ຮອງປະທານ ສພຊ ເຄື່ອນໄຫວຕິດຕາມກວດກາທີ່ແຂວງຫຼວງນຳ້ທາ
08/10/2020

            (ສພຊ) ລະຫວ່າງວັນທີ 2-3 ຕຸລາຜ່ານມາ, ທ່ານ ພົທ. ແສງນວນ ໄຊຍະລາດ ຮອງປະທານສະພາແຫ່ງຊາດ (ສພຊ) ພ້ອມດ້ວຍຄະນະ ໄດ້ເຄື່ອນໄຫວຕິດຕາມກວດກາການຈັດຕັ້ງປະຕິບັດກົດໝາຍ ແລະ ນິຕິກໍາທີ່ກ່ຽວຂ້ອງ ກ່ຽວກັບການເຊື່ອຖືສາສະໜາຕ່າງໆ, ການພັດທະນາຊີວິດການເປັນຢູ່ຂອງປະຊາຊົນບັນດາເຜົ່າ ແລະ ການເຄື່ອນຍ້າຍພົນລະເມືອງ ຂອງປະຊາຊົນສອງຟາກຊາຍແດນທີ່ບໍ່ຖືກຕ້ອງຕາມກົດໝາຍ; ການປະຕິບັດໜ້າທີ່ຂອງກໍາລັງປ້ອງກັນຊາດ-ປ້ອງກັນຄວາມສະຫງົບ, ການປະຕິບັດກົດໝາຍ ແລະ ກົດລະບຽບການໃນຄ້າຍຄຸ້ມຂັງ, ການຄ້າມະນຸດ, ວຽກງານການປັກຫລັກຊາຍແດນ; ການບໍລິການຢູ່ດ່ານສາກົນ, ຄວາມສະດວກ ແລະ ຄວາມຫຍຸ້ງຍາກຂອງພະນັກງານທີ່ປະຈໍາຢູ່ດ່ານຊາຍແດນ ທີ່ແຂວງຫລວງນໍ້າທາ.

             ໂອກາດນີ້ ຄະນະ ໄດ້ຮັບການຕ້ອນຮັບຢ່າງອົບອຸ່ນຈາກທ່ານ ໄຊພອນ ຄູນສິລິເຮືອງ ປະທານສະພາປະຊາຊົນແຂວງ ຫລວງນໍ້າທາ ພ້ອມດ້ວຍຄະນະ. ພາຍຫລັງໄດ້ຮັບການລາຍງານສະພາບຈາກທ່ານປະທານສະພາປະຊາຊົນແຂວງ ແລະ ພາກສ່ວນທີ່ກ່ຽວຂ້ອງ ເປັນຕົ້ນແມ່ນແນວລາວສ້າງຊາດແຂວງ, ພະແນກພາຍໃນ, ຄະນະພັກ,  ຄະນະບັນຊາກອງບັນຊາການທະຫານ ແລະ ກອງບັນຊາການປ້ອງກັນຄວາມສະຫງົບ ແລະ ພະແນກພົວພັນຕ່າງປະເທດແຂວງແລ້ວ. ທ່ານຮອງປະທານສະພາແຫ່ງຊາດ  ກໍໄດ້ມີຄໍາຄິດຄໍາເຫັນ ຊີ້ນໍາການນໍາແຂວງດັ່ງກ່າວ ດ້ວຍຄວາມຫ່ວງໃຍ ແລະ ຈິງໃຈ.

             ຫລັງຈາກນັ້ນ, ຄະນະ ໄດ້ສືບຕໍ່ເຄື່ອນໄຫວຊຸກຍູ້ ແລະ ຕິດຕາມກວດກາຢູ່ດ່ານສາກົນບໍ່ເຕ່ນ (ຊາຍແດນລາວ-ຈີນ) ເພື່ອຮັບຟັງການລາຍງານສະພາບລວມ ແລະ ຈຸດພິເສດຂອງດ່ານສາກົນ  ໂດຍທ່ານ ທອງສີ ກັນທະຈັກ ຮອງຫົວໜ້າຄະນະຄຸ້ມຄອງດ່ານສາກົນບໍ່ເຕ່ນ ແລະ ວຽກງານອື່ນໆ ຈາກພາກສ່ວນທີ່ກ່ຽວຂ້ອງ ເປັນຕົ້ນແມ່ນການຈັດເກັບພາສີສິນຄ້າຂາເຂົ້າ-ຂາອອກ, ການກວດກາການນໍາເຂົ້າຜະລິດຕະພັນພືດ ແລະ ສັດ, ການຄຸ້ມຄອງຄົນເຂົ້າ-ອອກດ່ານ ໂດຍສະເພາະແມ່ນຜູ້ຂັບລົດຂົນສົ່ງສິນຄ້າ, ການຈັດເກັບລາຍຮັບຂອງດ່ານ ແລະ ວຽກງານອື່ນໆ ທີ່ພົວພັນກັບການຂົນສົ່ງ ແລະ ຈໍລະຈອນສິນຄ້າຜ່ານດ່ານ.

             ພ້ອມດຽວກັນນີ້, ທ່ານຮອງປະທານສະພາແຫ່ງຊາດ ຍັງໄດ້ຮັບຟັງຂໍ້ສະເໜີຕ່າງໆ ເປັນຕົ້ນແມ່ນການເປີດດ່ານສະເພາະລົດບັນທຸກສິນຄ້າ ຢູ່ດ່ານສາກົນບໍ່ເຕ່ນ  ເຊິ່ງໄດ້ກໍ່ສ້າງສໍາເລັດແລ້ວ ໂດຍໄດ້ຮັບການຊ່ວຍເຫລືອລ້າຈາກອົງການປົກຄອງແຂວງຢຸນນານ ຈໍານວນ 20 ລ້ານຢວນ ແລະ ຝ່າຍຈີນໄດ້ມອບໃຫ້ແຂວງຫລວງນໍ້າທາ ໃນວັນທີ 4 ກັນຍາ 2020, ສ່ວນຝ່າຍລາວກໍໄດ້ສະເໜີເຖິງຫ້ອງວ່າການສໍານັກງານນາຍົກລັດຖະມົນຕີ ແລະ ບັນດາກະຊວງກ່ຽວຂ້ອງ ເພື່ອພິຈາລະນາປັບປຸງດ່ານທັງລະບົບໃຫ້ຄົບຖ້ວນສົມບູນຕາມມາດຖານຂອງດ່ານສາກົນ ເພື່ອຮອງຮັບການຂະຫຍາຍຕົວຂອງດ່ານໃນອະນາຄົດ ແລະ ຂໍ້ສະເໜີອື່ນໆ.

             ໂອກາດດັ່ງກ່າວນີ້, ທ່ານ ພົທ. ແສງນວນ ໄຊຍະລາດ ໄດ້ຮຽກຮ້ອງໃຫ້ທຸກພາກສ່ວນ ສືບຕໍ່ເພີ່ມທະວີຄວາມຮັບຜິດຊອບຕໍ່ໜ້າທີ່ການເມືອງ, ປະສານສົມທົບກັບພາກສ່ວນທີ່ກ່ຽວຂ້ອງໃຫ້ເລິກເຊິ່ງ, ເພີ່ມທະວີຄວາມສາມັກຄີໃຫ້ເປັນປຶກແຜ່ນ ເປັນແບບຢ່າງນໍາໜ້າ, ມີແບບແຜນ ແລະ ຖອດຖອນບົດຮຽນຢ່າງຕໍ່ເນື່ອງ, ປະຕິບັດຕາມຫລັກການລວມສູນປະຊາທິປະໄຕ ຊ່ວຍເຫລືອເຊິ່ງກັນແລະກັນ, ມີສະຕິຕໍ່ກົນອຸບາຍຂອງສັດຕູທີ່ຫັນປ່ຽນໂດຍສັນຕິ ແລະ ຮີບຮ້ອນເຊື່ອມຊຶມມະຕິກອງປະຊຸມໃຫຍ່ຂອງອົງຄະນະພັກແຂວງ ໂດຍຫັນເອົາແຜນການຕ່າງໆ ທີ່ໄດ້ຮັບຮອງໄປນັ້ນໃຫ້ປາກົດຜົນເປັນຈິງ. ທີ່ສໍາຄັນທີ່ສຸດ ໃນໄລຍະນີ້ ຕ້ອງຊຸກຍູ້ການຜະລິດໃຫ້ກາຍເປັນສິນຄ້າ ເພື່ອຮັບມືກັບການແຜ່ລະບາດຂອງພະຍາດໂຄວິດ-19.

                                                                     ແຫຼ່ງຂ່າວທີ່ມາ: ສະພາແຫ່ງຊາດ