ສະຫຼຸບການເຄື່ອນໄຫວວຽກງານຂອງ ຄະນະບໍລິຫານພັກ ສະພາແຫ່ງຊາດ ປະຈຳປີ 2019 ແລະທິດທາງແຜນການ ປະຈຳປີ 2020
28/01/2020

(ສພຊ) ວັນທີ 17 ມັງກອນ 2020 ທີ່ຫ້ອງປະຊຸມຄະນະເລຂາທິການສະພາແຫ່ງຊາດ (ສພຊ) ຫລັກ 6 ນະຄອນຫລວງວຽງຈັນ ຄະນະບໍລິຫານງານພັກສະພາແຫ່ງຊາດ ໄດ້ຈັດກອງປະຊຸມສະຫລຸບການເຄື່ອນໄຫວວຽກງານການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2019 ແລະ ທິດທາງແຜນການປະຈໍາປີ 2020  ໂດຍການເປັນປະທານຂອງສະຫາຍ ນາງ ສີໃສ ລືເດດມູນສອນ ກໍາມະການສູນກາງພັກ, ຮອງເລຂາຄະນະບໍລິຫານງານພັກສະພາແຫ່ງຊາດ, ຮອງປະທານສະພາແຫ່ງຊາດ; ມີບັນດາກຳມະການຄະນະບໍລິຫານງານພັກສະພາແຫ່ງຊາດ, ຄະນະພັກຮາກຖານຄະນະເລຂາທິການສະພາແຫ່ງຊາດ, ບັນດາສະມາຊິກພັກສົມບູນ ແລະ ສະມາຊິກພັກສໍາຮອງພາຍໃນສະພາແຫ່ງຊາດເຂົ້າຮ່ວມຢ່າງພ້ອມພຽງ.

          ຈຸດປະສົງຂອງການຈັດກອງປະຊຸມໃນຄັ້ງນີ້ ເພື່ອເປັນການສະຫລຸບ, ຕີລາຄາ, ກວດກາຄືນ ກ່ຽວກັບການຈັດ ຕັ້ງປະຕິບັດການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ພາຍໃນອົງຄະນະພັກສະພາແຫ່ງຊາດ ປະຈໍາປີ 2019 ແລະ ທິດທາງແຜນການເຄື່ອນໄຫວປີ 2020 ແລະ ເປັນບ່ອນອີງຄາດໝາຍສູ້ຊົນໃຫ້ບັນດາຮາກຖານພັກ, ໜ່ວຍພັກ ຕ້ອງໄດ້ບຸກບືນສູ້ຊົນສ້າງໜ່ວຍພັກຕົນໃຫ້ກາຍເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນໃຫ້ມີຄຸນນະພາບຫລາຍຂຶ້ນກວ່າເກົ່າ.

          ກອງປະຊຸມ ໄດ້ຮັບຟັງການຜ່ານບົດສະຫລຸບການເຄື່ອນໄຫວວຽກງານຂອງຄະນະບໍລິຫານງານພັກສະພາແຫ່ງຊາດ, ການກໍ່ສ້າງພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2019 ແລະ ທິດທາງແຜນການປະຈໍາປີ 2020; ການຜ່ານມະຕິຂອງຄະນະບໍລິຫານງານພັກສະພາແຫ່ງຊາດ ວ່າດ້ວຍການຮັບຮອງການຈັດປະເພດໜ່ວຍພັກ, ສະມາຊິກພັກ ຢູ່ພາຍໃນອົງຄະນະພັກສະພາແຫ່ງຊາດ; ການຜ່ານມະຕິຂອງຄະນະບໍລິຫານງານພັກສະພາແຫ່ງຊາດ ວ່າດ້ວຍການຮັບຮອງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຢູ່ພາຍໃນອົງຄະນະພັກສະພາແຫ່ງຊາດ ແລະ ຜ່ານມະຕິຂອງຄະນະບໍລິຫານງານພັກສະພາແຫ່ງຊາດວ່າດ້ວຍການຍ້ອງຍໍໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ໜ່ວຍພັກແຂງຢູ່ພາຍໃນອົງຄະນະພັກສະພາແຫ່ງຊາດ ພ້ອມທັງມອບໃບຍ້ອງຍໍ.

ຫລັງຈາກນັ້ນ, ກອງປະຊຸມຍັງໄດ້ຮັບຟັງການໂອ້ລົມໃຫ້ທິດຊີ້ນໍາຈາກສະຫາຍ ນາງ ສີໃສ ລືເດດມູນສອນ ໂດຍສະຫາຍໄດ້ຍ້ອງຍໍຊົມເຊີຍບັນດາຄະນະຮາກຖານພັກ ທີ່ໄດ້ນໍາພາໜ່ວຍພັກຍາດໄດ້ຜົນງານການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ສະແດງອອກຕໍ່ບັນດາຮາກຖານພັກໄດ້ຮັບໃບຍ້ອງຍໍ ເຊິ່ງເປັນຜົນງານອັນພົ້ນເດັ່ນທີ່ໄດ້ເອົາໃຈໃສ່ກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ສະຫາຍຍັງໄດ້ຮຽກຮ້ອງໃຫ້ບັນດາຄະນະພັກຮາກຖານໃຫ້ເອົາໃຈໃສ່ດັ່ງນີ້: ສະເໜີໃຫ້ບັນດາຄະນະພັກເອົາໃຈໃສ່ເສີມຂະຫຍາຍທິດທາງແຜນການປະຈໍາປີ 2020 ເພື່ອເພີ່ມທະວີຄວາມຮັບຜິດຊອບແຜນການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ຜັນຂະຫຍາຍໃຫ້ມີຄຸນນະພາບ; ເອົາໃຈໃສ່ເຝິກອົບຮົມແນວຄິດທາງດ້ານການເມືອງ ເພື່ອສ້າງພະນັກງານສະມາຊິກພັກໃຫ້ມີແນວຄິດການເມືອງທີ່ໜັກແໜ້ນ; ສ້າງໃຫ້ມີຄຸນສົມບັດສິນທໍາປະຕິວັດ ໃຫ້ຮູ້ຈັກຈໍາແນກມິດ, ສັດຕູຂອງຊາດ, ມີຄວາມຈິງໃຈຊ່ວຍເຫລືອເຊິ່ງກັນ ແລະ ກັນ ແລະ ບໍລິສຸດຕໍ່ຊາດ; ເພີ່ມທະວີບົດບາດແບບແຜນການນໍາພາຂອງພັກ, ເອົາໃຈໃສ່ລວມສູນປະຊາທິປະໄຕ ສົ່ງຂ່າວຊ່ວຍເຫລືອເຊິ່ງກັນແລະກັນ, ມີຈັນຍາບັນ ຈັນຍາທໍາ, ມີຄວາມຮັບຜິດຊອບຮູ້ຈັກເສຍສະຫລະຜົນປະໂຫຍສ່ວນຕົວເພື່ອສ່ວນລວມ; ສືບຕໍ່ຍົກສູງການຊີ້ນໍາ-ນໍາພາໜ່ວຍພັກຮາກຖານຂອງສະພາແຫ່ງຊາດ, ແບ່ງວຽກໃຫ້ຈະແຈ້ງ ບໍ່ກ້າວກ່າຍໜ້າທີ່ເຊິ່ງກັນແລະກັນ ສືບຕໍ່ສ້າງພະນັກງານສືບທອດປ່ຽນແທນໃຫ້ໄດ້ຫລາຍຂຶ້ນ; ເອົາໃຈໃສ່ວຽກງານກວດກາ ເພາະເປັນສິ່ງສໍາຄັນຫລາຍຕໍ່ການປະຕິບັດພາລະບົດບາດຂອງສະພາແຫ່ງຊາດ; ຍົກສູງຄວາມຮັບຜິດຊອບຂອງບັນດາອົງການຈັດຕັ້ງມະຫາຊົນ ແລະ ສ້າງຄວາມສາມັກຄີ, ສ້າງຂະບວນການຕ່າງໆ ເພື່ອຕ້ອນຮັບກອງປະຊຸມໃຫຍ່ຕ່າງໆ ນອກນີ້, ສະຫາຍຍັງໄດ້ຮຽກຮ້ອງໃຫ້ບັນດາສະຫາຍຄະນະພັກຮາກຖານ ຈົ່ງນໍາເອົາເນື້ອໃນຈິດໃຈຂອງກອງປະຊຸມໃນຄັ້ງນີ້ ໄປສືບຕໍ່ຄົ້ນຄວ້າຜັນຂະຫຍາຍນໍາໃຊ້ເຂົ້າໃນການປະຕິບັດວຽກງານຕົວຈິງໃຫ້ເກີດດອກອອກຜົນ.