດ, ວັດທະນະທໍາ-ສັງຄົມ ແລະ ແກ້ໄຂຄວາມທຸກຍາກຂອງ ແຂວງເຊກອງ ເຊິ່ງເຮັດໃຫ້ພື້ນຖານໂຄງລ່າງຈໍານວນຫນຶ່ງໄດ້ຮັບການປັບປຸງກໍ່ສ້າງດີຂຶ້ນກວ່າເກົ່າ.

ພາຍຫລັງ ທ່ານຮອງປະທານສະພາແຫ່ງຊາດ ໄດ້ມີຄໍາຖາມເຈາະຈີ້ມ, ກໍາມະການທີ່ກ່ຽວຂ້ອງຂອງ ສພຂ ແລະ ບັນດາພະແນກງານຂອງແຂວງ ໄດ້ລາຍງານໂດຍຫຍໍ້ກ່ຽວກັບບັນຫາຕົ້ນຕໍໃນວຽກງານຂອງຕົນ; ໄລຍະຜ່ານມາ ການສະກັດກັ້ນການລັກລອບຜ່ານຊາຍແດນ ແມ່ນມີຄວາມຫຍຸ້ງຍາກພໍສົມຄວນ ໂດຍສະເພາະຜ່ານຊາຍແດນ ລາວ-ຫວຽດນາມ ທີ່ບໍ່ແມ່ນດ່ານຊາຍແດນ, ມີການຄຸ້ມຄອງພົນລະເມືອງຕ່າງດ້າວໄດ້ເປັນຢ່າງດີ ເຊິ່ງໄດ້ມີປະຊາຊົນຫວຽດນາມ ມາສ້າງຄອບຄົວກັບປະຊາຊົນລາວຈໍານວນຫນຶ່ງເລັກນ້ອຍ, ປາກົດກາດຫຍໍ້ທໍ້ ຈໍານວນຫນຶ່ງ ຍັງແມ່ນບັນຫາຢາເສບຕິດ, ການເຜີຍແຜ່ນິຕິກໍາກ່ຽວກັບສາສະໜາ ຍັງບໍ່ທັນເຮັດໄດ້ທົ່ວເຖິງ ໃນເຂດຫ່າງໄກສອກຫລີກ ເຮັດໃຫ້ຍັງມີປາກົດການແຊກຊຶມຂອງສາສະໜາອື່ນເລັກນ້ອຍ ທີ່ບໍ່ແມ່ນສາສະຫນາພຸດ ເຊິ່ງມີພຶດຕິກໍາຂັດຕໍ່ແນວທາງນະໂນບາຍຂອງພັກ ລະບຽບ-ກົດໝາຍຂອງລັດ, ບັນຫາຊົນເຜົ່າຕຣຽງ ຢາກມີຊື່ຢູ່ໃນຈໍານວນຊົນເຜົ່າຂອງ ສປປລາວ ແລະ ບັນຫາອື່ນໆ.

ທ່ານ ພົທ. ແສງນວນ ໄຊຍະລາດ ໄດ້ມີຄໍາເຫັນຕໍ່ກັບບັນຫາເຜົ່າຕຣຽງ ແມ່ນມອບໃຫ້ ອົງການປົກຄອງແຂວງ ສຶກສາຄົ້ນຄວ້າເພື່ອນໍາສະເໜີຕໍ່ພາກສ່ວນກ່ຽວຂ້ອງ.  ທ່ານຍັງໄດ້ເນັ້ນໃຫ້ ອໍານາດການປົກຄອງແຂວງ ເພີ່ມທະວີວຽກງານກໍ່ສ້າງຮາກຖານການເມືອງ ໂດຍການປັບປຸງລະບົບການເມືອງຢູ່ຮາກຖານ, ປັບປຸງວຽກງານປ້ອງກັນຊາດ ປ້ອງກັນຄວາມສະຫງົບ; ວຽກງານການຕ່າງປະເທດ ແມ່ນຢາກໃຫ້ຕິດຕາມຕື່ມອີກ ການໄປສ້າງຄອບຄົວຂອງປະຊາຊົນລາວ ຢູ່ ສສ.ຫວຽດນາມ ແລະ ປະຊາຊົນຫວຽດນາມ ມາສ້າງຄອບຄົວຢູ່ ສປປລາວ; ເພີ່ມທະວີການປະສານງານລະຫວ່າງ ສພຂ ກັບອໍານາດການປົກຄອງແຂວງ ໂດຍມີນິຕິກໍາເປັນບ່ອນອີງ, ຫລີກເວັ້ນການກັກຂັງຜູ້ຕ້ອງຫາແລ້ວປະເວລາດົນ ໂດຍບໍ່ມີການສືບສວນສອບສວນ; ທຸກພາກສ່ວນ ຕ້ອງໄດ້ສ້າງຂະບວນການຂໍ່ານັບຮັບຕ້ອນ ກອງປະຊຸມພັກ 3 ຂັ້ນ  ເຊິ່ງຕິດພັນກັບການເລືອກບຸກຄະລາກອນໃຫ້ແກ່ການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II, ພ້ອມນັ້ນ ກໍສ້າງຂະບວນການຕ້ອນຮັບກອງປະຊຸມໃຫຍ່ ຄັ້ງທີ XI ຂອງພັກ; ບັນຫາອື່ນໆ ແມ່ນຈະເປັນສື່ກາງ ນໍາໄປສະເໜີພາກສ່ວນກ່ຽວຂ້ອງ ເພື່ອແກ້ໄຂ.

ກ່ອນໜ້ານີ້, ໃນວັນທີ 14 ສິງຫາ 2019 ທ່ານ ພົທ. ແສງນວນ ໄຊຍະລາດ ພ້ອມດ້ວຍຄະນະ ໄດ້ສົມທົບກັບ ທ່ານ ດົງເພັດ ພະຍົນ  ຮອງປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ພ້ອມດ້ວຍຄະນະ ໄດ້ເຄື່ອນໄຫວເຮັດວຽກຢູ່ດ່ານດາກຕະອອກ ເມືອງດາກຈຶງ ແຂວງເຊກອງ ໂດຍການຕ້ອນຮັບຂອງທ່ານ ໄລສວນ ມິສຸວັນ ກໍາມະການພັກແຂວງ, ເລຂາພັກເມືອງ ເຈົ້າເມືອງໆດາກຈຶງ ພ້ອມດ້ວຍບັນດາພະແນກການທີ່ກ່ຽວຂ້ອງຂອງເມືອງ.

ຈາກການລາຍງານຂອງ ທ່ານ ໄລສວນ ມິດສຸວັນ ໃຫ້ຮູ້ວ່າ:​ ເມືອງດາກຈຶງ ແມ່ນເມືອງທີ່ມີມູນເຊື້ອຕໍ່ສູ້ປົດປ່ອຍຊາດທີ່ພິລະອາດຫານ ເປັນເມືອງວິລະຊົນ ສ້າງຕັ້ງຂຶ້ນໃນວັນທີ 17 ກໍລະກົດ 1960; ຕັ້ງຢູ່ທິດຕາເວັນອອກຂອງແຂວງເຊກອງ ຫ່າງຈາກເທສະບານແຂວງ 105 ກິໂລແມັດ, ມີເນື້ອທີ່ 273.220 ເຮັກຕາ, ເປັນເຂດພູກອຍ 80%, ພູສູງ 15% ແລະ ພູພຽງ 5%, ມີພົນລະເມືອງ 24.238 ຄົນ, ຍິງ 12.126 ຄົນ; ປະກອບດ້ວຍ 4 ຊົນເຜົ່າໃຫຍ່ ຄື: ຕຣຽງ  60,2%, ແຢະ 21,5%, ກະຕູ 16% ແລະ ເຜົ່າອື່ນໆ 2,3 %, ມີຊາຍແດນຕິດກັບເມືອງໄຕຢາງ ແລະ ນາມຢາມ ແຂວງກວາງນາມ ແລະ ເມືອງດາກໄລ ແຂວງກອນຕຸມ ສສ.ຫວຽດນາມ; ສໍາລັບການພັດທະນາເສດຖະກິດ ຕິດພັນກັບການແກ້ໄຂຄວາມທຸຍາກ ແລະ ວຽກງານ 3 ສ້າງ: ໃນ 7 ເດືອນ ຂອງປີ 2019 ຜ່ານມາ, ຄະນະພັກ-ອົງການປົກຄອງເມືອງ ໄດ້ເອົາໃຈໃສ່ຊີ້ນໍາ ແລະ ຊຸກຍູ້ຂະແໜງການ ກ່ຽວຂ້ອງຂອງເມືອງ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ດ້ວຍຮູບແບບຍາດແຍ່ງທຶນຮອນ ຈາກຫລາຍພາກສ່ວນເສດຖະກິດ ໄດ້ທັງໝົດ 35 ໂຄງການ ມີມູນຄ່າ 58.531 ລ້ານກີບ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ-ຖືກທິດ ໃນລະດັບ 11% ຕໍ່ປີ, ລວມຍອດຜະລິດຕະພັນພາຍໃນ ບັນລຸໄດ້ 335.045,92 ລ້ານກີບ, ສະເລ່ຍຕໍ່ຫົວຄົນບັນລຸໄດ້ 13.823.167 ກີບ ຫລືເທົ່າກັບ 1.128 ໂດລາ ຕໍ່ຄົນຕໍ່ປີ, ເຮັດໃຫ້ຄວາມທຸຍາກ ຍັງເຫລືອ 9 ບ້ານ ກວມ 16,6%. ນອກຈາກນີ້ ບັນດາຂະແໜງການຂອງເມືອງ ກໍໄດ້ລາຍງານການຈັດຕັ້ງປະຕິບັດໜ້າທີ່ວຽກງານຂອງຕົນ ຕະຫລອດຮອດຄວາມສະດວກ ແລະ ຂໍ້ຍຸ້ງຍາກຕ່າງໆ.

ທ່ານ ພົທ. ແສງນວນ ໄຊຍະລາດ ໄດ້ມີຄໍາເຫັນວ່າ: ໃຫ້ແກ້ໄຂບັນຫາທາງສາສາໜາດ້ວຍວິທີສຶກສາອົບຮົມ ດ້ວຍເຫດດ້ວຍຜົນຢ່າງນິ້ມນວນ ອີງໃສ່ມູນເຊື້ອວັດທະນະທໍາອັນດີງາມຂອງພໍ່ແມ່ທີ່ເຄີຍປະຕິບັດກັນມາ. ທ່ານຍັງໄດ້ເນັ້ນໜັກໃຫ້ເພີ່ມທະວີວຽກງານກໍ່ສ້າງຮາກຖານການເມືອງ ໂດຍການປັບປຸງລະບົບການເມືອງ, ຍົກລະດັບແບບແຜນການນໍາພາດ້ານວຽກງານປ້ອງກັນຊາດ-ປ້ອງກັນຄວາມສະຫງົບ ຕະຫລອດຮອດວິຊາສະເພາະ ທີ່ກ່ຽວຂ້ອງ; ສໍາລັບການພັດທະນາເສດຖະກິດ-ສັງຄົມ ກ່ອນອື່ນຕ້ອງຊອກຮູ້ທ່າແຮງບົ່ມຊ້ອນ ເພື່ອຊຸກຍູ້ສົ່ງເສີມ ປະຊາຊົນເຮັດການຜະລິດກະສິກໍາເປັນສິນຄ້າ ສ້າງລາຍຮັບໃຫ້ແກ່ຄອບຄົວ ປະກອບສ່ວນ ເຂົ້າໃນການພັດທະນາເສດຖະກິດ-ສັງຄົມ ເຮັດໃຫ້ຊີວິດການເປັນຢູ່ນັບມື້ດີຂຶ້ນຢ່າງບໍ່ຢຸດຢັ້ງ, ໃຫ້ເອົາໃຈໃສ່ວຽກງານສຶກສາ ແລະ ສາທາລະນະສຸກ; ສໍາລັບບັນດາຂໍ້ສະເໜີອື່ນໆ ແມ່ນຈະນໍາໄປສະເໜີຕໍ່ພາກສ່ວນກ່ຽວຂ້ອງເພື່ອແກ້ໄຂຕາມຄວາມເໝາະສົມ.