ປະທານ ສພຊ, ນາຍົກ ຢ້ຽມຢາມໂຄງການປຸກສ້າງຫໍສະພາແຫ່ງຊາດຫຼັງໃໝ່
27/07/2020

          (ສພຊ) ຕອນບ່າຍວັນທີ 23 ກໍລະກົດຜ່ານມາ ທີ່ສະພາແຫ່ງຊາດ (ສພຊ) ທ່ານ ນາງ ປານີ ຢາທໍ່ຕູ້ ປະທານ ສພຊ ພ້ອມດ້ວຍຄະນະ ແລະ ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍຄະນະລັດຖະບານ ໄດ້ຢ້ຽມຢາມໂຄງການປຸກສ້າງຫໍສະພາແຫ່ງຊາດຫລັງໃຫມ່.

          ຄະນະ ໄດ້ຢ້ຽມຊົມການກໍ່ສ້າງໂຄງການແຕ່ຊັ້ນໃຕ້ດິນຈົນເຖິງຊັ້ນສຸດທ້າຍ ພ້ອມນັ້ນ ຍັງໄດ້ຮັບຟັງການລາຍງານໂດຍຫຍໍ້ຂອງການປະຕິບັດໂຄງການກໍ່ສ້າງ; ຈາກນັ້ນ, ທ່ານ ທອງລຸນ ສີສຸລິດ ໄດ້ມີຄໍາເຫັນຕໍ່ກັບການປະຕິບັດໂຄງການວ່າ:  ສະແດງຄວາມຊົມເຊີຍກອງພົນນ້ອຍ 11 ທີ່ໄດ້ມີຄວາມພະຍາຍາມສູງທີ່ສຸດໃນການສ້າງຄວາມຄືບໜ້າຂອງໂຄງການໃຊ້ເວລາພຽງແຕ່ 700 ກວ່າມື້, ໂຄງການນີ້ ເປັນໂຄງການສໍາຄັນ ແມ່ນການມອບໝາຍຂອງພັກ-ລັດ, ສະພາແຫ່ງຊາດຫວຽດນາມ ໄດ້ມອບໃຫ້ພວກສະຫາຍ ກໍຄືກອງພົນນ້ອຍ 11 ປະຕິບັດ ແມ່ນມີຄວາມສຳຄັນ, ເປັນກຽດສັກສີ ແລະ ເປັນສິ່ງທ້າທາຍ; ລັດຖະບານ ໄດ້ມອບໃຫ້ສະພາແຫ່ງຊາດລາວ ແລະ ຫວຽດນາມ ເປັນເຈົ້າຂອງປະຕິບັດໂຄງການ, ໂຄງການນີ້ມີຄວາມສຳຄັນຫລາຍ ສະແດງໃຫ້ເຫັນເຖິງຂອງຂວັນອັນລໍ້າຄ່າຂອງສະຫາຍຫວຽດນາມໃຫ້ແກ່ລາວ ເພາະວ່າເປັນນໍ້າໃຈມິດຕະພາບອັນຍິ່ງໃຫຍ່ ຄວາມສາມັກຄີພິເສດ ການຮ່ວມມືທີ່ຍາວນານຮອບດ້ານ ຂອງສອງພັກ-ສອງລັດ ແລະ ປະຊາຊົນສອງຊາດລາວ-ຫວຽດນາມ, ບົນຈິດໃຈເຂົ້າເມັດຫັກຜັກເສັ້ນໜຶ່ງ ກໍປັນກັນ, ອາຄານຫລັງນີ້ ຈະສາມາດນໍາໃຊ້ໄດ້ຍາວນານ ເພາະມີຄວາມແຂງແຮງທົນທານ ແລະ ຮັກສາໄດ້ຮູບຮ່າງສະຖາປັດຕະຍະກຳອັນມີຮູບແບບຂອງລາວໄດ້ຕໍ່ໄປ; ພ້ອມກັນນັ້ນ, ໄດ້ສະແດງຄວາມຊົມເຊີຍຕໍ່ຄວາມຮັບຜິດຊອບສູງ, ສີມືທີ່ປານີດລະດັບສູງ, ຄວາມພະຍາຍາມສູງທີ່ສຸດຕໍ່ສະພາບການບໍ່ປົກກະຕິ; ພ້ອມທັງເຊື່ອໝັ້ນວ່າ ອີກບໍ່ດົນປະເທດລາວ, ສະມາຊິກສະພາແຫ່ງຊາດ ແລະ ປະຊາຊົນລາວ ຈະໄດ້ຫໍສະພາແຫ່ງຊາດທີ່ສວຍສົດງົດງາມສະຫງ່າລາສີ ກາຍເປັນມໍລະດົກຕົກທອດ ໃຫ້ລູກຫລານລາວ.

          ໂຄງການກໍ່ສ້າງຫໍສະພາແຫ່ງຊາດຫລັງໃຫມ່ ມາຮອດປັດຈຸບັນ ໄດ້ດຳເນີນໄປ 60% ແລ້ວ ຄາດວ່າຈະໄດ້ມອບ-ຮັບໂດຍພື້ນຖານແມ່ນເດືອນມັງກອນ 2021.

                                                                                       ແຫຼ່ງຂ່າວທີ່ມາ: ສະພາແຫ່ງຊາດ