ປະທານ ສພຊ ຕ້ອນຮັບປະທານຄະນະມິດຕະພາບ ກຳປູເຈຍ-ລາວ
03/03/2020

(ສພຊ) ຕອນເຊົ້າວັນທີ 27 ກຸມພາຜ່ານມາ, ທີ່ສະພາແຫ່ງຊາດ (ສພຊ) ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ເຈີຍ ວັນເດັດ (Cher Vhandeth) ປະທານສະມາຄົມມິດຕະພາບກໍາປູ ເຈຍ-ລາວ, ປະທານຄະນະກໍາມາທິການແຜນການ, ການລົງທຶນ, ກະສິກໍາ, ພັດທະນາຊົນນະບົດ, ສິ່ງແວດລ້ອມ ແລະ ແຫລ່ງນໍ້າ ຂອງສະພາແຫ່ງຊາດ ແຫ່ງ ຣາຊະອານາຈັກກໍາປູເຈຍ ພ້ອມດ້ວຍຄະນະ ເນື່ອງໃນໂອກາດທີ່ມາຢ້ຽມຢາມ ແລະ ເຮັດວຽກ ຢູ່ ສປປລາວ ລະຫວ່າງວັນທີ 24-28 ກຸມພາ 2020.

          ທ່ານ ນາງ ປານີ ຢາທໍ່ຕູ້ ໄດ້ກ່າວສະແດງຄວາມຕ້ອນຮັບອັນອົບອຸ່ນຕໍ່ທ່ານ ເຈີຍ ວັນເດັດ ທີ່ໄດ້ນໍາພາຄະນະເດີນທາງມາຢ້ຽມຢາມ ແລະ ເຮັດວຽກຢູ່ໃນ ສປປລາວ ໃນຄັ້ງນີ້ ເຊິ່ງເປັນການປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບ ລາວ-ກໍາປູເຈຍ ທີ່ມີມາແຕ່ອະດີດຈົນເຖິງປັດຈຸບັນ ໃຫ້ນັບມື້ນັບຂະຫຍາຍຕົວເປັນບາດກ້າວອັນໃໝ່ທີ່ຍິ່ງໃຫຍ່ກວ່າເກົ່າ ພ້ອມທັງຕີລາຄາສູງຕໍ່ຜົນຂອງການພົບປະສອງຝ່າຍຮ່ວມກັບປະທານກໍາມາທິການກົດໝາຍ ສະພາແຫ່ງຊາດລາວ; ພ້ອມທັງສະເໜີໃຫ້ປະທານຄະນະມິດຕະພາບ ກໍາປູເຈຍ-ລາວ ຊຸກຍູ້ໃຫ້ມີການສືບຕໍ່ຮ່າງສົນທິສັນຍາເສັ້ນຊາຍແດນທີ່ໄດ້ປັກຫລັກໝາຍໄປແລ້ວນັ້ນ, ຊຸກຍູ້ໃຫ້ສອງພັກ-ສອງລັດສືບຕໍ່ປຶກສາຫາລືເລື່ອງບັນຫາຊາຍແດນ ເພື່ອໃຫ້ກາຍເປັນຊາຍແດນມິດຕະພາບ, ພັດທະນາ ແລະ ທ່ານຍັງໄດ້ກ່າວສະແດງຄວາມຂອບໃຈຕໍ່ປະຊາຊົນ, ພັກ-ລັດຖະບານກໍາປູເຈຍ ທີ່ໄດ້ໃຫ້ທຶນຊ່ວຍເຫລືອທາງດ້ານການສຶກສາໃຫ້ພະນັກງານສະພາແຫ່ງຊາດລາວ ໄດ້ໄປຍົກລະດັບຄວາມຮູ້ຄວາມສາມາດທີ່ປະເທດກໍາປູເຈຍ ຕະຫລອດໄລຍະຜ່ານມາຈົນຮອດປັດຈຸບັນ ແລະ ຍັງຈະສືບຕໍ່ໄປໃນອະນາຄົດ.

          ໂອກາດດັ່ງກ່າວ ທ່ານ ເຈີຍ ວັນເດັດ ກໍໄດ້ກ່າວສະແດງຄວາມຂອບອົກຂອບໃຈ ຕໍ່ທ່ານປະທານສະພາແຫ່ງຊາດລາວ ທີ່ໄດ້ເສຍສະຫລະເວລາອັນມີຄຸນຄ່າຕ້ອນຮັບຢ່າງອົບອຸ່ນ ພ້ອມທັງລາຍງານຈຸດປະສົງຂອງການມາຢ້ຽມຢາມ ສປປລາວ ໃນຄັ້ງນີ້ ແມ່ນເພື່ອສືບຕໍ່ເສີມຂະຫຍາຍສາຍພົວພັນມິດຕະພາບລະຫວ່າງລາວ-ກໍາປູເຈຍ ໃຫ້ນັບມື້ນັບຮັດແໜ້ນເຂົ້າກວ່າເກົ່າ ແລະ ເພື່ອພົບປະເຮັດວຽກຮ່ວມກັບປະທານກໍາມາທິການກົດໝາຍສະພາແຫ່ງຊາດລາວ ທັງເປັນການສຶກສາວັດທະນະທໍາການດໍາລົງຊີວິດຂອງພໍ່ແມ່ປະຊາຊົນລາວ ແລະ ໄດ້ລາຍງານໃຫ້ຮູ້ກ່ຽວກັບໂຕເລກໃຫ້ທຶນແກ່ພະນັກງານສະພາແຫ່ງຊາດລາວ ທີ່ຈະໄປສຶກສາຍົກລະດັບຢູ່ກໍາປູເຈຍ; ພ້ອມທັງໄດ້ລາຍງານຜົນຂອງການພົບປະສອງຝ່າຍ ລາວ-ກໍາປູເຈຍ ຮ່ວມກັບປະທານກໍາມາທິການກົດໝາຍສະພາແຫ່ງຊາດລາວ ໃຫ້ຮູ້ໂດຍສັງເຂບ.

          ກ່ອນໜ້ານີ້ ໃນຕອນເຊົ້າວັນດຽວກັນ ກໍໄດ້ມີການພົບປະສອງຝ່າຍ ລະຫວ່າງ ລາວ-ກໍາປູເຈຍ ທີ່ສະພາແຫ່ງຊາດລາວ ໂດຍຝ່າຍລາວ ນໍາໂດຍທ່ານ ສາຍທອງ ແກ້ວດວງດີ ປະທານກໍາມາທິການກົດໝາຍ ສະພາແຫ່ງຊາດລາວ, ຝ່າຍກໍາປູເຈຍ ນໍາໂດຍທ່ານ ເຈີຍ ວັນເດັດ ມີບັນດາຄະນະຜູ້ແທນທັງສອງຝ່າຍເຂົ້າຮ່ວມຢ່າງພ້ອມພຽງ.

          ໃນພິທີພົບປະ ທັງສອງຝ່າຍໄດ້ລາຍງານສະພາບການພັດທະນາເສດຖະກິດ-ສັງຄົມແຫ່ງຊາດຂອງຕົນໃຫ້ອີກຝ່າຍຮັບຮູ້ໂດຍສັງເຂບ, ພ້ອມກັນປຶກສາຫາລືຖອດຖອນບົດຮຽນການຮ່ວມມືເຊິ່ງກັນແລະກັນ ແລະ ໄດ້ຕົກລົງຈະສືບຕໍ່ຊຸກຍູ້ ການຮ່ວມມືລະຫວ່າງສອງປະເທດໃຫ້ໄດ້ຮັບຜົນດີຂຶ້ນກວ່າເກົ່າ, ຊຸກຍູ້ໃຫ້ນັກທຸລະກິດລາວ ໄປລົງທຶນໃນກໍາປູເຈຍ ແລະ ຊຸກຍູ້ໃຫ້ນັກທຸລະກິດກໍາປູເຈຍມາລົງທຶນຢູ່ ສປປລາວ, ພ້ອມກັບຕົກລົງທີ່ຈະຊຸກຍູ້ເສີມຂະຫຍາຍປະຕິບັດຕາມຂໍ້ຕົກລົງຂອງພັກ ແລະ ລັດຖະບານທັງສອງປະເທດ ທີ່ໄດ້ຕົກລົງເອົາໄວ້ໃຫ້ມີຜົນສັກສິດ. ໃນວັນດຽວກັນ, ກໍໄດ້ມີການເຊັນບົດບັນທຶກການຮ່ວມມື ວ່າດ້ວຍການໃຫ້ທຶນການສຶກສາແກ່ສະພາແຫ່ງຊາດລາວ ລະຫວ່າງ ຄະນະມິດຕະພາບ ກໍາປູເຈຍ-ລາວ ຂອງສະພາແຫ່ງຊາດ ແຫ່ງ ຣາຊະອານາຈັກກໍາປູເຈຍ ແລະ ຄະນະມິດຕະພາບລັດຖະສະພາ ລາວ-ກໍາປູເຈຍ ຂອງສະພາແຫ່ງຊາດ ແຫ່ງ ສປປລາວ ທີ່ໂຮງແຮມລາວພລາຊາ.