ກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດ ຊຸດທີ VIII ຮັບຮອງເອົາ 4 ມະຕິ
03/07/2020

ກອງ​ປະຊຸມ​ສະໄໝ​ສາ ມັນ​ເທື່ອ​ທີ 9 ຂອງ​ສະພາ​ແຫ່ງ​ຊາດ  ຊຸດ​ທີ  VIII  ໄດ້​ປິດ​ລົງ​ດ້ວຍ​ຜົນສຳເລັດ​ຢ່າງ​ຈົບງາມ ໃນ​ວັນ​ທີ 2 ກໍລະກົດ​ນີ້ ທີ່​ສະພາ​ແຫ່ງ​ຊາດ (ຫຼັກ 6) ໂດຍ​ມີ​ທ່ານ ບຸນຍັງ  ວໍລະ​ຈິດ  ເ​ລ​ຂາ​ທິ​ການ​ໃຫຍ່ ປະທານ​ປະເທດ ແຫ່ງ ສປປ ລາວ, ມີ​ການ​ນຳ​ພັກ​-​ລັດ ຕະຫຼອດ​ຮອດ​ສະມາຊິກ​ສະພາ​ແຫ່ງ​ຊາດ ແລະ ແຂກ​ຖືກ​ເຊີນ​ເຂົ້າ​ຮ່ວມ. ກອງ​ປະຊຸມ​ຄັ້ງ​ນີ້ ໄດ້​ຮັບຮອງ​ເອົາ 4 ມະ​ຕິ.ທ່ານ ນາງ ປານີ ຢາ​ທໍ່​ຕູ້ ປະທານ​ສະພາ​ແຫ່ງ​ຊາດ ໄດ້​ກ່າວ​ວ່າ: ຕະຫຼອດ​ໄລຍະ​ເວລາ 6 ວັນເຄິ່ງ  ຂອງ​ການ​ດໍາ​ເນີນ​ກອງ​ປະຊຸມ​ຄັ້ງ​ນີ້,  ສະມາຊິກ​ສະພາ​ແຫ່ງ​ຊາດ  ໃນ​ນາມ​ເປັນ​ຕົວ​ແທນ​ໃຫ້​ແກ່​ສິດ ແລະ ຜົນ​ປະໂຫຍດ​ອັນ​ຊອບ​ທໍາຂອງ​ປະຊາຊົນ​ລາວ​ບັນດາເຜົ່າ ໄດ້​ຍົກ​ສູງ​ຄວາມ​ຮັບຜິດຊອບ​ໃນ​ການ​ຄົ້ນຄວ້າ,  ປະ​ກອບ​ຄໍາ​ເຫັນໃສ່​ທຸກ​ເນື້ອ​ໃນ​ທີ່​ນໍາ​ມາ​ພິຈາລະນາ​ໃນ​ກອງ​ປະຊຸມ​ຄັ້ງ​ນີ້​ແມ່ນມີ​ຄວາມ​ສອດຄ່ອງ​ກັບ​ສະພາບ​ຄວາມ​ເປັນ​ຈິງ, ມີ​ບ່ອນ​ອີງ​ທາງ​ດ້ານ​ນະໂຍບາຍ, ກົດໝາຍ, ມີ​ຂໍ້​ມູນ ຊຶ່ງ​ໄດ້​ຈາກ​ຜົນ​ການ​ຕິດຕາມ​ກວດກາ ການ​ປະຕິບັດ​ລັດ​ຖະ​ທໍາ​ມະນູນ ແລະ ກົດໝາຍຂອງ​ສະພາ​ແຫ່ງ​ຊາດ ແລະ ສະມາຊິກ​ສະພາ​ແຫ່ງ​ຊາດ ຕໍ່​ອົງການ​ລັດ ຕາມ​ຂອບ​ເຂດ​ສິດ​ໜ້າທີ່​ຂອງ​ຕົນ.  ກອງ​ປະຊຸມ​ໄດ້​ພິຈາລະນາແລະຮັບຮອງເອົາ4ມະຕິດັ່ງນີ້:
1. ມະຕິ​ວ່າ​ດ້ວຍ​ການ ຈັດຕັ້ງ​ປະຕິບັດແຜນ​ພັດທະ ນາ​ເສດ​ຖະ​ກິດ​-​ສັງຄົມ, ແຜນ​ງົບປະມານ​ແຫ່ງ​ລັດ ແລະ ແຜນ​ເງິນຕາ 5 ເດືອນ, ຄາດ​ຄະເນ 6 ເດືອນ​ຕົ້ນ​ປີ 2020 ແລະ ແຜນ​ດັດແກ້​ບັນດາ​ຄາດໝາຍ​ເສດຖະກິດ​ມະຫາ​ພາກ, ການ​ຄ້າ, ການ​ລົງທຶນ, ງົບປະມານ ແລະ ເງິນຕາ ໃນ 6 ເດືອນ​ທ້າຍ​ປີ 2020. ກອງ​ປະຊຸມ​ສະແດງ​ຄວາມ​ຊົມເຊີຍ​ມາ​ຍັງ​ລັດຖະບານທີ່​ໄດ້​ເອົາໃຈໃສ່​ຊີ້​ນໍາ  ແລະ ຈັດ​ຕັ້ງ​ຜັນ​ຂະຫຍາຍ ບັນດາ​ມາດ​ຕະການ​ປ້ອງ​ກັນ,  ຄວບ​ຄຸມ ແລະ ແກ້​ໄຂ​ການ​ແຜ່​ລະບາດຂອງ​ພະຍາດໂຄ​ວິດ-19 ຢູ່​ພາຍ​ໃນ​ປະເທດ​ໄດ້​ຢ່າງ​ທັນ​ການ ແລະ ມີ​ປະສິດ​ທິ​ຜົນ. ກອງ​ປະຊຸມ​ສະເໜີ​ມາ​ຍັງ​ລັດຖະບານ ຈົ່ງ​ໄດ້​ຮີບ​ຮ້ອນ​ວາງ​ແຜນ​ຈັດ​ຕັ້ງ​ຜັນ​ຂະຫຍາຍ​ບັນດາ​ຄາດໝາຍ, ນະໂຍບາຍ ແລະ ມາດ​ຕະການ​ທີ່​ໄດ້​ກໍາ​ນົດ​ໄວ້​ໃນ​ມະຕິ​ກອງ​ປະຊຸມ​ສະພາ​ຄັ້ງ​ນີ້  ລົງ​ສູ່​ຂະແໜງການ ແລະ ທ້ອງຖິ່ນ​ຮາກ​ຖານ​ໂດຍ​ໄວ, ສຸມ​ໃສ່​ເຮັດ​ໃຫ້ເສດຖະກິດ​ມະຫາ​ພາກສືບຕໍ່​ມີ​ສະຖຽນ​ລະ​ພາບ ແລະ ມີ​ຄວາມ​ສະຫງົບ, ຄວບ​ຄຸມ​ອັດຕາ​ແລກປ່ຽນ,  ອັດຕາ​ເງິນ​ເຟີ້,  ການ​ເກັບ​ລາຍ​ຮັບ​ເຂົ້າ​ງົບປະມານ​ໃຫ້​ໄດ້​ຕາມ​ແຜນ, ສ້າງ​ສະພາບ​ແວດ​ລ້ອມ​ທີ່​ເອື້ອ​ອໍາ​ນວຍ​ໃຫ້​ແກ່​ການ​ດຶງ​ດູດ​ການ​ລົງທຶນ ແລະ ສືບຕໍ່​ຈັດ​ຕັ້ງ​ປະຕິບັດກົນ​ໄກ​ການ​ບໍລິການ​ຜ່ານ​ປະຕູ​ດຽວ ໃນ​ການ​ສົ່ງເສີມ​ການ​ລົງທຶນໃຫ້​ມີ​ຄວາມ​ເປັນ​ເອກະ​ພາບ​ສູງ ລະຫວ່າງ​ບັນດາ​ຂະແໜງການ​ຂັ້ນ​ສູນ​ກາງ ແລະ ທ້ອງຖິ່ນ ຕາມ​ກົດ​ໝາຍ​ກໍາ​ນົດ​ໄວ້, ເອົາໃຈໃສ່ໂຄ ສະນາ​ຢ່າງ​ກວ້າງຂວາງ ເພື່ອ​ສ້າງ​ຈິດ​ສໍາ​ນຶກ​ຮັກ​ຊາດ ແລະ ພັດທະນາ, ຫັນ​ວິ​ກິດ​ການ​ໃຫ້​ເປັນ​ໂອກາດ  ໃນ​ເງື່ອນໄຂ​ທີ່​ເສດ​ຖະ​ກິດ​-​ສັງຄົມ ມີ​ຄວາມ​ຫຍຸ້ງຍາກ, ສືບຕໍ່​ຂຸດ​ຄົ້ນ ແລະ ນໍາ​ໃຊ້​ທ່າແຮງ​ບົ່ມ​ຊ້ອນ​ພາຍ​ໃນ​ປະເທດ ເພື່ອ​ຍູ້​ແຮງ​ການ​ຜະລິດ​ທຸລະ​ກິດ ແລະ ສົ່ງເສີມ​ໃຫ້​ຄົນ​ລາວ​ຫັນ​ມາ​ຊົມໃຊ້​ຜະລິດ​ຕະ​ພັນ​ລາວ​ຢ່າງ​ແຂງ​ແຮງ. ກະກຽມ​ຄວາມ​ພ້ອມ​ຮອບດ້ານ ເພື່ອ​ຈັດ​ຕັ້ງ​ປະຕິບັດ​ແຜນ​ຊຸກຍູ້​ການ​ຜະລິດ​ລະດູຝົນ ໃນ​ປີ 2020 ໃຫ້​ທັນ​ລະດູ​ການ ແນໃສ່ ຄໍ້າ​ປະກັນ​ທາງ​ດ້ານ​ສະບຽງ​ອາຫານ ໃຫ້​ພຽງພໍ​ກັບ​ການ​ບໍລິໂພກ​ພາຍ​ໃນ ແລະ ເປັນ​ສິນຄ້າ​ສົ່ງ​ອອກ, ກະກຽມ​ແຜນ​ຮັບ​ມື​ກັບ​ໄພ​ພິບັດ​ທໍາ​ມະ​ຊາດ​ທີ່​ອາດ​ຈະ​ເກີດ​ຂຶ້ນ​ໃນ​ລະດູຝົນ​ນີ້, ລວມ​ທັງການ​ແຜ່​ລະບາດ​ຂອງ​ພະຍາດ​ໂຄ​ວິດ-19 ແລະ ພະຍາດ​ຕາມ​ລະດູ​ການ, ຮັບປະກັນ​ເຮັດ​ໃຫ້​ປະເທດ​ຊາດ​ມີ​ສະຖຽນ​ລະ​ພາບ​ທາງ​ດ້ານ​ການເມືອງ​ຢ່າງ​ໜັກ​ແໜ້ນ, ສັງຄົມ​ມີ​ຄວາມ​ສະຫງົບ​ໂດຍ​ພື້ນຖານ, ມີ​ຄວາມ​ຍຸ​ຕິ​ທໍາ, ເສດ​ຖະ​ກິດ​-​ສັງຄົມ ສືບຕໍ່​ມີ​ການ​ຂະຫຍາຍຕົວ, ຊີວິດ​ການ​ເປັນ​ຢູ່​ຂອງ​ປະຊາຊົນ​ໄດ້​ຮັບ​ການ​ປັບປຸງ ແລະ ຍົກ​ສູງ​ດີ​ຂຶ້ນ​ເປັນ​ກ້າວໆ.
2. ມະຕິ​ວ່າ​ດ້ວຍ​ການ​ຮັບ ຮອງ​ເອົາ ກົດໝາຍ​ວ່າ​ດ້ວຍ ພາສີ ສະບັບ​ປັບປຸງ; ການ​ປັບປຸງ​ບາງ​ມາດຕາ ຂອງ​ກົດໝາຍ​ວ່າ​ດ້ວຍ​ສະພາ​ແຫ່ງ​ຊາດ,  ກົດໝາຍ​ວ່າ​ດ້ວຍ​ສະພາ​ປະຊາຊົນ​ຂັ້ນ​ແຂວງ, ກົດໝາຍ​ວ່າ​ດ້ວຍ​ການ​ເລືອກ​ຕັ້ງ​ສະມາຊິກ​ສະພາ​ແຫ່ງ​ຊາດ ແລະ ສະມາຊິກ​ສະພາ​ປະຊາຊົນ​ຂັ້ນ​ແຂວງ  ແລະ ການ​ປັບປຸງ​ບາງ​ມາດຕາຂອງ​ກົດໝາຍ​ວ່າ​ດ້ວຍ​ນໍ້າ  ແລະ ຊັບ​ພະຍາກອນ​ນໍ້າ, ກົດໝາຍ​ວ່າ​ດ້ວຍ​ການ​ປົກ​ປັກ​ຮັກສາ​ສິ່ງ​ແວດ​ລ້ອມ.  ການ​ປັບປຸງ​ບາງ​ມາດຕາ​ຂອງ​ບັນດາ​ກົດໝາຍ​ດັ່ງກ່າວ ຈະ​ປະກອບສ່ວນ​ເຮັດ​ໃຫ້ການ​ຄຸ້ມ​ຄອງ​ລັດ ຄຸ້ມ​ຄອງ​ເສດ​ຖະ​ກິດ​-​ສັງຄົມ ໃນ​ຂົງເຂດ​ວຽກ​ງານ​ດັ່ງກ່າວ  ມີ​ຄວາມ​ສອດຄ່ອງ​ກັບ​ການ​ພັດທະນາ​ເສດ​ຖະ​ກິດ​-​ສັງຄົມ, ການ​ປົກ​ປັກ​ຮັກສາ​ສິ່ງແວດລ້ອມ​ໃນ​ໄລຍະ​ໃໝ່, ເປັນ​ການ​ປັບປຸງ​ກົງຈັກ, ການ​ບໍລິຫານ​ລັດ​ຕາມ​ກົດໝາຍໃຫ້​ມີ​ປະສິດ​ທິ​ຜົນ.
3. ມະຕິ​ວ່າ​ດ້ວຍ​ຜົນ​ການ​ຕິດຕາມ​ກວດກາ ຂອງ​ຄະນະ​ປະ​ຈໍາ​ສະພາ​ແຫ່ງ​ຊາດ ກ່ຽວ​ກັບ​ການ​ຄຸ້ມ​ຄອງ ແລະ ນໍາ​ໃຊ້​ຊັບ​ພະຍາ​ກອນ​ທໍາ​ມະ​ຊາດ (ການ​ສໍາ​ຫຼວດ  ແລະ  ການຂຸດ​ ຄົ້ນແຮ່​ທາດ, ຫີນ​ແຮ່, ຫີນຜາ ແລະ ຊາຍ). ກອງ​ປະຊຸມສະ ແດງ​ຄວາມ​ຊົມເຊີຍ​ມາ​ຍັງລັດ ຖະບານທີ່​ໄດ້​ເອົາໃຈໃສ່ຈັດ​ ຕັ້ງ​ຜັນ​ຂະຫຍາຍ​ບັນດາກົດ ໝາຍ​ທີ່​ກ່ຽວຂ້ອງເປັນ​ນິຕິ​ກໍາ​ອັນ​ລະອຽດ​ຂອງ​ຂະແໜງການ​ຕົນ  ເພື່ອ​ເປັນ​ເຄື່ອງມື​ໃນ​ການ​ຄຸ້ມ​ຄອງ ແລະ ນໍາ​ໃຊ້​ຊັບ​ພະຍາ​ກອນ​ດັັ່ງ​ກ່າວ. ແຕ່ກອງ​ປະຊຸມກໍ​ສະແດງ​ຄວາມ​ເປັນ​ຫ່ວງ  ແລະ ສະເໜີ​ມາ​ຍັງ​ລັດຖະບານ  ຈົ່ງ​ໄດ້​ເພີ່ມ​ທະວີ ຊີ້​ນໍາ​ຂະແໜງການ​ທີ່​ກ່ຽວຂ້ອງ ແລະ ອົງການ​ປົກຄອງ​ທ້ອງຖິ່ນ​ທຸກ​ຂັ້ນ  ເອົາໃຈໃສ່​ຕິດຕາມ​ກວດກາ ການ​ສໍາຫຼວດ, ການ​ຂຸດ​ຄົ້ນ​ແຮ່​ທາດ, ຫີນ​ແຮ່, ຫີນ​ຜາ  ແລະ  ຊາຍທີ່​ໄດ້ຮັບ​ ການ​ອະນຸຍາດ​ໄປ​ແລ້ວ​ນັ້ນ ໃຫ້​ດໍາ​ເນີນ​ການຖືກຕ້ອງ​ຕາມ​ກົດໝາຍ​ທີ່​ກ່ຽວຂ້ອງ​ວາງອອກ ແນ ໃສ່​ຮັບປະກັນນໍາ​ໃຊ້​ຊັບພະ ຍາກອນທໍາ​ມະ​ຊາດ​ຢ່າງ​ຍືນ​ຍົງ,  ມີ​ປະສິດ​ທິ​ຜົນ, ປະ​ຢັດ,  ຈໍາ​ກັດ​ການ​​ສົ່ງ​ຜົນ​ກະທົບ​ທາງ​ລົບ​ຕໍ່​ສິ່ງ​ແວດ​ລ້ອມ​-​ສັງຄົມ, ປະກອບສ່ວນ​ສ້າງ​ລາຍ​ຮັບ​ເຂົ້າ​ງົບປະມານ​ແຫ່ງ​ລັດ, ປົກ​ປັກ​ຮັກສາ​ໄດ້​ເຂດ​ນໍ້າ​ແດນດິນ ​ຂອງ​ປະເທດໄວ້​ໄດ້ຢ່າງ​ຄົບຖ້ວນ ແລະ ໝັ້ນຄົງພ້ອມ​ທັງ​ ເອົາໃຈໃສ່​ປຸກລະດົມໃຫ້​ພາກ ສ່ວນ​ທຸລະ​ກິດ ແລະ ປະຊາຊົນ​ລາວ​ບັນດາເຜົ່າຕັ້ງໜ້າ​ປະຕິບັດ ພັນທະ​ຂອງ​ຕົນ ໃນ​ການ​ເຄົາລົບ ແລະ ປະຕິບັດ​ກົດໝາຍທີ່​ກ່ຽວ ຂ້ອງຢ່າງ​ເຂັ້ມ​ງວດ.
4. ມະຕິ​ວ່າ​ດ້ວຍ​ຮັບຮອງ ທ່ານ ລີ​ເບີ ລີ​ບົວ​ປາວ ສະມາຊິກ​ສະພາ​ແຫ່ງ​ຊາດ ປະ​ຈໍາ​ເຂດ​ເລືອກ​ຕັ້ງ​ທີ 11 ແຂວງ​ບໍ​ລິ​ຄໍາ​ໄຊ ເປັນ​ກໍາ​ມະ​ການ​ຄະນະ​ປະ​ຈໍາ​ສະພາ​ແຫ່ງ​ຊາດ  ປະ​ທານ​ກໍາ​ມາ​ທິ​ການ​ແຜນການ, ການ​ເງິນ ແລະ ການ​ກວດ​ສອບ ຕາມ​ການ​ສະເໜີ​ຂອງ​ຄະນະ​ປະ​ຈໍາ​ສະພາ​ແຫ່ງ​ຊາດ.
ນອກຈາກ​ນີ້ ຍັງ​ໄດ້ຮັບຟັງ​ ການ​ຕອບ​ຄໍາ​ຊັກ​ຖາມ, ການ​ຊີ້​ແຈງ​ຈາກ​ທ່ານ​ນາຍົກລັດຖະມົນຕີ, ລັດຖະມົນຕີຈາກ 4 ກະຊວງ ແລະ ຜູ້​ວ່າການ​ທະ ນາຄານ​ ແຫ່ງ ສປປ ລາວ ກ່ຽວ​ກັບການ​ກໍາ​ນົດ​ນະໂຍບາຍ, ມາດ​ຕະການ​ສົ່ງເສີມ​ການ​ລົງ ທຶນ, ການ​ຈັດ​ເກັບ​ລາຍ​ຮັບ, ການ​ຄຸ້ມ​ຄອງ​ອັດຕາ​ແລກປ່ຽນ, ການ​ສົ່ງເສີມ​ການ​ຜະລິດ​ສະບຽງ​ອາຫານ, ການ​ແກ້​ໄຂ​ບັນຫາ​ແຮງ​ງານ, ການ​ກໍາ​ນົດ​ລາຄາ​ກະແສ​ໄຟຟ້າ ແລະ ບັນຫາ​ອື່ນໆ ແນໃສ່​ເຮັດ​ໃຫ້​ບັນດາ​ນະ ໂຍບາຍ ແລະ ມາດ​ຕະການ ຂອງ​ລັດຖະບານ​ວາງ​ອອກ​ນັ້ນ ໄດ້​ຮັບ​ການຈັດຕັ້ງ​ປະຕິບັດ ລົງ​ສູ່​ທ້ອງຖິ່ນ​ຮາກ​ຖານຢ່າງ​ກວ້າງຂວາງ ແລະ ທັນ​ເວ​ລາ. ກອງ​ປະຊຸມ​ຍັງ​ໄດ້​ພິຈາລະນາ ການເຄື່ອນໄຫວ​ວຽກ​ງານຂອງ​ຄະນະ​ປະ​ຈໍາ​ສະພາ​ແຫ່ງ​ຊາດ ໄລຍະ 6 ເດືອນ​ຕົ້ນ​ປີ,  ທິດ​ທາງ​ແຜນການ 6 ເດືອນ​ທ້າຍ​ປີ 2020 ແລະ ແຜນການ​ຮອດ​ກອງ​ປະຊຸມ​ຄັ້ງ​ປະຖົມ​ມະ​ລືກ ຂອງ​ສະພາ​ແຫ່ງ​ຊາດ  ຊຸດ​ທີ IX. ກອງ​ປະຊຸມ ສະເໜີ​ມາ​ຍັງ​ຄະນະ​ປະ​ຈໍາ​ສະພາ​ແຫ່ງ​ຊາດ ເອົາໃຈໃສ່​ຊີ້​ນໍາ​ກົງຈັກ​ເສນາ​ທິ​ການ ກະກຽມ​ເນື້ອ​ໃນ ທີ່​ຈະ​ນໍາ​ມາ​ພິຈາລະນາ ໃນ​ກອງ​ປະຊຸມ​ສະໄໝ​ສາມັນ ເທື່ອ​ທີ 10 ຂອງ​ສະພາ​ແຫ່ງ​ຊາດ ຊຸດ​ທີ VIII ໃຫ້​ມີ​ຄວາມ​ເໝາະ​ສົມ ແລະ ທັນ​ຕາມ​ກໍາ​ນົດ​ເວ​ລາ. ເອົາໃຈໃສ່​ຊີ້​ນໍາ ແລະ ປະສານ​ສົມທົບ ແຕ່​ຫົວທີ​ກັບ​ພາກສ່ວນ​ທີ່​ກ່ຽວຂ້ອງ ໃນ​ການ​ກະກຽມ​ເອກະສານ, ງົບປະມານ ຮັບ​ໃຊ້​ໃຫ້​ແກ່​ການ​ເລືອກ​ຕັ້ງ, ການ​ຄັດ​ເລືອກ​ບຸກ​ຄະລາ​ກອນ ທີ່​ຈະ​ອອກ​ສະໝັກ​ຮັບ​ເລືອກ​ຕັ້ງ​ເປັນ​ສະມາຊິກ​ສະພາ​ແຫ່ງ​ຊາດ ຊຸດ​ທີ IX ແລະ ສະມາຊິກ​ສະພາ​ປະຊາຊົນ​ຂັ້ນ​ແຂວງ ຊຸດ​ທີ II ໃຫ້​ຮັບປະກັນ​ທາງ​ດ້ານ​ມາດຖານ​ເງື່ອນ​ໄຂ.