ການທູດລັດຖະສະພາເພື່ອອາຊຽນທີ່ໜຽວແໜ້ນ ແລະ ຕອບສະໜອງຕໍ່ສະພາບການ
09/09/2020

          (ສພຊ) ວັນທີ 8 ກັນຍາ 2020 ທີ່ນະຄອນຫລວງຮ່າໂນ້ຍ ປະເທດ ສສ.ຫວຽດນາມ ໄດ້ມີພິທີເປີດກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ (ໄອປາ) ຄັ້ງທີ 41 ແບບທາງໄກ ໂດຍການເປັນປະທານ ແລະ ກ່າວເປີດກອງປະຊຸມຂອງທ່ານ ນາງ ຫງວຽນ ທິ ກິມ ເງີນ ປະທານສະພາແຫ່ງຊາດ ແຫ່ງ ສສ.ຫວຽດນາມ, ປະທານໄອປາ ຄັ້ງທີ 41; ເຂົ້າຮ່ວມມີທ່ານ ຫງວຽນ ຟູ ຈ້ອງ ປະທານປະເທດ ແຫ່ງ ສສ.ຫວຽດນາມ, ທ່ານ ຫງວຽນ ຊວນ ຟຸກ ນາຍົກລັດຖະມົນຕີ, ທັງເປັນປະທານອາຊຽນ 2020; ບັນດາທ່ານຫົວໜ້າຄະນະຜູ້ແທນລັດຖະສະພາປະເທດສະມາຊິກໄອປາ, ຄູ່ຮ່ວມເຈລະຈາ ແລະ ບັນດາສະມາຊິກລັດຖະສະພາໄອປາເຂົ້າຮ່ວມ.

          ໃນພິທີ ທ່ານ ນາງ ຫງວຽນ ທິ ກິມ ເງີນ ປະທານໄອປາ ໄດ້ມີຄໍາເຫັນກ່າວເປີດກອງປະຊຸມຢ່າງເປັນທາງການໂອກາດເຂົ້າຮ່ວມກອງປະຊຸມດັ່ງກ່າວ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດລາວ ໄດ້ມີຄໍາເຫັນພາຍໃຕ້ຫົວຂໍ້ “ການທູດລັດຖະສະພາເພື່ອອາຊຽນທີ່ໜຽວແໜ້ນ ແລະ ຕອບສະໜອງຕໍ່ສະພາບການ (Parliamentary Diplomacy for Cohesive and Responsive ASEAN)”  ເຊິ່ງມີເນື້ອໃນດັ່ງນີ້: ສະພາແຫ່ງຊາດ ແຫ່ງ ສປປລາວ ມີຄວາມພາກພູມໃຈເປັນຢ່າງຍິ່ງ ທີ່ໄດ້ຮັບການເຊື້ອເຊີນເຂົ້າຮ່ວມກອງປະຊຸມໃຫຍ່ໄອປາ ຄັ້ງທີ 41 ໃນຄັ້ງນີ້, ພ້ອມທັງສະແດງຄວາມຊົມເຊີຍ ແລະ ຕີລາຄາສູງຕໍ່ການປະຕິບັດໜ້າທີ່ການເປັນປະທານໄອປາ ຢ່າງຫ້າວຫັນຂອງທ່ານ ນາງ ຫງວຽນ ທິ ກິມ ເງີນ ປະທານໄອປາ ແລະ ເຊື່ອໝັ້ນວ່າພາຍໃຕ້ການເປັນປະທານຂອງທ່ານ, ກອງປະຊຸມຄັ້ງນີ້ຈະປະສົບຜົນສຳເລັດຢ່າງຈົບງາມ; ສະພາແຫ່ງຊາດລາວ ຕີລາຄາສູງ ແລະ ສະໜັບສະໜູນຕໍ່ຄໍາຂວັນຂອງກອງປະຊຸມໄອປາ ຄັ້ງທີ 41 ທີ່ວ່າ: “ການທູດລັດຖະສະພາເພື່ອອາຊຽນທີ່ໜຽວແໜ້ນ ແລະ ຕອບສະໜອງຕໍ່ສະພາບການ" ເຊິ່ງເປັນການຜັນຂະຫຍາຍເນື້ອໃນຈິດໃຈຂອງກອງປະຊມສຸດຍອດຜູ້ນຳອາຊຽນ ຄັ້ງທີ 36 ທີ່ໃຫ້ຄວາມສຳຄັນແກ່ການຮ່ວມມືທີ່ໃກ້ຊິດກວ່າເກົ່າລະຫວ່າງສະມາຊິກອາຊຽນ ແລະ ຄູ່ຮ່ວມອາຊຽນ ເພື່ອຮັບມືກັບບັນດາສິ່ງທ້າທາຍທີ່ເກີດຂຶ້ນໃນພາກພື້ນອາຊຽນ.

          ປະທານສະພາແຫ່ງຊາດລາວ ຍັງກ່າວຕື່ມວ່າ: ເພື່ອເປັນການຮັບມືກັບສິ່ງທ້າທາຍທັງຮູບແບບເກົ່າ ແລະ ໃໝ່ທີ່ເກີດຂຶ້ນໃນພາກພຶ້ນອາຊຽນ ກໍຄືໃນໂລກ, ໃນໄລຍະຜ່ານມາ ໄອປາ ໃນນາມທີ່ເປັນຕົວແທນຂອງປະຊາຊົນອາຊຽນ ກໍໄດ້ເຮັດບົດບາດການທູດລັດຖະສະພາ ດ້ວຍຄວາມເປັນເຈົ້າການເຂົ້າໃນການຊຸກຍູ້ສົ່ງເສີມການຮ່ວມມືຢ່າງໃກ້ຊິດ ລະຫວ່າງສະມາຊິກໄອປາດ້ວຍກັນ, ລວມທັງການພິຈາລະນາຮັບຮອງເອົາມະຕິທີ່ສຳຄັນຫລາຍສະບັບໃນກອງປະຊຸມໃຫຍ່ປະຈຳປີຂອງຕົນ ກໍໍຄືການປະກອບສ່ວນເຂົ້າໃນຂະບວນການສ້າງປະຊາຄົມອາຊຽນທີ່ໜຽວແໜ້ນ ແລະ ຕອບສະໜອງຕໍ່ສະພາບການ ແນໃສ່ຊຸກຍູ້, ສົ່ງເສີມການຮ່ວມມືທາງດ້ານເສດຖະກິດ-ສັງຄົມ ແລະ ການເມືອງ-ຄວາມໝັ້ນຄົງຂອງພາກພື້ນອາຊຽນ ບົນຫລັກການຄວາມເປັນເອກະສັນ; ສົ່ງເສີມການມີສ່ວນຮ່ວມຂອງປະຊາຊົນ ກໍຄືທຸກພາກສ່ວນໃນສັງຄົມເຂົ້າໃນຂະບວນການສ້າງປະຊາຄົມອາຊຽນ; ຕອບສະໜອງທາງດ້ານນິຕິກຳທີ່ມີຄວາມສອດຄ່ອງ ກົມກຽວກັນ, ຮັບປະກັນໃຫ້ແກ່ການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ; ແລກປ່ຽນບົດຮຽນ ແລະ ປະສົບການທີ່ດີນຳກັນໃນການປະຕິບັດໜ້າທີ່ຂອງລັດຖະສະພາສະມາຊິກໄອປາ;  ເປັນເຈົ້າການໃນການພິຈາລະນາໃຫ້ສັດຕະຍາບັນແກ່ສົນທິສັນຍາ ແລະ ສັນຍາຕ່າງໆໃນຂອບການຮ່ວມມືອາຊຽນ ເພື່ອຮັບປະກັນໃຫ້ແກ່ການຈັດຕັ້ງປະຕິບັດວິໄສທັດປະຊາຄົມອາຊຽນ 2025 ແລະ ແຜນແມ່ບົດຂອງສາມເສົາຄໍ້າປະຊາຄົມອາຊຽນ 2025 ໃຫ້ປາກົດຜົນເປັນຈິງ.

            ໃນປີ 2020 ນີ້, ໂລກ ກໍຄືພາກພື້ນອາຊຽນ ໄດ້ປະເຊີນໜ້າກັບສິ່ງທ້າທາຍຫລາຍຢ່າງ ເປັນຕົ້ນແມ່ນບັນຫາການແຜ່ລະບາດຂອງພະຍາດໂຄວິດ-19, ໄພພິບັດທາງທຳມະຊາດ ແລະ ອື່ນໆ ເຊິ່ງໄດ້ສົ່ງຜົນກະທົບຢ່າງໜັກໜ່ວງຕໍ່ການພັດທະນາເສດຖະກິດ-ສັງຄົມ, ສະຖຽນລະພາບ ແລະ ຄວາມໝັ້ນຄົງຂອງພາກພື້ນ ແລະ ໃນໂລກ, ຕໍ່ໜ້າສະພາບການດັ່ງກ່າວ, ປະທານສະພາແຫ່ງຊາດລາວ ຕີລາຄາສູງຕໍ່ມາດຕະການຕອບໂຕ້ຢ່າງທັນການຂອງອາຊຽນ ໂດຍສະເພາະຫວຽດນາມ ໃນນາມປະທານອາຊຽນ ທີ່ໄດ້ຈັດກອງປະຊຸມສຸດຍອດອາຊຽນ ແລະ ອາຊຽນບວກສາມ ສະໄໝພິເສດ ແລະ ກອງປະຊຸມລະຫວ່າງຜູ້ນຳໄອປາ ແລະ ຜູ້ນຳອາຊຽນແບບທາງໄກ ໃນເດືອນເມສາທີ່ຜ່ານມາ ເຊິ່ງບັນດາຜູ້ນຳອາ ຊຽນ ແລະ ຄູ່ຮ່ວມມື ແລະ ຜູ້ນໍາອົງການນິຕິບັນຍັດ ໄດ້ຢືນຢັນເຖິງຄວາມໝາຍໝັ້ນ ທີ່ຈະຮ່ວມມືກັນໃນການຕອບໂຕ້ກັບພະຍາດລະບາດດັ່ງກ່າວ. ຈາກຜົນຂອງກອງປະຊຸມ ແລະ ການນຳໃຊ້ມາຕະການຕ່າງໆ ໄດ້ຢັ້ງຢືນໃຫ້ເຫັນວ່າຄວາມສ່ຽງຈາກການແຜ່ລະບາດຂອງພະຍາດໂຄວິດ-19 ໃນບັນດາປະເທດສະມາຊິກອາຊຽນ ແມ່ນຢູ່ໃນເກນທີ່ສາມາດຄວບຄຸມໄດ້. ໃນນີ້, ຢູ່ ສປປລາວ ໄດ້ຈັດຕັ້ງປະຕິບັດຖະແຫລງການຮ່ວມຂອງຜູ້ນຳອາຊຽນກ່ຽວກັບການຕ້ານການແຜ່ລະບາດຂອງພະຍາດໂຄວິດ-19 ແລະ ເອົາໃຈໃສ່ເຝົ້າລະວັງ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດດັ່ງກ່າວຢ່າງທັນການ ດ້ວຍການອອກນິຕິກໍາ, ໂຄສະນາເຜີຍແຜ່ມາດຕະການເພື່ອສະກັດກັ້ນ ແລະ ຕ້ານກັບການແຜ່ລະບາດຂອງພະຍາດດັ່ງກ່າວ ໄປຄວບຄູ່ກັບການປຸກລະດົມໃຫ້ອົງການຈັດຕັ້ງລັດ, ພາກສ່ວນທຸລະກິດ, ຄອບຄົວ ແລະ ຊຸມຊົນໃນທົ່ວສັງຄົມເຂົ້າຮ່ວມຈັດຕັ້ງປະຕິບັດຢ່າງເຂັ້ມງວດ ເຊິ່ງມາຮອດປັດຈຸບັນ, ສປປລາວ ມີຜູ້ຕິດເຊື້ອທັງໝົດ 22 ຄົນ, ປິ່ນປົວຫາຍດີ 21 ຄົນ, ສາມາດຄວບຄຸມ ແລະ ຮັບປະກັນໄດ້ຊີວິດຂອງປະຊາຊົນຈາກໄພຄຸກຄາມຢ່າງຮ້າຍແຮງຂອງພະຍາດໂຄວິດ-19. ໄປຄຽງຄູ່ກັນນັ້ນ, ລັດຖະບານ ກໍໄດ້ເອົາໃຈໃສ່ແກ້ໄຂຜົນກະທົບທາງດ້ານເສດຖະກິດຈາກການແຜ່ລະບາດຂອງພະຍາດດັ່ງກ່າວ ດ້ວຍການວາງນະໂຍບາຍ, ມາດຕະການດ້ານເສດຖະກິດ-ການຄ້າ-ການເງິນ-ເງິນຕາ ເພື່ອຟື້ນຟູ ແລະ ສົ່ງເສີມການຜະລິດທຸລະກິດ ແລະ ການບໍລິການ ໂດຍສະເພາະແມ່ນການເລີ່ມຕົ້ນເຮັດທຸລະກິດແບບໃໝ່ຂອງໄວໜຸ່ມ ຜ່ານລະບົບອອນລາຍເພີ່ມຂຶ້ນ. 

           ໃນຕອນທ້າຍ, ທ່ານ ນາງ ປານີ ຢາທໍ່ຕູ້ ມີຄໍາເຫັນຕື່ມວ່າ: ສະພາແຫ່ງຊາດລາວ ມີຄວາມເຊື່ອໝັ້ນວ່າ ລັດຖະສະພາສະມາຊິກໄອປາ ຈະສືບຕໍ່ເພີ່ມທະວີການເຮັດບົດບາດການທູດລັດຖະສະພາ ເພື່ອຊຸກຍູ້ໃຫ້ລັດຖະບານຂອງບັນດາປະເທດສະມາຊິກອາຊຽນ ຈັດຕັ້ງຜັນຂະຫຍາຍບັນດາມາດຕະການ ແລະ ເນື້ອໃນຈິດໃຈທີ່ຜູ້ນຳອາຊຽນ ກໍຄືຜູ້ນໍາໄອປາໄດ້ຕົກລົງຮ່ວມກັນໃຫ້ປາກົດຜົນເປັນຈິງ ປະກອບສ່ວນເຂົ້າໃນການປົກປັກຮັກສາ ສັນຕິພາບ, ສະຖຽນລະພາບ, ຄວາມໝັ້ນຄົງ ແລະ ການພັດທະນາແບບຍືນຍົງໃນພາກພື້ນ ແລະ ໃນໂລກ.  ພ້ອມກັນນັ້ນ, ໄດ້ສະແດງຄວາມຂອບໃຈເປັນຢ່າງສູງມາຍັງປະເທດສະມາຊິກອາຊຽນ, ຄູ່ຮ່ວມອາຊຽນ, ບັນດາປະເທດເພື່ອນມິດ ແລະ ອົງການຈັດຕັ້ງສາກົນ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫລືອທາງດ້ານທຶນຮອນ, ການແລກປ່ຽນຂໍ້ມູນ-ຂ່າວສານ, ຊ່ຽວຊານ ແລະ ອຸປະກອນທາງການແພດທີ່ເປັນປະໂຫຍດ ໃຫ້ແກ່ ສປປລາວ ກໍຄືການຟື້ນຟູເສດຖະກິດທີ່ຖືກຜົນກະທົບຈາກການແຜ່ລະບາດຂອງພະຍາດໂຄວິດ-19.

                                                                               ແຫຼ່ງຂ່າວທີ່ມາ: ສະພາແຫ່ງຊາດ