ກບຜ ສະຫຼຸບວຽກງານປະຈຳປີ 2020
23/10/2020

         (ສພຊ) ລະຫວ່າງວັນທີ 13-14 ຕຸລາ 2020 ທີ່ສູນເຝິກອົບຮົມສູນກາງແນວລາວສ້າງຊາດ ກໍາມາທິການບັນດາເຜົ່າ (ກບຜ) ສະພາແຫ່ງຊາດ ໄດ້ຈັດກອງປະຊຸມຄົບຄະນະ ໂດຍການເປັນປະທານຂອງທ່ານ ນາງ ບົວພັນ ລີໄກຢາ ປະທານ ກບຜ, ເຂົ້າຮ່ວມມີທ່ານ ແສງນວນ ໄຊຍະລາດ ຮອງປະທານສະພາແຫ່ງຊາດ ຜູ້ຊີ້ນໍາວຽກງານກໍາມາທິການບັນດາເຜົ່າ, ມີບັນດາທ່ານຮອງກໍາມາທິການ, ຫົວໜ້າຄະນະຮັບຜິດຊອບວຽກງານເຂດເລືອກຕັ້ງ, ປະທານຄະນະສະມາຊິກສະພາແຫ່ງຊາດເພດຍິງ, ການນໍາຈາກກະຊວງ, ອົງການ, ສະມາຊິກສະພາແຫ່ງຊາດທີ່ເປັນກໍາມະການຂອງ ກບຜ ຈາກທຸກເຂດເລືອກຕັ້ງເຂົ້າຮ່ວມ.

          ຈຸດປະສົງຂອງການຈັດກອງປະຊຸມຄັ້ງນີ້ ເພື່ອເປັນການສະຫລຸບຕີລາຄາການເຄື່ອນໄຫວວຽກງານປະຈໍາປີ 2020 ແລະ ວາງທິດທາງແຜນການເຄື່ອນໄຫວປະຈໍາປີ 2021 ຂອງ ກບຜ ແລະ ຮັບຟັງການລາຍງານຜົນການຕິດຕາມກວດກາຂອງ ກບຜ ໃນໄລຍະຜ່ານມາ.

          ກອງປະຊຸມໄດ້ຮັບຟັງການສະເໜີຮ່າງບົດສະຫລຸບການເຄື່ອນໄຫວວຽກງານປະຈໍາປີ 2020 ຊຸດທີ VIII ແລະ ທິດທາງແຜນການເຄື່ອນໄຫວປະຈໍາປີ 2021 ຂອງ ກບຜ ສະພາແຫ່ງຊາດ ຊຸດທີ IX; ຮັບຟັງການລາຍງານຜົນການຕິດຕາມກວດກາຂອງ ກບຜ ໃນໄລຍະຜ່ານມາ ຕໍ່ກອງປະຊຸມຄັ້ງນີ້ ຈາກບັນດາທ່ານຮອງປະທານ ກບຜ ນອກຈາກນີ້ ຜູ້ແທນກອງປະຊຸມ ຍັງໄດ້ພ້ອມກັນສຸມສະຕິປັນຍາຄວາມຮູ້ຄວາມສາມາດຄົ້ນຄວ້າໄຈ້ແຍກບັນຫາຕ່າງໆທີ່ຕົນໃຫ້ຄວາມສົນໃຈ ແລະ ຜັດປ່ຽນກັນປະກອບຄໍາຄິດຄໍາເຫັນໃສ່ບົດລາຍງານດັ່ງກ່າວ ແລະ ຮ່າງມະຕິຂອງກອງປະຊຸມ.

          ໂອກາດດັ່ງກ່າວ ທ່ານຮອງປະທານສະພາແຫ່ງຊາດ ໄດ້ມີຄໍາເຫັນໂອ້ລົມຕໍ່ກອງປະຊຸມ ໂດຍທ່ານໄດ້ຍ້ອງຍໍຊົມເຊີຍຕໍ່ຜົນງານອັນດີເດັ່ນທີ່ ກບຜ ສະພາແຫ່ງຊາດຍາດມາໄດ້ໃນໄລຍະຜ່ານມາ ພ້ອມທັງສະເໜີບາງບັນຫາດັ່ງນີ້: ໃຫ້ຄະນະນໍາ ກບຜ ສືບຕໍ່ສຶກສາອົບຮົມການເມືອງ-ແນວຄິດໃຫ້ພະນັກງານ-ລັດຖະກອນ ພາຍໃນກໍາມາທິການໃຫ້ມີຄວາມເຂັ້ມແຂງຮັບປະກັນໃຫ້ມີພະນັກງານສືບທອດປ່ຽນແທນ ທີ່ມີຄຸນທາດການເມືອງໜັກແໜ້ນ,  ມີຄວາມຮູ້ຄວາມສາມາດທີ່ແນ່ນອນໄປຄວບຄູ່ກັນ; ສືບຕໍ່ບູລະນະກົງຈັກການຈັດຕັ້ງພາຍໃນກໍາມາທິການ ໃຫ້ເປັນລະບົບຄົບຊຸດຕາມພາລະບົດບາດທີ່ກຳນົດໄວ້ ທັງແທດເໝາະກັບວຽກງານຕົວຈິງຂອງກຳມາທິການ ແນໃສ່ປະຕິບັດສຳເລັດໜ້າທີ່ການເມືອງ ໃນໄລຍະໃໝ່ຂອງຕົນ ຕາມການຕົກລົງຂອງຂັ້ນເທິງ; ສືບຕໍ່ສ້າງແຜນການ, ຍາດແຍ່ງທຶນຮອນ ການເຝິກອົບຮົມ, ສໍາມະນາສ້າງຄວາມຮັບຮູ້ກ່ຽວກັບວຽກງານເຜົ່າ, ສາສະໜາ ແລະ ແບບວິທີການພົວພັນ ລະຫ່ວາງກຳມາທິການ ກັບບັນດາອົງການຈັດຕັ້ງມະຫາຊົນໃຫ້ທຸກພາກສ່ວນເຂົ້າໃຈ ໃຫ້ຫລາຍຂຶ້ນ ພ້ອມດຽວກັນນັ້ນ ແຕ່ລະເຂດເລືອກຕັ້ງ ຕ້ອງພະຍາມສ້າງໃຫ້ໄດ້ພະນັກງານທີ່ມີຄວາມຊໍານານງານ, ມີຄວາມຮັບຜິດຊອບໃຫ້ກາຍເປັນນັກຮົບຜູ້ທີ່ມີພິກໄຫວ, ຍຸດທະວິທີແກ້ໄຂບັນຫາສາສະໜາຢ່າງອ່ອນໄຫວ ແລະ ຄ່ອງແຄ້ວນີ້ມນວນຢູ່ໃນທ້ອງຖິ່ນຂອງຕົນ ທີ່ນັບມື້ນັບແຜ່ຂະຫຍາຍເປັນວົງກວ້າງ ແລະ ທ້າທາຍຕໍ່ອໍານາດການປົກຄອງຂອງລັດເຮົາ; ສືບຕໍ່ສົມທົບກັບບັນດາພາກສ່ວນທີ່ກ່ຽວຂ້ອງ ເອົາໃຈໃສ່ເຜີຍແຜ່ຊື່ເອີ້ນ ແລະ ຈໍານວນຊົນເຜົ່າຢູ່ປະເທດລາວ ຕໍ່ຖັນແຖວພະນັກງານ-ລັດຖະກອນ, ທະຫານ-ຕໍາຫລວດ ແລະ ທຸກຊັ້ນຄົນໃນສັງຄົມ ທັງໃຫ້ມີຄວາມເຂົ້າໃຈຕໍ່ຈຸດພິເສດ,​ ມູນເຊື້ອອັນດີງາມຂອງແຕ່ລະເຜົ່າ ແນໃສ່ເຮັດໃຫ້ປະຊາຊົນລາວບັນດາເຜົ່າມີຄວາມຮູ້ສຶກເອກອ້າງທະນົງໃຈ, ເຫັນເຖິງບົດບາດການນໍາພາ ແລະ ຄວາມເອົາໃຈໃສ່ຂອງພັກ-ລັດຕໍ່ທຸກຊົນເຜົ່າໃນປະເທດ; ໃຫ້ທຸກເຂດເລືອກຕັ້ງ ສືບຕໍ່ຕິດຕາມ ແລະ ຊຸກຍູ້ພາກສ່ວນກ່ຽວຂ້ອງຂັ້ນຂອງຕົນ ຕັ້ງໜ້າເຜີຍແຜ່  ດຳລັດ 315/ລບ ໃຫ້ກວ້າງຂວາງ ແລະ ທົ່ວເຖິງກວ່າທີ່ຜ່ານມາ ໂດຍສະເພາະແມ່ນປະຊາຊົນໃນເຂດຫ່າງໄກສອກຫລີກ. ຖ້າເປັນໄປໄດ້ ສະເໜີໃຫ້ກະຊວງພາຍໃນ ຍົກລະດັບ ດຳລັດ 315/ລບ ນີ້ຂຶ້ນເປັນກົດໝາຍ ເພື່ອສະດວກໃນການຄຸ້ມຄອງມີຄວາມຄ່ອງຕົວຂຶ້ນ; ສືບຕໍ່ຮ່ວມກັບພາກສ່ວນ ກ່ຽວຂ້ອງ ສ້າງ ແລະ ປັບປຸງນິຕິກໍາກ່ຽວກັບການພົວພັນປະສານງານລະຫວ່າງ ກບຜ ກັບພາກສ່ວນທີ່ກ່ຽວຂ້ອງໃຫ້ໄດ້ຮັບການເຊັນເປັນທາງການ ເພື່ອຮັບປະກັນໃນການປະຕິບັດໜ້າທີ່ ມີຄວາມຄ່ອງຕົວ ແລະ ວ່ອງໄວ ກ່ວາເກົ່າ.

                                                                               ແຫຼ່ງຂ່າວທີ່ມາ: ສະພາແຫ່ງຊາດ