ຄລສ ຫາລືທາງໄກເພື່ອຫາທາງແກ້ໄຂການແຜ່ລະບາດຂອງພະຍາດໂຄວິດ-19
09/09/2021

        (ສພຊ) ໃນວັນທີ 27 ສິງຫາ 2021 ຄະນະເລຂາທິການສະພາແຫ່ງຊາດ (ຄລສ) ໄດ້ຈັດກອງປະຊຸມທາງໄກ ຮ່ວມກັບຄະນະເລຂາທິການສະພາປະຊາຊົນຂັ້ນແຂວງ ພ້ອມດ້ວຍສະມາຊິກສະພາແຫ່ງຊາດ ທີ່ເປັນກໍາມະການຂອງກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ; ກໍາມາທິການແຜນການ, ການເງິນ ແລະ ການກວດສອບ, ກຳມາທິການວັດທະນະທໍາ-ສັງຄົມ ແລະ ກໍາມາທິການບັນດາເຜົ່າ ເພື່ອເຂົ້າຮ່ວມກອງປະຊຸມທາງໄກປຶກສາຫາລືກ່ຽວກັບກັບມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ໂດຍການເປັນປະທານຂອງທ່ານ ສົມມາດ ພົລເສນາ ກຳມະການສູນກາງພັກ, ຮອງປະທານຄະນະປະຈຳສະພາແຫ່ງຊາດ.

          ຈຸດປະສົງຂອງກອງປະຊຸມທາງໄກຄັ້ງນີ້ ແມ່ນເພື່ອປຶກສາຫາລືກ່ຽວກັບມາດຕະການປ້ອງກັນ, ຄວບຄຸມ, ສະກັດກັ້ນແລະ ແກ້ໄຂການແຜ່ລະບາດຂອງພະຍາດໂຄວິດ-19 ຈາກກຳມາທິການ, ຂະແໜງການຕ່າງໆ. ຜູ້ເຂົ້າຮ່ວມກອງປະຊຸມໄດ້ຕອບຄໍາຖາມເຈາະຈີ້ມ ເຊິ່ງຕ້ອງຮີບຮ້ອນຫາຊ່ອງທາງທີ່ສອດຄ່ອງກັບສະພາບຄວາມເປັນຈິງ ຄື: 1. ການຈັດຕັ້ງປະຕິບັດບັນດາມາດຕະການຂອງລັດຖະບານກ່ຽວກັບການປ້ອງກັນ, ຄວບຄຸມ, ສະກັດກັ້ນ ແລະແກ້ໄຂການແຜ່ລະບາດຂອງພະຍາດໂຄວິດ-19 ເຊັ່ນ: ມາດຕະການບໍລິຫານ ແລະ ສັງຄົມ, ມາດຕະການການແພດ, ມາດຕະການພາລາທິການ ແລະ ການເງິນ, ມາດຕະການດ້ານເສດຖະກິດ, ຂໍ້ຫຍຸ້ງຍາກ ແລະ ສິ່ງທ້າທາຍຢູ່ແຕ່ລະເຂດເລືອກຕັ້ງ; 2.ທິດທາງ, ມາດຕະການ ປ້ອງກັນ, ຄວບຄຸມ, ແກ້ໄຂການແຜ່ລະບາດຂອງພະຍາດໂຄວິດ-19 ແລະ ມາດຕະການແກ້ໄຂ, ຟື້ນຟູຜົນກະທົບທາງດ້ານເສດຖະກິດ-ສັງຄົມ ໃນຕໍ່ໜ້າ; 3.ຂໍ້ສະເໜີຕໍ່ກັບການຈັດຕັ້ງປະຕິບັດມາດຕະການຂອງລັດຖະບານ ເພື່ອສະເໜີໃຫ້ຄະນະປະຈຳສະພາແຫ່ງຊາດ ປະສານສົມທົບ ແລະ ຊຸກຍູ້ລັດຖະບານ ໃນການແກ້ໄຂບັນຫາດັ່ງກ່າວຢ່າງມີປະສິດທິພາບ ແລະ ປະສິດທິຜົນ; 4. ຜ່ານພຶດຕິກໍາໃນການປ້ອງກັນ, ສະກັດກັ້ນ, ຄວບຄຸມແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢູ່ບັນດາແຂວງ ທີ່ມີແຮງງານນຳເຂົ້າຈາກຕ່າງປະເທດ ເຫັນວ່າມີອັນໃດທີ່ສາມາດຖອດຖອນເປັນບົດຮຽນ ແລະ ມີອັນໃດຕ້ອງໄດ້ປັບປຸງຕື່ມ. ສຳລັບແຂວງທີ່ຍັງບໍ່ມີການລະບາດຫລື ລະບາດໜ້ອຍ ບັນດາທ່ານເຫັນຄວນມີມາດຕະການເພີ່ມທະວີ ຕື່ມອີກຄືແນວໃດ.

          ບັນດາຜູ້ເຂົ້າຮ່ວມກອງປະຊຸມ ໄດ້ພ້ອມກັນແລກປ່ຽນປະກອບຄຳຄິດຄຳເຫັນໃສ່ບັນດາຄຳຖາມເຈາະຈີ້ມ ເພື່ອເຮັດແນວໃດຄຳຄິດເຫັນດັ່ງກ່າວຈະສາມາດນຳໄປຜັນຂະຫຍາຍແລະ ປະຕິບັດໃຫ້ເກີດໝາກຜົນເປັນຈິງໄດ້.

(ອານຸສອນ ພູມມີທອນ)