ປະທານ ສພຊ ຕ້ອນຮັບປະທານາທິບໍລີຮົງກາລີ
05/11/2019

(ສພຊ) ຕອນເຊົ້າວັນທີ 25 ຕຸລາ 2019 ທີ່ສະພາແຫ່ງຊາດ (ສພຊ) ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ໄດ້ຕ້ອນຮັບທ່ານ ຢາໂນສ ອາແດຣ ປະທານາທິບໍດີ ແຫ່ງ ສາທາລະນະລັດຮົງກາລີ ພ້ອມດ້ວຍຄະນະ ເນື່ອງໃນໂອກາດທີ່ມາຢ້ຽມຢາມ ສປປລາວ ທາງລັດຖະກິດ.

        ທ່ານ ນາງ ປານີ ຢາທໍ່ຕູ້ ໄດ້ກ່າວສະແດງຄວາມຕ້ອນຮັບອັນອົບອຸ່ນຕໍ່ທ່ານ ຢາໂນສ ອາແດຣ ພ້ອມທັງຕີລາຄາສູງຕໍ່ການຢ້ຽມຢາມ ສປປລາວ ໃນຄັ້ງນີ້ ເປັນການເສີມຂະຫຍາຍສາຍພົວພັນຮ່ວມມືລະຫວ່າງສອງປະເທດລາວ-ຮົງກາລີ ໃຫ້ດີກວ່າເກົ່າ ພ້ອມທັງແຈ້ງສະພາບລວມກ່ຽວກັບສະພາແຫ່ງຊາດລາວ, ສະພາບການຮ່ວມມືລະຫວ່າງສະພາແຫ່ງຊາດລາວ ກັບ ສະພາແຫ່ງຊາດຮົງກາລີ ພ້ອມທັງ ກ່າວຂອບໃຈຢ່າງຈິງໃຈຕໍ່ການຊ່ວຍເຫລືອ ແລະ ສະໜັບສະໜູນຂອງຮົງກາລີ ໃນການພັດທະນາເສດຖະກິດ-ສັງຄົມຂອງລາວ ເຊິ່ງເຮັດໃຫ້ຊີວິດການເປັນຢູ່ຂອງປະຊາຊົນລາວ ດີຂຶ້ນເປັນກ້າວໆ ເປັນຕົ້ນການຊ່ວຍເຫລືອສ້າງຊັບພະຍາກອນມະນຸດ ໂດຍການໃຫ້ທຶນການສຶກສາແກ່ ສປປລາວ ຈໍານວນ 100 ທຶນຕໍ່ປີ ແລະ ອື່ນໆ.  ທ່ານຍັງໄດ້ສະເໜີວ່າ ຄວນຈະສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງສະພາແຫ່ງຊາດລາວ ແລະ ສະພາແຫ່ງຊາດຮົງກາລີ ໃຫ້ກ້າວຂຶ້ນສູ່ລະດັບສູງໃໝ່; ສະພາແຫ່ງຊາດລາວ ມີຄວາມພ້ອມທີ່ຈະສືບຕໍ່ແລກປ່ຽນການຢ້ຽມຢາມເຊິ່ງກັນ ແລະ ກັນ, ປຶກສາຫາລື ແລະ ແລກປ່ຽນຖອດຖອນບົດຮຽນກັບສະພາແຫ່ງຊາດຮົງກາລີ; ສະເໜີສອງສະພາແຫ່ງຊາດ ສືບຕໍ່ປະສານງານຮ່ວມກັນ ໃນການເຄື່ອນໄຫວຢູ່ໃນກອງປະຊຸມພາກພື້ນ ແລະ ສາກົນ ເພື່ອຜົນປະໂຫຍດລວມແຫ່ງສັນຕິພາບ ແລະ ຄວາມໝັ້ນຄົງໃນໂລກ.

        ທ່ານ ຢາໂນສ ອາແດຣ ກໍໄດ້ສະແດງຄວາມຂອບໃຈຕໍ່ທ່ານ ນາງ ປານີ ຢາທໍ່ຕູ້ ທີ່ໄດ້ໃຫ້ກຽດເສຍສະຫລະເວລາອັນມີຄຸນຄ່າຕ້ອນຮັບຢ່າງອົບອຸນ ແລະ ເຫັນດີຕາມຂໍ້ສະເໜີຕ່າງໆຂອງທ່ານປະທານສະພາແຫ່ງຊາດລາວ ພ້ອມທັງແຈ້ງຈຸດປະສົງຂອງການຢ້ຽມຢາມ ສປປລາວ ໃນຄັ້ງນີ້. ພ້ອມດຽວກັນນັ້ນ ຍັງໄດ້ແລກປ່ຽນບາງບັນຫາທີ່ຕົນໃຫ້ຄວາມສົນໃຈ.