ບັນດາທ່ານ ສສຊ ສືບຕໍ່ປະກອບຄຳເຫັນ ໃສ່ບົດລາຍງານ ຂອງລັດຖະບານ
14/11/2019

(ສພຊ) ວັນທີ 8 ພະຈິກ 2019 ມື້ທີ 2 ຂອງການດໍາເນີນກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ VIII, ໂດຍການເປັນປະທານກອງປະຊຸມຂອງທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ກອງປະຊຸມໄດ້ຮັບຟັງການປະກອບຄຳຄິດຄຳເຫັນຂອງບັນດາທ່ານສະມາຊິກສະພາແຫ່ງຊາດ (ສສຊ) ຕໍ່ບົດລາຍງານຂອງລັດຖະບານ.

          ໂອກາດດັ່ງກ່າວ ບັນດາທ່ານ ສສຊ ໄດ້ພ້ອມກັນສຸມສະຕິປັນຍາເຂົ້າໃນການປະກອບຄຳຄິດຄຳເຫັນໃສ່ບັນດາບົດລາຍງານຂອງລັດຖະບານ ເຊິ່ງບັນຫາທີ່ ສສຊ ໃຫ້ຄວາມສົນໃຈຫລາຍ ແມ່ນກ່ຽວກັບວຽກງານສາທາລະນະສຸກ, ວຽກງານສຶກສາ, ບັນຫາຢາເສບຕິດ, ບັນຫາການສໍ້ລາດບັງຫລວງ, ສຶກສາອົບຮົມພະນັກງານແຕ່ລະຂົງເຂດວຽກງານໃຫ້ມີຈັນຍາບັນຈັນຍາທຳ ແລະ ບັນຫາປາກົດການຫຍໍ້ທໍ້ທີ່ເຫັນວ່າຍັງບໍ່ທັນສອດຄ່ອງກັບລະບຽບກົດໝາຍ ຕະຫລອດຮອດບັນດາຂໍ້ຄົງຄ້າງທີ່ຍັງບໍ່ສາມາດບຸກທະລຸໄດ້.

          ວັນທີ 12 ພະຈິກ 2019 ໂດຍການເປັນປະທານກອງປະຊຸມຂອງທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ເຊິ່ງກ່ອນອື່ນທ່ານໄດ້ມີຄຳຖາມເຈາະຈີ້ມ ແລະ ເນັ້ນໃສ່ຈຸດທີ່ມີຄວາມສຳຄັນ ເພື່ອໃຫ້ບັນດາທ່ານ ສສຊ ສືບຕໍ່ປະກອບຄຳເຫັນໃສ່ບົດລາຍງານຂອງລັດຖະບານ.

          ຈາກນັ້ນ, ບັນດາທ່ານ ສສຊ ໄດ້ສຸມໃສ່ປະກອບຄຳຄິດຄຳເຫັນໃສ່ບົດລາຍງານຂອງລັດຖະບານຢ່າງກົງໄປກົງມາ ແລະ ມີເຫດມີຜົນ ເຊິ່ງບັນຫາທີ່ທ່ານ ສສຊ ໃຫ້ຄວາມສົນໃຈຫລາຍກວ່າໝູ່ ຍັງແມ່ນບັນຫາກ່ຽວກັບການຈັດເກັບລາຍຮັບ-ລາຍຈ່າຍ, ສົ່ງເສີມການຜະລິດເປັນສິນຄ້າ, ກ່ຽວກັບອາສາສະໝັກ ແລະ ບັນຫາອື່ນທີ່ກ່ຽວຂ້ອງ.