ສພຊ ສະຫລຸບການເຄື່ອນໄຫວວຽກງານ
06/01/2021

          (ສພຊ) ວັນທີ 31 ທັນວາ ຜ່ານມາ, ທີ່ຫ້ອງປະຊຸມໃຫຍ່ສະພາແຫ່ງຊາດ (ສພຊ) ຫລັກ 6 ນະຄອນຫລວງວຽງຈັນ ໄດ້ມີພິທີສະຫລຸບຜົນງານການເຄື່ອນໄຫວວຽກງານ ປະຈຳປີ 2020 ແລະ ທິດທາງແຜນການ ປະຈຳປີ 2021 ແລະ ການຍ້ອງຍໍຜົນງານ 5 ປີ ແກ່ພະນັກງານ-ລັດຖະກອນ ພາຍໃນ ສພຊ ໂດຍການເປັນປະທານຂອງທ່ານ ນາງ ປານີ ຢາທໍ່ຕູ້ ປະທານ ສພຊ; ມີຮອງປະທານ ສພຊ, ປະທານ-ຮອງປະທານກຳມາທິການ, ຫົວໜ້າ-ຮອງຫົວໜ້າກົງຈັກທີ່ຄະນະປະຈຳສ້າງຕັ້ງຂຶ້ນ ແລະ ພະນັກງານ-ລັດຖະກອນພາຍໃນ ສພຊ ເຂົ້າຮ່ວມຢ່າງພ້ອມພຽງ.

          ທັງນີ້, ເພື່ອເປັນການສະຫລຸບຕີລາຄາການຈັດຕັ້ງ ແລະ ການເຄື່ອນໄຫວວຽກງານ ປະຈະຈຳປີ 2020 ແລະ ວາງທິດທາງແຜນການ ປະຈຳປີ 2021 ຂອງ ສພຊ ແລະ ກຳນົດທິດທາງໃນຕໍ່ໜ້າ ໂດຍຕິດພັນກັບການກໍ່ສ້າງໜ່ວຍພັກເຂັ້ມແຂງ-ຮູ້ນຳພາຮອບດ້ານ ແລະ ຂະບວນການແຂ່ງຂັນ “ຮັກຊາດ ແລະ ພັດທະນາ” ຢູ່ພາຍໃນ ສພຊ; ເພື່ອເຮັດໃຫ້ພະນັກງານ-ລັດຖະກອນ ຢູ່ພາຍໃນ ສພຊ ຍົກສູງຈິດໃຈຮັກຊາດ, ຮັກລະບອບລະບອບປະຊາທິປະໄຕ, ມີສະຕິຊາດ, ສະຕິເຄົາລົບລັດຖະທຳມະນູນ ແລະ ກົດໝາຍ, ສ້າງສະຕິໃນການເປັນເຈົ້າຕົນເອງ ສ້າງຄວາມເຂັ້ມແຂງດ້ວຍຕົນເອງ, ສ້າງຄວາມສາມັກຄີເປັນປຶກແຜ່ນ, ມິີນ້ຳໃຈປະຢັດມັດທະຍັດ, ມີຄວາມດຸໝັ່ນຄົ້ນຄວ້າຮ່ຳຮຽນ, ມີການພັດທະນາຢ່າງຮອບດ້ານຂຶ້ນເລື້ອຍໆ, ຮັບປະກັນປະສິດທິພາບ ຂອງການປະຕິບັດວຽກງານໃນການເປັນເສນາທິການໃຫ້ແກ່ຄະນະພັກ, ຄະນະປະຈຳສະພາແຫ່ງຊາດ; ເພື່ອສ້າງຂະບວນການຕ່າງໆຢູ່ພາຍໃນ ສພຊ ໃຫ້ຟົດຟື້ນ, ຕໍ່ເນືອງຍາວນານ ແນໃສ່ຊອກໃຫ້ໄດ້ການຈັດຕັ້ງ ແລະ ບຸກຄະລາກອນດີເດັ່ນ ເພື່ອປະຕິບັດນະໂຍບາຍຍ້ອງຍໍ ຢ່າງຖືກຕ້ອງ ແລະ ຊັດເຈນ.

          ໃນພິທີ, ຜູ້ເຂົ້າຮ່ວມໄດ້ຮັບຟັງບົດສະຫລຸບການເຄື່ອນໄຫວວຽກງານ ປະຈຳປີ 2020 ແລະ ທິດທາງແຜນການ ປີ 2021 ທີ່ຕິດພັນກັບຂະບວນການແຂ່ງຂັນ “ຮັກຊາດ ແລະ ພັດທະນາ” ຢູ່ພາຍໃນ ສພຊ,  ຈາກນັ້ນ ໄດ້ມີພິທີຍ້ອງຍໍຜົນງານ 5 ປີ (2016-2020) ຕາມລັດຖະດຳລັດ ຂອງປະທານປະເທດ ແຫ່ງ ສປປລາວ ສະບັບເລກທີ 184/ປປທ, ລົງວັນທີ 20 ຕຸລາ 2020, ດຳລັດຂອງນາຍົກລົດຖະມົນຕີ ແຫ່ງ ສປປລາວ ສະບັບເລກທີ 540-541/ນຍ, ລົງວັນທີ 16 ຕຸລາ 2020 ແລະ ມະຕິຂອງຄະນະປະຈຳສະພາແຫ່ງຊາດ ວ່າດ້ວຍການຍ້ອງຍໍພະນັກງານ-ລັດຖະກອນ ພາຍໃນ ສພຊ ທີ່ມີຜົນງານພົ້ນເດັ່ນໃນການປະຕິບັດວຽກງານ ປະຈຳປີ 2020 ແລະ ຜົນງານ 5 ປີ (2016-2020) ເຊິ່ງການຍ້ອງຍໍຜົນງານໃນຄັ້ງນີ້ມີຈຳນວນທີ່ໄດ້ຮັບຫລຽນໄຊແຮງງານ ຊັ້ນ II ຈຳນວນ 61 ທ່ານ, ຍິງ 14 ທ່ານ; ຫລຽນໄຊແຮງງານ ຊັ້ນ III ຈຳນວນ 92 ທ່ານ, ຍິງ 40 ທ່ານ; ຫລຽນກາແຮງງານ ຈຳນວນ 76 ທ່ານ, ຍິງ 42 ທ່ານ; ໃບຍ້ອງຍໍຂອງລັດຖະບານ ຈຳນວນ 38 ທ່ານ, ຍິງ 20 ທ່ານ;  ໃບຍ້ອງຍໍ ຂອງຄະນະປະຈໍາສະພາແຫ່ງຊາດ ຈຳນວນ 48 ທ່ານ, ຍິງ 14 ທ່ານ; ໃບຍ້ອງຍໍ ຂອງຄະນະເລຂາທິການສະພາແຫ່ງຊາດ  ຈຳນວນ 49 ທ່ານ, ຍິງ 17 ທ່ານ; ໃບຊົມເຊີຍ ຂອງຄະນະເລຂາທິການສະພາແຫ່ງຊາດ  ຈຳນວນ 28 ທ່ານ, ຍິງ 1 ທ່ານ.

          ໃນໂອກາດນີ້, ທ່ານ ນາງ ປານີ ຢາທໍ່ຕູ້ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານການເຄື່ອນໄຫວວຽກງານຂອງ ສພຊ ທີ່ຍາດມາໄດ້ໃນໄລຍະ 5 ປີຜ່ານມາ ພ້ອມທັງເນັ້ນໜັກໃຫ້ສະພາຊິກພັກ, ພະນັກງານ-ລັດຖະກອນພາຍໃນ ສພຊ ເພີ່ມທະວີການສຶກສາອົບຮົມການເມືອງ-ແນວຄິດ ໃຫ້ແກ່ຖັນແຖວພະນັກງານສະມາຊິກພັກໃຫ້ເປັນປົກກະຕິຕໍ່ເນືອງ ເພື່ອໃຫ້ກຳແໜ້ນແນວທາງນະໂຍບາຍຂອງພັກຂອງລັດ ເປັນຕົ້ນການເຊື່ອມຊຶມມະຕິຂອງພັກ, ລະບຽບຂອງລັດ ພ້ອມທັງຫັນມາເປັນແຜນການ, ແຜນງານ ແລະ ແຜນວຽກຂອງຕົນ; ການແຕ່ງຕັ້ງບຸກຄະລາກອນ ແລະ ການຍ້ອງຍໍ ຕ້ອງຖືກຕ້ອງສອດຄ່ອງກັບມາດຖານເງື່ອນໄຂ ແລະ ຕ້ອງມີການປະເມີນຜົນການຈັດຕັ້ງປະຕິບັດໜ້າທີ່ວຽກງານ ໂດຍອີງໃສ່ແນວຄິດການເມືອງ ຜົນສຳເລັດຂອງໜ້າທີ່ວຽກງານຕົວຈິງ; ເອົາໃຈໃສ່ແກ້ໄຂປາກົດການຫຍໍ້ທໍ້ທີ່ເກີດຂຶ້ນໃນຖັນແຖວພະນັກງານ ແລະ ສະມາຊິກພັກຈຳນວນໜຶ່ງ ເດັດຂາດບໍ່ໃຫ້ມີສະພາບຊ້ຳເຮື້ອ; ການກໍ່ສ້າງພັກ-ພະນັກງານຕ້ອງເນັ້ນໜັກຄຸນນະພາບ ໃຫ້ໄດ້ສະມາຊິກພັກທີ່ດີ ມີຄວາມເປັນແບບຢ່າງນຳໜ້າ ແລະ ເຮັດສຳເລັດໜ້າທີ່ວຽກງານ, ມີລະບຽບແບບແຜນ, ປອດໃສຂາວສະອາດຕາມ 5 ຫລັກການ 3 ທິດນຳຂອງພັກ; ເອົາໃຈໃສ່ຈັດຕັ້ງປະຕິບັດການຊີ້ນຳ-ນຳພາ ຕາມຫລັກການລວມສູນປະຊາທິປະໄຕ ນຳພາເປັນໝູ່ຄະນະ ບຸກຄົນຮັບຜິດຊອບ, ທຸກບັນຫາຕ້ອງມີຄວາມເອກະພາບພາຍໃນພັກ, ເສີມຂະຫຍາຍຄວາມເປັນແບບຢ່າງຂອງສະມາຊິກພັກ ໂດຍສະເພາະກົດລະບຽບຂອງພັກ ກົດໝາຍຂອງລັດ; ເພີ່ມທະວີບົດບາດການຕິດຕາມກວດກາ ຂອງຄະນະພັກຕໍ່ວຽກງານລັດຂອງພະນັກງານ ຕໍ່ການຈັດຕັ້ງໜ່ວຍພັກ ອີງໃສ່ແຜນຂອງຄະນະພັກ, ຄະນະປະຈຳ ແລະ ກົດໝາຍ ເພື່ອປະຕິບັດການກວດກາຕາມໜ້າທີ່ ໂດຍສະເພາະແມ່ນກວດກາປາກົດການຫຍໍ້ທໍ້ຕ່າງໆທີ່ເກີດຂຶ້ນຢູ່ພາຍໃນ ສພຊ ພ້ອມທັງເສີມຂະຫຍາຍບົດບາດການຕິດຕາມກວດກາແກ້ໄຂປາກົດການຫຍໍ້ທໍ້ໃຫ້ດີຂຶ້ນກວ່າເກົ່າ ເພື່ອສ້າງພະນັກງານຜູ້ດີເດັ່ນຂອງພັກ ຂອງຊາດ ແລະ ຂອງປະຊາຊົນ; ການເປັນເສນາທິການຂອງສະມາຊິກພັກ, ພະນັກງານ-ລັດຖະກອນພາຍໃນ ສພຊ ຕ້ອງກຳແໜ້ນແນວທາງນະໂຍບາຍ ແລະ ສະພາບການຕົວຈິງ, ຕ້ອງເປັນເຈົ້າການປະສານສົມທົບກັບພາກສ່ວນທີ່ກ່ຽວຂ້ອງຕາມໜ້າທີ່ ແລະ ພາລະບົດບາດຂອງຕົນ; ເສີມຂະຫຍາຍຫົວຄິດປະດິດສ້າງ ກ້າຄິດ ກ້າເຮັດ ກ້າຮັບຜິດຊອບ ຂອງພະນັກງານວິຊາການ ທັງຍົກສູງຄວາມເປັນເຈົ້າການຂອງພະນັກງານ-ລັດຖະກອນ ໂດຍບໍ່ລໍຖ້າແຕ່ຄຳສັ່ງ, ຄຳຊີ້ນຳຈາກຂັ້ນເທິງ ໃຫ້ຖືຄຳຊີ້ນຳ-ຄຳສັ່ງ ເປັນແຜນການທີ່ວາງອອກ ແຕ່ການຊີ້ນຳ-ນຳພາຂອງແຕ່ລະຂັ້ນນັ້ນຕ້ອງມີການກວດກາ ແລະ ປະເມີນຄືນ ຖ້າອັນໃດບໍ່ດີໃຫ້ຫັນປ່ຽນ ເພື່ອຕີຖອຍປາກົດການຫຍໍ້ທໍ້ຕ່າງໆທີ່ຈະເກີດຂຶ້ນ ແລະ ໃນສະພາບການໂລກທີ່ພວມປະເຊີນໜ້າກັບພະຍາດ covid 19 ທີ່ກຳລັງແຜ່ລາມຢ່າງກວ້າງຂວາງຢ່າງໄວວາໃນປັດຈຸບັນ ໃຫ້ບັນດາພະນັກງານທຸກຄົນເປັນເຈົ້າການໃນການສະກັດກັ້ນ ແລະ ຕ້ານພະຍາດດັ່ງກ່າວ ຂໍໃຫ້ແຕ່ລະພາກສ່ວນຖືເປັນວຽກສຳຄັນ ທັງເປັນພັນທະຄວາມຮັບຜິດຊອບຂອງຕົນຕໍ່ກັບສັງຄົມ, ມີສະຕິຕໍ່ທຸກການເຄື່ອນໄຫວຂອງຕົນ ເພື່ອຕ້ານ ແລະ ສະກັດກັ້ນພະຍາດດັ່ງກ່າວ; ພ້ອມດຽວກັນນັ້ນ, ທ່ານຍັງໄດ້ຊີ້ນຳກ່ຽວກັບການກະກຽມການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II  ແລະ ວຽກງານພາຍໃນ ສພຊ ອີກຈຳນວນໜຶ່ງ.

                                                                         ແຫຼ່ງຂ່າວທີ່ມາ: ສະພາແຫ່ງຊາດ