ຮອງປະທານ ສພຊ ເຄື່ອນໄຫວພົບປະຜູ້ມີສິດເລືອກຕັ້ງຢູ່ເມືອງໄຊບູລີ
29/09/2020

          (ສພຊ) ເພືື່ອເປັນການເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດ (ສພຊ) ຊຸດທີ VIII ແລະ ສະພາປະຊາຊົນແຂວງ (ສພຂ) ຊຸດທີ I ໃນລະຫວ່າງວັນທີ 17-18 ກັນຍາ 2020 ທ່ານ ແສງນວນ ໄຊຍະລາດ ຮອງປະທານ ສພຊ ທັງເປັນສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 13 ແຂວງສະຫວັນນະເຂດ ພ້ອມດ້ວຍທ່ານ ບຸນເຕັມ ຊ່ວງສາຍະວົງ ສສຊ ປະຈໍາເຂດເລືອກຕັ້ງທີ 13 ທັັງເປັນປະທານຄະນະກໍາມະການວັດທະນະທໍາ-ສັງຄົມບັນດາເຜົ່າ ສພຂ, ທ່ານ ສີວິໄລ ອິນທະລືໄຊ ສສຂ ທັງເປັນຮອງເຈົ້າເມືອງໄຊບູລີ ແລະ ທ່ານ ນາງ ຈັນສະໝອນ ອິນທິລາດ ສສຂ ປະຈໍາເຂດເລືອກຕັ້ງເມືອງໄຊບູລີ ໄດ້ເຄື່ອນໄຫວພົບປະໂອ້ລົມຜູ້ມີສິດເລືອກຕັ້ງ ໃນ 3 ກຸ່ມບ້ານ ແລະ 1 ຈຸດເທສະບານເມືອງໄຊບູລີຄື: ກຸ່ມສາລະພູມ ບ້ານກາຈຸ, ກຸ່ມນາວເໜືອ ບ້ານດົງພູ້, ກຸ່ມປາກເຊບັ້ງໄຟ ບ້ານທ່າຄໍ້ ແລະ ເທສະບານເມືອງ ທີ່ສະໂມສອນຫ້ອງວ່າການປົກຄອງເມືອງໄຊບູລີ ໂດຍການຕ້ອນຮັບຂອງທ່ານ ອ່ອນລໍາພັນ ບົວສີແກ້ວ ເລຂາພັກເມືອງ ເຈົ້າເມືອງໄຊບູລີ, ມີບັນດາຄະນະບໍລິຫານງານພັກເມືອງ, ກອງບັນຊາການ ປກສ-ປກຊ ເມືອງ, ຫົວໜ້າຫ້ອງການ, ຄະນະຫ້ອງການ, ພະນັກງານ-ລັດຖະກອນອ້ອມຂ້າງເມືອງ ຕະຫລອດຮອດພໍ່ແມ່ປະຊາຊົນບັນດາເຜົ່າຜູ້ມີສິດເລືອກຕັ້ງເກືອບ 700 ຄົນ ເຂົ້າຮ່ວມ.

           ໂອກາດດຽວກັນ ບັນດາທ່ານ ສສຊ ແລະ ສສຂ ຍັງໄດ້ຮັບຟັງການລາຍງານ ຂອງທ່ານ ເຈົ້າເມືອງ ແລະ ຮັບຟັງການລາຍງານຂອງບັນດາຄະນະພັກຮາກຖານ, ເລຂາພັກບ້ານ ໃນແຕ່ລະກຸ່ມບ້ານ  ກ່ຽວກັບການຈັດຕັ້ງປະຕິບັດແຜນພັດທະນາເສດກິດ-ສັງຄົມ ແລະ ແຜນການເຄື່ອນໄຫວວຽກງານຕ່າງໆ ເປັນຕົ້ນແມ່ນການພັດທະນາພື້ນຖານໂຄງລ່າງຂອງບ້ານ, ເມືອງ. ການເຄື່ອນໄຫວພົບປະໂອ້ລົມໃນຄັ້ງນີ້ ບັນດາທ່ານ ສສຊ ແລະ ສສຂ ກໍໄດ້ນຳເອົາບັນຫາທີ່ສຳຄັນຕົ້ນຕໍທີ່ກອງປະຊຸມໄດ້ຮັບຮອງເອົານັ້ນ ມາສະເໜີເຜີຍແຜ່ໃຫ້ພໍ່ແມ່ປະຊາຊົນໄດ້ຮັບຊາບ ເປັນຕົ້ນແມ່ນມະຕິກອງປະຊຸມ ສພຊ ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ເດືອນ ຄາດຄະເນ 6 ເດືອນຕົ້ນປີ 2020  ທິດທາງວຽກງານຈຸດສຸມ 6 ເດືອນທ້າຍປີ 2020 ແລະ ການດັດແກ້ຄາດໝາຍແຜນພັດທະນາເສດຖະກິດ-ສັງຄົມປະຈຳປີ 2020; ມະຕິວ່າດ້ວຍການຮັບຮອງເອົາບົດລາຍງານແຜນງົບປະມານແຫ່ງລັດ 5 ເດືອນຕົ້ນປີ 2020 ແລະ ການສະເໜີດັດແກ້ງົບປະມານແຫ່ງລັດປະຈຳປີ 2020; ມະຕິວ່າດ້ວຍການຮັບຮອງເອົາການເລືອກຕັ້ງຜູ້ແທນ ກໍາມະການຄະນະປະຈຳ ແລະ ການແຕ່ງຕັ້ງບຸກຄະລາກອນຂອງ ສພຊ ແລະ ມະຕິວ່າດ້ວຍການຮັບຮອງເອົາບົດລາຍງານຜົນການຕິດຕາມກວດກາຂອງຄະນະປະຈຳ ສພຊ ກ່ຽວກັບການຈັດຕັ້ງປະຕິບັດກົດໝາຍໃນການຄຸ້ມຄອງ ແລະ ນຳໃຊ້ຊັບພະຍາກອນທຳມະຊາດ (ການຊອກຄົ້ນ, ສຳຫລວດ, ຂຸດຄົ້ນ ແລະ ປຸງແຕ່ງແຮ່ທາດ ແລະ ຫີນຜາ, ການຂຸດຄົ້ນຫີນແຮ່, ຊາຍ, ດິນດຳ-ດິນແດງ), ນອກນັ້ນ ກໍໄດ້ເປີດໂອກາດໃຫ້ຜູ້ເຂົ້າຮ່ວມສະເໜີບັນຫາ ແລະ ຂໍ້ຂັດຂ້ອງໝອງໃຈຕ່າງໆ ທີ່ຕິດພັນກັບການພັດທະນາເສດຖະກິດ, ການດຳລົງຊີວິດທີ່ພົບຄວາມຫຍຸ້ງຍາກລໍາບາກ ເຊິ່ງຄໍາສະເໜີທີ່ພົ້ນເດັ່ນແມ່ນກ່ຽວກັບການຂໍທຶນ ກໍຄືແຜນງົບປະມານຈາກລັດຖະບານໃນການສ້າງກັນເຈື່ອນຕາຝັ່ງເຊບັ້ງໄຟທີ່ເຫັນວ່າໄດ້ຮັບຜົນກະທົບຢ່າງໜັກໜ່ວງ ແລະ ທຶນເພື່ອສ້າງເສັ້ນທາງ, ຂົວແຫ່ງຕ່າງໆຂອງບ້ານທີ່ເປ່ເພເສຍຫາຍ ແລະ ທຶນໃນການສ້ອມແປງລະບົບຊົນລະປະທານທີ່ເປ່ເພຄືນໃໝ່. ທັງນີ້ ກໍເພື່ອເປັນຂໍ້ມູນໃຫ້ ສສຊ ແລະ ສສຂ ໄປຄົ້ນຄວ້າ ແລະ ປະສານສົມທົບ ກໍຄືນໍາສະເໜີຕໍ່ພາກສ່ວນທີ່ກ່ຽວຂ້ອງ ເພື່ອຊອກຫາທາງອອກຊ່ວຍເຫລືອພໍ່ແມ່ປະຊາຊົນ ແລະ ໃນໂອກາດດັ່ງກ່າວ ສສຊ ແລະ ສສຂ  ກໍໄດ້ອະທິບາຍ ພ້ອມທັງຊີ້ແຈ້ງຄໍາສະເໜີຂອງພໍ່ແມ່ປະຊາຊົນ ແລະ ໄດ້ເນັ້ນໃຫ້ພໍ່ແມ່ປະຊາຊົນບັນດາເຜົ່າ ຈົ່ງຮັກສາຄວາມສາມັກຄີ ທີ່ເປັນມູນເຊື້ອມານານ ຊ່ວຍເຫລືອເບິ່ງແຍງເຊິ່ງກັນແລະກັນ ຮູ້ຈັກຈໍາແນກໄດ້ມິດສັດຕູຈະແຈ້ງ, ການໃສ່ຮ້າຍປາຍສີ, ໂຄສະນາຊວນເຊື່ອ, ບິດເບືອນຕໍ່ແນວທາງຂອງພັກ, ກົດໝາຍຂອງລັດ, ຕ້ານປາກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມ, ເອົາໃຈໃສ່ສ້າງຂະບວນການແຂ່ງຂັນການຜະລິດໃຫ້ຫລາຍ ເພື່ອກາຍເປັນສິນຄ້າ ຊຸກຍູ້ການສ້າງເສດຖະກິດຂອງຕົນໃຫ້ມີຄວາມເຂັ້ມແຂງ, ເພື່ອຫລີກເວັ້ນການນໍາເຂົ້າຈາກຕ່າງປະເທດ, ທັງນີ້ ກໍເພື່ອເຮັດໃຫ້ຊີວິດການເປັນຢູ່ຂອງພໍ່ແມ່ປະຊາຊົນບັນດາເຜົ່າ ໃນແຕ່ລະຄອບຄົວໃຫ້ນັບມື້ນັບດີຂຶ້ນເທື່ອລະກ້າວ.

                                                                                       ແຫຼ່ງຂ່າວທີ່ມາ: ສະພາແຫ່ງຊາດ