ສະພາແຫ່ງຊາດ ພິຈາລະນາບົດລາຍງານການເຄື່ອນໄຫວ ຂອງຄະນະປະຈຳສະພາແຫ່ງຊາດ
30/06/2020

ປຊຊ.ກອງ​ປະຊຸມ​ສະໄໝ​ສາມັນ​ເທື່ອ 9 ຂອງ​ສະພາ​ແຫ່ງ​ຊາດ ຊຸດ​ທີ VIII ໃນ​ວັນ​ທີ 26 ມິຖຸນາ​ ຜ່ານ​ມາພາຍ​ໃຕ້​ການ​ເປັນ​ປະທານ​ຂອງ​ທ່ານ ແສງ​ນວນ ໄຊ​ຍະ​ລາດ ຮອງ​ປະທານ​ສະພາ​ແຫ່ງ ​ຊາດ, ທ່ານ ນາງ ສີໃສ ລື​ເດດ​ ມູນ​ສອນ ຮອງ​ປະທານສະພາ ​ແຫ່ງ​ຊາດ​ໄດ້​ຂຶ້ນ​ລາຍ​ງານການ ເຄື່ອນ​ໄຫວ​ວຽກ​ງານ 6 ເດືອນ​ຕົ້ນ​ປີ 2020 ແລະ ແຜນການ ເຄື່ອນໄຫວ​ວຽກ​ງານ​ຮອດ​ກອງ​ປະຊຸມ​ຄັ້ງ​ປະຖົມ​ມະລືກ​ຂອງ​ສະພາ​ແຫ່ງ​ຊາດ​ຊຸດ​ທີ IX.
    ທ່ານ ນາງ ສີໃສ ລື​ເດດ​ມູນ​ສອນ​ໃຫ້​ຮູ້​ວ່າ: ຄະນະ​ປະຈຳ​ສະພາ​ແຫ່ງ​ຊາດ​ໄດ້ ນຳ​ເອົາ​ຄຳ​ຄິດ​ເຫັນ​ຂອງ​ບັນດາ​ທ່ານ​ສະມາຊິກ​ສະພາ​ແຫ່ງ​ຊາດ​ທີ່​ມີ​ຕໍ່​​ເນື້​ອ​ໃນ​ຕ່າງໆ​ໂດຍ​ສະເພາະ​ການ​ປັບປຸງ​ເນື້ອ​ໃນ​ກົດໝາຍ​ທີ່​ຮັບຮອງ​ຢູ່​ກອງ​ປະຊຸມ​ສະໄໝ​ສາມັນ​ເທື່ອ​ທີ 8 ຂອງ​ສະພາ​ແຫ່ງ​ຊາດ ຊຸດ​ທີ VIII ຈຳນວນ 8 ສະບັບ ສຳເລັດ​ຮ້ອຍ​ສ່ວນ​ຮ້ອຍ, ເອົາໃຈໃສ່​ປະສານ​ສົມທົບ​ກັບ​ພາກສ່ວນກ່ຽວຂ້ອງ​ແຕ່​ຫົວທີ ແລະ ຊີ້​ນຳ​ຢ່າງ​ໃກ້ຊິດ​ໃນ​ການ​ກະກຽມ​ບັນ​ດາຮ່າງ​ກົດໝາຍ​ທີ່​ຈະ​ນຳ​ເຂົ້າ​ພິ​ຈາລະນາ​ຮັບຮອງ​ເອົາ​ຢູ່​ກອງ​ປະຊຸມ​ສະໄໝ​ສາ ມັນ​ເທື່ອ​ທີ 9 ຂອງ​ສະພາ​ແຫ່ງ​ຊາດ​ຊຸດ​ທີ VIII ຈຳນວນ 5 ສະບັບ​ເທົ່າ​ກັບ 38,46% ຂອງ​ແຜນການ​ສ້າງ ແລະ ປັບປຸງ​ກົດໝາຍ 6 ເດືອນ​ຕົ້ນ​ປີ 2020.
    ຄະນະ​ປະຈຳ​ສະພາ​ແຫ່ງ​ຊາດ​ໄດ້​ດຳເນີນ​ກອງ​ປະຊຸມ​ປະຈຳ​ເດືອນ​ຂອງ​ຕົນ​ເປັນ​ປົກ ກະຕິ ຊຶ່ງ​ໄດ້​ພິຈາລະນາ​ຕົກລົງ​ບັນຫາ​ສຳຄັນ​ລະດັບ​ພື້ນຖານ​ຂອງ​ປະເທດ​ທັງ​ໝົດ 46 ເນື້ອ​ໃນ, ເປັນ​ມະຕິ​ຄະນະປະຈຳ​ສະພາ​ແຫ່ງ​ຊາດ​ຈຳນວນ 31 ສະບັບ, ວຽກ​ງານ​ລັດຖະບານ 7 ສະ​ບັບ.
    ຄະນະ​ສະມາຊິກ​ສະພາ​ແຫ່ງ​ຊາດ​ປະຈຳ​ແຕ່​ລະ​ເຂດ​ເລືອກ​ຕັ້ງ​ໄດ້​ເອົາໃຈໃສ່​ໃນ​ການ​ເຄື່ອນໄຫວ​ວຽກ​ງານ​ຕາມ​ສິດ ແລະ ໜ້າທີ່​ຂອງ​ຕົນ​ຢ່າງ​ມີຜົນ ສຳເລັດ, ການ​ກະກຽມ​ໃຫ້ແກ່​ ການ​ເລືອກ​ຕັ້ງ ສະ​ມາ​ຊິກສະພາ​ ແຫ່ງ​ຊາດ​ຊຸດ​ທີ IX ແລະ ສະມາ ຊິກ​ສະພາ​ປະຊາຊົນ​ຂັ້ນ​ແຂວງ​ຊຸດ​ທີ II ໄດ້​ສຳ ເລັດ​ການ​ແຕ່ງຕັ້ງ​ຄະນະ​ກຳມະການ​ເລືອກ​ຕັ້ງ​ລະດັບ​ຊາດ ແລະ ດຳເນີນກອງ​ ປະຊຸມ​ຄັ້ງ​ປະຖົມ​ມະລືກ​ຂອງ​ຄະນະ​ດັ່ງກ່າວ​ເພື່ອ​ແບ່ງ​ງານ ແລະ ປຶກສາ​ຫາລື​ກ່ຽວ​ກັບ​ແຜນ​ດຳເນີນ​ງານ, ໂຄງ​ປະກອບກົງ ຈັກ ແລະ ບຸກ​ຄະລາ​ກອນ​ຂອງ​ສະພາ​ແຫ່ງ​ຊາດ​ຊຸດ​ທີ IX, ສະພາ​ປະຊາຊົນ​ຂັ້ນ​ແຂວງ​ຊຸດ​ທີ II ແລະ ວຽກ​ງານ​ອື່ນໆ​ທີ່​ປິ່ນ​ອ້ອມ​ໃຫ້​ແກ່​ການ​ເລືອກ​ຕັ້ງ.
    ກາ​ນນຳພາ​ຈັດ​ຕັ້ງ​ຜັນ​ຂະ ຫຍາຍ​ມະຕິ​ກອງ​ປະຊຸມ​ສະ ໄໝ​ສາມັນ​ເທື່ອ​ທີ 8 ຂອງສະພາ ແຫ່ງ ຊາດ​ຊຸດ​ທີ VIII ໃນ​ບາງ​ວຽກ​ງານ​ບໍ່​ທັນ​ເຂົ້າ​ສູ່​ລວງ​ເລິກ​ ບວກ​ກັບ​ສະພາບ​ຄວາມ​ຫຍຸ້ງ ຍາກ ​ຊຶ່ງ​ເກີດຈາກ​ການ​ລະ  ບາດ​ຂອງ​ພະຍາດ​ໂຄ​ວິດ-19 ພາ ໃຫ້​ການເຄື່ອນໄຫວ​ຂອງ​ສະ ພາ​ແຫ່ງ​ຊາດ​ມີ​ບາງວຽກ​ງານ​ທີ່​ຈະ​ຕ້ອງ​ໄດ້​ສືບຕໍ່​ເອົາໃຈ​ໃສ່.
    ທ່ານ​ໄດ້​ກ່າວ​ຕື່ມ​ອີກວ່າ: ສຳລັບ​ການ​ຄາດ​ຄະເນ​ແຜນ ການເຄື່ອນໄຫວ 6 ເດືອນ​ທ້າຍ​ປີ 2020 ແລະ ແຜນການ​ຮອດ​ກອງ​ປະຊຸມ​ຄັ້ງ​ປະຖົມ​ມະລືກ​ຂອງ​ສະພາ​ແຫ່ງ​ຊາດ​ຊຸດ​ທີ IX ໃນ​ປີ 2021 ຄະນະ​ປະຈຳ​ສະພາ​ແຫ່ງ​ຊາດ​ໄດ້​ກຳນົດ​ມາດ​ຕະການ​ຕົ້ນຕໍ​ດັ່ງນີ້: 1) ເພື່ອ​ຮັບປະກັນ​ການ​ຈັດຕັ້ງ​ປະ ຕິບັດ​ແຜນການເຄື່ອນໄຫວວຽກ​ ງານ 6 ເດືອນ​ທ້າຍ​ປີ 2020 ຂອງ​ສະພາ​ແຫ່ງ​ຊາດ​ໄດ້​ຮັບ​ຜົນສຳເລັດ, ຄະນະ​ປະຈຳສະ ພາ​ແຫ່ງ​ຊາດ​ໄດ້​ເພີ່ມ​ທະວີ ການ​ ນຳພາ​ບັນດາ​ກຳມາ​ທິການ, ຄະນະ​ເລຂາ​ທິ​ການ​ສະພາ​  ແຫ່ງ​ຊາດ, ກົງຈັກທີ່ຄະນະປະ ຈຳ​ສະພາ​ແຫ່ງ​ຊາດ​ສ້າງຕັ້ງ​ ເອົາໃຈໃສ່​ຜັນ​ຂະຫຍາຍແຜນ ການ​ສະບັບ​ນີ້​ເປັນ​ແຜນການ ເຄື່ອນໄຫວ 6 ເດືອນ​ທ້າຍ ປີ 2020, ເປັນ​ແຜນການເຄື່ອນ ໄຫວວຽກ​ງານ​ປະຈຳ​ເດືອນ ​ຂອງ​ແຕ່​ລະ​ພາກສ່ວນລວມ​ທັງ​ປະສານ​ສົມທົບ​ກັບບັນດາ ​ກະຊວງ, ອົງການ​ທີ່ຢູ່​ໃນ​ຂອບ​ເຂດ​ຄວາມ​ຮັບຜິດຊອບ​ຂອງ​ຕົນ ​ເພື່ອ​ປຶກສາ​ຫາລື​ໃຫ້​ມີ​ຄວາມ​ເປັນ​ເອກະ​ພາບ ແລະ ເຂົ້າຮ່ວມ​ຢ່າງ​ເປັນ​ປົກກະຕິ​ໃນ​ການຈັດຕັ້ງ​ປະຕິບັດ​ວຽກ​ງານ​ຕ່າງໆ​ໃຫ້​ສຳເລັດ​ທັນ​ເວລາ ແລະ ມີ​ຄຸນ​ນະ​ພາບ. 2). ເພື່ອ​ຮັບປະກັນ​ການ​ກະກຽມ​ໃຫ້​ແກ່​ການ​ເລືອກ​ຕັ້ງ​ໄດ້​ຮັບ​ຜົນ​ດີ, ຄະນະ​ປະຈຳ ສະພາ​ແຫ່ງ​ຊາດ​ສົມທົບ​ກັບ​ຄະນະ​ກຳມະການ​ເລືອກ​ຕັ້ງ​ລະດັບ​ຊາດ​ແຕ່​ຫົວ ທີ, ຄົ້ນຄວ້າ ແລະ ອອກ​ນິຕິ ກຳ​ ຕ່າງໆ​ທີ່ຢູ່​ຂອບ​ເຂດ​ສິດຂອງ ​ຕົນ​ເພື່ອ​ເປັນ​ບ່ອນ​ອີງ​ໃຫ້​ພາກ ສ່ວນ​ກ່ຽວຂ້ອງ​ເຄື່ອນ​ໄຫວວຽກ​ງານ​ບັນລຸ​ຕາມ​ແຜນການ​ທີ່​ວາງ​ໄວ້. 3). ເພື່ອ​ຮັບປະກັນ​ການ​ກະກຽມ​ກອງ​ປະຊຸມ​ຄັ້ງ​ປະຖົມ​ມະ ລຶກ​ຂອງ​ສະພາ​ແຫ່ງ​ຊາດ​ຊຸດ​ທີ IX ຄະນະ​ປະຈຳ​ສະພາ​ແຫ່ງ​ຊາດ​ຊີ້​ນຳ​ກົງຈັກ​ຂອງ​ສະພາ​ແຫ່ງ​ຊາດ ກົງຈັກ​ທີ່​ຄະນະ​ປະຈຳ​ສະພາ​ແຫ່ງ​ຊາດ​ສ້າງຕັ້ງ​ປະສານ​ສົມທົບ​ກັບ​ພາກສ່ວນ​ຕ່າງໆ​ກະກຽມ​ໃຫ້​ແກ່ການ​ດຳເນີນ​ກອງ​ປະຊຸມ​ຄັ້ງ​ປະຖົມ​ມະລືກ​ຂອງ​ສະພາ​ແຫ່ງ​ຊາດ​ຊຸດ​ທີ IX ເປັນຕົ້ນ​ດ້ານ​ເນື້ອ​ໃນ, ດ້ານ​ບໍລິຫານ​-​ພິທີການ, ດ້ານ​ງົບປະມານ​ຮັບ​ໃຊ້ ແລະ ດ້ານ​ອື່ນໆ. 4). ຍົກ​ສູງ​ຄວາມ​ຮັບຜິດຊອບ ຂອງ​ບັນດາ​ອົງການ​ລັດ​ຂັ້ນ​ຕ່າງໆ​ໃນ​ການ​ຜັນ​ຂະຫຍາຍ​ແຜນການ​ສະບັບ​ນີ້​ຕາ​ມ​ສິດ ແລະ ໜ້າທີ່​ຂອງ​ຕົນ​ທີ່​ກົດໝາຍ​ກຳນົດ​ເປັນຕົ້ນ​ແມ່ນ​ການ​ຮຽບຮຽງ​ບັນດາ​ກົດໝາຍ​ທີ່​ຖືກ​ຮັບຮອງ​ແລ້ວ​ໃຫ້ສາມາດ​ປະກາດ​ໃຊ້​ທັນ​ເວ​ລາ. ການກະ ກຽມ​ເນື້ອ​ໃນ​ຕ່າງໆ​ຂອງ​ກອງ​ ປະຊຸມ​ສະໄໝ​ສາມັນ​ເທື່ອ​ທີ 10 ຂອງ​ສະພາ​ແຫ່ງ​ຊາດ​ຊຸດ​ ທີ VIII, ການຈັດຕັ້ງ​ຜັນ​ຂະຫຍາຍ​ ບັນດາ​ນິຕິ​ກຳ​ຕ່າງໆຂອງ​ສະ ພາແຫ່ງ​ຊາດ, ມະຕິ​ກອງ​ປະ ຊຸມ​ຄະນະ​ປະຈຳ​ສະ​ພາ​ແ​ຫ່ງ​ ຊາດ, ໃຫ້ການ​ຮ່ວມ​ມື​ສະໜອງ​ຂໍ້​ມູນ ແລະ ເປັນ​ເຈົ້າ​ການ​ຄົ້ນ ຄວ້າ, ພິຈາລະນາ​ແກ້​ໄຂ​ຄຳ​ສະເໜີ​ຂອງ​ພົນລະເມືອງ​ຜ່ານ​ໂທລະສັບ​ສາຍ​ດ່ວນ.