ຮອງປະທານ ສພຊ ຕິດຕາມກວດກາຢູ່ແຂວງຄຳມ່ວນ
16/12/2020

       (ສພຊ) ວັນທີ 10 ທັນວາ 2020 ທີ່ຫ້ອງວ່າການປົກຄອງແຂວງຄໍາມ່ວນ, ທ່ານ ພົທ. ແສງນວນ ໄຊຍະລາດ ເລຂາທິການສູນກາງພັກ, ຮອງປະທານສະພາແຫ່ງາດ (ສພຊ) ພ້ອມດ້ວຍຄະນະ ເຊິ່ງມີທ່ານ ຄໍາຈັນ ໂສຕາປະເສີດ ຮອງປະທານກໍາມາທິການບັນດາເຜົ່າ, ທ່ານ ເຄນທອງ ນວນທະສິງ ຮອງປະກໍາມາທິການການຕ່າງປະເທດ, ມີຕາງໜ້າກໍາມາທິການປ້ອງກັນຊາດ-ປ້ອງກັນຄວາມສະຫງົບ ແລະ ພະນັກງານທີ່ກ່ຽວຂ້ອງຈາກ ສພຊ ໄດ້ເຄື່ອນໄຫວເຮັດວຽກກັບສະພາປະຊາຊົນແຂວງ ແລະ ອໍານາດການປົກຄອງແຂວງຄໍາມ່ວນ; ເຂົ້າຮ່ວມມີທ່ານ ວົງເພັດ ທິບປັນຍາ ຮອງເລຂາພັກແຂວງ ຫົວໜ້າຫ້ອງວ່າການແຂວງ, ທ່ານ ນ. ວຽງມະນີ ຈັນທະນະສິນ ຮອງປະທານຄະນະສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 12 ແຂວງຄໍາມ່ວນ; ມີ ສສຊ, ສະມາຊິກສະພາປະຊາຊົນແຂວງ (ສສຂ), ຕາງໜ້າບັນດາພະແນກການ, ອົງການທຽບເທົ່າພະແນກການທີ່ກ່ຽວຂ້ອງຂອງແຂວງ ແລະ ພະນັກງານວິຊາການຈໍານວນໜຶ່ງ.

       ຈຸດປະສົງ, ເພື່ອຕິດຕາມກວດກາການປະຕິບັດກົດໝາຍ ແລະ ນິຕິກໍາທີ່ກ່ຽວຂ້ອງກັບຜູ້ເຊື່ອຖືສາສະໜາຕ່າງໆ, ການພັດທະນາຊີວິດການເປັນຢູ່ຂອງປະຊາຊົນບັນດາເຜົ່າ ແລະ ການເຄື່ອນຍ້າຍພົນລະເມືອງຂອງປະຊາຊົນ ສອງຟາກຊາຍແດນ ທີ່ບໍ່ຖືກຕ້ອງຕາມກົດໝາຍ; ການປະຕິບັດໜ້າທີ່ຂອງກໍາລັງປ້ອງກັນຊາດ-ປ້ອງກັນຄວາມສະຫງົບ, ການປະຕິບັດກົດໝາຍ ແລະ ກົດລະບຽບໃນຄ້າຍຄຸມຂັງ, ການຄ້າມະນຸດ, ວຽກງານປັກຫລັກໝາຍຊາຍແດນ; ການບໍລິການ ແລະ ຄວາມສະດວກ, ຄວາມຫຍຸ້ງຍາກຂອງພະນັກງານທີ່ປະຈໍາຢູ່ດ່ານຊາຍແດນ.

       ທ່ານ ວົງເພັດ ທິບປັນຍາ ໄດ້ລາຍງານກ່ຽວກັບການພັກທະນາເສດຖະກິດ-ສັງຄົມ ແລະ ປາກົດການທີ່ພົ້ນເດັ່ນພາຍໃນແຂວງ ເຊິ່ງແຂວງຄໍາມ່ວນມີເນື້ອທີ່  16.315 ກິໂລຕາແມັດ, ມີຊາຍແດນທາງທິດເໜືອຕິດກັບແຂວງບໍລິຄໍາໄຊ, ທິດໃຕ້ຕິດກັບແຂວງສະຫວັນນະເຂດ, ທິດຕາເວັນອອກຕິດກັບແຂວງກວາງບິ່ງ ແລະ ຮ່າຕິ່ງ ສສ.ຫວຽດນາມ, ທິດຕາເວັນຕົກຕິດກັບແຂວງນະຄອນພະນົມ ຣາຊະອານາຈັກໄທ; ມີພົນລະເມືອງ 433.570 ຄົນ ຍິງ 216.198 ຄົນ, ປະກອບມີ 9 ຊົນເຜົ່າ; ດ້ານການພັດທະນາເສດຖະກິດ-ສັງຄົມ: ລວມຍອດຜະລິດຕະພັນພາຍໃນ (GDP) ບັນລຸ 8.476 ຕື້ກີບ, ລາຍໄດ້ສະເລ່ຍຕໍ່ຫົວຄົນ 2.199 ໂດລາສະຫະລັດ; ທາງດ້ານການຮັກສາເສັ້ນຊາຍແດນໄດ້ມີກອງຮ້ອຍຊາຍແດນປະຈໍາຢູ່ແຕ່ລະເມືອງ ເພື່ອເຮັດຫນ້າທີ່ປ້ອງກັນ-ລາດຕະເວນ, ປົກປັກຮັກສາເສັ້ນຊາຍແດນ ແລະ ບູລະນະຫລັກຫມາຍຊາຍແດນຢ່າງເປັນປົກກະຕິ; ຈາກນັ້ນ, ບັນດາພະແນກການກ່ຽວຂ້ອງຂອງແຂວງ ກໍໄດ້ລາຍງານເພີ່ມເຕີມ ເປັນຕົ້ນ: ຕາງໜ້າກອງບັນຊາການປ້ອງກັນຄວາມສະຫງົບແຂວງ, ພະແນກພາຍໃນແຂວງ, ອົງການແນວລາວສ້າງຊາດ, ກອງບັນຊາການທະຫານແຂວງ, ອົງການໄອຍະການປະຊາຊົນ ແລະ ພະແນກການຕ່າງປະເທດ.

        ທ່ານຮອງປະທານສະພາແຫ່ງຊາດ ໄດ້ມີຄໍາເຫັນ ແລະ ໃຫ້ທິດຊີ້ນໍາ ເຊິ່ງທ່ານໄດ້ເນັ້ນໃຫ້ແກ້ໄຂບັນຫາສາສະໜາດ້ວຍຄວາມອ່ອນໂຍນ ນີ້ມນວນ, ດ້ວຍເຫດດ້ວຍຜົນ, ລະມັດລະວັງ, ໃຫ້ສະເໝີພາບຕໍ່ໜ້າກົດໝາຍ ແລະ ບໍ່ໃຫ້ເຄື່ອນໄຫວທາງສາສະຫນາທີ່ຂັດຕໍ່ແນວທາງນະໂຍບາຍຂອງພັກ-ລັດ; ສໍາລັບວຽກໄອຍະການທີ່ມີປາກົດການເຄື່ອນ ໄຫວຂອງທະນາຍຄວາມເຖື່ອນ ແມ່ນໃຫ້ກວດກາຄືນລະອຽດ ແລະ ລາຍງານຄືນໃຫ້ ສພຊ; ໃຫ້ມີການຄຸ້ມຄອງຢ່າງເຂັ້ມງວດກວ່າເກົ່າຕໍ່ບັນດາໂຄງການຊ່ວຍເຫລືອທີ່ມີການເຄື່ອນໄຫວທາງສາສະຫນາ; ພ້ອມນັ້ນ, ທ່ານຍັງໄດ້ສະເໜີໃຫ້ຮີບຮ້ອນຈັດຕັ້ງມອບໝາຍໜ້າທີ່ພາຍຫລັງສໍາເລັດກອງປະຊຸມໃຫຍ່ຂອງອົງຄະນະພັກແຂວງ ພ້ອມທັງຮີບຮ້ອນຜັນຂະຫຍາຍມະຕິຂອງກອງປະຊຸມໃຫຍ່ຂອງອົງຄະນະພັກແຂວງ; ຮີບຮ້ອນວຽກງານກະກຽມໃຫ້ແກ່ການເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II ໂດຍສະເພາະແມ່ນການເລືອກບຸກຄະລາກອນອອກສະໝັກຮັບເລືອກຕັ້ງ;  ຈົ່ງພ້ອມພຽງຮຽງໜ້າກັນສາມັກຄີຊ່ວຍເຫລືອກັນ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ເຊິ່ງຕ້ອງມີແບບແຜນວິທີເຮັດວຽກທີ່ດີ, ປະຕິບັດຫລັກການລວມສູນປະຊາທິປະໄຕ; ການແກ້ໄຂບັນຫາປາກົດການຫຍໍ້ທໍ້ຕ່າງໆຂອງແຂວງ ໃຫ້ມີການປະສານງານນໍາກັນ ລະຫວ່າງພະແນກການຕ່າງໆ.

       ວັນທີ 11 ທັນວາ 2020 ຄະນະຕິດຕາມກວດກາຂອງ ສພຊ ນໍາໂດຍທ່ານ ຄໍາຈັນ ໂສຕາປະເສີດ ຮອງປະທານກໍາມາທິການບັນດາເຜົ່າ ແລະ ທ່ານ ເຄນທອງ ນວນທະສິງ ຮອງປະທານກໍາມາທິການການຕ່າງປະເທດ ພ້ອມດ້ວຍຕາງໜ້າກໍາມາທິການປ້ອງກັນຊາດ-ປ້ອງກັນຄວາມສະຫງົບ ແລະ ພະນັກງານທີ່ກ່ຽວຂ້ອງຈາກ ສພຊ ແລະ ສະພາປະຊາຊົນແຂວງຄໍາມ່ວນ ໄດ້ສືບຕໍ່ຕິດຕາມກວດກາຢູ່ດ່ານສາກົນນາເພົ້າ ແຂວງຄໍາມ່ວນ ສປປລາວ ເຊິ່ງຕິດກັບ ດ່ານສາກົນຈາລໍ່ ສສ.ຫວຽດນາມ ໂດຍການຕ້ອນຮັບ ແລະ ລາຍງານສະພາບລວມຂອງທ່ານ ພົມມະນີ ໄຊຍະລາດ ຫົວໜ້າຄຸ້ມຄອງດ່ານສາກົນນາເພົ້າ ພ້ອມດ້ວຍຄະນະ ແລະ ໄດ້ໃຫ້ຮູ້ວ່າດ່ານສາກົນນາເພົ້າ ແຂວງຄໍາມ່ວນ ໄດ້ຮັບການເປີດນໍາໃຊ້ເປັນດ່ານສາກົນເລີ່ມແຕ່ວັນທີ 01 ເມສາ 2004 ມາເຖິງປະຈຸບັນ ເຊິ່ງເປັນດ່ານລະຫວ່າງແຂວງຄໍາມ່ວນ ສປປລາວ ກັບດ່ານຈາລໍ່ ແຂວງກວາງບິ່ງ ສສ.ຫວຽດນາມ ມີທີ່ຕັ້ງປະຕູດ່ານຢູ່ບ້ານນາເພົ້າ ເມືອງບົວລະພາ ຫ່າງຈາກເທສະບານແຂວງຄໍາມ່ວນປະມານ 145 ກິໂລແມັດ.

                                                                        ແຫຼ່ງຂ່າວທີ່ມາ: ສະພາແຫ່ງຊາດ