ແຂວງຈໍາປາສັກ ທາບທາມບຸກຄະລາກອນ ກອງປະຊຸມໃຫຍ່ ຄັ້ງທີ XI ຂອງພັກ
06/01/2021

           (ສພຊ) ລະຫວ່າງວັນທີ 4-5 ມັງກອນ 2021 ທີ່ສະໂມສອນແຂວງຈໍາປາສັກ ໄດ້ຈັດກອງປະຊຸມທາບທາມຄວາມເຫັນໃສ່ຮ່າງເອກະສານ ແລະ ບຸກຄະລາກອນ ກອງປະຊຸມໃຫຍ່ ຄັ້ງທີ XI ຂອງພັກ ໂດຍການເປັນປະທານຂອງສະຫາຍ ພົທ. ແສງນວນ ໄຊຍະລາດ ເລຂາທິການສູນກາງພັກ, ຮອງປະທານສະພາແຫ່ງຊາດ (ສພຊ); ມີສະຫາຍ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນ; ສະຫາຍ ຄໍາສຸກ ບຸນຍະວົງ ຮອງປະທານກວດກາສູນກາງພັກ ພ້ອມດ້ວຍຄະນະຈາກສູນກາງ, ບັນດາສະຫາຍຜູ້ແທນອົງຄະນະພັກແຂວງ 4 ແຂວງພາກໃຕ້ (ຈໍາປາສັກ, ສາລະວັນ, ເຊກອງ ແລະ ອັດຕະປື) ເຂົ້າຮ່ວມ.

          ກອງປະຊຸມໄດ້ຮັບການກ່າວຕ້ອນຮັບຄະນະຜູ້ແທນກອງປະຊຸມ ຈາກສະຫາຍ ວິໄລວົງ ບຸດດາຄໍາ ເລຂາພັກແຂວງ ເຈົ້າແຂວງຈໍາປາສັກ.

          ຈຸດປະສົງຂອງການທາບທາມຄວາມເຫັນໃນຄັ້ງນີ້ ແມ່ນເພື່ອທາບທາມຄວາມຄິດຄວາມເຫັນຂອງບັນດາຜູ້ແທນສົມບູນ ທີ່ຈະເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດຂອງພັກເປັນຄັ້ງສຸດທ້າຍ ກ່ອນຈະກ້າວເຂົ້າເຖິງມື້ດໍາເນີນກອງປະຊຸມໃຫຍ່ ແລະ ເພື່ອເຮັດໃຫ້ເນື້ອໃນກອງປະຊຸມໃຫຍ່ ຄັ້ງທີ XI ຂອງພັກ ເຊິ່ງເປັນເອກະສານສໍາຄັນມີເນື້ື້ອໃນຄົບຖ້ວນ, ຖືກຕ້ອງສອດຄ່ອງ, ແທດຕົວຈິງ ທັງຮັບປະກັນຄຸນນະພາບ ແລະ ປະສິດທິຜົນ, ສ່ອງແສງອອກໄດ້ໝົດທ່າແຮງບົ່ມຊ້ອນຂອງຊາດ ແລະ ຖືກນໍາໄປຈັດຕັ້ງປະຕິບັດ ໃຫ້ປາກົດຜົນເປັນຈິງ ແລະ ຜົນສໍາເລັດ; ຍໍ້າຄືນຄວາມເປັນເອກະພາບ ທາງດ້ານທັດສະນະ, ຄວາມຮັບຮູ້, ຄວາມເຂົ້າໃຈຂອງບັນດາສະຫາຍຜູ້ແທນກອງປະຊຸມ ຕໍ່ບັນຫາບັນດາເນື້ອໃນຕົ້ນຕໍຂອງກອງປະຊຸມໃຫຍ່ ຄັ້ງທີ XI ຂອງພັກ ແລະ ເປັນການທາບທາມຮອບທີ III ເພື່ອຄວາມແຈ່ມແຈ້ງ ແລະ ເປັນເອກະພາບສູງຕໍ່ກັບການຄັດເລືອກຄະນະບໍລິຫານງານສູນກາງພັກ ສະໄໝທີ XI ກ່ອນຈະເຖິງມື້ດໍາເນີນກອງປະຊຸມໃຫຍ່ຂອງພັກ.

          ກອງປະຊຸມໄດ້ຮັບຟັງຄວາມຄິດຄວາມເຫັນເຈາະຈີ້ມຈາກປະທານກອງປະຊຸມ ກ່ຽວກັບຮ່າງລາຍງານການເມືອງ; ຮ່າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX; ຮ່າງບົດສໍາຫລວດການນໍາພາລວມ ຂອງຄະນະບໍລິຫານສູນກາງພັກ ສະໄໝທີ X; ຮ່າງກົດລະບຽບຂອງພັກສະບັບປັບປຸງ ຈາກນັ້ນ ຜູ້ແທນກອງປະຊຸມສົມບູນກໍໄດ້ຜັດປ່ຽນກັນປະກອບຄໍາຄິດຄໍາເຫັນໃສ່ບັນດາຮ່າງບົດດັ່ງກ່າວ ດ້ວຍຄວາມຮັບຜິດຊອບສູງແທດເໝາະກັບຄວາມເປັນຈິງຂອງທ້ອງຖິ່ນຂອງຕົນ ແລະ ກອງປະຊຸມຍັງໄດ້ຮັບຟັງການສະເໜີມາດຖານ, ເງື່ອນໄຂ ຂອງບຸກຄະລາກອນກອງປະຊຸມໃຫຍ່ ຄັ້ງທີ XI ຂອງພັກ ພ້ອມທັງດໍາເນີນການປ່ອນບັດ.

                                                                           ແຫຼ່ງຂ່າວທີ່ມາ: ສະພາແຫ່ງຊາດ