ປະທານສະພາແຫ່ງຊາດ ລາວ-ຫວຽດນາມ ເຫັນດີ ເປັນເອກະພາບ 3 ບັນຫາສຳຄັນ
12/05/2020

(ສພຊ) ສະຫາຍ ນາງ ຫ​ງວຽນ  ທິ  ກິມ  ເງິນ  ກໍາ​ມະ​ການ​ກົມ​ການເມືອງສູນກາງ​ພັກ​ກອມ​ມູ​ນິດ​ຫວຽດນາມ ປະທານ​ສະພາ​ແຫ່ງ​ຊາດ ສສ ຫວຽດນາມ ພ້ອມ​ດ້ວຍ​ຄະນະໄດ້​ໂທລະສັບ​ປະຊຸມ​ທາງໄກກັບສະຫາຍ ນາງ ປານີ ຢາ​ທໍ່​ຕູ້ ກໍາ​ມະ​ ການກົມ​ການເມືອງ​ສູນກາງພັກ ປະທານ​ສະພາ​ແຫ່ງ​ຊາດລາວ ພ້ອມ​ດ້ວຍ​ຄະນະ ໃນ​ວັນ​ທີ 7 ພຶດສະພາ ​ຜ່ານ​ມາໂດຍສອງ​ຝ່າຍ​ໄດ້​ສະແດງຄວາມ​ປິ​ຕິ​ຊົມຊື່ນຕໍ່ການ​ແລກປ່ຽນ​ຄວາມ​ຄິດ​ຄວາມ​ເຫັນໃນ​ບັນຫາ​ສຳຄັນ ແລະ ຮີບ​ດ່ວນ ເພາະ​ມັນ​ກະທົບ​ເຖິງ​ເສດ​ຖະ​ກິດ​-​ສັງຄົມ, ການ​ພັດທະນາ​ປະເທດ​ຊາດ  ແລະ ຊີວິດ​ການ​ເປັນ​ຢູ່​ຂອງ​ປະຊາຊົນ​ບັນດາເຜົ່າ ຊຶ່ງ​ມີ​ຄວາມ​ເປັນ​ເອກະ​ພາບ​ຕໍ່​ກັບ 3  ເນື້ອໃນ​ທີ່​ສໍາ​ຄັນ​ດັ່ງນີ້:
1. ການ​ແຜ່​ລະບາດ​ຂອງ​ເຊື້ອ​ພະຍາດ​ອັກເສບ​ປອດ​ຈາກ​ເຊື້ອ​ຈຸ​ລະ​ໂຣກ​ສາຍ​ພັນ​ໃໝ່  (ໂຄ​ວິດ-19): 
ສະຫາຍ ນາງ ປານີ ຢາທໍ່​ຕູ້ ໄດ້​ສະແດງ​ຄວາມ​ຍ້ອງຍໍຊົມ ເຊີຍ​ຢ່າງ​ຈິງ​ໃຈ ແລະ ຕີ​ລາຄາ​ສູງ​ຕໍ່​ພັກ, ລັດ​ຖະບານ, ສະພາ​ແຫ່ງ​ຊາດ  ແລະ  ປະຊາຊົນ​ຫວຽດນາມ​ອ້າຍ​ນ້ອງ​ທີ່​ໄດ້​ປະ ສົບ​ຜົນ​ສໍາ​ເລັດ​ຢ່າງ​ໜ້າ​ພູມໃຈ​ໃນ​ການ​ສະກັດກັ້​ນ-​ປ້ອງ​ກັນ ແລະ ຄວບ​ຄຸມ​ການ​ແຜ່​ລະບາດ​ຂອງ​ເຊື້ອ​ພະຍາດໂຄ​ວິດ-19 ຢ່າງ​ທັນ​ການ, ມີ​ປະສິດ​ທິ​ຜົນ ຊຶ່ງ​ສາມາດ​ປົກ​ປັກ​ຮັກສາ​ຊີວິດ​ຂອງ​ປະຊາຊົນ,   ປາສະຈາກ​ການ​ລົ້ມ​ຫາຍ​ຕາຍ​ຈາກ. ຈາກ​ຜົນ​ສໍາ​ເລັດ​ດັ່ງກ່າວ ສສ ຫວຽດ ນາມ ໄດ້​ຮັບ​ການ​ຍ້ອງຍໍ​ຊົມ ເຊີຍ​ຢ່າງ​ກວ້າງຂວາງ ແລະ ໄດ້​ຮັບ​ນາມມະຍົດ​ເປັນ​ປະເທດ​ດີເດັ່ນ ແລະ ມີ​ຜົນ​ສໍາ​ເລັດ​ໃນ​ບັ້ນ​ຮົບ​ສະກັດ​ກັ້ນ, ເຝົ້າ​ລະວັງ, ຄວບ​ຄຸມ  ແລະ  ແກ້​ໄຂ ການ​ແຜ່​ລະບາດ​ຂອງ​ພະຍາດ​ໂຄ​ວິດ-19 ແລະ ຍັງ​ສາມາດ​ສະໜອງ​ຂໍ້​ມູນ ແລະ ບົດຮຽນໃຫ້​ແກ່​ບັນ ດາ​ປະເທດ​ຕ່າງໆ​ໃນ​ພາກ​ພື້ນ ແລະ ໃນ​ໂລກ  ພ້ອມນັ້ນກໍ​ສະ ແດງ​ຄວາມ​ຊົມເຊີຍ​ຕໍ່​ຜົນ​ສໍາ​ເລັດ​ຂອງ​ກອງ​ປະຊຸມ​ສຸດ​ຍອດ​ທາງໄກ​ສະໄໝ​ພິເສດ​ຂອງ​ຜູ້​ນໍາ​ອາ​ຊຽນ ແລະ ກອງ​ປະຊຸມ​ສຸດ​ຍອດ​ສະໄໝ​ພິເສດ ຜູ້​ນໍາ​ອາ​ຊຽນ​ບວກ​ສາມ​ກ່ຽວ​ກັບ​ການ​ລະບາດ​ຂອງ​ພະຍາດ​ໂຄ​ວິດ-19 ພາຍ​ໃຕ້​ການ​ເປັນ​ປະທານ​ອາ​ຊຽນ​ຂອງ ສສ ຫວຽດນາມ ທີ່​ໄດ້​ເປັນ​ເຈົ້າ​ການ ແລະ ມີ​ຂໍ້​ລິ​ເລີ່ມ​ຈັດ​ກອງ​ປະຊຸມ​ດັ່ງກ່າວ​ຢ່າງ​ທັນ​ການ ຊຶ່ງ​ຜູ້ນໍາອາຊຽນ ແລະ ຜູ້​ນໍາ​ອາ​ຊຽນ​ບວກ​ສາມ ໄດ້​ເຫັນ​ດີ​ຮັບຮອງ​ເອົາ​ຖະແຫຼງ ການຂອງ​ສອງ​ກອງ​ປະຊຸມ​ດັ່ງ ກ່າວ ເພື່ອ​ສືບຕໍ່​ຮ່ວມ​ມືກັນສະ ກັດ​ກັ້ນ, ຮັບ​ມື ແລະ ຄວບຄຸມ​ ການ​ແຜ່​ລະບາດ​ຂອງ​ພະຍາດ ໂຄ​ວິດ-19 ຢ່າງ​ມີ​ປະສິດ​ທິ​ຜົນ.
ສະຫາຍ​ປະທານ​ສະພາ​ແຫ່ງ​ຊາດ​ລາວຍັງ​ໄດ້​ລາຍ​ງານ ສະ​ພາບ ແລະ ຜົ​ນ​ສຳ​ເລັດ​ຂອງ ການ​ເຝົ້າ​ລະວັງ,  ຄວບ​ຄຸມ ແລະ ການ​ແກ້​ໄຂ​ການແຜ່​ລະບາດ​ຂອງ​ພະຍາດໂຄ​ວິດ-19  ຢູ່ ສ​ປ​ປ ລາວ ໃຫ້​ປະ​ທານສະ​ພາ​ແຫ່ງຊາດ​ຫວຽດ​ນາມໄດ້ຮັບ ຊາບ.  ພິເສດ​ແມ່ນ​ການ​ຮ່ວມ​ ມື​ແລກປ່ຽນຈາກທີມງານ​ແພດ ຊ່ຽວຊານຂອງ ສສ ຫວຽດນາມ ແລະ ສປ ​ຈີນ ພ້ອມ​ນັ້ນ, ສປປ​ລາວ ຍັງ​ໄດ້​ຮັບ​ການ​ຊ່ວຍເຫຼືອ​ຈາກ​ບັນດາ​ປະເທດ​ເພື່ອນ​ມິດ ກໍ​ຄື​ອົງການ​ຈັດ​ຕັ້ງ​ສາກົນ   ແລະ ການ​ຊ່ວຍເຫຼືອຈາກ​ສັງຄົມ​ຢູ່​ພາຍ​ໃນ​ປະ​ເທດ    ໃນ​ໂອກາດ​ນີ້ ໄດ້​ສະແດງ​ຄວາມ​ຂອບໃຈ​ຢ່າງ​ຈິງ​ໃຈ​ມາ​ຍັງ​ພັກ, ລັດຖະບານ, ສະພາ​ແຫ່ງ​ຊາດ ແລະ ປະຊາ ຊົນຫວຽດນາມ​ອ້າຍ​ນ້ອງທີ່​ໄດ້​ໃຫ້ການ​ຊ່ວຍເຫຼືອ​ອຸປະກອນ​ການ​ແພດ​ທີ່​ຈໍາ​ເປັນ ແລະ ສົ່ງ​ທີມ​ງານນັກວິຊາການ​ແພດ ມາ​ຊ່ວຍ​ໃນ​ການ​ວາງ​ແຜນ​ສະກັດ​ກັ້ນກໍ​ຄື​ບົດຮຽນ​ການ​ປິ່ນປົວ​ຜູ້​ຕິດເຊື້ອ​ພະຍາດ​ໂຄ​ວິດ-19. 
2.  ການ​ເປັນ​ເຈົ້າພາບ​ໄອ​ປາ​ຂອງ​ສະພາ​ແຫ່ງ​ຊາດ​ຫວຽດນາມ: 
ສະຫາຍ​ປະທານສະພາ ​ແຫ່ງ​ຊາດ​ລາວໄດ້​ມີ​ຄໍາ​ເຫັນ​ ແລະ ຕີ​ລາຄາ​ສູງຕໍ່ການປະຕິ ບັດ​ໜ້າທີ່​ການ​ເປັນ​ປະທານ​ໄອ​ປາປີ 2020 ຂອງ​ສະພາແຫ່ງ ຊາດ​ຫວຽດນາມ ໃນການເຊີດ ​ຊູ​ນ້ຳໃຈ​ສາມັກຄີ, ແບ່ງປັນ,  ຊ່ວຍ ເຫຼືອ​ຊຶ່ງ​ກັນ ແລະ ​ກັນ ແລະ ສະ ໜັບສະໜູນກັນຢ່າງ​ເຕັມທີ່​  ເພື່ອ​ ຕໍ່ສູ້ກັບການລະບາດຂອງ​ພະ ຍາດ​ໂຄ​ວິດ-19 ນີ້; ສະພາ​ແຫ່ງ​ຊາດ​ລາວເຫັນ​ດີ​ເປັນ​ເອກະພາບ ແລະ ສະໜັບສະໜູນຕໍ່​ບັນດາ​ມາດຕະການ​ທີ່​ຜູ້ນໍາອາ​ຊຽນ​ໄດ້​ເປັນ​ເອກະ​ພາບ​ກັນ  ແລະ ໄດ້​ຮັບຮອງ​ເອົາ​ຖະແຫຼງການ ຂອງ​ກອງ​ປະຊຸມສຸດຍອດ​ທາງ ໄກ​ສະໄໝ​ພິເສດ​ຂອງ​ຜູ້​ນໍາ​ອາ​ຊຽນ ແລະ ກອງ​ປະຊຸມສຸດຍອດ ​ສະໄໝ​ພິເສດຜູ້ນໍາອາຊຽນ ບວກ​ສາມກ່ຽວ​ກັບ​ການ​ລະບາດ ​ຂອງ​ພະຍາດ​ໂຄ​ວິດ-19; ໃນ​ ຖານະ​ສະມາຊິກ​ໄອ​ປາຈະປະ ຕິບັດ​ພາລະ​ບົດບາດຂອງ​ຕົນ ​ໃນ​ການ​ຕິດຕາມ​ຊຸກຍູ້ລັດຖະ ບານຈັດ​ຕັ້ງ​ຜັນ​ຂະຫຍາຍ​ເນື້ອ​ໃນ​ຖະແຫຼງການ​ຂອງສອງ​ກອງ​ປະຊຸມ​ດັ່ງກ່າວໃຫ້​ມີ​ປະສິດ​ທິ ຜົນ​ເປັນ​ຢ່າງ​ດີ  ພ້ອມ​ທັງ​ເຊື່ອ ​ໝັ້ນ​ວ່າສະພາ​ແຫ່ງ​ຊາດ​ຫວຽດ ນາມ ໃນ​ຖານະ​ປະທານ​ໄອ​ປາ ຈະ​ສືບຕໍ່​ປະສານ​ສົມທົບ​ກັບບັນ ດາ​ປະເທດ​ສະມາຊິກ​ໄອ​ປາ  ເພື່ອ​ຄວາມ​ເປັນ​ເອກະ​ພາບ​ກັນ​ກ່ຽວ​ກັນ​ຮູບ​ການ ແລະ ວິທີ​ການ ໃນ​ການ​ຈັດ​ກອງປະຊຸມ​ໄອ​ປາ​ທີ່​ຈະ​ມາ​ເຖິງ  ໂດຍ​ຄຳນຶງ​ເຖິງ​ຜົນ​ປະໂຫຍດ, ຄວາມ​ປອດ​ໄພ​ຂອງ​ປະຊາຊົນ​ເປັນ​ຫຼັກ  ພ້ອມ​ນັ້ນ​ກໍ​ໄດ້​ສະເໜີ​ໃຫ້​ເພີ່ມ​ທະວີ​ການ​ແລກປ່ຽນ​ຂໍ້​ມູນ​ຂ່າວສານ, ແລກປ່ຽນ​ບົດຮຽນ, ການ​ຮ່ວມ​ມື ແລະ ຊຸກຍູ້ແລກປ່ຽນ​ບົດ​ຮຽນ​ນໍາກັນກ່ຽວ​ກັບ​ການ​ສະກັດກັ້ນ ແລະ ຄວບ​ຄຸມ​ການ​ແຜ່​ລະບາດ ຂອງ​ພະ ຍາດໂຄ​ວິດ-19, ລວມ ​ທັງ​ການ​ປັບປຸງ​ກົດໝາຍ ແລະ ນິຕິ​ກໍາ​ຕ່າງໆ   ເພື່ອ​ຄວບ​ຄຸມ ແລະ ສະກັດ​ກັ້ນ​ການ​ແຜ່​ລະ ບາດຂອງ​ພະຍາດ​ໂຄວິດ-19.
ສະຫາຍ ນາງ ປານີ ຢາ​ທໍ່​ຕູ້ ຍັງ​ໃຫ້​ຮູ້​ຕື່ມ​ວ່າ:  ກ່ຽວ​ກັບການ​ຈັດ​ກອງ​ປະຊຸມສະໄໝສາມັນ​ເທື່ອ​ທີ 9 ຂອງ​ສະພາແຫ່ງ​ຊາດ​ ຊຸດ​ທີ VIII ນີ້ ຈະ​ໄດ້​ຈັດ​ຂຶ້້ນ​ໃນ​ວັນ​ທີ 22 ມີຖຸນາ  2020  ຊຶ່ງ​ສະພາ​ແຫ່ງ​ຊາດຈະ​ປະຊຸມ​ແບບປົກກະຕິ ໂດຍອີງໃສ່ສະພາບການ​ການ​ແຜ່​ລະບາດ​ຂອງ​ພະຍາດ​ໂຄ​ວິດ-19 ນີ້  ຈະ​ໄດ້​​ຫຼຸດເນື້ອໃນ ຂອງກອງ​ປະຊຸມ​ທີ່​ບໍ່​ຈຳເປັນ   ຊຶ່ງ​ໄດ້​ນໍາ​ເອົາ​ຫົວຂໍ້​ທີ່​ຈຳເປັນ  ແລະ ຮີບ​ດ່ວນ​ແທ້ໆ ແລະ ໄດ້​ນໍາ​ໃຊ້​ເວລາ​  ໃນ​ກອງ​ປະຊຸມສັ້ນ​ລົງ ພ້ອມ​ທັງ​ພະຍາຍາມ​ປະຕິບັດ​ຕາມ​ການ​ແນະນຳ​ຂອງ​ຄະນະ​ສະເພາະ​ກິດ​ກ່ຽວ​ກັບ​ການ​ຮັບ ປະກັນ​ສຸຂະພາບ​ໃຫ້​ແກ່​ບັນດາ​ທ່ານ​ສະມາຊິກ​ສະພາ​ແຫ່ງ​ຊາດ.
3.  ການ​ດຳເນີນ​ໂຄງການ​ກໍ່ສ້າງ​ຫໍ​ສະພາ​ແຫ່ງ​ຊາດ​ລາວ​ຫຼັງ​ໃໝ່:
ສະຫາຍ​ປະທານ​ສະພາ​ແຫ່ງ​ຊາດ​ລາວ ໄດ້​ຕາງໜ້າ​ຄະ ນະ​ຄຸ້ມ​ຄອງ​ໂຄງການ​ປຸກສ້າງຫໍ​ ສະພາ​ແຫ່ງ​ຊາດຫຼັງໃໝ່, ແຈ້ງ​ໃຫ້​ສະຫາຍ​ປະທານ​ສະພາ​ແຫ່ງ​ຊາດ​ຫວຽດນາມຊາບກ່ຽວ​ກັບ​ການຈັດຕັ້ງ​ປະຕິບັດ​ບັນດາໜ້າ ວຽກໂຄງການ​ກໍ່ສ້າງ​ ໃນ​ໄລຍະ ​ການ​ແຜ່​ລະບາດ​ຂອງ​ພະຍາດ ໂຄ​ວິດ-19  ຊຶ່ງ​ໄດ້​ສົ່ງ​ ຜົນ​ກະທົບ​ຕໍ່​ການ​ກໍ່ສ້າງ​ໂຄງການ ໃນບາງ​ດ້ານ  ເປັນຕົ້ນການ​ນໍາເຂົ້າ​-​ສົ່ງ​ ອອກ​ເຄື່ອງ​ວັດ​ສະດຸ​ອຸປະກອນ, ວິຊາ​ການ, ແຮງ​ງານ, ການ​ຜະ ລິດ​ເຄື່ອງ​ເຟີ​ນີ​ເຈີ ແລະ ອື່ນໆ...ຕໍ່​ບັນຫາ​ດັ່ງກ່າວ ໂດຍໄດ້​ຮັບ ​ການ​ຊີ້​ນໍາ​ຢ່າງ​ໃກ້​ຊິດ​ຈາກ​ຄະ ນະ​ຄຸ້ມ​​ຄອງໂຄງການ​ຝ່າຍລາວ ແລະ ຫວຽດນາມໄດ້​ມອບ​ໃຫ້​ຄະນະ​ຄຸ້ມ​ຄອງ​ຝ່າຍລາວປະ ສານສົມທົບ​ກັບ​ພາກສ່ວນ​ຕ່າງໆ​ ຂອງລາວ ແລະ ບໍລິສັດຮັບເໝົາ ກໍ່ສ້າງ  ສ້າງ​ແຜນວຽກ​ແຕ່​ລະ​ໄລ ຍະ ເພື່ອໃຫ້ສອດຄ່ອງ​ກັບ​ສະພາ​ບ ຄວາມ​ຫຍຸ້ງຍາກ​ໃນ​ປັດ​ຈຸ​ບັນ.
ສະຫາຍ  ຫ​ງວຽນ  ທິ  ກິມ ເງິນ  ໄດ້​ສະແດງ​ຄວາມ​ດີໃຈ ແລະ ຕີ​ລາຄາ​ສູງ​ຕໍ່​ການສົນທະ ນາ​ບາງ​ປະເດັນ​ທີ່​ສໍາຄັນ   ແລະ ເລັ່ງ​ດ່ວນ ໂດຍ​ຜ່ານ​ໂທລະສັບ​ໃນ​ຄັ້ງ​ນີ້  ພ້ອມ​ທັງ​ໄດ້​ແຈ້ງໃຫ້​ຮູ້​ໂດຍ​ຫຍໍ້​ກ່ຽວ​ກັບ​ສະພາບ​ເສດ​ຖະ​ກິດ​-​ສັງຄົມ  ແລະ  ສະພາບ​ການ​ແຜ່​ລະບາດ​ຂອງ​ພະຍາດ​ໂຄ​ວິດ-19  ຊຶ່ງປັດຈຸບັນ​ຜ່ານມາ 22 ມື້ ບໍ່​ພົບ​ຜູ້​ຕິດເຊື້ອ ແລະ ສາ ມາດ​ຄວບ​ຄຸມ​ໄດ້​ໂດຍ​ພື້ນຖານ,  ບາງ​ມາດ​ຕະການ​ໄດ້ມີ​ການ​ແກ້​ໄຂ  ເປັນຕົ້ນ​ການ​ສຶກສາໄດ້​ ເປີດ​ໂຮງຮຽນ, ການ​ຄົມມະນາ ຄົມ​ຂົ່ນ​ສົ່ງ​ໄດ້​ເປັນປົກ​ກະ​ຕິ. ໃນ​ປີ 2020 ນີ້ ສະພາ​ແຫ່ງຊາດ ຫວຽດນາມ ໃນນາມ​ປະທານ​ໄອ​ປາຈະ​ພະຍາຍາມເຮັດ​ໃຫ້ດີ​ ທີ່​ສຸດໃຫ້​ບັນດາ​ປະເທດ​ສະມາ ຊິກ​ໄດ້​ຮັບ​ຜົນ​ປະໂຫຍດ  ຊຶ່ງ​ໃນ​ໄລຍະ​ຜ່ານມາໄດ້​ຮັບຜົນ​ ກະທົບ​ຈາກ​ການ​ແຜ່​ລະບາດ ​ຂອງ​ພະຍາດ​ໂຄ​ວິດ-19 ເຮັດ​ໃຫ້ການ​ຈັດກອງ​ປະຊຸມ​ເລື່ອນ​ອອກ​ໄປແຕ່​ຄາດຄະ​ແນ​ວ່າ  ໃນ​ເດືອນ​ມີຖຸນາ  2020  ຈະໄດ້​ ເປີດກອງປະຊຸມ​ໄອ​ປາ​-​ອາຊຽນ ຢູ່​ດານັງ ປະເທດ​ຫວຽດນາມ,   ໃນ​ນີ້   ສະຫາຍ​ປະທານ​ສະພາ​ແຫ່ງ​ຊາດ​ຫວຽດນາມກໍ​ໄດ້​ເຊື້ອ​ເຊີນ​ປະທານ​ສະພາ​ແຫ່ງຊາດ​ລາວເຂົ້າ​ຮ່ວມ  ຊຶ່ງ​ປະທານ​ສະ ພາ​ແຫ່ງ​ຊາດ​ກໍ​ໄດ້​ຕອບ​ຮັບ​ຄໍາ​ເຊີນ. 
  ກ່ຽວ​ກັບ​ໂຄງການ​ກໍ່ສ້າງ​ຫໍ​ສະພາ​ແຫ່ງ​ຊາດຫຼັງ​ໃໝ່  ພັກ​-​ລັດຖະບານ, ສະພາ​ແຫ່ງ​ຊາດ​ຫວຽດນາມໄດ້​ຕີລາຄາສູງ​ຕໍ່​ການ​ເອົາໃຈໃສ່ຂອງແຕ່ລະພາກ ສ່ວນ  ແລະ  ໄດ້​ສ້າງ​ເງື່ອນໄຂ ​ອຳ ນວຍ​ຄວາມ​ສະດວກ​ຮອບດ້ານ​ໃຫ້​ແກ່​ການ​ກໍ່ສ້າງ​ສະພາ​ແຫ່ງ​ຊາດ​ລາວ, ແຕ່​ການ​ກໍ່ສ້າງ​ກໍ​ພົບ​ຄວາມ​ຫຍຸ້ງຍາກ ເນື່ອງຈາກ​ການ​ແຜ່​ລະບາດ​ຂອງພະຍາດ​ໂຄ​ວິດ-19 ເຮັດໃຫ້ໂຄງການກໍ່ສ້າງ​ມີ​ຄວາມຊັກ​ຊ້າ ແລະ ມີ​ຜົນ​ກະທົບ​ຕໍ່ການນໍາເຂົ້າແຮງງານ, ວັດ​ສະ​ດຸ​ອຸປະກອນ​ໃນ​ການ​ກໍ່ສ້າງ ແລະ ບັນຫາ​ອື່ນໆ; ໃນນີ້,  ປະທານ​ສະພາແຫ່ງຊາດ​ຫວຽດນາມໄດ້​ສະເໜີ​ໃຫ້​ພັກ​-​ລັດຖະບານ ສປປ ລາວ ເອົາໃຈ ໃສ່​ອຳ​ນວຍ​ຄວາມ​ສະດວກ​ໃຫ້​ແກ່​ການ​ນໍາ​ເຂົ້າ​ແຮງ​ງານ ແລະ ວັດ​ສະ​ດຸ​ອຸປະກອນ​ອື່ນໆ  ເພື່ອ​ອຳນວຍ​ຄວາມ​ສະດວກ  ແລະ ຮັບປະກັນ​ໃຫ້​ໂຄງການ​ກໍ່ສ້າງ​ບັນລຸ​ຕາມ​ແຜນການ​ທີ່​ວາງ​ໄວ້.