ຄລສ ສະຫລຸບການເຄື່ອນໄຫວວຽກງານ 5 ປີ
25/12/2020

      (ສພຊ) ວັນທີ 11 ທັນວາ 2020 ທີ່ຫ້ອງປະຊຸມຄະນະເລຂາທິການສະພາແຫ່ງຊາດ (ຫລັກ 6) ນະຄອນຫລວງວຽງຈັນ, ຄະນະເລຂາທິການສະພາແຫ່ງຊາດ (ຄລສ) ໄດ້ຈັດກອງປະຊຸມສະຫລຸບການເຄື່ອນໄຫວວຽກງານ 5 ປີ ແລະ ປະກາດແຕ່ງຕັ້ງຕໍາແໜ່ງບໍລິຫານຈໍານວນໜຶ່ງພາຍໃນ ຄລສ ໂດຍການເປັນປະທານຂອງທ່ານ ນາງ ສວນສະຫວັນ ວິຍະເກດ ເລຂາທິການສະພາແຫ່ງຊາດ ໂດຍການເຂົ້າຮ່ວມຂອງທ່ານ ນາງ ສີໃສ ລືເດດມູນສອນ ຮອງປະທານສະພາແຫ່ງຊາດ ຜູ້ຊີ້ນໍາວຽກງານ ຄລສ ມີບັນດາທ່ານຮອງເລຂາທິການສະພາແຫ່ງຊາດ, ຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າພະແນກ ແລະ ພະນັກງານ-ວິຊາການພາຍໃນຄະນະເລຂາທິການເຂົ້າຮ່ວມ.

       ຈຸດປະສົງຂອງກອງປະຊຸມໃນຄັ້ງນີ້, ເພື່ອເປັນການສະຫລຸບການເຄື່ອນໄຫວວຽກງານ 5 ປີ ຂອງ ຄລສ ແລະ ປະກາດການແຕ່ງຕັ້ງຕໍາແໜ່ງບໍລິຫານ ພ້ອມທັງຮັບຟັງການໂອ້ລົມຂອງທ່ານຮອງປະທານສະພາແຫ່ງຊາດ ຜູ້ຊີ້ນໍາວຽກງານ ຄລສ.

       ກອງປະຊຸມ, ໄດ້ຮັບຟັງການຜ່ານມະຕິຄະນະປະຈໍາສະພາແຫ່ງຊາດ ວ່າດ້ວຍການແຕ່ງຕັ້ງຕໍາແໜ່ງບໍລິຫານຈໍານວນໜຶ່ງພາຍໃນ ຄລສ ແລະ ກຳມາທິການ; ການຜ່ານບົດສະຫລຸບການເຄື່ອນໄຫວວຽກງານ 5 ປີ  (2016-2020) ແລະ ແຜນການເຄື່ອນໄຫວຮອດກອງປະຊຸມຄັ້ງປະຖົມມະລືກ ແລະ ແຜນວຽກງານປະຈໍາປີ 2021 ຂອງ ຄລສ; ນອກຈາກນີ້, ຜູ້ແທນກອງປະຊຸມຍັງໄດ້ຜັດປ່ຽນກັນປະກອບຄໍາຄິດຄໍາເຫັນໃສ່ບົດສະຫລຸບ, ແຜນການເຄື່ອນໄຫວປະຈໍາປີ 2021 ແລະ ຄໍາຖາມເຈາະຈີ້ມຂອງທ່ານຮອງປະທານສະພາແຫ່ງຊາດ ຜູ້ຊີ້ນໍາວຽກງານ ຄລສ.

       ໂອກາດດັ່ງກ່າວ, ທ່ານຮອງປະທານສະພາແຫ່ງຊາດ ໄດ້ມີຄຳເຫັນໂອ້ລົມຕໍ່ກອງປະຊຸມ ໂດຍທ່ານໄດ້ສະແດງຄວາມຊົມເຊີຍຕໍ່ ຄລສ ທີ່ໄດ້ປະຕິບັດໜ້າທີ່ຂອງຕົນຕະຫລອດໄລຍະ 5 ປີ ເຫັນວ່າມີຜົນງານຫລາຍອັນພົ້ນເດັ່ນ ເຊິ່ງມີທັງຂໍ້ສະດວກ ແລະ ຫຍຸ້ງຍາກ; ພ້ອມນັ້ນ, ທ່ານຮອງປະທານສະພາແຫ່ງຊາດຍັງໄດ້ຮຽກຮ້ອງໃຫ້ຄະນະນໍາ ແລະ ບັນດາວິຊາການຂອງ ຄລສ ຈົ່ງເພີ່ມທະວີຍົກສູງຄວາມຮັບຜິດຊອບ, ຄວາມເປັນເຈົ້າການໃນການເປັນເສນາທິການໃນກົງຈັກຂອງ ຄລສ ແລະ ປະສານງານສົມທົບກັບພາກສ່ວນທີ່ກ່ຽວຂ້ອງ, ກໍານົດຈະແຈ້ງໃນການປະຕິບັດໜ້າທີ່ວຽກງານ; ກວດຄືນສິດໜ້າທີ່ໃນການກໍານົດໃນມະຕິໂດຍສະເພາະແມ່ນກົນໄກການປະສານງານຕ່າງໆ ເຊັ່ນ: ການປະສານງານລະຫວ່າງເລຂາຄະນະພັກຮາກຖານ ແລະ ຄະນະເລຂາທິການ; ວຽກງານຕ້ອງໃຫ້ມີຄຸນະພາບຍົກສູງການສຶກສາອົບຮົມການເມືອງແນວຄິດ ໃຫ້ພະນັກງານ-ລັດຖະກອນເປັນບັນຫາທີ່ສໍາຄັນ ຕິດພັນກັບການຍົກລະດັບ, ການຮຽນຮູ້, ສ້າງພະນັກໃນວຽກງານຕົວຈິງ, ປະເມີນໃນການປະຕິບັດວຽກງານຕົວຈິງ; ໃຫ້ເອົາໃຈໃສ່ປັບປຸງກົນໄກການປະສານງານກັບຄະນະຮັບຜິດຊອບວຽກງານເຂດເລືອກຕັ້ງ ທ່ານຍັງໄດ້ເນັ້ນໜັກໃຫ້ພະນັກງານລັດຖະກອນເອົາໃຈໃສ່ຮັບ ຜິດຊອບວຽກງານຕ່າງໆຂອງຕົນທີ່ໄດ້ການມອບໝາຍໃຫ້ປະສົບຜົນສໍາເລັດ; ໃຫ້ພະນັກ ງານຫລັກແຫລ່ງເອົາໃຈໃສ່ຊັບຊ້ອນພະນັກງານໃຫ້ເຂົ້າກັບຄວາມຮູ້ຄວາມສາມາດ; ໃຫ້ຄັດເລືອກເອົາພະນັກງານຜູ້ທີ່ມີລະບຽບວິໄນ, ດຸໝັ່ນ, ຊື່ສັດ, ມີຄວາມຫ້າວຫັນມາເປັນພະນັກງານຫລັກແຫລ່ງ ເຊິ່ງທ່ານໄດ້ຍົກໃຫ້ເຫັນການເປັນພະນັກງານທີ່ດີຕ້ອງຕ້ານ 4 ຢ່າງຄື: ຕ້ານວ່າຕົນເອງດີ, ເກັ່ງ; ຕ້ານແນວຄິດໃຫ້ແຕ່ໝູ່ເອົາໃຈ; ຕ້ານແນວຄິດເຮັດນໍາແຕ່ຜູ້ທີ່ມັກເອົາໃຈເຮົາ ແລະ ຕ້ານການຕີລາຄາຊັ່ງຊາພະນັກງານ ດ້ວຍອະຄະຕິ ແລະ ແນວຄິດຄັບແຄບ.

                                                                                            ແຫຼ່ງຂ່າວທີ່ມາ: ສະພາແຫ່ງຊາດ