ສພຊ ຈັດກອງປະຊຸມ ແນະນຳການປະເມີນ ການປະຕິບັດໜ້າທີ ຂອງບຸກຄະລາກອນ
11/11/2019

 

(ສພຊ) ລະຫວ່າງວັນທີ 4-5 ພະຈິກ 2019 ທີ່ຫ້ອງປະຊຸມຄະນະເລຂາທິການສະພາແຫ່ງຊາດ (ຫລັກ 6) ນະຄອນຫລວງວຽງຈັນ ໄດ້ມີກອງປະຊຸມແນະນຳສະມາຊິກສະພາແຫ່ງຊາດ (ສສຊ) ກ່ຽວກັບການປະເມີນຜົນການປະຕິບັດໜ້າທີ່ຂອງບຸກຄະລາກອນດຳລົງຕຳແໜ່ງ ທີ່ສະພາແຫ່ງຊາດ (ສພຊ) ເລືອກຕັ້ງ ແລະ ຮັບຮອງເອົາການແຕ່ງຕັ້ງ ໂດຍການເປັນປະທານຂອງທ່ານ ແສງນວນ ໄຊຍະລາດ ຮອງປະທານສະພາແຫ່ງຊາດ, ທັງເປັນຫົວໜ້າຄະນະຮັບຜິດຊອບການປະເມີນຜົນ; ເຂົ້າຮ່ວມມີທ່ານ ສົມພັນ ແພງຄຳມີ ຮອງປະທານຄະນະປະຈຳສະພາແຫ່ງຊາດ; ມີບັນດາທ່ານ ສສຊ ຈາກ 18 ເຂດເລືອກຕັ້ງ, ຮອງເຈົ້າແຂວງ-ຮອງເຈົ້າຄອງນະຄອນຫລວງ, ຮອງປະທານສະພາປະຊາຊົນແຂວງ-ຮອງປະທານສະພາປະຊາຊົນນະຄອນຫລວງ ແລະ ພະນັກງານທີ່ກ່ຽວຂ້ອງເຂົ້າຮ່ວມ.

        ທັັງນີ້, ກໍເພື່ອເສີມຂະຫຍາຍຄວາມຮັບຜິດຊອບຕໍ່ພາລະບົດບາດ, ສິດ ແລະ ໜ້າທີ່ ຂອງ ສສຊ ໃນຖານະເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ; ເພື່ອເປັນບ່ອນອີງໃຫ້ບັນດາທ່ານ ສສຊ ຄົ້ນຄວ້າ, ພິຈາລະນາ, ຕີລາຄາປະເມີນຜົນຕໍ່ບຸກຄະລາກອນດຳລົງຕຳແໜ່ງທີ່ສະພາແຫ່ງຊາດເລືອກຕັ້ງ ແລະ ຮັບຮອງເອົາການແຕ່ງຕັ້ງແຕ່ລະທ່ານໃຫ້ຖືກຕ້ອງກັບຕົວຈິງ.

        ໃນກອງປະຊຸມ, ຜູ້ເຂົ້າຮ່ວມໄດ້ຮັບຟັງຄຳແນະນຳຂອງຄະນະຮັບຜິດຊອບການປະເມີນຜົນ ສະບັບເລກທີ 07/ຄຊມ, ລົງວັນທີ 18/9/2019 ກ່ຽວກັບການປະເມີນຜົນຕໍ່ບຸກຄະລາກອນດຳລົງຕຳແໜ່ງ ທີ່ສະພາແຫ່ງຊາດເລືອກຕັ້ງ ແລະ ຮັບຮອງເອົາການແຕ່ງຕັ້ງ; ຄຳແນະນຳ, ວິທີການຄົ້ນຄວ້າຢູ່ໜ່ວຍ, ຄຳແນະນຳວ່າດ້ວຍລະບຽບການໃຫ້ຄະແນນປະເມີນຜົນ; ພ້ອມທັງໄດ້ຈັດໜ່ວຍອອກເປັນ 6 ໜ່ວຍ ເພື່ອຄົ້ນຄວ້າ, ປຶກສາຫາລື, ແລກປ່ຽນຄວາມຄິດຄວາມເຫັນ ແລະ ແຕ່ລະໜ່ວຍຂຶ້ນລາຍງານສ່ອງແສງຕໍ່ຄະນະຮັບຜິດຊອບການປະເມີນຜົນ.

        ທີ່ປະຊຸມ, ທ່ານ ແສງນວນ ໄຊຍະລາດ ໄດ້ກ່າວວ່າ: ການປະເມີນຜົນທີ່ຈະດຳເນີນໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII ແລະ ສະພາປະຊາຊົນແຂວງ (ສພຂ) ຊຸດທີ I ນີ້ ຖືວ່າເປັນເທື່ອທຳອິດ ແລະ ທັງເປັນວຽກງານທີ່ລະອຽດອ່ອນ ເຊິ່ງພວກເຮົາຍັງບໍ່ທັນມີບົດຮຽນ, ປະສົບການ ແລະ ຢູ່ໃນໄລຍະເວລາທ້າຍສະໄໝຂອງ ສພຊ ແລະ ສພຂ ຜ່ານມາພວກເຮົາຫາກໍເລີ່ມຕົ້ນດ້ວຍການປະເມີນຜົນຕໍ່ບຸກຄະລາກອນທີ່ມາລາຍງານ, ຊີ້ແຈງໃນກອງປະຊຸມສະພາແຫ່ງຊາດເທົ່ານັ້ນ; ດັ່ງນັ້ນ, ຈຶ່ງຮຽກຮ້ອງໃຫ້ພວກເຮົາຕ້ອງມີຄວາມຮັບຜິດຊອບຕໍ່ການປະເມີນຜົນ ເພື່ອໃຫ້ມີຄຸນນະພາບ ແລະ ມີຜົນສຳເລັດຕາມຈຸດປະສົງທີ່ວາງໄວ້.