ຮອງປະທານ ສພຊ ເຂົ້າຮ່ວມພິທີສະເຫຼີມສະຫຼອງ ກອງພົນທີ 1 ຄົບຮອບ 35 ປີ
17/02/2020

(ສພຊ) ວັນທີ 12 ກຸມພາ ຜ່ານມາ ທີ່ກອງພົນທະຫານຮາບທີ 1 ເມືອງວັງວຽງ ແຂວງວຽງຈັນ ໄດ້ຈັດພິທີສະ ເຫລີມສະຫລອງກອງພົນທີ 1 ຄົບຮອບ 35 ປີ (12/2/1985-12/2/2020); ໂດຍການເຂົ້າຮ່ວມຂອງສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ, ປະທານຄະນະກວດກາສູນກາງພັກ, ຮອງນາຍົກລັດຖະ ມົນຕີ, ປະທານອົງການກວດກາລັດຖະບານ, ຫົວໜ້າອົງການຕ້ານການສໍ້ລາດບັງຫລວງຂັ້ນສູນກາງ; ສະຫາຍ ພົນໂທ ແສງນວນ ໄຊຍະລາດ ເລຂາທິການສູນກາງພັກ, ຮອງປະທານສະພາແຫ່ງຊາດ; ມີການນໍາພັກ-ລັດທັງສູນກາງ ແລະ ທ້ອງຖິ່ນ, ຄະນະພັກ, ຄະນະບັນຊາ, ນາຍ ແລະ ພົນທະຫານທົ່ວກອງພົນທີ 1, ອະດີດການນໍາກອງພົນທີ 1, ພະນັກງານປະຕິວັດອາວຸໂສບໍານານ, ອົງການຈັດຕັ້ງມະຫາຊົນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໃນພິທີ, ສະຫາຍ ພົຈວ. ສາຍໃຈ ກົມມະສິດ ຫົວໜ້າການທະຫານກອງພົນທີ 1 ໄດ້ກ່າວບົດປາໄສຕໍ່ທີ່ຊຸມນຸມ ໂດຍໄດ້ຍົກໃຫ້ເຫັນປະຫວັດຄວາມເປັນມາ, ຜົນງານຂອງກອງພົນທະຫານຮາບທີ 1 ນັບຕັ້ງແຕ່ມື້ສ້າງຕັ້ງເປັນຕົ້ນມາ ເຊິ່ງກອງພົນທະຫານຮາບທີ 1 ໄດ້ຮັບການສ້າງຕັ້ງຂຶ້ນໃນວັນທີ 12 ກຸມພາ 1985 ໂດຍແມ່ນປະທານໄກສອນ ພົມວິຫານ ເປັນຜູ້ອະນຸມັດສ້າງຕັ້ງ ຢູ່ນະຄອນຫລວງວຽງຈັນ ມາຮອດປີ 1993 ມີຄໍາສັ່ງໃຫ້ຍົກຍ້າຍໄປຕັ້ງຢູ່ເມືອງວັງວຽງ ແຂວງວຽງຈັນ. ນັບແຕ່ມື້ໄດ້ຮັບການສ້າງຕັ້ງມາ ກອງພົນໄດ້ເອົາໃຈໃສ່ປັບປຸງກໍາລັງໃຫ້ເຂັ້ມແຂງທາງດ້ານກໍາລັງພົນ, ຍຸດໂທປະກອນ ແລະ ຍຸດທະວິທີໃນການສູ້ຮົບ; ໃນໄລຍະຜ່ານມາມີຜົນງານໃນການປະກອບສ່ວນເຂົ້າໃນການປົກປັກຮັກສາເຂດນໍ້າແດນດິນອະທິປະໄຕຂອງຊາດໄວ້ຢ່າງໝັ້ນຄົງ.

ເພື່ອເປັນການຍ້ອງຍໍໍຊົມເຊີຍຕໍ່ກອງພົນທະຫານຮາບທີ 1 ໃນໄລຍະ 5 ປີຜ່ານມາ ກະຊວງປ້ອງກັນປະເທດ ໄດ້ປະດັບຫລຽນໄຊພິລະອາດຫານ ຊັ້ນ 1 ເຊິ່ງປະດັບຫລຽນໂດຍສະຫາຍ ພົນໂທ ທອງລອຍ ສິລິວົງ ກໍາມະການສູນກາງພັກ, ຮອງລັດຖະມົນຕີກະຊວງປ້ອງກັນປະເທດ, ປະທານຫົວໜ້າກົມໃຫຍ່ການເມືອງກອງທັບ.

ໃນໂອກາດເຂົ້າຮ່ວມພິທີສະເຫລີມສະຫລອງ, ສະຫາຍ ບຸນທອງ ຈິດມະນີ ໄດ້ມີຄໍາເຫັນໂອ້ລົມຕໍ່ພິທີໂຮມຊຸມນຸມ ເຊິ່ງສະຫາຍໄດ້ຍ້ອງຍໍຊົມເຊີຍຕໍ່ຜົນງານຂອງກອງພົນທະຫານຮາບທີ 1 ທີ່ຍາດມາໄດ້ໃນຕະຫລອດໄລຍະ 35 ປີຜ່ານມາ ກໍຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ພ້ອມກັນນີ້, ສະຫາຍຍັງໄດ້ເນັ້ນໃຫ້ເອົາໃຈໃສ່ 5 ບັນຫາຄື: ສືບຕໍ່ຫັນກຳລັງລົງຮາກຖານ ກໍາລັງປະຊາຊົນບັນດາເຜົ່າ ແລະ ຊັ້ນຄົນຕ່າງໆ, ປຸກລະດົມຂົນຂວາຍສຶກສາອົບຮົມ ຊີ້ແຈງໃຫ້ເຫັນກົນອຸບາຍທໍາລາຍມ້າງເພຂອງສັດຕູ ແລະ ພວກຄົນບໍ່ດີ, ສ້າງ ແລະ ຍົກສູງສະຕິຕື່ນຕົວ ເປັນເຈົ້າຂອງພົນລະເມືອງ ທຸກຄົນໃຫ້ເຂົ້າຮ່ວມວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ, ສ້າງທ່າສະໜາມປ້ອງກັນຊາດ-ປ້ອງກັນຄວາມສະຫງົບ, ສ້າງບ້ານປ້ອມໝັ້ນສູ້ຮົບ ແລະ ກຸ່ມບ້ານສູ້ຮົບຕິດລຽນ ໃຫ້ໜັກແໜ້ນເຂັ້ມແຂງ, ສຸມໃສ່ສ້າງຮາກຖານການເມືອງພັດທະນາຊົນນະບົດ ຕາມ 4 ເນື້ອໃນ 4 ຄາດໝາຍ ແລະ ຕາມທິດສາມສ້າງທີ່ວາງໄວ້; ເພີ່ມທະວີການປັບປຸງທຸກເຫລົ່າຮົບໃນກຳລັງກອງພົນໃຫ້ທັນສະໄໝ, ໜັກແໜ້ນເຂັ້ມແຂງຂຶ້ນເລື້ອຍໆ, ກຽມພ້ອມສູ້ຮົບ ແລະ ສູ້ຮົບມີໄຊ, ບໍ່ຍອມຈໍານົນ, ອົງອາດກ້າຫານ, ມີຄວາມເສຍສະຫລະສູງ, ມີຄວາມຮູ້-ຄວາມສາມາດທາງດ້ານເຕັກນິກ-ສີລະປະຍຸດ-ຍຸດທະວິທີເກັ່ງກ້າສາມາດ ປາບແພ້ຝ່າຍກົງກັນຂ້າມໄດ້ທຸກກໍລະນີ; ເອົາໃຈໃສ່ປະສານແໜ້ນກັບກຳລັງທ້ອງຖິ່ນ ທັງຊ່ວຍປັບປຸງກໍາລັງທອງຖິ່ນຄື: ທະຫານແຂວງ, ເມືອງ, ກອງຫລອນ ແລະ ກໍາລັງສໍາຮອງຢູ່ຮາກຖານບ້ານ ແລະ ສໍານັກງານອົງການ, ຫົວໜ່ວຍວິສາຫະກິດຕ່າງໆ ໃຫ້ມີກຳລັງແຈກຢາຍບົ່ມຊ້ອນ ຢູ່ທົ່ວທຸກບ່ອນ ເພື່ອເປັນກໍາລັງແຮງສັງລວມໃນການປົກປັກຮັກສາເຂດນໍ້າແດນດິນ, ບ້ານຊ່ອງ ກໍຄືທ້ອງຖິ່ນຂອງຕົນ, ແບ່ງເບົາຄວາມຮັບຜິດຊອບຂອງກໍາລັງຫລວງ ເພື່ອມີໂອກາດປັບປຸງກຳລັງໃຫ້ທັນສະໄໝ ກາຍເປັນກຳລັງຫລັກແຫລ່ງຂອງພັກ, ຂອງຊາດທີ່ໜັກແໜ້ນເຂັ້ມແຂງ; ເພີ່ມທະວີວຽກງານປັບປຸງກໍ່ສ້າງພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ, ສະເພາະໜ້ານີ້ ແມ່ນສຸມໃສ່ການກະກຽມ ແລະ ດຳເນີນກອງປະຊຸມໃຫຍ່ອົງຄະນະພັກກອງພົນ, ກອງພັນ, ກອງຮ້ອຍ ແລະ ກົມກອງຕ່າງໆທີ່ຂຶ້ນກັບຄະນະພັກກອງພົນ, ໃຫ້ເອົາໃຈໃສ່ດຳເນີນຊີວິດການເມືອງພາຍໃນພັກໃຫ້ເລິກເຊິ່ງ ຕີລາຄາແບ່ງປະເພດສະມາຊິກພັກ, ພະນັກງານຜູ້ບັງຄັບບັນຊາຢູ່ແຕ່ລະກົມກອງໃຫ້ເລິກເຊິ່ງ, ຖືສໍາຄັນ ແລະ ເອົາໃຈໃສ່ກໍ່ສ້າງພະນັກງານຜູ້ບັງຄັບບັນຊາຢູ່ແຕ່ລະບ່ອນຕາມທິດຫັນເປັນໜຸ່ມ ມີຜູ້ສືບທອດປ່ຽນແທນຢ່າງຕໍ່ເນື່ອງ; ຖືສໍາຄັນ ແລະ ບໍ່ລົດລະວຽກງານຕິດຕາມ-ກວດກາພາຍໃນພັກ, ກວດກາການປະຕິບັດໜ້າທີ່ຂອງພະນັກງານ, ສະມາຊິກພັກ ໃຫ້ເປັນປົກກະຕິ ກໍລະນີມີການລະເມີດລະບຽບ-ກົດໝາຍ ແລະ ລະເມີດລະບຽບວິໄນຂອງກອງທັບ ຕ້ອງມີການສຶກສາອົບຮົມ, ກວດກາ, ແກ້ໄຂຢ່າງທັນການ ແລະ ເຂັ້ມງວດຕາມລະບຽບກົດໝາຍ.

ໃນພິທີ, ໄດ້ມີການສະແດງສິລະປະວັນນະຄະດີ, ກ້ອນກໍາລັງສວນສະໜາມ, ການສະແດງເຝິກແອບຫັດກາຍ, ສິລະປະການຕໍ່ສູ້ຂອງເຫລົ່າຮົບຕີພິເສດ ແລະ ການໂດດຈ້ອງຂອງເຫລົ່າຮົບທະຫານອາກາດ. ໂອກາດນີ້, ພາກສ່ວນຕ່າງໆໄດ້ມອບເຄື່ອງອຸປະຖໍາໃຫ້ກອງພົນທະຫານຮາບທີ 1 ເຊິ່ງສະຫາຍ ພົນໂທ ແສງນວນ ໄຊຍະລາດ ໄດ້ມອບຄອມພິວເຕີ ແລະ ເຂົ້າສານອາຫານແຫ້ງ ລວມມູນຄ່າ 5 ລ້ານກວ່າກີບ.