ປະທານ ສພຊ ເຂົ້າຮ່ວມກອງປະຊຸມພົບປະລະຫວ່າງຜູ້ນຳໄອປາ-ອາຊຽນ ທາງໄກ
08/07/2020

       

           (ສພຊ) ໃນວັນທີ 26 ມີຖຸນາຜ່ານມາ ທີ່ສະພາແຫ່ງຊາດ ນະຄອນຫລວງວຽງຈັນ, ທ່ານ ​ນາງ ປານີ ຢາ​ທໍ່​ຕູ້ ປະທານ​ສະພາ​ແຫ່ງ​ຊາດ (ສພຊ) ​ໄດ້​ເຂົ້າ​ຮ່ວມກອງປະຊຸມພົບປະລະຫວ່າງຜູ້ນໍາໄອປາ-ອາຊຽນ ທາງໄກ  ໃນວາ ລະກອງປະຊຸມສຸດຍອດອາຊຽນຄັ້ງທີ 36 (ຜ່ານ​ທາງ​ລະບົບ​ອອນ​ລາຍ) ​ໂດ​ຍມີ​ທ່ານ ຫງວຽນ ຊວນ ຟຸກ ນາຍົກລັດຖະມົນຕີແຫ່ງ ສສ.ຫວຽດນາມ, ປະທານກອງປະຊຸມສຸດຍອດຜູ້ນຳອາຊຽນ ຄັ້ງທີ 36, ມີ​ບັນດາປະມຸກລັດ ແລະ ຫົວໜ້າລັດຖະບານຂອງບັນດາປະເທດສະມາຊິກອາຊຽນ, ປະທານລັດຖະສະພາ ຂອງບັນດາລັດຖະສະພາສະມາຊິກໄອປາ​ເຂົ້າ​ຮ່ວມ.

          ​ໂອກາດ​ດັ່ງກ່າວ, ທ່ານນາງ ຫງວຽນ ທິ ກິມ ເງິນ ປະທານສະພາແຫ່ງ​ຊາດ ສສ.ຫວຽດນາມ ທັງ​ເປັນປະທານໄອປາ ​ໄດ້ສະແດງຄວາມເປັນຫ່ວງເປັນໃຍ ຕໍ່ຜົນກະທົບອັນໜັກໜ່ວງ ທີ່ເກີດຈາກພະຍາດ covid-19 ໃນບັນດາປະເທດອາຊຽນ, ໄອປາ ສະໜັບສະໜູນການຈັດຕັ້ງປະຕິບັດຂໍ້ລິເລີ່ມຂອງອາຊຽນ, ຈະສືບຕໍ່ຄຽງຂ້າງ ແລະ ສະໜັບສະໜູນລັດຖະບານຂອງບັນດາປະເທດສະມາຊິກອາຊຽນ ໃນການປະຕິບັດບັນດາມາດຕະການເພື່ອ ຄວບຄຸມ ແລະ ຕອບໂຕ້ຕໍ່ການລະບາດຂອງພະຍາດ, ເພີ່ມທະວີຄວາມອາດສາມາດຂອງບັນດາປະເທດເພື່ອກຽມ ພ້ອມຕໍ່ເຫດການສຸກເສີນ, ຮັບປະກັນສະວັດດີພາບຂອງປະຊາຊົນ, ຟື້ນຟູກິດຈະກຳທາງເສດຖະກິດ, ຮັກສາລະດັບ ການພັດທະນາຢ່າງມີສະຖຽນລະພາບທັງພາຍໃນປະເທດ ແລະ ພາກພື້ນ.

         ທ່ານ ນາງ ຫງວຽນ ທິ ກິມ ເງິນ ໃຫ້​ຮູ້​ອີກ​ວ່າ: ດ້ານການເມືອງ ແລະ ຄວາມໝັ້ນຄົງ, ໄອປາ ສືບຕໍ່ເພີ່ມ ທະວີການຮ່ວມມື, ຮັບປະກັນຄວາມໂປ່ງໃສ, ເປີດກວ້າງ ແລະ ບົນຫລັກການພື້ນຖານກົດໝາຍ ເພື່ອຢັ້ງຍືນຄືນ ຄວາມເປັນແກນກາງຂອງອາຊຽນ, ຮຽກຮ້ອງໃຫ້ມີການຮ່ວມມືຢ່າງໜັກແໜ້ນ, ຍົກລະດັບການເປັນຄູ່ຮ່ວມຂອງ ໄອປາ-ອາຊຽນໃນການເຊື່ອມໂຍງພາກພື້ນ, ແລະ ຍົກສູງຂີດຄວາມສາມາດຂອງບັນດາປະເທດສະມາຊິກອາຊຽນ ໃນການໂຕ້ຕອບຕໍ່ບັນຫາຄວາມໝັ້ນຄົງຮູບແບບໃໝ່. ສ່ວນດ້ານເສດຖະກິດ,  ເພື່ອສ້າງປະຊາຄົມເສດຖະກິດອາ ຊຽນແບບກວມລວມ ແລະ ເຂັ້ມແຂງ, ລັດຖະສະພາສະມາຊິກໄອປາ ມີຄວາມຮັບຜິດຊອບໃນການສົ່ງເສີມການ ໃຫ້ສັດຕະຍາບັນແກ່ບັນດາຂໍ້ຕົກລົງໃນພາກພື້ນ ເພື່ອສົ່ງເສີມການຮ່ວມມືໃນຮູບແບບນະໂຍບາຍເພື່ອການພັດທະ ນາເສດຖະກິດແບບໝູນວຽນ, ພະລັງງານທົດແທນ, ນະວັດຕະກຳໃໝ່ ແລະ ການປັບໂຕຢ່າງຫ້າວຫັນຕໍ່ການປະຕິ ຮູບອຸດສາຫະກຳ 4.0; ໃນມໍ່ໆນີ້, ອາຊຽນຕ້ອງໄດ້ສຸມໃສ່ທຶນຮອນເພື່ອເພີ່ມທະວີການຟຶ້ນຟູເສດຖະກິດອາຊຽນ ພາຍຫຼັງການແຜ່ລະບາດຂອງໂຄວິດ-19, ມຸ້ງໝັ້ນໃນການເປີດຕະຫລາດເພື່ອການຄ້າ ແລະ ການລົງທຶນ, ເຊື່ອມ ໂຍງຕ່ອງໂຊ້ເສດຖະກິດ, ຮັບປະກັນສະບຽງອາຫານ, ປ້ອງກັນພາວະເສດຖະກິດທົດຖອຍ ແລະ ສະໜັບສະໜູນປະ ຊາຊົນ ແລະ ຫົວໜ່ວຍທຸລະກິດທີ່ໄດ້ຮັບຜົນກະທົບຈາກໂຄວິດ-19. ຮີບຮ້ອນເລັ່ງຄວາມຕ້ອງການໃນການສົ່ງເສີມ ອຸດສາຫະກຳທີ່ຂັບເຄື່ອນດ້ວຍຄວາມຮູ້ ແລະ ເສດຖະກິດດິຈິຕອນ.

         ສຳລັບດ້ານວັດທະນະທຳ ແລະ ສັງຄົມ, ໄອປາ ຊຸກຍູ້ໃຫ້ມີການເພີ່ມທະວີບົດບາດຂອງແມ່ຍິງ ແລະ ປັບ ປຸງແຜນງານສຳລັບເດັກນ້ອຍ ແລະ ຜູ້ສູງອາຍຸໃນການຈັດຕັ້ງປະຕິບັດບັນດານະໂຍບາຍຂອງການພັດທະນາເສດຖະ ກິດ-ສັງຄົມ. ໄອປາຍິນດີຕໍ່ຄວາມພະຍາຍາມຂອງອາຊຽນໃນປີ 2020 ເພື່ອສົ່ງເສີມສິດສະເໝີພາບຍິງ-ຊາຍ ແລະ ການສ້າງຄວາມເຂັ້ມແຂງໃຫ້ແກ່ແມ່ຍິງ, ສ່ວນ​ບັນຫາ​ອັນຮີບດ່ວນ ທີ່​ຈະ​ຕ້ອງ​ໄດ້​ຈັດ​ຕັ້ງ​ປະຕິບັດ ​ໃນ​ໄວໆ​ນີ້, ແມ່ນ ການວາງນະໂຍບາຍກ່ຽວກັບການສຶກສາ, ການວ່າງງານ ແລະ ການປັບປຸງລະບົບສາທາລະນະສຸກ ກວມເອົາການ ເຂົ້າເຖິງວັກຊີນ ແລະ ສິ່ງສຳຄັນອື່ນໆ ໃຫ້ແກ່ກຸ່ມຄົນທີ່ມີຄວາມສ່ຽງ ແລະ ພິການ ທີ່ຖືກຜົນກະທົບຢ່າງໜັກຈາກ ບັນຫາໂຄວິດ-19. ນອກນັ້ນພວກເຮົາສະໜັບສະໜູນຕໍ່ການມີສ່ວນຮ່ວມຂອງສະມາຊິກລັດຖະສະພາໜຸ່ມໃນໄອ ປາ, ເພື່ອກ້າວໄປສູ່ການສ້າງຕັ້ງເວທີ ສສຊ ໜຸ່ມຂອງໄອປາ ເພື່ອເຊື່ອມໂຍງກັບເວທີຊາວໜຸ່ມອາຊຽນ.