ໜ່ວຍພັກຮາກຖານ ກກໝ ດຳເນີນກອງປະຊຸມໃຫຍ່ ຄັ້ງທີ II
09/09/2021

             (ສພຊ) ກອງປະຊຸມໃຫຍ່ຄັ້ງທີ II ຂອງໜ່ວຍພັກຮາກຖານກຳມາທິການກົດໝາຍ (ກກໝ) ໄດ້ໄຂຂຶ້ນ ແລະສຳເລັດລົງດ້ວຍໝາກຜົນອັນຈົບງາມ ໃນວັນທີ 28 ສິງຫາຜ່ານມາ, ທີ່ສະພາແຫ່ງຊາດພາຍໃຕ້ການເຂົ້າຮ່ວມຂອງສະຫາຍ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ເລຂາຄະນະບໍລິຫານງານພັກສະພາແຫ່ງຊາດ, ປະທານສະພາແຫ່ງຊາດ ໂດຍການເປັນປະທານກອງປະຊຸມຂອງສະຫາຍ ອຳໄພ ຈິດມານົນ ຮັກສາການເລຂາໜ່ວຍພັກຮາກຖານ ກກໝ; ເຂົ້າຮ່ວມມີສະຫາຍຮັກສາການຮອງເລຂາໜ່ວຍພັກ, ຮັກສາການກຳມະການໜ່ວຍພັກ, ຜູ້ຕາງໜ້າຈາກຫ້ອງການຊ່ວຍວຽກງານບໍລິຫານພັກສະພາແຫ່ງຊາດ, ຜູ້ຕາງໜ້າຈາກອົງການຈັດຕັ້ງມະຫາຊົນ, ສະມາຊິກພັກສົມບູນ-ສຳຮອງ, ສະມາຊິກພັກອະວຸໂສບຳນານພາຍໃນໜ່ວຍພັກ ແລະແຂກຖືກເຊີນ.

             ກອງປະຊຸມໄດ້ຮັບຟັງການລາຍງານ ແລະ ປະກອບຄຳຄິດຄຳເຫັນຢ່າງກົງໄປກົງມາຕໍ່ບົດລາຍງານການເມືອງຂອງໜ່ວຍພັກ ໃນໄລຍະແຕ່ປີ 2018-2021 ແລະ ທິດທາງແຜນການ 5 ປີ (2021-2025), ບົດສຳຫລວດການນຳພາຂອງຄະນະໜ່ວຍພັກຮາກຖານ ກກໝ ຊຸດເກົ່າ. ພ້ອມນັ້ນ, ຜູ້ແທນສົມບູນຂອງກອງປະຊຸມຍັງໄດ້ສຸມໃສ່ຄົ້ນຄວ້າຢ່າງເລິກເຊິ່ງໃນການນຳໃຊ້ສິດປະຊາທິປະໄຕຂອງຕົນປ່ອນບັດເລືອກຕັ້ງເອົາຄະນະໜ່ວຍພັກຮາກຖາກ ກກໝ ຊຸດໃໝ່ ບົນພື້ນຖານຫລັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຖານເງື່ອນໄຂທີ່ໄດ້ກຳນົດໄວ້ ໂດຍມີຜູ້ສະໝັກຮັບເລືອກຕັ້ງ 7 ສະຫາຍ ຍິງ 1 ສະຫາຍ ແລະ ຜູ້ສະໝັກເລືອກຕັ້ງເປັນຜູ້ແທນສົມບູນ, ສຳຮອງທີ່ຈະເຂົ້າຮ່ວມກອງປະຊຸມໃຫຍ່ຄັ້ງທີ IV ຂອງອົງຄະນະພັກສະພາແຫ່ງຊາດ ທັງໝົດ 19 ສະຫາຍ ເຊິ່ງກອງປະຊຸມໃຫຍ່ໄດ້ເລືອກຕັ້ງເອົາຄະນະໜ່ວຍພັກ ສະໄໝທີ II  ໄດ້ຈໍານວນ 5 ສະຫາຍ ຄື: ສະຫາຍ ຈະເລີນ ເຍຍປາວເຮີ ເປັນເລຂາ,  ສະຫາຍ ອຳໄພ ຈິດມານົນ ເປັນຮອງເລຂາ, ສະຫາຍ ພູທອນ ວໍລະເພັດ ເປັນປະທານກວດກາ, ສະຫາຍ ພອນແກ້ວ ຕົ້ນວໍລະຈິດ ເປັນຮອງປະທານກວດກາແລະ ສະຫາຍ ບຸນຍົງ ພົນເສນາ ເປັນກຳມະການກວດກາຂອງໜ່ວຍພັກ ກກໝ ແລະ ແລະ ເລືອກໄດ້ຜູ້ແທນສົມບູນ 17 ສະຫາຍ, ສຳຮອງ 2 ສະຫາຍ.

             ສະຫາຍ ປອ. ໄຊສົມພອນ ພົມວິຫານ ຍັງໄດ້ມີຄຳເຫັນ ແລະ ກ່າວສະ​ແດງ​ຄວາມ​ຊົມ​ເຊີຍ​ຄະ​ນະ​ຊຸດ​ເກົ່າ ທີ່​ສາ​ມາດຍາດ​ໄດ້​ຜົນ​ງານຫລາຍ​ດ້ານ ໂດຍ​ສະ​ເພາະ​ວຽກ​ງານ​ກົດ​ໝາຍ ເຊິ່ງ​ເປັນ​ວຽກ​ງານ​ໜຶ່ງ​ທີ່​ຈ​ຳ​ເປັນ ແລະ ສຳ​ຄັນຫລາຍ; ພ້ອມນັ້ນ,ກໍ​ໄດ້​ຊີ້​ນຳ​ໃຫ້ຄະ​ນະ​ພັກ​ຊຸດ​ໃໝ່ເອົາ​ໃຈ​ໃສ່​ໃນ​ການ​ແກ້​ໄຂ​ບັນ​ຫາ​ຂໍ້​ຄົງ​ຄ້າງ​ ກໍ​ຄື​ບາງ​ດ້ານ​ທີ່​ຍັງ​ບໍ່​ທັນ​ຈັດ​ຕັ້ງ​ປະ​ຕິ​ບັດ​ສຳ​ເລັດ ແລະ ເຊື່ອ​ໝັ້ນ​ວ່າ ພາຍ​ໃຕ້​ການ​ນຳ​ພາ​ຂອງ​ຄະ​ນະ​ພັກ​ຊຸດ​ໃໝ່ຈະ​ເຮັດ​ໃຫ້​ໜ່ວຍ​ພັກ​ຮາກ​ຖານ ກກໝ ສາ​ມາດ​ຍາດ​ໄດ້​ຜົນ​ງານ​ທີ່​ພົ້ນ​ເດັ່ນ​ໃນຫລາຍ​ດ້ານ.

(ນາງ ປາກາລັກ ພົມມີໄຊ)