ບົດສູນທອນພົດກ່າວອັດ ກອງປະຊຸມສະໄໝສາມັນເທື່ອທີ 9 ຂອງ ສພຊ ຊຸດທີ VIII
07/07/2020

 ຮຽນ - ທ່ານ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ທີ່ເຄົາລົບ ແລະ ນັບຖື ຢ່າງສູງ;

          - ບັນດາທ່ານຜູ້ນໍາພັກ-ລັດ ທີ່ນັບຖື;

          - ບັນດາທ່ານສະມາຊິກສະພາແຫ່ງຊາດ, ແຂກທີ່ມີກຽດ ທີ່ນັບຖື ແລະ ຮັກແພງ.

 

        ຕະຫລອດໄລຍະເວລາ 6 ວັນ ເຄິ່ງ ຂອງການດໍາເນີນກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດ (ສພຊ) ຊຸດທີ VIII, ສະມາຊິກສະພາແຫ່ງຊາດ ໃນນາມເປັນຕົວແທນໃຫ້ແກ່ສິດ ແລະ ຜົນປະໂຫຍດອັນຊອບທໍາຂອງປະຊາຊົນລາວບັນດາເຜົ່າ ໄດ້ຍົກສູງຄວາມຮັບຜິດຊອບໃນການຄົ້ນຄວ້າ, ປະກອບຄໍາເຫັນໃສ່ທຸກເນື້ອໃນທີ່ນໍາມາພິຈາລະນາໃນກອງປະຊຸມຄັ້ງນີ້ແມ່ນມີຄວາມສອດຄ່ອງກັບສະພາບຄວາມເປັນຈິງ, ມີບ່ອນອີງທາງດ້ານນະໂຍບາຍ, ກົດໝາຍ, ມີຂໍ້ມູນ ເຊິ່ງໄດ້ຈາກຜົນການຕິດຕາມກວດກາການປະຕິບັດລັດຖະທໍາມະນູນ ແລະ ກົດໝາຍ ຂອງ ສພຊ ແລະ ສສຊ ຕໍ່ອົງການລັດຕາມຂອບເຂດສິດໜ້າທີ່ຂອງຕົນ ກອງປະຊຸມໄດ້ພິຈາລະນາ ແລະ ຮັບຮອງເອົາ 4 ມະຕິ ດັ່ງນີ້:

  1. ມະຕິວ່າດ້ວຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ແຜນເງິນຕາ 5 ເດືອນ, ຄາດຄະເນ 6 ເດືອນຕົ້ນປີ 2020 ແລະ ແຜນດັດແກ້ບັນດາຄາດໝາຍເສດຖະກິດມະຫາພາກ, ການຄ້າ, ການລົງທຶນ, ງົບປະມານ ແລະ ເງິນຕາ ໃນ 6 ເດືອນທ້າຍປີ 2020. ກອງປະຊຸມສະແດງຄວາມຊົມເຊີຍມາຍັງລັດຖະບານ ທີ່ໄດ້ເອົາໃຈໃສ່ຊີ້ນໍາ  ແລະ ຈັດຕັ້ງຜັນຂະຫຍາຍ ບັນດາມາດຕະການປ້ອງກັນ,  ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢູ່ພາຍໃນປະເທດໄດ້ຢ່າງທັນການ ແລະ ມີປະສິດທິຜົນ. ກອງປະຊຸມສະເໜີມາຍັງລັດຖະບານ ຈົ່ງໄດ້ຮີບຮ້ອນວາງແຜນຈັດຕັ້ງຜັນຂະຫຍາຍບັນດາຄາດໝາຍ, ນະໂຍບາຍ ແລະ ມາດຕະການທີ່ໄດ້ກໍານົດໄວ້ໃນມະຕິກອງປະຊຸມສະພາຄັ້ງນີ້ ລົງສູ່ຂະແໜງການ ແລະ ທ້ອງຖິ່ນຮາກຖານໂດຍໄວ, ສຸມໃສ່ເຮັດໃຫ້ເສດຖະກິດມະຫາພາກ ສືບຕໍ່ມີສະຖຽນລະພາບ ແລະ ມີຄວາມສະຫງົບ, ຄວບຄຸມອັດຕາແລກປ່ຽນ, ອັດຕາເງິນເຟີ້, ການເກັບລາຍຮັບເຂົ້າງົບປະມານໃຫ້ໄດ້ຕາມແຜນ, ສ້າງສະພາບແວດລ້ອມທີ່ເອື້ອອໍານວຍໃຫ້ແກ່ການດຶງດູດການລົງທຶນ ແລະ ສືບຕໍ່ຈັດຕັ້ງປະຕິບັດ ກົນໄກການບໍລິການຜ່ານປະຕູດຽວ ໃນການສົ່ງເສີມການລົງທຶນ ໃຫ້ມີຄວາມເປັນເອກະພາບສູງ ລະຫວ່າງບັນດາຂະແໜງການຂັ້ນສູນກາງ ແລະ ທ້ອງຖິ່ນ ຕາມກົດໝາຍກໍານົດໄວ້, ເອົາໃຈໃສ່ ໂຄສະນາຢ່າງກວ້າງຂວາງ ເພື່ອສ້າງຈິດສໍານຶກຮັກຊາດ ແລະ ພັດທະນາ, ຫັນວິກິດການໃຫ້ເປັນໂອກາດ ໃນເງື່ອນໄຂທີ່ເສດຖະກິດ-ສັງຄົມ ມີຄວາມຫຍຸ້ງຍາກ, ສືບຕໍ່ຂຸດຄົ້ນ ແລະ ນໍາໃຊ້ທ່າແຮງບົ່ມຊ້ອນພາຍໃນປະເທດ ເພື່ອຍູ້ແຮງການຜະລິດທຸລະກິດ ແລະ ສົ່ງເສີມໃຫ້ຄົນລາວຫັນມາຊົມໃຊ້ຜະລິດຕະພັນລາວຢ່າງແຂງແຮງ. ກະກຽມຄວາມພ້ອມຮອບດ້ານ ເພື່ອຈັດຕັ້ງປະຕິບັດແຜນຊຸກຍູ້ການຜະລິດລະດູຝົນ ໃນປີ 2020 ໃຫ້ທັນລະດູການ ແນໃສ່ຄໍ້າປະກັນທາງດ້ານສະບຽງອາຫານ ໃຫ້ພຽງພໍກັບການບໍລິໂພກພາຍໃນ ແລະ ເປັນສິນຄ້າສົ່ງອອກ, ກະກຽມແຜນຮັບມືກັບໄພພິບັດທໍາມະຊາດທີ່ອາດຈະເກີດຂຶ້ນໃນລະດູຝົນນີ້, ລວມທັງການແຜ່ລະບາດຂອງພະຍາດໂຄວິດ-19 ແລະ ພະຍາດຕາມລະດູການ, ຮັບປະກັນເຮັດໃຫ້ປະເທດຊາດມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບໂດຍພື້ນຖານ, ມີຄວາມຍຸຕິທໍາ, ເສດຖະກິດ-ສັງຄົມ ສືບຕໍ່ມີການຂະຫຍາຍຕົວ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງ ແລະ ຍົກສູງດີຂຶ້ນເປັນກ້າວໆ.
  2. ມະຕິວ່າດ້ວຍການຮັບຮອງເອົາກົດໝາຍວ່າດ້ວຍພາສີ ສະບັບປັບປຸງ; ການປັບປຸງບາງມາດຕາ ຂອງກົດໝາຍວ່າດ້ວຍ ສພຊ, ກົດໝາຍວ່າດ້ວຍສະພາປະຊາຊົນຂັ້ນແຂວງ, ກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ ແລະ ການປັບປຸງບາງມາດຕາ ຂອງກົດໝາຍວ່າດ້ວຍນໍ້າ ແລະ ຊັບພະຍາກອນນໍ້າ, ກົດໝາຍວ່າດ້ວຍການປົກປັກຮັກສາສິ່ງແວດລ້ອມ. ການປັບປຸງບາງມາດຕາຂອງບັນດາກົດ ໝາຍດັ່ງກ່າວ ຈະປະກອບສ່ວນເຮັດໃຫ້ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ໃນຂົງເຂດວຽກງານດັ່ງກ່າວ ມີຄວາມສອດຄ່ອງກັບການພັດທະນາເສດຖະກິດ-ສັງຄົມ, ການປົກປັກຮັກສາສິ່ງແວດລ້ອມໃນໄລຍະໃໝ່, ເປັນການປັບປຸງກົງຈັກ, ການບໍລິຫານລັດຕາມກົດໝາຍ ໃຫ້ມີປະສິດທິຜົນ.
  3. ມະຕິວ່າດ້ວຍຜົນການຕິດຕາມກວດກາ ຂອງຄະນະປະຈໍາ ສພຊ ກ່ຽວກັບການຄຸ້ມຄອງ ແລະ ນໍາໃຊ້ຊັບພະຍາກອນທໍາມະຊາດ (ການສໍາຫລວດ ແລະ ການຂຸດຄົ້ນແຮ່ທາດ, ຫີນແຮ່, ຫີນຜາ ແລະ ຊາຍ). ກອງປະຊຸມ ສະແດງຄວາມຊົມເຊີຍມາຍັງລັດຖະບານ ທີ່ໄດ້ເອົາໃຈໃສ່ຈັດຕັ້ງຜັນຂະຫຍາຍບັນດາກົດໝາຍທີ່ກ່ຽວຂ້ອງ ເປັນນິຕິກໍາອັນລະອຽດຂອງຂະແໜງການຕົນ, ເພື່ອເປັນເຄື່ອງມືໃນການຄຸ້ມຄອງ ແລະ ນໍາໃຊ້ຊັບພະຍາກອນດັັ່ງກ່າວ. ແຕ່ກອງປະຊຸມກໍສະແດງຄວາມເປັນຫ່ວງ ແລະ ສະເໜີມາຍັງລັດຖະບານ ຈົ່ງໄດ້ເພີ່ມທະວີຊີ້ນໍາຂະແໜງການທີ່ກ່ຽວຂ້ອງ ແລະ ອົງການປົກຄອງທ້ອງຖິ່ນທຸກຂັ້ນ ເອົາໃຈໃສ່ຕິດຕາມກວດກາການສໍາຫລວດ, ການຂຸດຄົ້ນແຮ່ທາດ, ຫີນແຮ່, ຫີນຜາ ແລະ ຊາຍ ທີ່ໄດ້ຮັບການອະນຸຍາດໄປແລ້ວນັ້ນ ໃຫ້ດໍາເນີນການຖືກຕ້ອງຕາມກົດໝາຍທີ່ກ່ຽວຂ້ອງວາງອອກ ແນໃສ່ຮັບປະກັນນໍາໃຊ້ຊັບພະຍາກອນທໍາມະຊາດຢ່າງຍືນຍົງ, ມີປະສິດທິຜົນ, ປະຍັດ, ​ຈໍາກັດການສົ່ງຜົນກະທົບທາງລົບຕໍ່ສິ່ງແວດລ້ອມ-ສັງຄົມ, ປະກອບສ່ວນສ້າງລາຍຮັບເຂົ້າງົບປະມານແຫ່ງລັດ, ປົກປັກຮັກສາໄດ້ເຂດນໍ້າແດນດິນຂອງປະເທດໄວ້ໄດ້ຢ່າງຄົບຖ້ວນ ແລະ ໝັ້ນຄົງ, ພ້ອມທັງເອົາໃຈໃສ່ປຸກລະດົມ ໃຫ້ພາກສ່ວນທຸລະກິດ ແລະ ປະຊາຊົນລາວບັນດາເຜົ່າ ຕັ້ງໜ້າປະຕິບັດພັນທະຂອງຕົນ ໃນການເຄົາລົບ ແລະ ປະຕິບັດກົດໝາຍທີ່ກ່ຽວຂ້ອງ ຢ່າງເຂັ້ມງວດ.
  4. ມະຕິວ່າດ້ວຍຮັບຮອງທ່ານ ລີເບີ ລີບົວປາວ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 11 ແຂວງບໍລິຄໍາໄຊ ເປັນກໍາມະການຄະນະປະຈໍາ ສພຊ, ປະທານກໍາມາທິການແຜນການ, ການເງິນ ແລະ ການກວດສອບ ຕາມການສະເໜີຂອງຄະນະປະຈໍາ ສພຊ.

ບັນດາທ່ານທີ່ນັບຖື ແລະ ຮັກແພງ

        ເຖິງວ່າກອງປະຊຸມຄັ້ງນີ້ດໍາເນີນໃນໄລຍະສັ້ນກໍຕາມ ແຕ່ຍັງໄດ້ຈັດສັນເວລາຮັບຟັງການຕອບຄໍາຊັກຖາມ, ການຊີ້ແຈງຈາກທ່ານນາຍົກລັດຖະມົນຕີ, ລັດຖະມົນຕີຈາກ 4 ກະຊວງ ແລະ ຜູ້ວ່າການທະນາຄານແຫ່ງ ສປປ ລາວ ກ່ຽວກັບການກໍານົດນະໂຍບາຍ, ມາດຕະການສົ່ງເສີມການລົງທຶນ, ການຈັດເກັບລາຍຮັບ, ການຄຸ້ມຄອງອັດຕາແລກປ່ຽນ, ການສົ່ງເສີມການຜະລິດສະບຽງອາຫານ, ການແກ້ໄຂບັນຫາແຮງງານ, ການກໍານົດລາຄາກະແສໄຟຟ້າ ແລະ ບັນຫາອື່ນໆ ແນໃສ່ເຮັດໃຫ້ບັນດານະໂຍບາຍ ແລະ ມາດຕະການ ຂອງລັດຖະບານວາງອອກນັ້ນ ໄດ້ຮັບການຈັດຕັ້ງປະຕິບັດລົງສູ່ທ້ອງຖິ່ນຮາກຖານຢ່າງກວ້າງຂວາງ ແລະ ທັນເວລາ. ກອງປະຊຸມຍັງໄດ້ພິຈາລະນາການເຄື່ອນໄຫວວຽກງານ ຂອງຄະນະປະຈໍາ ສພຊ ໄລຍະ 6 ເດືອນຕົ້ນປີ, ທິດທາງແຜນການ 6 ເດືອນທ້າຍປີ 2020 ແລະ ແຜນການຮອດກອງປະຊຸມຄັ້ງປະຖົມມະລືກ ຂອງ ສພຊ ຊຸດທີ IX. ກອງປະຊຸມສະເໜີມາຍັງຄະນະປະຈໍາ ສພຊ ເອົາໃຈໃສ່ຊີ້ນໍາກົງຈັກເສນາທິການ ກະກຽມເນື້ອໃນທີ່ຈະນໍາມາພິຈາລະນາ ໃນກອງປະຊຸມສະໄໝສາມັນເທື່ອທີ 10 ຂອງ ສພຊ ຊຸດທີ VIII ໃຫ້ມີຄວາມເໝາະສົມ ແລະ ທັນຕາມກໍານົດເວລາ. ເອົາໃຈໃສ່ຊີ້ນໍາ ແລະ ປະສານສົມທົບ ແຕ່ຫົວທີກັບພາກສ່ວນທີ່ກ່ຽວຂ້ອງ ໃນການກະກຽມເອກະສານ, ງົບປະມານ ຮັບໃຊ້ໃຫ້ແກ່ການເລືອກຕັ້ງ, ການຄັດເລືອກບຸກຄະລາກອນ ທີ່ຈະອອກສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ ຊຸດທີ II ໃຫ້ຮັບປະກັນທາງດ້ານມາດຖານເງື່ອນໄຂ. ເອົາໃຈໃສ່ສືບຕໍ່ສ້າງຄວາມເຂັ້ມແຂງໃຫ້ແກ່ພະນັກງານ-ລັດຖະກອນ ຂອງ ສພຊ ແລະ ສະພາປະຊາຊົນຂັ້ນແຂວງ ໃຫ້ມີຄຸນນະພາບ ແລະ ຮັບປະກັນ ການປະຕິບັດໜ້າທີ່ໃຫ້ໄດ້ດີ.

 

ບັນດາທ່ານຜູ້ນໍາພັກ-ລັດ, ສະມາຊິກສະພາແຫ່ງຊາດ

ບັນດາທ່ານແຂກທີ່ມີກຽດທີ່ນັບຖື ແລະຮັກແພງ

       ໃນຊ່ວງໄລຍະເວລາ 6 ເດືອນທ້າຍປີ ທີ່ຍັງເຫລືອຂອງປີມ້ວນທ້າຍ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ແຫ່ງລັດ ຄັ້ງທີ VIII ນີ້, ໄປຄຽງຄູ່ກັບຜົນສໍາເລັດທີ່ຍາດມາໄດ້ ໃນການປົກປັກຮັກສາ ແລະ ພັດທະນາປະເທດຊາດນັ້ນ, ລັດພວກເຮົາຍັງຈະປະເຊີນໜ້າກັບສິ່ງທ້າທາຍ ແລະ ຂໍ້ຫຍຸ້ງຍາກຫລາຍປະການ ໃນເງື່ອນໄຂຂອງການແຜ່ລະບາດຂອງພະຍາດໂຄວິດ-19 ແລະ ເສດຖະກິດໂລກມີການທົດຖອຍເຊິ່ງໄດ້ສົ່ງຜົນກະທົບຕໍ່ການພັດທະນາເສດຖະກິດ-ສັງຄົມຂອງປະເທດ; ສະນັ້ນ, ກອງປະຊຸມຮຽກຮ້ອງມາຍັງລັດ ຖະບານ, ບັນດາຂະແໜງການ, ອົງການປົກຄອງທ້ອງຖິ່ນທຸກຂັ້ນ ຕະຫລອດເຖິງທຸກພາກສ່ວນເສດຖະກິດ ແລະ ປະຊາຊົນລາວບັນດາເຜົ່າ ຈົ່ງໄດ້ເພີ່ມທະວີຄວາມສາມັກຄີເປັນປຶກແຜນ, ຮ່ວມຈິດຮ່ວມໃຈ ກັບພັກ-ລັດ ຜ່ານຜ່າຂໍ້ຫຍຸ້ງຍາກທາງດ້ານເສດຖະກິດ-ການເງິນ ເພື່ອສືບຕໍ່ພັດທະນາປະເທດຊາດ ກ້າວຂຶ້ນຢ່າງໜັກແໜ້ນ, ເພື່ອຄວາມຈະເລີນຮຸ່ງເຮືອງ ແລະ ຄວາມວັດທະນະຖາວອນ ຂອງປະເທດຊາດລາວຂອງພວກເຮົາ.

ບັນດາທ່ານຜູ້ນໍາພັກ-ລັດ, ສະມາຊິກສະພາແຫ່ງຊາດ

ບັນດາທ່ານແຂກທີ່ມີກຽດທີ່ນັບຖື ແລະຮັກແພງ

          ການດໍາເນີນກອງປະຊຸມສະໄໝສາມັນເທື່ອທີ 9 ຂອງ ສພຊ ຊຸດທີ VIII ມາຮອດນີ້ ໄດ້ສໍາເລັດຕາມຈຸດປະສົງຄາດໝາຍທີ່ວາງໄວ້. ຜົນສໍາເລັດຂອງກອງປະຊຸມໃນຄັ້ງນີ້ ແມ່ນໝາກຜົນລວມຍອດແຫ່ງການເສີມຂະຫຍາຍສະຕິປັນຍາລວມໝູ່, ການປະສານສົມທົບແໜ້ນແຕ່ຫົວທີ ລະຫວ່າງ ສພຊ ກັບລັດຖະບານ, ລະຫວ່າງ ບັນດາກໍາມາທິການຂອງ ສພຊ ກັບບັນດາກະຊວງ, ອົງການທີ່ກ່ຽວຂ້ອງ ກໍຄືການມີສ່ວນຮ່ວມທີ່ສຳຄັນຂອງບັນດາທ່ານສະມາຊິກສະພາແຫ່ງຊາດ ທີ່ໄດ້ສຸມສະຕິປັນຍາ, ເຊີດຊູຄວາມຮັບຜິດຊອບໃນການຄົ້ນຄວ້າ, ປະກອບຄໍາເຫັນທີ່ມີລັກສະນະສ້າງສັນ, ມີເຫດຜົນ, ມີເນື້ອໃນເລິກເຊິ່ງ ຕໍ່ບັນດາເນື້ອໃນທີ່ນໍາມາພິຈາລະນາ ແລະ ຮັບຮອງເອົາໃນກອງປະຊຸມຄັ້ງນີ້.

          ກອງປະຊຸມສະແດງຄວາມຂອບໃຈຢ່າງສູງມາຍັງບັນດາທ່ານຜູ້ນໍາພັກ-ລັດ ທີ່ໄດ້ຊີ້ນໍາ ແລະ ສະຫລະເວລາເຂົ້າຮ່ວມກອງປະຊຸມໃນຄັ້ງນີ້, ສະແດງຄວາມຂອບໃຈມາຍັງຄະນະລັດຖະບານ, ກົງຈັກເສນາທິການຂອງສ ສພຊ ທີ່ໄດ້ກະກຽມເນື້ອໃນຮອບດ້ານໃຫ້ແກ່ການດໍາເນີນກອງປະຊຸມຄັ້ງນີ້ ທັນຕາມກໍານົດເວລາ. ຂອບໃຈກໍາລັງປ້ອງກັນຊາດ, ປ້ອງກັນຄວາມສະຫງົບ, ສື່ມວນຊົນ ແລະ ພາກສ່ວນກ່ຽວຂ້ອງທີ່ໄດ້ປະຕິບັດໜ້າທີ່ຂອງຕົນ ດ້ວຍຄວາມຮັບຜິດຊອບສູງ ປະກອບສ່ວນເຮັດໃຫ້ກອງປະຊຸມຄັ້ງນີ້ມີຜົນສໍາເລັດຢ່າງຈົບງາມ.

          ໃນໂອກາດອັນສະຫງ່າລາສີນີ້, ຂ້າພະເຈົ້າຂໍອວຍພອນໄຊອັນປະເສີດ ມາຍັງບັນດາທ່ານຜູ້ນໍາພັກ-ລັດ, ອົງການແນວລາວສ້າງຊາດ ແລະ ອົງການຈັດຕັ້ງມະຫາຊົນ, ນັກປະຕິວັດອາວຸໂສ, ສະມາຊິກສະພາແຫ່ງຊາດ, ພະນັກງານ, ທະຫານ, ຕໍາຫລວດ ພ້ອມດ້ວຍປະຊາຊົນລາວບັນດາເຜົ່າ ຈົ່ງມີສຸຂະພາບແຂງແຮງ, ມີຄວາມສຸກສົມຫວັງ ແລະ ປະສົບຜົນສໍາເລັດ ໃນໜ້າທີ່ວຽກງານອັນມີກຽດສະຫງ່າຂອງບັນດາທ່ານ.

        ມາຮອດນີ້, ຂ້າພະເຈົ້າຂໍປະກາດອັດກອງປະຊຸມສະໄໝສາມັນເທື່ອທີ 9 ຂອງ ສພຊ ຊຸດທີ VIII ຢ່າງເປັນທາງການ ນັບແຕ່ເວລານີ້ເປັນຕົ້ນໄປ.