ສສຊ ຢ້ຽມຢາມໂຄງການກໍ່ສ້າງທາງລົດໄຟລາວ-ຈີນ
18/11/2020

(ສພຊ) ໃນໂອກາດເຂົ້າຮ່ວມກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດ ຊຸດທີ VIII,  ວັນທີ 14 ພະຈິກ 2020 ບັນດາທ່ານສະມາຊິກສະພາແຫ່ງຊາດ (ສສຊ) ນໍາໂດຍທ່ານ ສາຍທອງ ແກ້ວດວງດີ ປະທານກໍາມາທິການກົດໝາຍ ສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຢ້ຽມບໍລິສັດວິສະວະກໍາທາງລົດໄຟເລກ 2 ສປຈີນ ຢູ່ບ້ານສົງເປືອຍ,  ເມືອງນາຊາຍທອງ, ນະຄອນຫລວງວຽງຈັນ ເພື່ອຕິດຕາມກວດກາຄວາມຄືບໜ້າການກໍ່ສ້າງເສັ້ນທາງລົດໄຟລາວ-ຈີນ; ໂດຍໄດ້ຮັບການຕ້ອນຮັບຈາກທູດເສດຖະກິດ ແຫ່ງ ສປຈີນ ປະຈໍາລາວ, ຜູ້ອໍານວຍການໃຫຍ່ບໍລິສັດວິສາວະກໍາທາງລົດໄຟລາວ-ຈີນ ເລກ 2 ພ້ອມດ້ວຍພາກສ່ວນກ່ຽວຂ້ອງ.

          ໂອກາດດັ່ງກ່າວ, ຄະນະໄດ້ຮັບຟັງການລາຍງານຄວາມຄືບໜ້າການກໍ່ສ້າງເສັ້ນ ທາງລົດໄຟລາວ-ຈີນ ເຊິ່ງມາຮອດປັດຈຸບັນໂດຍລວມມີຄວາມຄືບໜ້າ 80%; ໃນນີ້, ແບ່ງເປັນຫລາຍໜ້າວຽກຍ່ອຍ ເປັນຕົ້ນ: ວຽກການວາງຂາງຂົວ ກວມຫລາຍກວ່າ 95%, ການວາງລາງລົດໄຟ ມີຄວາມຄືບໜ້າເກືອບ 56%, ວຽກລະບົບ ຄືບໜ້າ 19% ແລະ ການກໍ່ສ້າງສະຖານີ ສໍາເລັດແລ້ວ 21​% ແລະ ວຽກອື່ນໆກໍມີຄວາມຄືບໜ້າຕາມລໍາດັບ.

          ທ່ານ ສາຍທອງ ແກ້ວດວງດີ ຕາງໜ້າໃຫ້ຄະນະສະມາຊິກສະພາແຫ່ງຊາດ ໄດ້ ສະແດງຄວາມຊົມເຊີຍຕໍ່ການປະຕິບັດໜ້າທີ່ຂອງພະນັກງານທຸກຄົນ ລວມເຖິງພາກ ສ່ວນກ່ຽວຂ້ອງຕ່າງໆ ທີ່ໄດ້ເອົາໃຈໃສ່ໃນການປະຕິບັດໜ້າທີ່ຢ່າງແຂງແຮງ ໃນການກໍ່ສ້າງເສັ້ນທາງລົດໄຟລາວ-ຈີນ ເຮັດໃຫ້ໂຄງການມີຄວາມຄືບໜ້າຢ່າງຕໍ່ເນື່ອງ, ມີປະສິດທິພາບ ແລະ ມີປະສິດທິຜົນສູງ.

          ໂຄງການທາງລົດໄຟ ລາວ-ຈີນ ເລີ່ມລົງມືກໍ່ສ້າງມາແຕ່ວັນທີ 25 ທັນວາ 2016 ມີໄລຍະການກໍ່ສ້າງ 5 ປີ ແລະ ຈະເປີດນໍາໃຊ້ທ້າຍປີ 2021 ເຊິ່ງນໍາໃຊ້ງົບປະມານກໍ່ສ້າງ 37.400 ຕື້ຢວນ, ການກໍ່ສ້າງແບ່ງອອກເປັນ 2 ໄລຍະ ຄື: ແຕ່ ຢຸ່ຍຊີ ຫາ ບໍ່ຫານ ສປຈີນ ມີຄວາມຍາວ 509 ກິໂລແມັດ ແລະ ແຕ່ ບໍ່ເຕນ ຫາ ນະຄອນຫລວງວຽງຈັນ ມີຄວາມຍາວ 422 ກິໂລແມັດ ຖືກອອກແບບໃຫ້ມີຄວາມໄວ 160 ກິໂລແມັດຕໍ່ຊົ່ວໂມງ, ມີ 32 ສະຖານີ ໂດຍເປັນໂຄງການບູລິມາສິດທໍາອິດ ພາຍໃຕ້ຫົວຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ກາຍເປັນສັນຍາລັກຮ່ວມມືຮອບດ້ານລະຫວ່າງສອງປະເທດ ລາວ-ຈີນ.

          ໃນວາລະການເຄື່ອນໄຫວ ແລະ ຢ້ຽມຢາມໃນຄັ້ງນີ້ ຄະນະຍັງໄດ້ທ່ຽວຊົມຫ້ອງ ເຊື່ອມຈອດທາງລົດໄຟ, ທ່ຽວຊົມເຂດເກັບມ້ຽນລາງລົດໄຟ ແລະ ຂີ່ລົດໄຟໃນຂະບວນທົດລອງ ເພື່ອທ່ຽວຊົມທັດສະນີຍະພາບລະຫວ່າງສອງຝາກທາງ ຂອງໂຄງການກໍ່ສ້າງທາງລົດໄຟດັ່ງກ່າວ ແລະ ໃນຕອນບ່າຍຂອງວັນດຽວກັນ, ກໍໄດ້ມີ ສສຊ ຄະນະທີ່ສອງ ເຊິ່ງນໍາໂດຍ ທ່ານ ເມກສະຫວັນ ພົມພິທັກ ປະທານຄະນະ ສສຊ ປະຈໍາເຂດເລືອກຕັ້ງທີ 15 ແຂວງຈໍາປາສັກ ພ້ອມດ້ວຍຄະນະ ໄດ້ເຂົ້າຢ້ຽມຢາມບໍລິສັດວິສະວະກໍາທາງລົດໄຟເລກ 2 ສປຈີນ ເຊັ່ນກັນ.

(ສອນສັກ ວັນວິໄຊ)