ປະທານ ສພຊ ເຂົ້າຮ່ວມພິທີມອບ-ຮັບໜ້າທີ່ເຈົ້າແຂວງໆຊຽງຂວາງ
25/02/2021

        (ສພຊ) ວັນທີ 29 ມັງກອນ 2021 ທີ່ຫ້ອງຫ້ອງວ່າການປົກຄອງແຂວງຊຽງຂວາງ ໄດ້ຈັດພິທີມອບ-ຮັບໜ້າທີ່ລະຫວ່າງທ່ານ ບຸນຕົ້ນ ຈັນທະພອນ ເຈົ້າແຂວງໆຊຽງຂວາງ ຜູ້ເກົ່າ ແລະ ທ່ານ ບຸນຈັນ ສີວົງພັນ ກໍາມະການສູນກາງພັກ, ເຈົ້າແຂວງໆຊຽງຂວາງ ຜູ້ໃໝ່; ໂດຍການເຂົ້າຮ່ວມ​ຂອງ​ທ່ານ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ (ສພຊ); ມີບັນດາທ່ານຮອງເລຂາພັກແຂວງ, ກໍາມະການພັກແຂວງ, ຜູ້ຕາງໜ້າຄະນະຈັດຕັ້ງສູນກາງພັກ, ຫົວໜ້າ-ຮອງຫົວໜ້າພະແນກການອ້ອມຂ້າງແຂວງ ແລະ ອະດີດການນໍາຂອງແຂວງເຂົ້າຮ່ວມ.

        ທ່ານ ນາງ ບຸດສະດີ ທະນະເມືອງ ກຳມະການສູນກາງພັກ, ຜູ້ຕາງໜ້າຄະນະຈັດຕັ້ງສູນກາງພັກ ໄດ້ຜ່ານມະຕິຕົກລົງຂອງກົມການເມືອງສູນກາງພັກ ເລກທີ 01/ກມສພ, ລົງວັນທີ 22 ມັງກອນ 2021 ວ່າດ້ວຍການອະນຸມັດໃຫ້ພະນັກງານການນໍາຂັ້ນສູງອອກພັກການ-ຮັບອຸດໜູນບໍານານ ແລະ ຄໍາສັ່ງຂອງນາຍົກລັດຖະມົນຕີ ເລກທີ 634/ນຍ, ລົງວັນທີ 30 ທັນວາ 2020 ວ່າດ້ວຍການແຕ່ງຕັ້ງເຈົ້າແຂວງໆຊຽງຂວາງ; ໂດຍທ່ານ ບຸນຕົ້ນ ຈັນທະພອນ ອະດີດເລຂາຄະນະບໍລິຫານງານພັກແຂວງ, ເຈົ້າແຂວງໆຊຽງຂວາງ ຜູ້ເກົ່າ ອອກພັກການພັກຜ່ອນບໍານານ ແລະ ທ່ານ ບຸນຈັນ ສີວົງພັນ ກໍາມະການສູນກາງພັກ, ເລຂາພັກແຂວງ ໄດ້ຮັບການແຕ່ງຕັ້ງເປັນເຈົ້າແຂວງໆຊຽງຂວາງ ຜູ້ໃໝ່; ພ້ອມກັນນັ້ນ, ກໍໄດ້ມີພິທີເຊັນບົດບັນທຶກມອບ-ຮັບໜ້າທີ່ຮ່ວມກັນລະຫວ່າງທ່ານເຈົ້າແຂວງໆຊຽງຂວາງຜູ້ເກົ່າ ແລະ ຜູ້ໃໝ່.

         ໂອກາດນີ້, ທ່ານ ນາງ ປານີ ຢາທໍ່ຕູ້ ໄດ້ມີຄໍາເຫັນໂອ້ລົມຕໍ່ພິທີ  ແລະ ເຊື່ອໝັ້ນວ່າ ເຈົ້າແຂວງຜູ້ໃຫມ່ ຈະສືບຕໍ່ເສີມຂະຫຍາຍມູນເຊື້ອອັນດີງາມຂອງບັນດາສະຫາຍການນໍາລຸ້ນຜ່ານມາ ເພື່ອສືບຕໍ່ຊີ້ນໍາ-ນໍາພາ ແລະ ຍູ້ແຮງຂະບວນການປົກປັກຮັກສາ ແລະ ພັດທະນາຢູ່ພາຍໃນແຂວງ ໃຫ້ມີການຂະຫຍາຍຕົວຢ່າງຮອບດ້ານ, ຕໍ່ເນື່ອງ ແລະ ໝັ້ນທ່ຽງ, ສູ້ຊົນຈັດຕັ້ງປະຕິບັດບັນດາຄາດໝາຍ ແລະ ທິດທາງທີ່ກໍານົດໄວ້ໃນມະຕິກອງປະຊຸມໃຫຍ່ອົງຄະນະພັກແຂວງຄັ້ງທີ VIII ແລະ ມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ສະພາບ ແລະ ເງື່ອນໄຂຕົວຈິງຂອງທ້ອງຖິ່ນໃຫ້ບັນລຸຜົນສໍາເລັດ ແລະ ສ້າງພື້ນຖານອັນໜັກແໜ້ນ ໃຫ້ແກ່ການພັດທະນາຢ່າງຮອບດ້ານ ແລະ ຕໍ່ເນື່ອງຂອງແຂວງຊຽງຂວາງໃນຕໍ່ໜ້າ. ພ້ອມກັນນັ້ນ, ກໍໄດ້ເນັ້ນໃຫ້ສະຫາຍເຈົ້າແຂວງ ສືບຕໍ່ເອົາໃຈໃສ່ຊີ້ນໍາກະກຽມຄວາມພ້ອມຮອບດ້ານ ໃຫ້ແກ່ການເລືອກຕັ້ງສະມາຊິກສະພາແຫ່ງຊາດ ຊຸດທີ  IX ແລະ ສະມາຊິກສະພາປະຊາຊົນຂັ້ນແຂວງ ຊຸດທີ II ໃຫ້ບັນລຸຕາມຄາດໝາຍທີ່ກໍານົດໄວ້ ເປັນຕົ້ນແມ່ນເອົາໃຈໃສ່ເຜີຍແຜ່, ແນະນໍາບັນດາເອກະສານຕ່າງໆໃຫ້ບັນດາໜ່ວຍປ່ອນບັດເລືອກຕັ້ງຕ່າງໆໃຫ້ສໍາເລັດພາຍໃນອາທິດທໍາອິດຂອງເດືອນກຸມພາ 2021 ເພື່ອໃຫ້ເຂົາເຈົ້າມີຄວາມເຂົ້າໃຈ ແລະ ຄວບຄຸມການປ່ອນບັດ ກໍຄືການນັບຄະແນນໃຫ້ຖືກຕ້ອງຕາມລະບຽບການວາງອອກ, ເອົາໃຈໃສ່ແກ້ໄຂປາກົດການຫຍໍ້ທໍ້ຕ່າງໆ ກ່ອນການດໍາເນີນການເລືອກຕັ້ງ ຢູ່ໃນຈຸດທີ່ຫລໍ່ແຫລມ ແນໃສ່ຮັບປະກັນ ເຮັດໃຫ້ການເລືອກຕັ້ງຄັ້ງນີ້ ມີຄວາມສະຫງົບ ແລະ ຄວາມປອດໄພ 100%.

         ໃນໂອກາດທີ່ໄດ້ມາເຄື່ອນໄຫວ ແລະ ເຮັດວຽກຢູ່ແຂວງຊຽງຂວາງຄັ້ງນີ້, ທ່ານ ນາງ ປານີ ຢາທໍ່ຕູ້ ຍັງໄດ້ເຄື່ອນໄຫວຕິດຕາມ ແລະ ຊຸກຍູ້ການກະກຽມການເລືອກຕັ້ງສະມາຊິກສະພາແຫ່ງຊາດ ຊຸດທີ  IX ແລະ ສະມາຊິກສະພາປະຊາຊົນຂັ້ນແຂວງ ຊຸດທີ II ຢູ່ເມືອງໜອງແຮດ ແລະ ຢ້ຽມຢາມພື້ນຖານເສດຖະກິດ-ສັງຄົມຢູ່ແຂວງຊຽງຂວາງຈໍານວນໜຶ່ງ.

                                                                                                     ແຫຼ່ງຂ່າວທີ່ມາ: ສະພາແຫ່ງຊາດ