ຮອງປະທານ ສພຊ ເຄື່ອນໄຫວວຽກງານຢູ່ ສພຂ ໄຊສົມບູນ
29/01/2021

         (ສພຊ) ວັນທີ 20 ມັງກອນ 2020 ທ່ານ ພົທ. ແສງນວນ ໄຊຍະລາດ ຮອງປະທານສະພາແຫ່ງຊາດ (ສພຊ) ໄດ້ເຄື່ອນໄຫວວຽກງານຢູ່ສະພາປະຊາຊົນແຂວງ (ສພຂ) ໄຊສົມບູນ ທີ່ຫ້ອງປະຊຸມຫ້ອງວ່າການແຂວງ ໂດຍການຕ້ອນຮັບຂອງທ່ານ ບຸນສຸກ ຈອມວິສານ ປະທານ ສພຂ; ເຂົ້າຮ່ວມມີທ່ານ ພົຕ. ຄໍາລຽງ ອຸທະໄກສອນ ເຈົ້າແຂວງໆໄຊສົມບູນ ແລະ ມີການນໍາຂັ້ນແຂວງຈໍານວນໜຶ່ງເຂົ້າຮ່ວມ.

        ທ່ານ ພົທ. ແສງນວນ ໄຊຍະລາດ ໄດ້ໃຫ້ຮູ້ກ່ຽວກັບຈຸດປະສົງທີ່ມາເຮັດວຽກຮ່ວມກັບ  ສພຂ ໄຊສົມບູນ ໃນຄັ້ງນີ້ ແມ່ນເພື່ອຕິດຕາມກວດກາຄວາມພ້ອມໃນການກະກຽມໃຫ້ແກ່ການເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ (ສສຂ) ຊຸດທີ II.

        ໃນໂອກາດດັ່ງກ່າວ, ປະທານ ສພຂ ໄດ້ລາຍງານຫຍໍ້ກ່ຽວກັບຄວາມພ້ອມໃນການກະກຽມໃຫ້ແກ່ການເລືອກຕັ້ງ ສສຊ ຊຸດທີ IX ແລະ  ສສຂ ຊຸດທີ II ສຳລັບ ສພຂ ໄຊສົມບູນ ແມ່ນໄດ້ຮ່າງຂໍ້ຕົກລົງຂອງອະນຸກໍາມະການວ່າດ້ວຍການແບ່ງຄວາມຮັບຜິດຊອບໃນຄະນະ ແລະ ໜ່ວຍງານຊ່ວຍວຽກ; ນອກນັ້ນ, ຍັງໄດ້ແຕ່ງຕັ້ງກໍາມະການຂັ້ນແຂວງ ແລະ ຂັ້ນເມືອງ ເປັນທີ່ຮຽບຮ້ອຍແລ້ວ.

        ພ້ອມນັ້ນ, ເຈົ້າແຂວງໄຊສົມບູນ ຍັງໄດ້ລາຍງານໃຫ້ຮູ້ກ່ຽວກັບຈໍານວນຂອງປະຊາກອນພາຍໃນແຂວງໄຊສົມບູນ ເຊິ່ງໃນປັດຈຸບັນ ແມ່ນມີປະຊາກອນຈຳນວນໜຶ່ງແສນກວ່າຄົນ ເພື່ອເຮັດໃຫ້ບັນລຸຕາມລະດັບຄາດໝາຍທີ່ວາງໄວ້ນັ້ນ ບັນດາການນໍາແຂວງໄຊສົມບູນ ໄດ້ເຄື່ອນໄຫວ, ເຜີຍແຜ່ໂຄສະນາ, ເຊື່ອມຊຶມ ແລະ ປຸກລະດົມພໍ່ແມ່ປະຊາຊົນ ໃຫ້ຮັບຮູ້, ເຂົ້າໃຈກ່ຽວກັບພາລະບົດບາດ, ສິດ ແລະ ໜ້າທີ່ຂອງ ສພຊ ແລະ ສພຂ.

                                                                                 ແຫຼ່ງຂ່າວທີ່ມາ: ສະພາແຫ່ງຊາດ