ຖະແຫຼງຂ່າວກ່ຽວກັບການແຕ່ງຕັ້ງຄະນະກຳມະການເລືອກຕັ້ງລະດັບຊາດ
19/11/2020

           (ສພຊ) ໃນຕອນບ່າຍຂອງວັນທີ 30 ຕຸລາ 2020 ທີ່ສະພາແຫ່ງຊາດ (ຫລັກ 6) ນະຄອນຫລວງວຽງຈັນ, ທ່ານ ສົມພູ ດວງສະຫວັນ ຄະນະປະຈຳສະພາແຫ່ງຊາດ, ປະທານກຳມາທິການວັດທະນາທຳ-ສັງຄົມ ກຳມະການອະນຸກຳມະການເລ ຂານຸການ ທັງເປັນໂຄສົກຂອງຄະນະກຳມະການເລືອກຕັ້ງລະດັບຊາດ ໄດ້ຈັດພິທີຖະແຫລງຂ່າວຕໍ່ສື່ມວນຊົນ ທັງພາຍໃນ ແລະ ຕ່າງປະເທດ ກ່ຽວກັບການແຕ່ງຕັ້ງຄະນະກຳມະການເລືອກຕັ້ງລະດັບຊາດ ແລະ ບັນດາອະນຸກຳມະການຂອງຄະນະກຳມະການເລືອກຕັ້ງລະດັບຊາດ ເຊິ່ງຈະຈັດຂຶ້ນໃນຕົ້ນປີ 2021 ທີ່ຈະມາເຖິງນີ້.

            ທ່ານ ສົມພູ ດວງສະຫວັນ ກ່າວວ່າ: ອີງຕາມລັດຖະທຳມະນູນ ແຫ່ງ ສປປລາວ (ສະບັບປັບປຸງ ປີ 2015) ມາດຕາ 54 ແລະ ກົດໝາຍວ່າດ້ວຍສະພາແຫ່ງຊາດລາວ (ສະບັບປັບປຸງ ປີ 2015) ມາດຕາ 06 ກ່ຽວກັບອາຍຸການຂອງສະພາແຫ່ງຊາດແຕ່ລະຊຸດແມ່ນ 5 ປີ; ລັດຖະທຳມະນູນ ແຫ່ງ ສປປລາວ ມາດຕາ 108 ແລະ ມາດຕາ 109 ກ່ຽວກັບການແຕ່ງຕັ້ງຄະນະກໍາມະການເລືອກຕັ້ງລະດັບຊາດ ແລະ ອີງຕາມກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ (ສະບັບປັບປຸງ ປີ 2015) ມາດຕາ 25 ທີ່ໄດ້ກໍານົດໃຫ້ຄະນະປະຈໍາສະພາແຫ່ງຊາດ ເປັນຜູ້ຕົກລົງແຕ່ງຕັ້ງຄະນະກໍາມະການເລືອກຕັ້ງລະດັບຊາດ ແລ້ວສະເໜີທ່ານປະທານປະເທດ ອອກລັດຖະດຳລັດປະກາດເປັນທາງການຢ່າງຊ້າເກົ້າສິບວັນກ່ອນວັນເລືອກຕັ້ງ. ຄະນະກຳມະການເລືອກຕັ້ງລະດັບຊາດ ປະກອບດ້ວຍ ປະທານ, ຮອງປະທານ ແລະ ກຳມະການ. ແຕ່ຈຳນວນຄະນະກຳມະການບໍ່ໃຫ້ເກີນສິບເຈັດຄົນ ແລະ ມາດຕາ 24 ຍັງໄດ້ກຳນົດສິດໃຫ້ຄະນະກຳມະການເລືອກຕັ້ງແຕ່ລະຂັ້ນມີສິດສ້າງຕັ້ງອະນຸກຳມະການເພື່ອເປັນກົງຈັກຊ່ວຍວຽກຂອງຕົນຢ່າງເໝາະສົມ. ຜ່ານການຈັດຕັ້ງປະຕິບັດຕາມເນື້ອໃນຂອງລັດຖະທໍາມະນູນ ແລະ ກົດໝາຍດັ່ງກ່າວ ຂໍແຈ້ງໃຫ້ບັນດາທ່ານໄດ້ຮັບຊາບ ດັ່ງນີ້:

          1. ຄະນະປະຈໍາສະພາແຫ່ງຊາດ ໄດ້ມີມະຕິສະບັບ ເລກທີ 32/ຄປຈ, ລົງວັນທີ 13/5/2020 ວ່າດ້ວຍການແຕ່ງຕັ້ງຄະນະກຳມະການເລືອກຕັ້ງລະດັບຊາດ ເພື່ອດໍາເນີນການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II ໂດຍແຕ່ງຕັ້ງທ່ານ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ເປັນປະທານຄະນະກໍາມະການເລືອກຕັ້ງລະດັບຊາດ; ມີ ທ່ານ ຈັນສີ ໂພສີຄຳ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ແລະ ທ່ານ ບຸນທອງ ຈິດມະນີ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ປະທານອົງການກວດກາລັດຖະບານ ເປັນຮອງປະທານຄະນະກໍາມະການເລືອກຕັ້ງລະດັບຊາດ, ພ້ອມດ້ວຍບັນດາທ່ານກຳມະການຂອງຄະນະກໍາມະການເລືອກຕັ້ງລະດັບຊາດ ເຊິ່ງມາຈາກອົງການຈັດຕັ້ງພັກ-ລັດ ແລະ ອົງການຈັດຕັ້ງມະຫາຊົນ ອີກຈຳນວນ ​15 ທ່ານ. 

         2. ຄະນະກໍາມະການເລືອກຕັ້ງລະດັບຊາດ ໄດ້ອອກມະຕິສະບັບເລກທີ 01​/ຄລຊ, ລົງວັນທີ 20 ສິງຫາ 2020 ວ່າດ້ວຍການແຕ່ງຕັ້ງ ແລະ ການເຄື່ອນໄຫວຂອງບັນດາອະນຸກຳມະການຂອງຄະນະກໍາມະການເລືອກຕັ້ງລະດັບຊາດ ເພື່ອຊ່ວຍຄະນະກຳມະການເລືອກຕັ້ງລະດັບຊາດ ກະກຽມ ແລະ ດຳເນີນວຽກງານເລືອກຕັ້ງໃຫ້ໄປຕາມຂັ້ນຕອນ, ຕາມກຳນົດເວລາ ແລະ ຄາດໝາຍທີ່ວາງໄວ້ ເຊິ່ງປະກອບມີ 05 ອະນຸກໍາມະການ ດັ່ງນີ້: 

        (1) ອະນຸກຳມະການເລຂານຸການ: ມີ ທ່ານ ນາງ ສີໃສ ລືເດດມູນສອນ ກໍາມະການສູນກາງພັກ, ຮອງປະທານສະພາແຫ່ງຊາດ, ກໍາມະການຄະນະກໍາມະການເລືອກຕັ້ງລະດັບຊາດ, ຜູ້ປະຈໍາການຄະນະປະຈໍາການ ຄະນະກໍາມະການເລືອກຕັ້ງລະດັບຊາດ ເປັນຫົວໜ້າອະນຸກຳມະການ ແລະ ທ່ານລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ກໍາມະການຄະນະກໍາມະການເລືອກຕັ້ງລະດັບຊາດ ເປັນຮອງຫົວໜ້າອະນຸກຳມະການ ພ້ອມດ້ວຍກຳມະການອີກຈຳນວນ 07 ທ່ານ ເພື່ອຊ່ວຍຄະນະກຳມະການເລືອກຕັ້ງລະດັບຊາດໃນການຄົ້ນຄວ້າສ້າງເອກະສານຕ່າງໆ, ສະຫລຸບສັງລວມການເຄື່ອນ ໄຫວຂອງຄະນະກໍາມະການເລືອກຕັ້ງລະດັບຊາດ, ເປັນໃຈກາງໃນການປະສານສົມທົບວຽກງານກັບບັນດາອະນຸກຳມະການ ຂອງຄະນະກຳມະການເລືອກຕັ້ງລະດັບຊາດ, ຄະນະກຳມະການເລືອກຕັ້ງຂັ້ນທ້ອງຖິ່ນ ແລະ ບັນດາອົງການຈັດຕັ້ງທີ່ກ່ຽວຂ້ອງ ພ້ອມທັງເຮັດໜ້າທີ່ເປັນໂຄສົກຂອງຄະນະກຳມະການເລືອກຕັ້ງລະດັບຊາດ; 

        (2) ອະນຸກຳມະການໂຄງປະກອບ ແລະ ບຸກຄະລາກອນ: ມີທ່ານ ຈັນສີ ໂພສີຄຳ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ຮອງປະທານຄະນະກໍາມະການເລືອກຕັ້ງລະດັບຊາດ ເປັນຫົວໜ້າອະນຸກຳມະການ; ທ່ານ ພົທ. ແສງນວນ ໄຊຍະລາດ ຄະນະເລຂາທິການສູນກາງພັກ, ຮອງປະທານສະພາແຫ່ງຊາດລາວ, ກໍາມະການຄະນະກໍາມະການເລືອກຕັ້ງລະດັບຊາດ ເປັນຮອງຫົວໜ້າອະນຸກຳມະການ ພ້ອມດ້ວຍກຳມະການອີກຈຳນວນ 9 ທ່ານ ເພື່ອຮັບຜິດຊອບປະສານສົມທົບກັບອົງການຈັດຕັ້ງພັກ-ລັດ, ແນວລາວສ້າງຊາດ, ອົງການຈັດຕັ້ງມະຫາຊົນຂັ້ນສູນກາງ ແລະ ທ້ອງຖິ່ນ ຄົ້ນຄວ້າບຸກຄະລາກອນ ແລະຄາດຄະເນອັດຕາສ່ວນຜູ້ຮັບສະໝັກເລືອກຕັ້ງ, ກະກຽມເອກະສານຕ່າງໆກ່ຽວກັບວຽກງານບຸກຄະລາກອນ ແລະ ເກັບກຳສະຖິຕິຈຳນວນພົນລະເມືອງ ແລະ ຜູ້ມີສິດເລືອກຕັ້ງໃນຂອບເຂດທົ່ວປະເທດ; 

        (3) ອະນຸກຳມະການໂຄສະນາ, ປຸກລະດົມຂະບວນການ: ມີທ່ານ ປອ. ບຸນທອງ ຈິດມະນີ ກໍາມະການກົມການເມືອງສູນກາງພັກ, ເລຂາທິການສູນກາງພັກ,​ ຮອງນາຍົກລັດຖະມົນຕີ, ປະທານອົງການກວດກາລັດຖະບານ, ຮອງປະທານຄະນະກໍາມະການເລືອກຕັ້ງລະດັບຊາດ ເປັນຫົວໜ້າອະນຸກຳມະການ ແລະ ທ່ານ ຄຳພັນ ພົມມະທັດ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ກໍາມະການຄະນະກໍາມະການເລືອກຕັ້ງລະດັບຊາດ ເປັນຮອງຫົວໜ້າອະນຸກຳມະການ ແລະ ທ່ານ ສົມພັນ ແພງຄຳມີ,  ກຳມະການສູນກາງພັກ, ຮອງປະທານສະພາແຫ່ງຊາດ ເປັນຮອງຫົວໜ້າອະນຸກຳມະການ ພ້ອມດ້ວຍກຳມະການອີກຈຳນວນ 13 ທ່ານ ເພື່ອຈັດຕັ້ງເຝິກອົບຮົມ ແລະ ໂຄສະນາເຜີຍແຜ່ບັນດາເອກະສານຮັບໃຊ້ໃຫ້ແກ່ການກະກຽມ ແລະດຳເນີນການເລືອກຕັ້ງ; ສ້າງຄວາມຮັບຮູ້, ເຂົ້າໃຈ ແລະ ເປັນເອກະພາບ; ຄວາມຕື່ນຕົວສະໝັກໃຈຂອງປະຊາຊົນບັນດາເຜົ່າ ໃນການໃຊ້ສິດປະຊາທິປະໄຕຂອງຕົນເຂົ້າໃນການເລືອກຕັ້ງ ແລະ ນຳພາສື່ມວນຊົນປະເພດຕ່າງໆຢູ່ຂັ້ນສູນກາງ ແລະທ້ອງຖິ່ນ ເພື່ອໂຄສະນາການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະສະພາປະຊາຊົນຂັ້ນແຂວງ ຊຸດທີ II;

        (4) ອະນຸກຳມະການປ້ອງກັນຊາດ-ປ້ອງກັນຄວາມສະຫງົບ: ມີທ່ານ ພົອ. ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ, ລັດຖະມົນຕີກະຊວງປ້ອງກັນປະເທດ, ກໍາມະການຄະນະກໍາມະການເລືອກຕັ້ງລະດັບຊາດ ເປັນຫົວໜ້າອະນຸກຳມະການ ແລະທ່ານ ພົທ. ວິໄລ ຫຼ້າຄຳຟອງ ເລຂາທິການສູນກາງພັກ, ລັດຖະມົນຕີກະຊວງປ້ອງກັນຄວາມສະຫງົບ, ກໍາມະການຄະນະກໍາມະການເລືອກຕັ້ງລະດັບຊາດ ເປັນຮອງຫົວໜ້າອະນຸກຳມະການ ພ້ອມດ້ວຍກຳມະການອີກຈຳນວນ 07 ທ່ານ ເພື່ອຄົ້ນຄວ້າ, ວາງແຜນການປ້ອງກັນການເລືອກຕັ້ງໃຫ້ມີຄວາມສະຫງົບ, ເປັນລະບຽບຮຽບຮ້ອຍ; ແກ້ໄຂບັນຫາຫຍໍ້ທໍ້ຕ່າງໆທີ່ເປັນປັດໄຈກໍ່ຄວາມບໍ່ສະຫງົບ ແລະຄວາມບໍ່ເປັນລະບຽບຮຽບຮ້ອຍ ທີ່ຫວັງກີດຂວາງ, ທຳລາຍການເລືອກຕັ້ງຢ່າງທັນການ ແລະ ເດັດຂາດ; 

        (5) ອະນຸກຳມະການງົບປະມານ: ມີທ່ານ ສົມດີ ດວງດີ ກໍາມະການສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ກໍາມະການຄະນະກໍາມະການເລືອກຕັ້ງລະດັບຊາດ ເປັນຫົວໜ້າອະນຸກຳ ມະການ ແລະ ທ່ານ ບຸນປອນ ບຸດຕະນະວົງ ກໍາມະການສູນກາງພັກ, ຮອງປະທານສະພາແຫ່ງຊາດ, ກໍາມະການຄະນະກໍາມະການເລືອກຕັ້ງລະດັບຊາດ ເປັນຮອງຫົວໜ້າອະນຸກຳມະການ ພ້ອມດ້ວຍກຳມະການອີກຈຳນວນ 03 ທ່ານ ເພື່ອຄົ້ນຄວ້າຈັດສັນງົບປະມານກ່ຽວກັບການເຄື່ອນໄຫວ ໃຫ້ບັນດາອະນຸກຳມະການຂອງຄະນະກຳມະການເລືອກຕັ້ງລະດັບຊາດ ດຳເນີນງານໃຫ້ສອດຄ່ອງຕາມລະບຽບການເງິນ ບົນຫລັກການປະຢັດມັດທະຍັດ ແລະ ສົມເຫດສົມຜົນ.​

         ການເລືອກຕັ້ງສະມາຊິກສະພາແຫ່ງຊາດ ຊຸດທີ IX  ແລະ ສະພາປະຊາຊົນຂັ້ນແຂວງ ຊຸດທີ II ເປັນເຫດການທາງການເມືອງທີ່ມີຄວາມສໍາຄັນຂອງຊາດ ເຊິ່ງອົງການຈັດຕັ້ງພັກ-ລັດ, ກໍາລັງປະກອບອາວຸດ ແລະ ປະຊາຊົນລາວບັນດາເຜົ່າມີໜ້າທີ່ປະກອບສ່ວນ ເຮັດໃຫ້ການເລືອກຕັ້ງໃນຄັ້ງນີ້ ເປັນປາງບຸນໃຫຍ່ຂອງຊາດ, ດໍາເນີນດ້ວຍບັນຍາກາດເບີກບານມ່ວນຊື່ນ, ມີປະຊາທິປະໄຕ, ຖືກຕ້ອງຕາມກົດໝາຍ, ປະຢັດມັດທະຍັດ ແລະ ສູ້ຊົນໃຫ້ບັນລຸຕາມຄາດໝາຍທີ່ວາງໄວ້. ຖືເອົາການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງເທື່ອນີ້ ເປັນການບູລະນະລັດປະຊາທິປະໄຕ ປະຊາຊົນ ໃຫ້ມີຄວາມໜັກແໜ້ນ, ເຂັ້ມແຂງ;ເປັນການເສີມຂະຫຍາຍສິດປະຊາທິປະໄຕ, ສິດເປັນເຈົ້າ ຂອງປະຊາຊົນລາວບັນດາເຜົ່າ ເຂົ້າໃນການເລືອກເອົາຕົວແທນແຫ່ງສິດ ແລະ ຜົນປະໂຫຍດຂອງຕົນ ເຂົ້າໃນອົງການອຳນາດລັດຂັ້ນສູນກາງ ແລະທ້ອງຖິ່ນ; ສະແດງໃຫ້ເຫັນທາດແທ້ຂອງລັດ ທີ່ມາຈາກປະຊາຊົນ, ລັດຂອງປະຊາຊົນ ໂດຍປະຊາຊົນ ແລະ ເພື່ອຜົນປະໂຫຍດຂອງປະຊາຊົນຢ່າງແທ້ຈິງ. ຄະນະກຳມະການເລືອກຕັ້ງລະດັບຊາດ ຈະປະຕິບັດໜ້າທີ່ ແລະ ເຄື່ອນໄຫວວຽງານຕາມຫລັກການລວມສູນປະຊາທິປະໄຕ ເສີມຂະຫຍາຍບົດບາດນຳພາເປັນໝູ່ຄະນະ ໃນການຕົກລົງທຸກບັນຫາທີ່ສຳຄັນ, ຖືເອົາການແບ່ງງານ ແລະ ແບ່ງຄວາມຮັບຜິດຊອບໃຫ້ບຸກຄົນ ເພື່ອເສີມຂະຫຍາຍຄວາມເປັນເຈົ້າການໃນການປະຕິບັດໜ້າທີ່ວຽກງານໃຫ້ບັນລຸຕາມຄາດໝາຍ. 

        ສຳລັບການປະກາດວັນເລືອກຕັ້ງ, ການກຳນົດຈຳນວນຜູ້ສະໝັກຮັບເລືອກຕັ້ງ ແລະ ຈຳນວນສະມາຊິກສະພາແຫ່ງຊາດ ຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II ແມ່ນຈະມີການຖະແຫລງຂ່າວຕື່ມ ພາຍຫລັງທີ່ຄະນະກຳມະການເລືອກຕັ້ງລະດັບຊາດ ໄດ້ກຳນົດອອກມາຢ່າງເປັນທາງການ. ສະນັ້ນ ຈຶ່ງຂໍໃຫ້ບັນດາທ່ານຮ່ວມຕິດຕາມເຫດການການເມືອງທີ່ສຳຄັນຂອງຊາດ ໃນຄັ້ງນີ້ຢ່າງໃກ້ຊິດດ້ວຍ!

                                                                              ແຫຼ່ງຂ່າວທີ່ມາ: ສະພາແຫ່ງຊາດ