ບົດກ່າວປິດກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດ ຊຸດທີ VIII
18/11/2020

ບົດກ່າວປິດກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດ ຊຸດທີ VIII ຂອງທ່ານ ນາງ ປານີ ຢາທໍ່ຕູ້, ກໍາມະການກົມການເມືອງສູນກາງພັກ, ປະທານສະພາແຫ່ງຊາດ, ວັນທີ 17 ພະຈິກ 2020

ຂໍຮຽນ:      - ທ່ານ ບຸນຍັງ ວໍລະຈິດ, ເລຂາທິການໃຫຍ່ຄະນະບໍລິຫານ                  ງານສູນກາງພັກ, ປະທານປະເທດ ທີ່ເຄົາລົບ ແລະ ນັບຖື                ຢ່າງສູງ,

              - ບັນດາທ່ານຜູ້ນໍາ, ອາດີດການນໍາພັກ-ລັດ ທີ່ນັບຖື.

              - ບັນດາທ່ານສະມາຊິກສະພາແຫ່ງຊາດ, ທ່ານແຂກທີ່ມີ              ກຽດ ທີ່ນັບຖື ແລະ ຮັກແພງ.

 

    ກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດ ໄດ້ດໍາເນີນມາເປັນເວລາ 16 ວັນ, ບົນພື້ນຖານ ການເສີມຂະຫຍາຍສິດປະຊາທິປະໄຕ, ຄວາມຮັບຜິດຊອບການເມືອງຂອງສະມາຊິກສະພາແຫ່ງຊາດ, ມາຮອດນີ້ ກອງປະຊຸມ ໄດ້ບັນລຸຜົນສໍາເລັດຕາມຄາດໝາຍທີ່ວາງໄວ້.

ກອງປະຊຸມ ໄດ້ໃຊ້ເວລາ 4 ວັນ ເພື່ອພິຈາລະນາ ບົດລາຍງານຂອງລັດຖະບານ ກ່ຽວກັບ ສະພາບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ປະຈໍາປີ 2020 ແລະ ທິດທາງປະຈໍາປີ 2021. ກອງປະຊຸມ ຕີລາຄາສູງ ຕໍ່ຄວາມພະຍາຍາມຂອງລັດຖະບານ ທີ່ໄດ້ສູ້ຊົນຈັດຕັ້ງປະຕິບັດແຜນດັ່ງກ່າວ ໃນສະພາບແວດລ້ອມ ສາກົນ ແລະ ພາກພື້ນມີຄວາມຫຍຸ້ງຍາກ ແລະ ມີສິ່ງທ້າທາຍຫຼາຍປະການ ຊຶ່ງໄດ້ສົ່ງຜົນກະທົບໂດຍກົງ ຕໍ່ການຈັດຕັ້ງປະຕິບັດບັນດາຄາດໝາຍ ແລະ ທິດທາງທີ່ໄດ້ກໍານົດໄວ້ໃນແຜນພັດທະນາເສດຖະກິດ-ສັງຄົມ ປະຈໍາປີ 2020 ເປັນຕົ້ນແມ່ນ: ການແຜ່ລະບາດຂອງພະຍາດໂຄວິດ-19 ຊຶ່ງໄດ້ສົ່ງຜົນກະທົບຢ່າງໜັກໜ່ວງ ຕໍ່ທຸກຂົງເຂດວຽກງານ ກໍຄື ການດໍາລົງຊີວິດຂອງປະຊາຊົນ, ການຜະລິດ-ການບໍລິການທຸລະກິດ, ຄວາມຫຍຸ້ງຍາກທາງດ້ານການເງິນ-ເງິນຕາ ແລະ ໄພພິບັດທໍາມະຊາດ ທີ່ເກີດຂຶ້ນຢ່າງຕໍ່ເນື່ອງຢູ່ໃນຫຼາຍທ້ອງຖິ່ນ ເປັນຕົ້ນແມ່ນ ຢູ່ບັນດາແຂວງພາກກາງ ແລະ ພາກໃຕ້;  ແຕ່ພາຍໃຕ້ການຊີ້ນໍາ-ນໍາພາຂອງກົມການ ເມືອງສູນກາງພັກ, ດ້ວຍຄວາມຮັບຜິດຊອບສູງ ຂອງລັດຖະບານ, ບັນດາຂະແໜງ ການ, ອົງການປົກຄອງທ້ອງຖິ່ນແຕ່ລະຂັ້ນ ແລະ ດ້ວຍການສະໜັບສະໜູນ, ການຮ່ວມມືຢ່າງກວ້າງຂວາງ ຈາກທຸກພາກສ່ວນເສດຖະກິດ ແລະ ປະຊາຊົນລາວບັນດາເຜົ່າ, ເຮັດໃຫ້ການຈັດຕັ້ງປະຕິບັດ ຫຼາຍຄາດໝາຍບັນລຸຕາມແຜນທີ່ກໍານົດໄວ້. ກອງປະຊຸມສະເໜີ ມາຍັງລັດຖະບານ ຮີບຮ້ອນ ສຸມໃສ່ຈັດຕັ້ງຜັນຂະຫຍາຍບັນດານະໂຍບາຍ ແລະ ມາດຕະການ ທີ່ໄດ້ສະເໜີຕໍ່ກອງປະຊຸມຄັ້ງນີ້ ເພື່ອຮັບປະກັນເຮັດໃຫ້ການຈັດຕັ້ງປະຕິບັດແຜນປະຈໍາປີ 2020 ທີ່ຍັງເຫຼືອ ແລະ ທິດທາງປະຈໍາປີ 2021 ໃຫ້ບັນລຸບັນຕາມແຜນການທີ່ກໍານົດໄວ້; ສືບຕໍ່ຊີ້ນໍາບັນດາຂະແໜງການ, ອົງການປົກຄອງທ້ອງຖິ່ນທຸກຂັ້ນ ຍົກສູງຄວາມຮັບຜິດຊອບ ແລະ ເພີ່ມທະວີຄວາມສາມັກຄີເປັນປຶກແຜນ ຂອງທຸກພາກສ່ວນເສດຖະກິດ ແລະ ປະຊາຊົນລາວບັນດາ ເຜົ່າ ຜ່ານຜ່າຂໍ້ຫຍຸ້ງຍາກ, ຫັນສິ່ງທ້າທາຍ ໃຫ້ກາຍເປັນກາລະໂອກາດ ດ້ວຍການເສີມຂະຫຍາຍຈິດໃຈເປັນເຈົ້າຕົນເອງ, ເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ດ້ວຍຄໍາຂວັນ “ລາວທ່ຽວລາວ, ລາວຊົມໃຊ້ຜະລິດຕະພັນລາວ” ນັບມື້ກວ້າງ ຂວາງອອກໃນສັງຄົມ; ສຸມໃສ່ແກ້ໄຂ ຄວາມຫຍຸ້ງຍາກທາງດ້ານເສດຖະກິດ-ການເງິນ-ເງິນຕາ, ການສ້າງວຽກເຮັດງານທໍາ, ຊ່ວຍເຫຼືອຜູ້ປະສົບໄພພິບັດ ຢູ່ບັນດາແຂວງພາກກາງ ແລະ ພາກໃຕ້ ໃຫ້ຄືນສູ່ສະພາບປົກກະຕິ, ກະກຽມການຜະລິດລະດູແລ້ງໃຫ້ກວ້າງຂວາງ ແລະ ເປັນຂະບວນຟົດຟື້ນ ເພື່ອຮັບປະກັນທາງດ້ານສະບຽງອາຫານ, ມີສິນຄ້າຊົມໃຊ້ພາຍໃນ ແລະ ມີສ່ວນສົ່ງອອກ; ສືບຕໍ່ເອົາໃຈໃສ່ປັບປຸງແກ້ໄຂກົນໄກ ການບໍລິຫານລັດ, ການຄຸ້ມຄອງເສດຖະກິດ-ສັງຄົມ ຂອງຂະແໜງການຂັ້ນສູນກາງ ແລະ ທ້ອງຖິ່ນ ໃຫ້ເຂັ້ມງວດຕາມກົດໝາຍ ແລະ ມີຄວາມຄ່ອງຕົວດີຂຶ້ນ.

    ກອງປະຊຸມ ໄດ້ຮັບຟັງການຊີ້ແຈງອະທິບາຍ ຈາກ 5 ກະຊວງ, ອົງການ ໃນບັນຫາທີ່ພົ້ນເດັ່ນ ທີ່ສົ່ງຜົນກະທົບຕໍ່ການຈັດຕັ້ງປະຕິບັດ ແຜນພັດທະນາເສດຖະ ກິດ-ສັງຄົມ ເປັນຕົ້ນ: ການສະໜອງແຫຼ່ງທຶນເພື່ອສົ່ງເສີມທຸລະກິດຂະໜາດນ້ອຍ-ຂະໜາດກາງ, ການປະຕິບັດບາງຕົວຊີ້ວັດທາງດ້ານການສຶກສາ, ສາທາລະນະສຸກ ທີ່ມີລັກສະນະທົດຖອຍລົງ. ກອງປະຊຸມ ສະເໜີມາຍັງລັດຖະບານ ສືບຕໍ່ຊີ້ນໍາຂະແໜງ ການທີ່ກ່ຽວຂ້ອງ ຍົກສູງຄວາມຮັບຜິດຊອບການເມືອງຂອງພະນັກງານ ໃນແຕ່ລະຂັ້ນ, ເອົາໃຈໃສ່ສຸມແກ້ໄຂສິ່ງກີດຂວາງ ບົນພື້ນຖານປະສານສົມທົບກັບຂະແໜງ ການ ແລະ ອົງການປົກຄອງທ້ອງຖິ່ນ, ການສຶກສາອົບຮົມ ແລະ ຍົກສູງສະຕິຕືນຕົວເປັນເຈົ້າຂອງປະຊາຊົນ ເຂົ້າຮ່ວມກັບພາກລັດ ເພື່ອສູ້ຊົນ ບັນລຸບັນດາຄາດໝາຍທີ່ວາງໄວ້, ເຮັດໃຫ້ປະເທດຊາດ ຫຼຸດພົ້ນອອກຈາກສະຖານະພາບດ້ອຍພັດທະນາໃນຊຸມປີຕໍ່ໜ້າ.

ກອງປະຊຸມ ໄດ້ຮັບຟັງການລາຍງານຜົນການຕິດຕາມກວດກາ ກ່ຽວກັບ ການ ຈັດຕັ້ງປະຕິບັດກົດໝາຍ ຕິດພັນກັບການຄຸ້ມຄອງການບໍລິການຮ້ານກິນດື່ມ ແລະ ຮ້ານບັນເທີງ; ໂດຍຜ່ານການຕິດຕາມກວດກາ, ກອງປະຊຸມເຫັນວ່າ ວຽກງານຄຸ້ມຄອງບໍລິການຮ້ານກິນດື່ມ ແລະ ຮ້ານບັນເທີງ ໄດ້ຫັນເຂົ້າສູ່ການຄຸ້ມຄອງຕາມລະບຽບກົດໝາຍດີຂຶ້ນ, ສ້າງໄດ້ວຽກເຮັດງານທໍາ, ສ້າງລາຍຮັບໃຫ້ແກ່ປະຊາຊົນ. ກອງປະຊຸມສະເໜີມາຍັງລັັັດຖະບານ ເອົາໃຈໃສ່ຊີ້ນໍາ ຂະແໜງການກ່ຽວຂ້ອງທຸກຂັ້ນ ເຂັ້ມງວດກວດກາ ການອະນຸຍາດ ແລະ ການເຄື່ອນໄຫວຂອງບັນດາຮ້ານບັນເທີງຢູ່ບາງທ້ອງຖິ່ນ ໃຫ້ຖືກຕ້ອງຕາມກົດໝາຍ ແລະ ໃຫ້ມີຄວາມສົມດູນກັບການຂະ ຫຍາຍຕົວທາງດ້ານເສດຖະກິດຂອງທ້ອງຖິ່ນ, ຈໍາກັດປາກົດການຫຍໍ້ທໍ້ ທີ່ເກີດຂຶ້ນໃນການບໍລິການຮ້ານບັນເທີງໃຫ້ລຸດລົງ.

ກອງປະຊຸມ ໄດ້ຮັບຮອງເອົາຜັງລວມຕົວເມືອງນະຄອນຫຼວງວຽງຈັນ ເພື່ອເປັນພື້ນຖານໃຫ້ແກ່ລັດຖະບານ ນໍາໄປຊີ້ນໍາຂະແໜງການກ່ຽວຂ້ອງ ກໍຄື ນະຄອນຫຼວງວຽງຈັນ ຈັດຕັ້ງຜັນຂະຫຍາຍເປັນ ໂຄງການລະອຽດ ໃຫ້ເປັນຮູບປະທໍາ ແລະ ຖືກຕ້ອງຕາມກົດໝາຍທີ່ກ່ຽວຂ້ອງ, ຮັກສາໄວ້ໄດ້ ເອກະລັກທາງດ້ານສິນລະປະ, ວັດທະນະທໍາ, ສະຖາປັດຕະຍະກໍາຂອງລາວ, ຮັບປະກັນການພັດທະນາໄປຄຽງຄູ່ກັບການອະນຸລັກຮັກສາສິ່ງແວດລ້ອມ ແລະ ທໍາມະຊາດ ໃຫ້ມີຄວາມສວຍງາມ, ຍືນຍົງ ແລະ ມີຄວາມເປັນລະບຽບຮຽບຮ້ອຍ.

ກອງປະຊຸມ ໄດ້ພິຈາລະນາ ແລະ ຮັບຮອງເອົາການສະເໜີຂອງທ່ານນາຍົກ ລັດຖະມົນຕີ ກ່ຽວກັບ ການແຕ່ງຕັ້ງສະມາຊິກລັດຖະບານ 2 ທ່ານຄື: ທ່ານ ທອງຈັນ ມະນີໄຊ ເປັນລັດຖະມົນຕີກະຊວງພາຍໃນ ແລະ ແຕ່ງຕັ້ງ ທ່ານ ຄໍາເຈນ ວົງໂພສີ ເປັນລັດຖະມົນຕີ, ຫົວໜ້າຫ້ອງວ່າການສໍານັກງານນາຍົກ ລັດຖະມົນຕີ, ຊຶ່ງເປັນການເພີ່ມບຸກຄະລາກອນທີ່ມີຄວາມຮູ້, ຄວາມສາມາດເຂົ້າໃນຄະນະລັດຖະບານ ເພື່ອຮັບ ປະກັນການບໍລິຫານລັດຢູ່ຂັ້ນສູນກາງໃຫ້ມີຄຸນນະພາບ ແລະ ມີປະສິດທິຜົນ

ກອງປະຊຸມ ສະແດງຄວາມຊົມເຊີຍມາຍັງ ອົງການກວດສອບແຫ່ງລັດ ແລະ ອົງການກວດກາລັດ ທີ່ໄດ້ມີຄວາມພະຍາຍາຍາມ ເຄື່ອນໄຫວວຽກງານຕາມພາລະບົດບາດໄດ້ເປັນຢ່າງດີ ແລະ ໄດ້ສະໜອງຂໍ້ມູນທີ່ສໍາຄັນ ໃຫ້ແກ່ກອງປະຊຸມສະພາແຫ່ງຊາດ ໄດ້ພິຈາລະນາຮັບຮອງເອົາ. ກອງປະຊຸມສະແດງຄວາມຊົມເຊີຍຕໍ່ລັດຖະ ບານ ທີ່ໄດ້ ເອົາໃຈໃສ່ຊີ້ນໍາ ບັນດາເປົ້າໝາຍທີ່ຖືກກວດສອບ ແກ້ໄຂຜົນການກວດສອບ ແລະ ຜົນການກວດກາຕາມຜົນການກວດສອບ, ສ້າງໄດ້ສະຕິ ຕໍ່ວິໄນແຜນ ການ-ການເງິນ ແລະ ເຂັ້ມງວດໃນການປະຕິບັດລະບຽບກົດໝາຍກ່ຽວຂ້ອງດີຂຶ້ນ. ກອງປະຊຸມ ສະເໜີໃຫ້ອົງການກວດສອບແຫ່ງລັດ ສືບຕໍ່ເອົາໃຈໃສ່ປັບປຸງ ແລະ ປະກາດໃຊ້ບັນດານິຕິກໍາລຸ່ມກົດໝາຍອັນລະອຽດ ເພື່ອເພີ່ມເຄື່ອງມືໃຫ້ແກ່ນັກກວດສອບ ປະຕິບັດໜ້າທີ່ຄ່ອງຕົວ ແລະ ຖືກຕ້ອງຕາມຫຼັກການເຄື່ອນໄຫວຂອງການກວດສອບ, ພ້ອມທັງເພີ່ມທະວີ ກົນໄກປະສານງານພາຍໃນ ກໍຄື ກັບພາກສ່ວນທີ່ກ່ຽວຂ້ອງ ໃນການແກ້ໄຂຜົນການກວດສອບໃຫ້ມີຄວາມໂລ່ງລ່ຽນ, ວ່ອງໄວຂຶ້ນ; ສຸມໃສ່ບໍາລຸງສ້າງບຸກຄະລາກອນ ທາງດ້ານວິຊາສະເພາະ ໄປຄວບຄູ່ກັບດ້ານການ ເມືອງແນວຄິດ, ຄວາມຮັບຜິດຊອບ, ຈັນຍາບັນ ເພື່ອຮັບປະກັນການຈັດຕັ້ງປະຕິບັດວຽກງານກວດສອບໃຫ້ມີຄຸນນະພາບສູງຂຶ້ນ.

ກອງປະຊຸມ ສະແດງຄວາມຊົມເຊີຍ ຕໍ່ຜົນສໍາເລັດ ໃນ 1 ປີ ຜ່ານມາຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ ຍາດມາໄດ້; ກອງປະຊຸມສະເໜີມາຍັງ ສອງອົງການດັ່ງກ່າວ, ສືບຕໍ່ເອົາໃຈໃສ່ ຍົກລະດັບຄວາມຮູ້ຄວາມສາມາດ ຂອງພະນັກງານ ໄປຄຽງຄູ່ກັບການຝຶກຝົນຫຼໍ່ຫຼອມ ທາງດ້ານຄຸນທາດການເມືອງ, ຄຸນສົມບັດສິນທໍາປະຕິວັດ, ປັບປຸງລະບອບແບບແຜນວິທີເຮັດວຽກ ແລະ ເພີ່ມທະວີຍົກສູງຄວາມຮັບຜິດຊອບ ຊີ້ນໍາ, ຕິດຕາມກວດກາ ການປະຕິບັດໜ້າທີ່ຂອງພະນັກງານຂັ້ນລຸ່ມຕົນ ເປັນປົກກະຕິ, ຍົກສູງນໍ້າໃຈບໍລິການ ຮັບໃຊ້ປະຊາຊົນ ດ້ວຍຄວາມຊື່ສັດ, ຈໍາກັດປາກົດການຫຍໍ້ທໍ້ທີ່ເກີດຂຶ້ນຢູ່ໃນຖັນແຖວສະມາຊິກພັກ, ພະນັກງານຈໍານວນໜຶ່ງ ໃຫ້ຫຼຸດລົງເທື່ອລະກ້າວ; ເອົາໃຈໃສ່ ປັບປຸງກົນໄກການປະສານງານ ລະຫວ່າງ ສອງອົງການດ້ວຍກັນ ແລະ ການປະສານງານ ກັບ ອົງການລັດທີ່ກ່ຽວຂ້ອງແຕ່ລະຂັ້ນ ໃຫ້ມີຄວາມໂລ່ງລ່ຽນ, ວ່ອງໄວ ເພື່ອຮັບປະກັນໃຫ້ການດໍາເນີນຄະດີຖືກຕ້ອງຕາມກົດໝາຍ ແລະມີຄວາມຍຸຕິທໍາ.

ກອງປະຊຸມສະແດງຄວາມຊົມເຊີຍ ຄະນະປະຈໍາສະພາແຫ່ງຊາດ ໃນຖານະທີ່ເປັນອົງການປະຈໍາການ ຂອງສະພາແຫ່ງຊາດ ໄດ້ເອົາໃຈໃສ່ ຊີ້ນໍາ-ນໍາພາການເຄື່ອນ ໄຫວວຽກງານ ຂອງສະພາແຫ່ງຊາດ ນັບມື້ໄດ້ຮັບການປັບປຸງມີຄຸນນະພາບດີຂຶ້ນເປັນກ້າວໆ. ກອງປະຊຸມ ສະແດງຄວາມຂອບໃຈ ແລະ ຊົມເຊີຍມາຍັງຄະນະພັກ, ອົງການປົກຄອງທ້ອງຖິ່ນ ທີ່ໄດ້ໃຫ້ການຊີ້ນໍາ ແລະ ຮ່ວມມືກັບ ຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ຈັດຕັ້ງປະຕິບັດວຽກງານຂອງສະພາແຫ່ງຊາດຢູ່ແຕ່ລະທ້ອງຖິ່ນມີຜົນສໍາເລັດເປັນຢ່າງດີ, ສ້າງໄດ້ຄວາມເປັນເອກະພາບ ແລະ ຄວາມຕັດສິນໃຈສູງຮ່ວມກັນ ລະຫວ່າງ ອົງການບໍລິຫານລັດ ແລະ ອົງການຕົວແທນຂອງປະຊາຊົນຢູ່ຂັ້ນທ້ອງຖິ່ນ ໃນການແກ້ໄຂຂໍ້ຫຍຸ້ງຍາກ, ສິ່ງທ້າທາຍ ກໍຄື ການສູ້ຊົນ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ບັນດາແຜນວຽກທີ່ວາງອອກຢູ່ຂັ້ນທ້ອງຖິ່ນ ມີຜົນສໍາເລັດຫຼາຍຂຶ້ນ.

ກອງປະຊຸມ ສະແດງຄວາມຂອບໃຈ ແລະ ຊົມເຊີຍມາຍັງອົງການແນວລາວສ້າງຊາດ ແລະ ບັນດາອົງການຈັດຕັ້ງມະຫາຊົນຂັ້ນສູນກາງ ທີ່ໄດ້ຕາງໜ້າປະຊາຊົນລາວບັນດາຊັ້ນຄົນໃນທົ່ວປະເທດ ປະກອບຄວາມຄິດຄວາມເຫັນ ຕໍ່ການເຄື່ອນໄຫວວຽກງານຂອງສະພາແຫ່ງຊາດ ກໍຄື ສະມາຊິກສະພາແຫ່ງຊາດ, ພ້ອມທັງນໍາເອົາຄວາມຄິດເຫັນ ແລະ ຄໍາສະເໜີຂອງປະຊາຊົນບັນດາຊັ້ນຄົນມາຍັງ ສະພາແຫ່ງຊາດ. ກອງປະຊຸມຂໍນໍາເອົາບັນຫາ ແລະ ຂໍ້ສະເໜີດັ່ງກ່າວ ໄປຍັງຂະແໜງການ ແລະ ອົງ ການປົກຄອງທ້ອງຖິ່ນ ທີ່ກ່ຽວຂ້ອງ ພິຈາລະນາແກ້ໄຂ.

ກອງປະຊຸມ ໄດ້ຮັບຮອງເອົາກົດໝາຍຈໍານວນ 5 ສະບັບ ດ້ວຍຄະແນນສຽງສ່ວນຫຼາຍ, ເພື່ອເພີ່ມເຄື່ອງມືຄຸ້ມຄອງລັດໃຫ້ແກ່ຂະແໜງການທີ່ກ່ຽວຂ້ອງ ເປັນຕົ້ນແມ່ນ: ກົດໝາຍວ່າດ້ວຍຊັ້ນນັກການທູດ, ກົດໝາຍວ່າດ້ວຍຊາວໜຸ່ມລາວ, ກົດ     ໝາຍວ່າດ້ວຍການຮ່ວມມືລະຫວ່າງປະເທດ ທາງອາຍາ, ກົດໝາຍວ່າດ້ວຍການສຶກສາຊັ້ນສູງ ແລະ ກົດໝາຍວ່າດ້ວຍການກວດສອບແຫ່ງລັດ, ຮັບປະກັນ ເຮັດໃຫ້ການເຄື່ອນໄຫວວຽກຂອງຂະແໜງການດັ່ງກ່າວ ນັບມື້ຫັນເຂົ້າສູ່ລະບຽບກົດໝາຍ ແລະ ມີຄຸນນະພາບດີຂຶ້ນ.

 

ບັນດາທ່ານຜູ້ນໍາພັກລັດ, ທ່ານຍິງ ທ່ານຊາຍ ທີ່ນັບຖື

    ໃນກອງປະຊຸມຄັ້ງນີ້, ນອກຈາກໄດ້ພິຈາລະນາ ຮັບຮອງເອົາບັນຫາພື້ນຖານທີ່ສໍາຄັນຂອງຊາດແລ້ວ, ຍັງໄດ້ຮັບຟັງ ແລະ ປະກອບຄໍາເຫັນເບື້ອງຕົ້ນ ໃສ່ຮ່າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ແລະ ຮ່າງແຜນ ການເຄື່ອນ ໄຫວວຽກງານຂອງສະພາແຫ່ງຊາດ 5 ປີ (2021-2025). ກອງປະຊຸມ ສະເໜີມາຍັງລັດຖະບານ ແລະ ຄະນະປະຈໍາສະພາແຫ່ງຊາດ ຈົ່ງໄດ້ ຊີ້ນໍາກະຊວງ ແລະ ກໍາມາທິການກ່ຽວຂ້ອງ ນໍາເອົາຄວາມຄິດເຫັນຂອງສະມາຊິກສະພາແຫ່ງຊາດໄປປັບປຸງເຂົ້າໃສ່ແຜນດັ່ງກ່າວ ແລະ ສືບຕໍ່ຄົ້ນຄວ້າໃຫ້ເລິກເຊິ່ງຕໍ່ແຕ່ລະບັນຫາ ເພື່ອກໍານົດບັນດາຄາດໝາຍ, ທິດທາງ, ວຽກງານຈຸດສຸມໃນແຕ່ລະດ້ານໃຫ້ມີຄວາມຊັດເຈນ ແລະ ສອດຄ່ອງກັບ ຄວາມຮຽກຮ້ອງຕ້ອງການ ໃນການພັດທະນາເສດຖະກິດ-ສັງຄົມ, ຄວາມອາດສາມາດຕົວຈິງທາງດ້ານທຶນຮອນ ໃນໄລຍະ 5 ປີຕໍ່ໜ້າ, ເພື່ອ ສາມາດນໍາໄປພິຈາລະນາ ແລະ ຮັບຮອງເອົາຢູ່ໃນກອງຊຸມຄັ້ງປະຖົມມະລຶກ ຂອງສະພາແຫ່ງຊາດ ຊຸດທີ IX ທີ່ຈະມາເຖິງ.

        ກອງປະຊຸມ ຍັງໄດ້ຮັບຟັງການລາຍງານ ກ່ຽວກັບ ການກະກຽມວຽກງານເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະສະມາຊິກສະພາປະຊາຊົນຂັ້ນແຂວງ ຊຸດທີ II. ກອງປະຊຸມຮຽກຮ້ອງມາຍັງບັນດາກະຊວງ, ອົງການທຽບເທົ່າ, ອົງການປົກຄອງທ້ອງຖິ່ນທຸກຂັ້ນ ຈົ່ງໄດ້ເອົາໃຈໃສ່ຊີ້ນໍາ-ນໍາພາ ແລະ ກະກຽມເງື່ອນ ໄຂຮອບດ້ານ ເພື່ອຮັບປະກັນໃຫ້ແກ່ການເລືອກຕັ້ງຄັ້ງນີ້ ບັນລຸຜົນສໍາເລັດຕາມຄາດໝາຍທີ່ວາງໄວ້.

 

ບັນດາທ່ານທີ່ນັບຖື ແລະຮັກແພງ

    ສະພາແຫ່ງຊາດຊຸດທີ VIII ໃກ້ຈະໝົດວາລະໄປອີກບໍ່ເທົ່າໃດເດືອນຂ້າງໜ້ານີ້, ຕະຫຼອດໄລຍະ 5 ປີຜ່ານມາ, ໃນຖານະເປັນອົງການຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນ, ສະມາຊິກສະພາແຫ່ງຊາດ ໄດ້ເອົາໃຈໃສ່ຍົກສູງຄວາມຮັບຜິດຊອບການເມືອງ ຈັດຕັ້ງປະຕິບັດສິດ ແລະ ໜ້າທີ່ຂອງຕົນຕາມກົດໝາຍໄດ້ຢ່າງຄົບຖ້ວນ, ເສີມຂະຫຍາຍສິດປະຊາທິປະໄຕ ເຂົ້າໃນການຄົ້ນຄວ້າ, ພິຈາລະນາ ແລະ ຕົກລົງບັນຫາສໍາຄັນຂອງຊາດ, ລົງເລິກໃກ້ຊິດຕິດແທດ ແລະ ຮັບຟັງຄວາມຄິດເຫັນຂອງປະຊາຊົນ ເພື່ອສະເໜີໃຫ້ພາກສ່ວນກ່ຽວຂ້ອງ ພິຈາລະນາແກ້ໄຂ. ຜ່ານການເຄື່ອນໄຫວວຽກງານໃນສະພາຊຸດນີ້, ສະມາຊິກສະພາແຫ່ງຊາດແຕ່ລະທ່ານ, ລ້ວນແຕ່ໄດ້ມີຄວາມເຕີບໃຫຍ່ໃນຂະບວນການເຮັດວຽກຕົວຈິງ ແລະ ມີຄວາມພູມໃຈທີ່ຕົນເອງ ໄດ້ປະກອບສ່ວນເຮັດໃຫ້ບົດບາດ ຂອງສະພາແຫ່ງຊາດ ສູງເດັ່ນຂຶ້ນ ທັງຢູ່ພາຍໃນ ແລະຕ່າງປະເທດ. ຕາງໜ້າໃຫ້ຄະນະປະຈໍາສະພາແຫ່ງຊາດ, ຂ້າພະເຈົ້າ ຂໍສະແດງຄວາມຂອບໃຈ ແລະ ຍ້ອງຍໍສັນລະເສີນ ບັນດາທ່ານສະມາຊິກສະພາແຫ່ງຊາດ ທີ່ໄດ້ສໍາເລັດໜ້າທີ່ອັນມີກຽດສະຫງ່າຂອງຕົນ. ຂ້າພະເຈົ້າ ມີຄວາມຫວັງຢ່າງຍິ່ງວ່າ, ສະມາຊິກສະພາແຫ່ງຊາດແຕ່ລະທ່ານ ຈະມີຄວາມຊົງຈໍາທີ່ດີ ຕະ ຫຼອດໄລຍະການຮ່ວມເຄື່ອນໄຫວວຽກງານ ໃນສະພາແຫ່ງຊາດຊຸດນີ້ ແລະ ຈະສືບ ຕໍ່ປະກອບສ່ວນຄວາມຮູ້ຄວາມສາມາດຂອງຕົນ ເຂົ້າໃນພາລະກິດປົກປັກຮັກສາ ແລະ ສ້າງພັດທະນາປະເທດຊາດ ເພື່ອຄວາມສົມບູນພູນສຸກຂອງປະຊາຊົນລາວບັນດາເຜົ່າ ແລະ ຄວາມຈະເລີນຮຸ່ງເຮືອງວັດທະນາຂອງປະເທດຊາດລາວເຮົາ.

    ນະໂອກາດນີ້, ຕາງໜ້າໃຫ້ສະພາແຫ່ງຊາດ, ຂ້າພະເຈົ້າ ຂໍສະແດງຄວາມຮູ້ບຸນຄຸນ ແລະ ຂອບໃຈຢ່າງສູງມາຍັງທ່ານ ບຸນຍັງ ວໍລະຈິດ, ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ, ພ້ອມດ້ວຍບັນດາທ່ານຜູ້ນໍາພັກລັດ ທີ່ໄດ້ໃຫ້ທິດຊີ້ນໍາຢ່າງຮອບດ້ານ ຕໍ່ການເຄື່ອນ ໄຫວວຽກງານ ຂອງສະພາແຫ່ງຊາດ ຊຸດທີ VIII ຕະຫຼອດ ໄລຍະ 5 ປີຜ່ານມາ. ສະແດງຄວາມຂອບໃຈມາຍັງລັດຖະ ບານ, ສານປະຊາຊົນສູງສຸດ, ອົງການໄອຍະການປະຊາຊົນສູງສຸດ, ສະພາປະຊາຊົນຂັ້ນແຂວງ, ອົງການກວດສອບແຫ່ງລັດ, ອົງການແນວລາວສ້າງຊາດ, ບັນດາອົງການຈັດຕັ້ງມະຫາຊົນ, ອົງການປົກຄອງທ້ອງຖິ່ນທຸກຂັ້ນ, ສື່ມວນຊົນ, ກົມກອງຕ່າງໆທີ່ກ່ຽວຂ້ອງ ຕະຫຼອດເຖິງພະນັກງານປະຕິວັດອາວຸໂສ, ປະຊາຊົນລາວບັນດາ ເຜົ່າທຸກຊັ້ນຄົນ, ທຸກພາກສ່ວນເສດຖະກິດທັງພາຍໃນ ແລະຕ່າງປະເທດ ແລະ ເພື່ອນມິດສາກົນ ທີ່ໄດ້ໃຫ້ການຮ່ວມມື, ການສະໜັບສະໜູນສະພາແຫ່ງຊາດ ຊຸດທີ VIII ໄດ້ເຮັດສໍາເລັດໜ້າທີ່ຕາມທີ່ພັກ-ລັດ ແລະ ປະຊາຊົນມອບໝາຍໃຫ້.

    ກອງປະຊຸມ ຮຽກຮ້ອງມາຍັງພະນັກງານ, ສະມາຊິກພັກ, ທະຫານ, ຕຳຫຼວດ ແລະປະຊາຊົນລາວບັນດາເຜົ່າ ແລະ ທຸກພາກສ່ວນເສດຖະກິດ ທັງພາຍໃນ ແລະຕ່າງປະເທດ ຈົ່ງໄດ້ເຊື່ອມຊືມ ແລະ ຈັດຕັ້ງຜັນຂະຫຍາຍ ບັນດາມະຕິ ແລະ ກົດ      ໝາຍ ທີ່ໄດ້ຮັບຮອງໃນກອງປະຊຸມຄັ້ງນີ້ ໃຫ້ເປັນແຜນວຽກອັນລະອຽດຂອງຕົນ, ພ້ອມທັງ ອອກແຮງແຂ່ງຂັນສ້າງຜົນງານ ເພື່ອຂໍ່ານັບຮັບຕ້ອນວັນບຸນສໍາຄັນຂອງຊາດ ກໍຄື ສ້າງຂະບວນການຕ້ອນຮັບກອງປະຊຸມໃຫຍ່ຜູ້ແທນທົ່ວປະເທດ ຂອງພັກ ຄັ້ງທີ XI ທີ່ຈະໄຂຂຶ້ນໃນມໍ່ໆນີ້.

    ໃນໂອກາດນີ້, ຕາງໜ້າໃຫ້ສະພາແຫ່ງຊາດ, ຂ້າພະເຈົ້າ ຂໍອວຍພອນໄຊ ອັນປະເສີດມາຍັງ ທ່ານ ບຸນຍັງ ວໍລະຈິດ, ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ພ້ອມດ້ວຍບັນດາທ່ານຜູ້ນໍາ, ອາດີດການນໍາຂັ້ນສູງ, ນັກປະຕິວັດອາວຸໂສ, ພະນັກງານ, ທະຫານ, ຕຳຫຼວດ ແລະປະຊາຊົນລາວບັນດາເຜົ່າ ໃນທົ່ວປະເທດ, ຈົ່ງມີສຸຂະພາບເຂັ້ມແຂງ, ມີຄວາມຜາສຸກໃນຊີວິດ ແລະ ປະສົບຜົນສໍາເລັດ ໃນໜ້າທີ່ວຽກງານອັນມີກຽດຂອງບັນດາທ່ານ, ພ້ອມກັນປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດລາວເຮົາ ໃຫ້ມີຄວາມຈະເລີນຮຸ່ງເຮືອງ.

   ໃນນາມປະທານກອງປະຊຸມ, ຂ້າພະເຈົ້າ ຂໍປະກາດອັດກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ VIII ຢ່າງເປັນທາງການ ນັບແຕ່ເວລານີ້ ເປັນຕົ້ນໄປ.  

(ຂໍຂອບໃຈ)