ສສຊ ສະເໜີຫຼາຍບັນຫາໃຫ້ລັດຖະບານແກ້ໄຂ
19/11/2019

ບັນດາສະມາຊິກສະພາແຫ່ງຊາດ (ສສຊ) ໄດ້ສະເໜີໃຫ້ລັດຖະບານ ແກ້ໄຂຂັ້ນຂອດ ຫຼື ບໍລິການເອກະສານການສົ່ງອອກສິນຄ້າກະສິກຳໃຫ້ວ່ອງໄວຂຶ້ນ, ຂະນະທີ່ ສສຊ ເຂດ 13 ສະເໜີລັດຖະບານຂະຫຍາຍການບໍລິການເສຍຄ່າທຳນຽມທາງ ແລະ ທີ່ດິນສູ່ທະນາຄານອື່ນໆ ຄວບຄູ່ກັບການຈັດເກັບແບບເດີມ. ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ VIII ໂດຍການເປັນປະທານ ຂອງທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ບັນດາ ສສຊ ໄດ້ສຸມໃສ່ປະກອບຄຳຄິດຄຳເຫັນ ໃສ່ລາຍງານຂອງລັດ ຖະບານ, ອົງການກວດສອບແຫ່ງລັດ ແລະ ອົງການກວດກາລັດຖະບານ. ທ່ານ ສາຍທອງ ໄຊຍະວົງ ສະມາຊິກສະພາແຫ່ງຊາດ ເຂດເລືອກຕັ້ງທີ 15 ແຂວງຈຳປາສັກ ໄດ້ສະເໜີໃຫ້ລັດຖະບານ ສືບຕໍ່ແກ້ໄຂການສົ່ງອອກສິນຄ້າ ໃຫ້ມີຄວາມຖືກຕ້ອງ, ວ່ອງໄວ ຊຶ່ງໄລຍະຜ່ານມາ ເຫັນວ່າ ຍັງມີຄວາມຫຍຸ້ງຍາກໃນການບໍລິການດ້ານເອກະສານ ການສົ່ງອອກສິນຄ້າ ຍັງມີຄວາມຊັກຊ້າ ບໍ່ທັນການ ເນື່ອງຈາກວ່າ ສິນຄ້າທີ່ສົ່ງອອກໄປຕ່າງປະເທດ ສ່ວນໃຫຍ່ເປັນສິນຄ້າກະສິກຳ ເຊັ່ນ: ມັນຕົ້ນ, ພືດຜັກ ແລະ ອື່ນໆ ຖ້າແກ່ຍາວເວລາໃນການປະກອບເອກະສານ ຈະເຮັດໃຫ້ສິນຄ້າອາດຈະເນົ່າ, ເປື່ອຍ ບໍ່ໄດ້ມາດຕະຖານ ຈະເຮັດໃຫ້ຕະຫຼາດບໍ່ຮັບຊື້ສິນຄ້າກໍເປັນໄດ້. ທ່ານ ສາຍທອງ ໄຊຍະວົງ ຍັງສະເໜີ ກ່ຽວກັບການແກ້ໄຂໄພພິບັດ ຍັງມີຄວາມຊັກຊ້າ, ບໍ່ທັນລະດູການ ຊຶ່ງໄພພິບັດທີ່ເກີດຂຶ້ນຢູ່ແຂວງພາກກາງ ແລະ ພາກໃຕ້ ໄດ້ສົ່ງຜົນເສຍຫາຍ ຕໍ່ໄຮ່ນາ, ຮົ້ວສວນ, ພືດຜັກ ແລະ ອື່ນໆ ຂອງປະຊາຊົນໄດ້ຮັບຄວາມເສຍຫາຍ ຈຶ່ງສະເໜີໃຫ້ລັດຖະບານ ແກ້ໄຂສ້ອມແປງຊົນລະປະທານ, ຈັກສູບນຳ້ ເພື່ອໃຫ້ທັນກັບການຜະລິດເຂົ້ານາແຊງ. ທ່ານ ຄຳຈັນ ຄູນສະຫວັນ ສສຊ ເຂດ 13 ແຂວງສະຫວັນນະເຂດ ສະເໜີໃຫ້ລັດຖະບານຂະຫຍາຍການບໍລິການເສຍຄ່າທຳນຽມທາງ ແລະ ທີ່ດິນ ຜ່ານທະນາຄານການຄ້າຕ່າງປະເທດລາວ ມະຫາຊົນ (ທຄຕລ) ຂະຫຍາຍໄປສູ່ທະນາຄານອື່ນ ເນື່ອງຈາກວ່າ ມີຫຼາຍເມືອງ, ຫຼາຍເຂດ ບໍ່ມີສາຂາ ຫຼື ປ່ອງບໍລິການ ຂອງ ທຄຕລ, ເມື່ອປະຊາຊົນຜູ້ທີ່ໄປເສຍຜ່ານທະນາຄານຕ້ອງເດີນທາງໄປຫາຕົວເມືອງໃຫຍ່ ບ່ອນທີ່ມີ ສາຂາ ຫຼື ປ່ອງບໍລິການ ທຄຕລ, ໃນຂະນະທີ່ການເກັບພາສີ-ອາກອນແບບເດີມ ກໍເຫັນວ່າ ຍັງຈຳເປັນໄດ້ນຳໃຊ້ອີກຕໍ່ໄປ, ທັງນີ້ ເພື່ອຄວາມສະດວກຂອງປະຊາຊົນ. ໃນຂະນະທີ່ ສສຊ ເຂດ 2 ແຂວງຜົ້ງສາລີ ສະເໜີໃຫ້ລັດຖະບານ ກໍຄືກະຊວງການເງິນ ສຳຫຼວດຖານລາຍຮັບຢ່າງລະອຽດຄືນໃໝ່ ໂດຍຜູ້ສຳຫຼວດຖານລາຍຮັບ ແລະ ຜູ້ເກັບພາສີ-ອາກອນບໍ່ແມ່ນຄົນໆດຽວກັນ ຫຼື ບໍ່ແມ່ນຂະແໜງດຽວກັນ ທັງນີ້ ເພື່ອຄວາມໂປ່ງໃສ ໃນການຈັດເກັບລາຍຮັບເຂົ້າງົບປະມານ.