ປະທານ ສພຊ ໄດ້ເຂົ້າຮ່ວມກອງປະຊຸມ ປະຈຳປີ ຂອງ APPF ຄັ້ງທີ 28
28/01/2020

(ສພຊ) ລະຫວ່າງວັນທີ 13-15 ມັງກອນ 2020 ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມປະຈໍາປີ ຂອງເວທີປຶກສາຫາລື ລັດຖະສະພາອາຊີ-ປາຊີຟິກ (APPF) ຄັ້ງທີ 28 ໃນຫົວຂໍ້ “ຄູ່ຮ່ວມລັດຖະສະພາ ສໍາລັບປີ 2020 ແລະ ຕໍ່ໜ້າ” ເຊິ່ງໄດ້ຈັດຂຶ້ນທີ່ລັດຖະສະພາປະເທດອົດສະຕຣາລີ ໂດຍການເຂົ້າຮ່ວມ ແລະ ກ່າວປິດຂອງທ່ານ ໂທນີ ສະມິດ ປະທານລັດຖະສະພາອົດສະຕຣາລີ, ເຂົ້າຮ່ວມມີບັນດາປະທານ ແລະ ສະມາຊິກລັດຖະສະພາ ຈາກປະເທດສະມາຊິກ ໃນພາກພື້ນອາຊີ ແລະ ປາຊີຟິກ.

ໃນພິທີປິດ, ພາຍຫລັງຕາງໜ້າໃຫ້ລັດຖະສະພາອົດສະຕຣາລີ ໄດ້ຂຶ້ນຜ່ານມະຕິ ແລະ ຖະແຫລງການຮ່ວມ ຂອງກອງປະຊຸມປະຈໍາປີເວທີປຶກສາຫາລື ລັດຖະສະພາອາຊີ-ປາຊີຟິກ ຄັ້ງທີ 28, ບັນດາປະເທດສະມາຊິກ ກໍໄດ້ຮ່ວມລົງນາມໃນຖະແຫລງການດັ່ງກ່າວ,​ ເຊິ່ງທ່ານ ນາງ ປານີ ຢາທໍ່ຕູ້ ກໍໄດ້ຕາງໜ້າໃຫ້ ສປປລາວ ລົງນາມໃນຖະແຫລງການດັ່ງກ່າວ.

ກອງປະຊຸມປະຈໍາປີ ຂອງເວທີປຶກສາຫາລືລັດຖະສະພາອາຊີ-ປາຊີຟິກ ຄັ້ງທີ 28 ແມ່ນໄດ້ຮັບຜົນສໍາເລັດ ຕາມລະດັບຄາດໝາຍ ໂດຍບັນດາປະເທດສະມາຊິກ ກໍໄດ້ໃຫ້ການຮ່ວມມື ແລະ ເປັນເອກະພາບຕໍ່ມະຕິຕ່າງໆ ທີ່ໄດ້ຮ່ວມກັນປຶກສາຫາລື ເປັນຕົ້ນແມ່ນດ້ານການເມືອງ-ຄວາມໝັ້ນຄົງ, ເສດຖະຖິດ, ວັດທະນະທໍາ-ສັງຄົມ, ການແກ້ໄຂບັນຫາອາກາດຮ້ອນ, ການສົ່ງເສີມບົດບາດຍິງ-ຊາຍ, ເຕັກໂນໂລຊີ ແລະ ນະວັດຕະກໍາໃໝ່ໆ ລວມທັງດ້ານການທ່ອງທ່ຽວ ແລະ ອື່ນໆ.

ທັງໝົດນີ້ ໄດ້ສະແດງໃຫ້ເຫັນວ່າ ບັນດາປະເທດສະມາຊິກ ຈາກພາກພື້ນອາຊີ-ປາຊີຟິກ ແມ່ນຈະສືບຕໍ່ຮ່ວມມືກັນ ແນໃສ່ເພີ່ມທະວີບົດບາດຂອງອົງການນິຕິບັນຍັດ ໃນການສົ່ງເສີມສັນຕິພາບ, ຄວາມໝັ້ນຄົງ ແລະ ຄວາມຈະເລີນຮຸ່ງເຮືອງຂອງພາກພື້ນ, ສ້າງຄວາມໄວ້ເນື້ອເຊື່ອໃຈກັນ, ຮ່ວມມືກັນ ແລະ ຊ່ວຍເຫລືອເຊິ່ງກັນ ແລະ ກັນ ຕາມກົນໄກ ແລະ ບົດບາດຂອງລັດຖະສະພາ ໃນການຮັບມືກັບສິ່ງທ້າທາຍ ແລະ ການແກ້ໄຂບັນຫາຕ່າງໆຂອງພາກພື້ນ ແລະ ສາກົນ ທີ່ສອດຄ່ອງກັບຫລັກການຂອງອົງການສະຫະປະຊາຊາດ.

ສໍາລັບກອງປະຊຸມເວທີປຶກສາຫາລືລັດຖະສະພາອາຊີ-ປາຊີຟິກ ຄັ້ງທີ 29 ແມ່ນຈະຈັດຂຶ້ນຢູ່ ສາທາລະນະລັດ ເກົາຫລີ ໃນປີ 2021.