ກຜງສ ສະຫຼຸບວຽກງານປະຈຳປີ 2020
20/10/2020

            (ສພຊ) ລະຫວ່າງວັນທີ 8-9 ຕຸລາ 2020, ທີ່ຫ້ອງປະຊຸມເລຂາທິການສະພາແຫ່ງຊາດ (ຫລັກ 6) ນະຄອນຫລວງວຽງຈັນ ກໍາມາທິການແຜນການ, ການເງິນ ແລະ ການກວດສອບ (ກຜງສ) ສະພາແຫ່ງຊາດ (ສພຊ) ໄດ້ຈັດກອງປະຊຸມຄົບຄະນະ ປະຈໍາປີ 2020 ໂດຍການເປັນປະທານຂອງທ່ານ ລີເບີ ລີບົວປາວ ປະທານ ກຜງສ, ເຂົ້າຮ່ວມມີທ່ານ ບຸນປອນ ບຸດຕະນະວົງ ຮອງປະທານ ສພຊ ທັງເປັນຜູ້ຊີ້ນໍາ ກຜງສ, ມີບັນດາທ່ານຄະນະປະຈໍາສະພາແຫ່ງຊາດ, ປະທານ-ຮອງປະທານກໍາມາທິການພາຍໃນ ສພຊ, ກໍາມະການຂອງ ກຜງສ, ບັນດາທ່ານຮອງລັດຖະມົນຕີ, ຜູ້ຕາງໜ້າຈາກຂະແໜງການຂອງລັດຖະບານ, ແຂກທີ່ຖືກເຊີນ.

            ຈຸດປະສົງຂອງການຈັດກອງປະຊຸມຄັ້ງນີ້ ກໍເພື່ອເປັນການປຶກສາຫາລື ແລະ ກວດກາຄືນ ກ່ຽວກັບການຈັດ ຕັ້ງປະຕິບັດພາລະບົດບາດຂອງ ກຜງສ ໃນຖານະທີ່ເປັນເສນາທິການໃຫ້ແກ່ກອງປະຊຸມສະພາແຫ່ງຊາດ ແລະ ຄະນະປະຈໍາສະພາແຫ່ງຊາດໃນການຈັດຕັ້ງປະຕິບັດວຽກງານຂອງສະພາແຫ່ງຊາດຕາມສິດ ແລະ ໜ້າທີ່ທີ່ໄດ້ກໍານົດໄວ້ໃນກົດໝາຍວ່າດ້ວຍສະພາແຫ່ງຊາດ ອັນໃດທີ່ເຮັດໄດ້ຢ່າງຕັ້ງໜ້າ ແລະ ເສີມຂະຫຍາຍ, ອັນໃດທີ່ຍັງຂາດຕົກບົກຜ່ອງ ແລະ ຄວນໄດ້ພ້ອມກັນຊອກຫາວິທີປັບປຸງແກ້ໄຂ ແນໃສ່ຍົກສູງຄຸນນະພາບ ແລະ ປະສິດທິຜົນໃນການເຄື່ອນໄຫວວຽກງານໃຫ້ສູງຂຶ້ນ; ຄົ້ນຄວ້າປະກອບຄໍາຄິດຄໍາເຫັນຕໍ່ການສະຫລຸບຕີລາຄາຕໍ່ການຈັດຕັ້ງປະຕິບັດວຽກງານຂອງ ກຜງສ ໃນໄລຍະ 5 ປີຜ່ານມາ ແລະ ເພື່ອເປັນການກະກຽມຄວາມພ້ອມທາງດ້ານເນື້ອໃນທີ່ຂຶ້ນກັບຄວາມຮັບຜິດ ຊອບຂອງ ກຜງສ ທີ່ຈະນໍາເຂົ້າລາຍງານ ແລະ ພິຈາລະນາຮັບຮອງເອົາຢູ່ໃນວາລະກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດຊຸດທີ VIII.

            ກອງປະຊຸມໄດ້ຮັບຟັງການລາຍງານແຜນພັດທະນາເສດຖະກິດ-ສັງຄົມ ປີ 2021; ແຜນງົບປະມານແຫ່ງລັດ ປີ 2021; ຜົນການກວດສອບບົດສະຫລຸບຂາດຕົວການຈັດຕັ້ງປະຕິບັດງົບປະມານແຫ່ງລັດປີ 2019 ແລະ ແຜນເຄື່ອນໄຫວກວດສອບ ປີ 2021; ຜົນການກວດກາຕາມຜົນການກວດສອບ ແລະ ຮ່າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ແລະ ບົດສະຫລຸບ 5 ປີ ຂອງ ກຜງສ.

         ໂອກາດດັ່ງກ່າວ ທ່ານ ບຸນປອນ ບຸດຕະນະວົງ ໄດ້ມີຄໍາເຫັນໂອ້ລົມຕໍ່ກອງປະຊຸມວ່າ: ຜ່ານການເຄື່ອນໄຫວວຽກງານ 1 ປີຜ່ານມາ ກຜງສ ໄດ້ຕັ້ງໜ້າຈັດຕັ້ງປະຕິບັດວຽກງານຕາມພາລະບົດບາດ, ສິດ ແລະ ໜ້າທີ່ຂອງຕົນ ມີຜົນສຳເລັດໃນຫລາຍໆດ້ານ ເຊິ່ງເປັນການປະກອບສ່ວນເຂົ້າໃນພາລະກິດລວມຂອງຊາດ ແລະ ສະພາແຫ່ງຊາດຕະຫລອດມາ, ກອງປະຊຸມຄົບຄະນະໃນຄັ້ງນີ້ ເນື້ອແທ້ກໍແມ່ນເພື່ອພ້ອມກັນສັງເກດຕີລາຄາຜົນໄດ້ຮັບ ແລະ ຂໍ້ຄົງຄ້າງຕ່າງໆ ທີ່ຈະສືບຕໍ່ນຳໄປແກ້ໄຂໃນຊຸມປີຕໍ່ໜ້າໃຫ້ປະສົບຜົນສຳເລັດ ເປັນຕົ້ນ: ການປະສານສົມທົບກັບພາກສ່ວນທີ່ກ່ຽວຂ້ອງຂອງລັດຖະບານໃນການຄົ້ນຄວ້າ ແລະ ເຂົ້າຮ່ວມແຕ່ຫົວທີ ເພື່ອເປັນເອກະພາບທາງດ້ານເນື້ອໃນ, ຂໍ້ມູນ ແລະ ບັນດາມາດຕະການຕ່າງໆ ໃນການຈັດຕັ້ງປະຕິບັດກົດໝາຍ, ມະຕິ ແລະ ຄຳສັ່ງຕ່າງໆ ທີ່ກ່ຽວພັນກັບບັນຫາທີ່ເປັນພື້ນຖານສຳຄັນຂອງຊາດ, ການແກ້ໄຂຜົນຂອງການກວດສອບ ແລະ ຜົນການກວດກາໃຫ້ມີຄວາມຖືກຕ້ອງ ແລະ ສອດຄ່ອງກັບກົດໝາຍທີ່ກຳນົດໄວ້, ໄປຄຽງຄູ່ກັນນັ້ນ ກອງປະຊຸມໃນຄັ້ງນີ້ ຈະສຸມໃສ່ຄົ້ນຄ້ວາປະກອບຄຳເຫັນໃສ່ຮ່າງເອກະສານສຳຄັັນຫລາຍສະບັບທີ່ຈະນຳໄປຄົ້ນຄວ້າພິຈາລະນາ ໃນກອງປະຊຸມສະໄໝສາມັນເທື່ອທີ 10 ທີ່ຈະໄຂຂຶ້ນໃນທ້າຍເດືອນນີ້.

                                                                        ແຫຼ່ງຂ່າວທີ່ມາ: ສະພາແຫ່ງຊາດ