ກອງປະຊຸມໃຫຍ່ສະມັດຊາລັດຖະສະພາລະຫວ່າງຊາດອາຊຽນ (AIPA) ຄັ້ງທີ 42
24/08/2021

      (ສພຊ) ໃນຕອນເຊົ້າວັນທີ 23 ສິງຫາ 2021 ທີ່ຫ້ອງປະຊຸມຄະນະປະຈຳສະພາແຫ່ງຊາດ, ທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ພ້ອມດ້ວຍຄະນະຜູ້ແທນຂັ້ນສູງຂອງສະພາແຫ່ງຊາດລາວ ໄດ້ເຂົ້າຮ່ວມພິທີເປີດກອງປະຊຸມສະມັດຊາລັດຖະສະພາລະຫວ່າງຊາດອາຊຽນ (AIPA) ຄັ້ງທີ 42 ແບບທາງໄກ ຈັດໂດຍສະພານິຕິບັນຍັດ ແຫ່ງ ບຣູໄນ ດາຣູຊາລາມ ເຊິ່ງກອງປະຊຸມດັ່ງກ່າວຈະໄດ້ດຳເນີນໄປເປັນເວລາ 3 ວັນ (ລະຫວ່າງວັນທີ 23-25 ສິງຫາ 2021) ພາຍໃຕ້ການເປັນປະທານຂອງທ່ານ ເປຮິນ ດາໂຕະ ຮາຈິ ອາດູນ ລາມັນ ຕາອິບ ປະທານສະພານິຕິບັນຍັດ ແຫ່ງ ບຣູໄນ ດາຣູຊາລາມ ທັງເປັນປະທານກອງປະຊຸມໃຫຍ່ໄອປາ ຄັ້ງທີ 42.
      ຈຸດປະສົງຂອງການເຂົ້າຮ່ວມກອງປະຊຸມຄັ້ງນີ້, ແມ່ນເພື່ອປະຕິບັດພັນທະ ແລະ ບົດບາດຂອງຕົນ ໃນຖານະທີ່ສະພາແຫ່ງຊາດ ແຫ່ງ ສປປລາວ ເປັນສະມາຊິກສົມບູນຂອງອົງການສະມັດຊາລັດຖະສະພາລະຫວ່າງຊາດອາຊຽນ ເພື່ອສະແດງຄວາມຄິດຄວາມເຫັນ ແລະ ແລກປ່ຽນທັດສະນະຕໍ່ບັນຫາຕ່າງໆຂອງພາກພື້ນ ກໍຄືຂອງໂລກ; ກອງປະຊຸມຈະໄດ້ສຸມໃສ່ຄົ້ນຄວ້າປຶກສາຫາລືແລກປ່ຽນຄຳຄິດຄວາມເຫັນ ໃນຫົວຂໍ້: “ເຊື່ອມສານການຮ່ວມມືລັດຖະສະພາ ໃນການນຳໃຊ້ລະບົບດິຈິຕອນຢ່າງເທົ່າທຽມກັນ ເພື່ອກ້າວສູ່ປະຊາຄົມອາຊຽນ 2025 (Forging Parliamentary Cooperation In Digital Inclusion Towards Asean Community 2025)”
       ໃນພິທີເປີດກອງປະຊຸມໃຫຍ່ໄອປາຄັ້ງນີ້ ມີພະມະຫາກະສັດຊຸນຕານ ແຫ່ງ ບຣູໄນ ດາຣູຊາລາມ ໃຫ້ກຽດເຂົ້າຮ່ວມ ແລະ ກ່າວປາໄສເປີດກອງປະຊຸມຢ່າງເປັນທາງການ  ເຊິ່ງມີຄະນະຜູ້ແທນທີ່ນຳໂດຍປະທານລັດຖະສະພາຈາກປະເທດສະມາຊິກລັດຖະສະພາອາຊຽນ 9 ປະເທດ, ປະເທດສັງເກດການ ແລະ ແຂກຂອງປະເທດເຈົ້າພາບ ທີ່ເປັນຕົວແທນຈາກລັດຖະສະພາພາກພື້ນ ແລະ ສາກົນເຂົ້າຮ່ວມຢ່າງຫລວງຫລາຍ.
        ຫລັງຈາກພິທີເປີດຢ່າງເປັນທາງການ, ຫົວໜ້າຄະນະຜູ້ແທນຂອງລັດຖະສະພາແຕ່ລະປະເທດສະມາຊິກໄອປາ ໄດ້ຜັດປ່ຽນກັນຂຶ້ນກ່າວປາໄສຕໍ່ກອງປະຊຸມຕາມລຳດັບ ເຊິ່ງໃນໂອກາດນີ້,  ທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປລາວ ໄດ້ກ່າວປາໄສຕໍ່ກອງປະຊຸມຄົບຄະນະວາລະທີ 1 ໂດຍທ່ານໄດ້ຕີລາຄາສູງ ແລະ ສະໜັບສະໜູນຕໍ່ຄຳຂວັນຂອງກອງປະຊຸມໃຫຍ່ໄອປາຄັ້ງນີ້ ມີຄວາມໝາຍ ແລະ ຄວາມສຳຄັນຫລາຍ ເຊິ່ງຈະເປັນການປະກອບສ່ວນເຂົ້າໃນການຈັດຕັ້ງປະຕິບັດແຜນແມ່ບົດດິຈິຕອນອາຊຽນ 2025 ແລະ ແຜນປະຕິບັດງານອາຊຽນດ້ານວິທະຍາສາດ, ເຕັກໂນໂລຊີ ແລະ ນະວັດຕະກໍາ 2016-2025. ພ້ອມກັນນີ້, ທ່ານຍັງໄດ້ຕີລະຄາສະພາບການໃນພາກພື້ນກໍຄືໃນທົ່ວໂລກ ທີ່ພວມສືບຕໍ່ຜັນແປໄປຢ່າງສັບສົນ ແລະ ປະເຊີນໜ້າກັບສິ່ງທ້າທາຍຫລາຍຢ່າງເປັນຕົ້ນແມ່ນການແຜ່ລະບາດຂອງພະຍາດໂຄວິດ-19, ໄພພິບັດທໍາມະຊາດ ແລະ ອື່ນໆ ເຊິ່ງໄດ້ສົ່ງຜົນກະທົບຢ່າງໜັກໜ່ວງຕໍ່ສຸຂະພາບ, ການພັດທະນາເສດຖະກິດ-ສັງຄົມ, ສະຖຽນລະພາບ ແລະ ຄວາມໝັ້ນຄົງໃນພາກພື້ນ ແລະ ໃນໂລກ; ໃນໂອກາດດຽວກັນນີ້, ທ່ານຍັງຍົກໃຫ້ເຫັນແຜນພັດທະນາເສດຖະກິດ-ສັງຄົມແຫ່ງຊາດຂອງປະເທດ ເທື່ອທີ IX (2021-2025) ປະກອບດ້ວຍ 6 ເປົ້າໝາຍ; ໃນນັ້ນ, ລັດຖະບານໄດ້ເອົາໃຈໃສ່ສ້າງຍຸດທະສາດການພັດທະນາວິທະຍາສາດ ແລະ ເຕັກໂນໂລຊີ, ນະໂຍບາຍແຫ່ງຊາດ ແລະ ກົດໝາຍໃນຂົງເຂດເຕັກໂນໂລຊີສື່ສານ ແລະ ຂໍ້ມູນຂ່າວສານຂອງ ສປປລາວ ເພື່ອຊຸກຍູ້ສົ່ງເສີມໃຫ້ແກ່ອົງການ ແລະ ຂະແໜງການຕ່າງໆໃນທົ່ວສັງຄົມ, ສາມາດນໍາໄປຜັນຂະຫຍາຍ ແລະ ນໍາໃຊ້ເຄື່ອງມືທີ່ທັນສະໄໝເຂົ້າໃນການຄຸ້ມຄອງ, ບໍລິຫານລັດ, ການບໍລິການດ້ານການປົກຄອງ, ດ້ານສັງຄົມໃຫ້ປະຊາຊົນ ແລະ ການພັດທະນາເສດຖະກິດ-ສັງຄົມ ໃຫ້ມີການຂະຫຍາຍຕົວ ໂດຍສະເພາະທຸລະກິດຂະໜາດກາງ, ຂະໜາດນ້ອຍ, ຈຸລະວິສາຫະກິດ ແລະ ສະຕາດອັບມີຄວາມດຸນດ່ຽງ ແລະ ສາມາດເຊື່ອມໂຍງເຂົ້າກັບເສດຖະກິດຂອງພາກພື້ນ ແລະ ຂອງໂລກ.
        ໃນຕອນທ້າຍ, ທ່ານໄດ້ຮຽກຮ້ອງໃຫ້ລັດຖະສະພາສະມາຊິກໄອປາ ສືບຕໍ່ຮັດແໜ້ນການຮ່ວມມືໃນການຊຸກຍູ້ສົ່ງເສີມການຄົ້ນຄວ້າ, ການພັດທະນາວິທະຍາສາດ ແລະ ເຕັກໂນໂລຊີ, ເຊື່ອມສານການຮ່ວມມືລັດຖະສະພາ ໃນການນຳໃຊ້ ແລະ ເຂົ້າເຖິງລະບົບດິຈິຕອນຂອງທຸກຊັ້ນໃນສັງຄົມຢ່າງທົ່ວເຖິງ ແລະ ເທົ່າທຽມກັນ, ກ້າວສູ່ປະຊາຄົມອາຊຽນ, ສົ່ງເສີມການຮ່ວມມືລະຫວ່າງພາກລັດ ແລະ ເອກະຊົນໃຫ້ມີສ່ວນຮ່ວມໃນວຽກງານດັ່ງກ່າວໃຫ້ຫລາຍຂຶ້ນ ພ້ອມທັງຊຸກຍູ້ໃຫ້ລັດຖະບານປະເທດສະມາຊິກອາຊຽນ ຈັດຕັ້ງຜັນຂະຫຍາຍແຜນແມ່ບົດດ້ານດິຈີຕອນຂອງອາຊຽນ 2025 ແລະ ແຜນປະຕິບັດງານອາຊຽນດ້ານວິທະຍາສາດ ເຕັກໂນໂລຊີ ແລະ ນະວັດຕະກໍາ 2016-2025 ເຂົ້າໃນນະໂຍບາຍ ແລະ ລະບຽບກົດໝາຍຂອງແຕ່ລະປະເທດສະມາຊິກອາຊຽນ ໃຫ້ມີຄວາມສອດຄ່ອງກົມກຽວກັນ.
       ໃນມື້ຕໍ່ໄປ, ກອງປະຊຸມກຳມາທິການຕ່າງໆຂອງໄອປາ ປະກອບມີ: ກອງປະຊຸມຄະນະສະມາຊິກລັດຖະສະພາເພດຍິງ, ກຳມາທິການການເມືອງ, ກຳມາທິການເສດຖະກິດ, ກຳມາທິການສັງຄົມ ແລະ ກຳມາທິການວຽກງານພາຍໃນ ຂອງໄອປາ ຈະໄດ້ດຳເນີນຕາມວາລະຂອງກອງປະຊຸມໃຫຍ່ສະມັດຊາລັດຖະສະພາລະຫວ່າງຊາດອາຊຽນ ເຊິງຈະໄດ້ຄົ້ນຄວ້າ, ປຶກສາຫາລື ແລະ ພິຈາລະນາຮັບຮອງເອົາຮ່າງມະຕິ ຈຳນວນ 28 ສະບັບ. 

                                                                                ແຫຼ່ງຂ່າວທີ່ມາ: ສະພາແຫ່ງຊາດ