ຮອງປະທານ ສພຊ ຢ້ຽມຢາມເຮັດວຽກຢູ່ແຂວງ ຫຼວງພະບາງ
04/09/2019

(ສພຊ) ຕອນເຊົ້າວັນທີ 26 ສິງຫາ 2019, ທ່ານ ນາງ ສີໃສ ລືເດດມູນສອນ ກໍາມະການສູນກາງພັກ, ຮອງປະທານສະພາແຫ່ງຊາດ (ສພຊ), ຄະນະອະນຸກໍາມະການເນື້ອໃນກອງປະຊຸມໃຫຍ່ ຄັ້ງທີ XI ຂອງພັກ ໄດ້ນໍາພາຄະນະຮັບຜິດຊອບ-ຄົ້ນຄວ້າເນື້ອໃນຂົງເຂດລະບົບອໍານາດລັດ ເຄື່ອນໄຫວຕິດຕາມຊຸກຍູ້ວຽກງານຢູ່ແຂວງຫລວງພະບາງ. ໃນການເຄື່ອນໄຫວວຽກງານດັ່ງກ່າວ ມີທ່ານ ຄໍາຂັນ ຈັນທະວີສຸກ ກໍາມະການສູນກາງພັກ, ເລຂາພັກແຂວງ, ເຈົ້າແຂວງ ແຂວງຫລວງພະບາງ, ທັງເປັນຫົວໜ້າອະນຸກໍາມະການເນື້ອໃນກອງປະຊຸມໃຫຍ່ ຄັ້ງທີ VIII ຂອງອົງຄະນະພັກແຂວງແຂວງຫລວງພະບາງ; ບັນດາທ່ານຮອງເລຂາພັກແຂວງ, ຮອງເຈົ້າແຂວງແຂວງຫລວງພະບາງ; ບັນດາທ່ານຈາກພະແນກຕ່າງໆຂອງແຂວງ, ຕາງໜ້າຈາກສະພາປະຊາຊົນແຂວງຫລວງພະບາງ, ອົງການໄອຍະການປະຊາຊົນແຂວງ, ສານປະຊາຊົນແຂວງ ແລະ ອົງການສືບສວນ-ສອບສວນຂອງແຂວງ ແລະ ພາກສ່ວນກ່ຽວຂ້ອງ ໄດ້ເຂົ້າຮ່ວມກອງປະຊຸມຢ່າງພ້ອມພຽງ.

 ໃນກອງປະຊຸມ ທ່ານ ຄໍາຂັນ ຈັນທະວີສຸກ ໄດ້ຕາງໜ້າການນໍາຂອງແຂວງ ລາຍງານກ່ຽວກັບການກະກຽມກອງປະຊຸມໃຫຍ່ຂອງອົງຄະນະພັກແຂວງ, ການກະກຽມຮ່າງລາຍງາານການເມືອງກອງປະຊຸມໃຫຍ່ອົງຄະນະພັກແຂວງ ແຂວງຫລວງພະບາງ. ພ້ອມກັນນັ້ນ ກອງປະຊຸມຍັງໄດ້ຮັບຟັງລາຍງານການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ ຈາກບັນດາພະແນກທີ່ກ່ຽວຂ້ອງຂອງແຂວງ ແລະ ຮັບຟັງລາຍງານການພົວພັນປະສານງານ ລະຫວ່າງ ຫ້ອງວ່າການປົກຄອງແຂວງຫລວງພະບາງ ແລະ ສະພາປະຊາຊົນແຂວງຫລວງພະບາງ ຈາກຕາງໜ້າຂອງທັງສອງພາກສ່ວນ.                                                                                               

ໃນໂອກາດດຽວກັນ, ວັນທີ 27 ສິງຫາ 2019 ທ່ານ ນາງ ສີໃສ ລືເດດມູນສອນ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມຊຸກຍູ້ວຽກງານຢູ່ເມືອງວຽງຄໍາ ແຂວງຫລວງພະບາງ ໂດຍມີທ່ານ ຊາຍພອນ ຈັນທຸມມາ ຮັກສາການເລຂາພັກເມືອງ, ເຈົ້າເມືອງເມືອງວຽງຄໍາ, ບັນດາທ່ານຮອງເຈົ້າເມືອງ, ບັນດາທ່ານຫົວໜ້າຫ້ອງການຕ່າງໆຂອງເມືອງວຽງຄໍາເຂົ້າຮ່ວມ.

ທ່ານ ຊາຍພອນ ຈັນທຸມມາ ໄດ້ຕາງໜ້າການນໍາຂອງເມືອງ ລາຍງານການກະກຽມກອງປະຊຸມໃຫຍ່ ຄັ້ງທີ XII ຂອງອົງຄະນະພັກເມືອງວຽງຄໍາ, ​ການກະກຽມຮ່າງລາຍງານການເມືອງກອງປະຊຸມໃຫຍ່ຂອງອົງຄະນະພັກເມືອງ. ພ້ອມກັນນັ້ນ, ກອງປະຊຸມໄດ້ຮັບຟັງລາຍງານການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ ຈາກຫ້ອງການ ປກສ ເມືອງ ຕາງໜ້າອົງການສືບສວນ-ສອບສວນ ຂອງເມືອງວຽງຄໍາ ແລະ ພາກສ່ວນທີ່ກ່ຽວຂ້ອງ; ຮັບຟັງລາຍງານສະພາບການເຄື່ອນໄຫວວຽກງານ ຂອງໜ່ວຍສະມາຊິກສະພາປະຊາຊົນແຂວງປະຈໍາເມືອງວຽງຄໍາ ໃນຖານະເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າພາຍໃນເມືອງ ແລະ ການປະຕິບັດສິດ ແລະ ໜ້າທີ່ຂອງສະມາຊິກສະພາປະຊາຊົນແຂວງ ຕາມທີ່ກໍານົດໄວ້ໃນກົດໝາຍ.

ທ່ານ ນາງ ສີໃສ ລືເດດມູນສອນ ໄດ້ມີຄໍາເຫັນຕໍ່ສອງກອງປະຊຸມ ໂດຍໄດ້ສະແດງຄວາມຍ້ອງຍໍຊົມເຊີຍຕໍ່ ຄະນະຮັບຜິດຊອບກະກຽມກອງປະຊຸມໃຫຍ່ຂອງອົງຄະນະພັກແຂວງ ແຂວງຫລວງພະບາງ, ຄະນະຮັບຜິດຊອບກະກຽມກອງປະຊຸມໃຫຍ່ຂອງອົງຄະນະພັກເມືອງ ເມືອງວຽງຄໍາ, ແຂວງຫລວງພະບາງ ທີ່ໄດ້ເອົາໃຈໃສ່ຈັດຕັ້ງຜັນຂະຫຍາຍຈິດໃຈຊີ້ນໍາຂອງສູນກາງພັກ ເຂົ້າໃນການກະກຽມກອງປະຊຸມໃຫຍ່ອົງຄະນະພັກຂອງຕົນເປັນຢ່າງດີ. ພ້ອມກັນນັ້ນ, ທ່ານຮອງປະທານສະພາແຫ່ງຊາດ ໄດ້ມີທິດຊີ້ນໍາໃຫ້ເອົາໃຈໃສ່ການກະກຽມຮ່າງບົດລາຍງານການເມືອງ ໂດຍສະເພາະການຕີລາຄາຜົນການຈັດຕັ້ງປະຕິບັດມະຕິກອງປະຊຸມໃຫຍ່ອົງຄະນະພັກຂັ້ນຂອງຕົນໃນໄລຍະຜ່ານມາ ໃຫ້ເລິກເຊິ່ງ, ຊອກໃຫ້ເຫັນດ້ານຄົງຄ້າງ, ສາເຫດ ແລະ ເອົາໃຈໃສ່ການກໍານົດທິດທາງໃນຕໍ່ໜ້າ ໃຫ້ສອດຄ່ອງກັບສະພາບຄວາມເປັນຈິງ ແລະ ສາມາດແກ້ໄຂບັນຫາທີ່ເກີດຂຶ້ນໄດ້ຢ່າງມີປະສິດທິພາບ;  ເອົາໃຈໃສ່ການຮ່າງແຜນພັດທະນາເສດຖະກິດ-ສັງຄົມຂອງແຂວງ ແລະ ເມືອງວຽງຄໍາ ໃຫ້ສອດຄ່ອງກັບທ່າແຮງບົ່ມຊ້ອນຂອງທ້ອງຖິ່ນຕົນ. ການກະກຽມເອກະສານດັ່ງກ່າວ  ໃຫ້ອີງໃສ່ຄໍາສັ່ງຂອງຄະນະເລຂາທິການສູນກາງພັກ ສະບັບເລກທີ 04/ຄລສພ, ລົງວັນທີ 7 ພຶດສະພາ 2018 ວ່າດ້ວຍການກະກຽມດໍາເນີນກອງປະຊຸມໃຫຍ່ອົງຄະນະພັກກະຊວງ-ອົງການ, ແຂວງ-ນະຄອນ ຫລວງ; ອົງຄະນະພັກເມືອງ-ນະຄອນ ແລະ ຮາກຖານພັກ ໃນຂອບເຂດທົ່ວປະເທດ ເພື່ອເຮັດໃຫ້ການກະກຽມກອງປະຊຸມໃຫຍ່ຂອງອົງຄະນະພັກຂັ້ນຂອງຕົນ ໄດ້ຮັບຜົນສໍາເລັດຕາມແຜນການ ແລະ ຄາດໝາຍທີ່ວາງໄວ້.