ສະເຫລີມສະຫລອງ 45 ປີ ສພຊ ແລະ ຍ້ອງຍໍຜົນງານ 5 ປີ ສພຊ
27/10/2020

         (ສ​ພ​ຊ) ພິ​ທີ​​ໂຮ​ມຊຸມ​ນຸມສະ​ເຫລີມ​ສະ​ຫລອງ​ວັນ​ສ້າງ​ຕັ້ງ​ສະ​ພາ​ແຫ່ງ​ຊາດ (ສ​ພ​ຊ) ຄົບ​ຮອບ 45 ປີ ໄດ້​ຈັດ​ຂຶ້ນ​ໃນ​ວັນ​ທີ 26 ຕຸ​ລາ 2020 ຢູ່​ທີ່​ຫໍ​ປະ​ຊຸມ​ແຫ່ງ​ຊາ​ດ ນ​ະ​ຄອນ​ຫລວງວຽງ​ຈັນ ໂດຍ​​ມີ​ທ່ານ ນາງ ປານີ ຢາທໍ່ຕູ້ ປະ​ທານ​ຄະ​ນະ​ປະ​ຈໍາສະ​ພາ​ແຫ່ງ​ຊາດ (ຄ​ປ​ຈ. ສ​ພ​ຊ), ທ່ານ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ, ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມ​ດ້ວຍ​ການ​ນຳ​ພັກ-ລັດ,​ ສະມາຊິກສະພາແຫ່ງຊາດ (ສ​ສ​ຊ), ​ອະ​ດີດ​ການ​ນໍາ​ຂັ້ນ​ສູ​ງ​ພັກ-ລັດ, ອະ​ດີດ​ ສ​ສ​ຊ, ພະ​ນັກ​ງານ​ປະ​ຕິ​ວັດ​ອາ​ວຸ​ໂສ, ພະ​ນັກ​ງານ-ລັດ​ຖ​ະ​ກອ​ນ​ພ​າຍ​ໃນ​ ສ​ພ​ຊ ເຂົ້າ​ຮ່ວມ​ຢ່າ​ງ​ພ້ອ​ມ​ພຽງ.

          ໃນ​ພິ​ທີ​ຊຸມ​ນຸມ, ທ່ານ ນາງ ປານີ ຢາທໍ່ຕູ້ ໄດ້​ຂຶ້ນ​ສະ​ເໜີ​ໂດຍ​ຫຍ​ໍ້​ກ່ຽວ​ກັບ 45 ປີ ແຫ່ງ​ການ​ເຕີບ​ໃຫຍ່​ຂ​ະ​ຫຍາຍ​ຕົວ​ຂ​ອງ​ ສ​ພ​ຊ ເຊິ່ງ​ມີ​ເນື້​ອ​ໃນ​ບາງ​ຕອນ​ວ່າ: ໃນວັນທີ 2 ທັນວາ 1975 ເຊິ່ງເປັນວັນຊາດ ຂອງສາທາລະນະລັດ ປະຊາທິປະໄຕ ປະຊາຊົນລາວ ແລະ ໃນວັນດຽວກັນນັ້ນ, ກອງປະຊຸມ ຍັງໄດ້ຮັບຮອງເອົາ ມະຕິການແຕ່ງຕັ້ງສະພາປະຊາຊົນສູງສຸດ ເພື່ອສະໜອງຕອບຄວາມຮຽກຮ້ອງຕ້ອງການ ມີອໍານາດລັດ ທາງດ້ານນິຕິບັນຍັດ ເພື່ອປະຕິບັດໜ້າທີ່ຄົ້ນຄວ້າຮ່າງລັດຖະທໍາມະນູນ ແລະ ອອກບັນດາກົດໝາຍຂອງ ລະບອບ ສາທາລະນະລັດ ປະຊາທິປະໄຕ ປະຊາຊົນລາວ ໃຫ້ສອດຄ່ອງກັບສະພາບການໃນໄລຍະໃໝ່. ນັບແຕ່ມື້ນັ້ນມາເຖິງປັດຈຸບັນເປັນເວລາ 45 ປີ, ສະພາປະຊາຊົນສູງສຸດໃນເມື່ອກ່ອນ ແລະ ສະພາແຫ່ງຊາດ ໃນປັດຈຸບັນ ໄດ້ຮັບການປັບປຸງກໍ່ສ້າງ ແລະ ເຕີບໃຫຍ່ຂະຫຍາຍຕົວທາງດ້ານປະລິມານ ແລະ ຄຸນນະພາບ ທັງສາມາດຍາດໄດ້ ຜົນງານອັນດີເດັ່ນຫລວງຫລາຍ​ໃນການປະຕິບັດພາລະບົດບາດໜ້າທີ່ຂອງຕົນ ຕາມ 3 ພ​າ​ລະ​ບົດ​ບາ​ດ ​ຄື: ດ້ານ​ນ​ິ​ຕິ​ບັນ, ດ້ານການພິຈາລະນາຕົກລົງບັນຫາສໍາຄັນພື້ນຖານຂອງປະເທດຊາດ ແລະ ດ້ານການຕິດຕາມກວດກາຂອງ ສ​ພ​ຊ; ພ້ອມນັ້ນ, ຍັງ​ໄດ້​ມີ​ກາ​ນ​ພົວ​ພັນ​ເຄື່ອນ​ໄຫວ​ວຽກ​ງານ​ການ​ຕ່າງ​ປະ​ເທດ​ກັບ​ບັນ​ດາ​ປະ​ເທດ​ໃນ​ພາກ​ພື້ນ ແລະ ສາ​ກົນ​ອີກ​ດ້ວຍ.

          ຈາກນັ້ນ, ຜູ້​ຕາງ​ໜ້າ​ຈາກກະ​ຊວງ​ພາຍ​ໃນ ໄດ້​ຂຶ້ນ​ຜ່ານ​ລັດ​ຖະ​ດໍາລັດ​ວ່າ​ດ້ວຍ​ການ​ປະ​ດັດ​ຫລຽນ​ຄໍາ​ແຫ່ງ​ຊາ​ດ ໃຫ້ ສ​ພ​ຊ ແລະ ລັດ​ຖະ​ດໍາ​ລັດ​ວ່າ​ດ້ວຍ​ການ​ປະ​ດັບ​ຫລຽນ​ໄຊ​ອິດ​ສະ​ຫລະ​ຊັ້ນ I ໃຫ້​ແກ່​ປະ​ທານ ​ຄ​ປ​ຈ.ສ​ພ​ຊ; ພ້​ອມ​ນັ້ນ, ​ທ່ານ ບຸນ​ຍັງ ວໍ​ລະ​ຈິດ ໄດ້​ໃຫ້​ກຽດ​ປະ​ດັບ​ຫລຽນ​ຄໍາ​ແຫ່ງ​ຊາດໃຫ້ ສ​ພ​ຊ ແລະ ປະ​ດັບ​ຫລຽນ​ໄຊ​ອິດ​ສະ​ຫລະ ຊັ້ນ I ໃ​ຫ້​ແກ່​ປະ​ທານ​ຄະ​ນະ​ປະ​ຈໍາ ສ​ພ​ຊ ໂດຍ​ມີ​ບັນ​ດາ​ທ່ານຄະ​ນະ​ປະ​ຈ​ໍາ ສ​ພ​ຊ ​ຂຶ້ນ​ເປັນ​ສັກ​ຂີ​ພິ​ຍານ; ນອກນັ້ນ, ຍັງ​ມີ​ພິ​ທີມອບ​ຫລຽນ​ກ​າ​ລະ​ນຶກ 45 ປີຂອງ ສ​ພ​ຊ ແລະ ຫລຽນ​ກາ​ລະ​ນຶກ​ ສ​ສ​ຊ ໃຫ້​ແກ່​ອະ​ດີ​ດ​ ສ​ສ​ຊ ທີ່​ເປັນ​ການ​ນໍາ​ພັກ-ລັດ​ຂັ້ນ​ສູງ ໂດຍ​ແມ່ນ​ທ່ານ ນາງ ສວນ​ສະ​ຫວັນ​ ວິ​ຍາ​ເກດ ເລ​ຂາ​ທິ​ການ ສ​ພ​ຊ ​​ໄດ້​ຂຶ້ນຜ່ານມ​ະ​ຕິ​ຂອງ​ ຄ​ປ​ຈ.ສ​ພ​ຊ ວ່າ​ດ້ວຍ​ການມອບ​ຫລຽນ​ດັ່ງ​ກ່າວ ແລະ ເປັນ​ກຽດມອບໂດຍທ່ານ ປາ​ນີ ຢາ​ທໍ່​ຕູ້.

          ພິ​ທີ​ທີ່​ມີ​ຄວາມ​ໝາຍ​ສໍາ​ຄັນ​ຄັ້ງ​ນີ້, ​ຜູ້​ເຂົ້າ​ຮ່ວມຍັງ​ໄດ້​ຮັບ​ຟັງ​ການ​ກ່າວ​ສູນ​ທອ​ນ​ພົດ​ຈ​າກ​ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ແຫ່ງ ສ​ປ​ປ​ລາວ ເຊິ່ງ​ທ່ານ​ໄດ້​ກ່າວ​ຍ້ອງ​ຍໍ​ຊົມ​ເຊີຍ​ ແລະ ຕີ​ລາ​ຄາ​ສູງ​ຕໍ່​ຜົນ​ສໍາ​ເລັດ​ຫລາຍ​ດ້ານ​ທີ່​ສ​ະ​ພາ​ປະ​ຊາ​ຊົນ​ສູງ​ສຸດ​ໃນ​ເມື່ອ​ກ່ອນ ກໍ​ຄື ສ​ພ​ຊ ໃນ​ປັດ​ຈຸ​ບັນ​ ສາ​ມາດ​ຍາດ​ມາ​ໄດ້ ທັງ​ໃຫ້​ທິດ​ຊີ້​ນໍາ​​ເນ​ັ້ນ​ໜັກ​ບາງ​ບັນ​ຫາ​ຕໍ່​ ສ​ພ​ຊ ແລະ ສະ​ພາ​ປະ​ຊາ​ຊົນ​ຂັ້ນ​ແຂວງໃຫ້ເອົາ​ໃຈ​ໃສ່​ຕື່ມ​ອີກ​ຈໍາ​ນວນ​ໜຶ່ງ.

          ກ່ອນ​​ໜ້າທີ່ເລີ່​ມ​ພິ​ທີ​ທາງ​ການ, ຄ​ປ​ຈ.ສ​ພ​ຊ ແລະ ສ​ສ​ຊ ໄດ້​ວາ​ງ​ພວງ​ມາ​ລາ ຢູ່​ອະ​ນຸ​ສາ​ວະ​ລີ​ນັກ​ຮົບ​ນິ​ລະ​ນານ. ວາງ​ກະ​ຕ່າ​ດອກ​ໄມ້​ຢູ່​ຫໍ​ພ​ິ​ພິ​ຕະ​ພັນ​ປະ​ທານ ໄກ​ສອນ ພົມ​ວິ​ຫານ, ຮັບ​ຊົມ​ສາລະຄະດີ 45 ປີ ແຫ່ງ​ການ​ເຕີບ​ໃຫຍ່​ຂະ​ຫຍາຍ​ຕົວ​ຂອງ ສ​ພ​ຊ ແລ​ະ ຮັບ​ຊົມ​ການ​ສະ​ແດງ​ສິ​ລະ​ປະ​ອີກ​ດ້ວຍ.

          ຕອນ​ບ່າຍ​ຂ​ອງວັນ​ດຽວ​ກັນ, ສ​ພ​ຊ ຍັງ​ໄດ້​ຈັດ​ພິ​ທີ​ມອບ​ຫລຽນ​ກາ​ລະ​ນຶກ ສ​ສ​ຊ ແລະ ຍ້ອງ​ຍໍ​ຜົນ​ງານ 5 ປີ ຂອງ ສ​ສ​ຊ ຊຸ​ດ​ທີ VIII ຢູ່​ທີ່​ຫ​ໍ​ປະ​ຊຸມ​ສະ​ພາ​ແຫ່ງ​ຊາດ (ຫລັກ 6) ນ​ະ​ຄອນ​ຫລວງວຽງ​ຈັນ ໂດຍ​ການ​ເປັນ​ປະ​ທານ​ຂອງ​ທ່ານ ນາງ ປາ​ນີ ຢາ​ທໍ່​ຕູ​້; ມີບັນ​ດາ​ທ່ານ ສ​ສ​ຊ, ຄະ​ນະ​ກົມ, ຄະ​ນະ​ພະ​ແນກພາຍ​ໃນ ສ​ສ​ຊ ແລະ ພາກ​ສ່ວນ​ກ່ຽວ​ຂ້ອງ​ເຂົ້າ​ຮ່ວມ ເຊິ່ງພິ​ທີ​ມອບ​ຄັ້ງ​ນີ້ ປະ​ກອບ​ມີຫລຽນ​ໄຊ​ອິດ​ສະ​ຫລະ ຊັ້ນ II ຈ​ໍາ​ນວນ 4 ທ່ານ, ຫລຽນ​ໄຊ​ແຮງ​ງານ​ຊັ້ນ I ຈ​ໍາ​ນວນ 54 ທ່ານ, ຫລຽນ​ໄຊ​ແຮງ​ງານ​ຊັ້ນ II ຈ​ໍາ​ນວນ 72 ທ່ານ, ຫລຽນ​ໄຊ​ແຮງ​ງານ​ຊັ້ນ III ຈ​ໍາ​ນວນ 14 ທ່ານ ແລະ ຫລຽນຫລຽນ​ກາ​ລະ​ນຶກ ສ​ສ​ຊ ແລະ ຫລຽ​ນ​ກາ​ລະ​ນຶກ 45 ປີ ສ​ພ​ຊ ຈຳ​ນວນ 551 ທ່ານ ຍິງ 102 ທ່ານ.

                                                                                  ແຫຼ່ງຂ່າວທີ່ມາ: ສະພາແຫ່ງຊາດ