ໜ່ວຍພັກຮາກຖານ ກຜງສ ສຳເລັດກອງປະຊຸມຄັ້ງທີ II
13/09/2021

         (ສພຊ) ກອງປະຊຸມໃຫຍ່ຄັ້ງທີ II ຂອງໜ່ວຍພັກຮາກຖານກຳມາທິການແຜນການ, ການເງິນ ແລະ ການກວດສອບ (ກຜງສ) ສະພາແຫ່ງຊາດ ໄດ້ໄຂຂຶ້ນ ແລະ ສຳເລັດລົງດ້ວຍຜົນສຳເລັດອັນຈົບງາມ ໃນວັນທີ 2 ກັນຍາ 2021 ທີ່ສະພາແຫ່ງຊາດ ພາຍໃຕ້ການເປັນປະທານຂອງສະຫາຍ ປອ. ລີເບີ ລີບົວປາວ ຮັກສາການເລຂາໜ່ວຍພັກຮາກຖານ ກຜງສ, ປະທານ ກຜງສ;  ໂດຍການເຂົ້າຮ່ວມຂອງສະຫາຍ ສຸບັນ ສະວະບຸດ ກຳມະການຄະນະບໍລິຫານງານພັກສະພາແຫ່ງຊາດ, ປະທານກຳມາທິການວຽກງານສະມາຊິກສະພາແຫ່ງຊາດ; ມີຮອງເລຂາໜ່ວຍພັກ, ກຳມະການໜ່ວຍພັກ, ຜູ້ຕາງໜ້າຈາກຫ້ອງການຊ່ວຍວຽກງານບໍລິຫານພັກສະພາແຫ່ງຊາດ, ຜູ້ຕາງໜ້າຈາກອົງການຈັດຕັ້ງມະຫາຊົນ,  ສະມາຊິກພັກສົມບູນ-ສຳຮອງ, ສະມາຊິກພັກອະວຸໂສບຳນານພາຍໃນໜ່ວຍພັກ ແລະ ແຂກຖືກເຊີນ.

          ກອງປະຊຸມໄດ້ຮັບຟັງບົດລາຍງານການເມືອງຂອງໜ່ວຍພັກ ແລະ ທິດທາງແຜນການໃນຕໍ່ໜ້າ;  ບົດສຳຫລວດການນຳພາຂອງຄະນະໜ່ວຍພັກຮາກຖານ ກຜງສ ຊຸດເກົ່າ. ຈາກນັ້ນ, ຜູ້ແທນສົມບູນຂອງກອງປະຊຸມຍັງໄດ້ສຸມໃສຄົ້ນຄວ້າຢ່າງເລິກເຊິ່ງໃນການນຳໃຊ້ສິດປະຊາທິປະໄຕຂອງຕົນປ່ອນບັດເລືອກຕັ້ງເອົາຄະນະໜ່ວຍພັກຮາກຖານ ກຜງສ ຊຸດໃໝ່ ບົນພື້ນຖານຫລັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຖານເງື່ອນໄຂທີ່ໄດ້ກຳນົດໄວ້;  ໂດຍກອງປະຊຸມໃຫຍ່ໜ່ວຍພັກຮາກຖານ ກຜງສ ມີຜູ້ສະໝັກຮັບເລືອກຕັ້ງ 7 ສະຫາຍ ຍິງ 1 ສະຫາຍ ແລະ ເລືອກໄດ້ຄະນະພັກຊຸດໃໝ່ ຈໍານວນ 5 ສະຫາຍ ຄື: ສະຫາຍ ປອ. ລີເບີ ລີບົວປາວ ເປັນເລຂາ, ສະຫາຍ ທັນຕາ ກອງຜາລີ ເປັນຮອງເລຂາ, ສະຫາຍ ໂພສີ ເຕັມເມລາດເປັນປະທານກວດກາ, ສະຫາຍປອ. ສາຍທອງ ພົມມະວົງ ເປັນຮອງປະທານກວດກາ ແລະ ສະຫາຍ ປອ. ເກດແກ້ວ ສີຫາລາດເປັນກ​ຳ​ມະ​ການ​ໜ່ວຍ​ພັກ​ຮາກ​ຖານ. ນອກນັ້ນ, ຍັງມີຜູ້ສະໝັກເລືອກຕັ້ງເປັນຜູ້ແທນສົມບູນ,ສຳຮອງຂອງໜ່ວຍພັກຮາກຖານ ກຜງສ ທີ່ຈະເຂົ້າຮ່ວມກອງປະຊຸມໃຫຍ່ ຄັ້ງທີ IV ຂອງອົງຄະນະພັກສະພາແຫ່ງຊາດ ທັງໝົດ 17 ສະຫາຍ,ເລືອກເອົາ 15 ສະຫາຍ, ໃນນັ້ນ ຜູ້​ແທນສົມບູນ 13 ສະຫາຍ, ສຳຮອງ 2 ສະຫາຍ. ກອງປະຊຸມໄດ້ເຫັນດີ ແລະ ຮັບຮອງເອົາບົດລາຍງານການເມືອງກ່ຽວກັບການຕີລາຄາການຈັດຕັ້ງປະຕິບັດວຽກງານຂອງໜ່ວຍພັກຮາກຖານ ກຜງສ ໃນໄລຍະ 3 ປີຜ່ານມາ ແລະ ທິດທາງແຜນການວຽກງານຂອງໜ່ວຍ​ພັກ 5 ປີຕໍ່ໜ້າ (2021-2025)ເຊິ່ງຈະສຸມໃສ່ບັນດາວຽກທີ່ສໍາຄັນຄື: ສືບຕໍ່ສຶກສາອົບຮົມການເມືອງແນວຄິດໃຫ້ສະມາຊິກ​​ພັກ, ພະນັກງານ-ລັດຖະກອນພາຍໃນໜ່ວຍພັກຮາກຖານຢ່າງເລິກເຊິ່ງທົ່ວເຖິງ, ໃຫ້ມີຄຸນສົມບັດສິນທຳປະຕິວັດ ເປັນພະນັກງານທີ່ເປັນແບບຢ່າງນໍາໜ້າ, ສ້າງໃຫ້ສະມາຊິກ​​ພັກເປັນຜູ້ທີ່ມີຄວາມຫ້າວຫັນ ໃນໜ້າທີ່ວຽກງານ, ຈັດຕັ້ງການຮໍ່າຮຽນເຊື່ອມຊຶມແນວທາງນະໂຍບາຍຂອງພັກ, ລະບຽບ, ກົດໝາຍ, ບັນດາເອກະສານສຳຄັນ, ທິດສະດີ, ມະຕິ ແລະ ຄຳສັ່ງຕ່າງໆຂອງພັກ ແລະ ຂອງຄະນະບໍລິຫານງານສະພາແຫ່ງຊາດໃຫ້ເປັນປົກກະຕິ ເພື່ອປະກອບສ່ວນເຂົ້າໃນທຸກວຽກງານຂອງ​​ພັກປະ​ຊາ​ຊົນ​ປະ​ຕິ​ວັດ​ລາວ ກໍຄືວຽກງານຂອງສະພາແຫ່ງຊາດ; ສູ້ຊົນການດໍາເນີນຊີວິດການເມືອງແຕ່ລະຄັ້ງໃຫ້ມີເນື້ອໃນໜັກແໜ້ນ, ການຕິດຕາມກວດກາ-ປ້ອງກັນ ພາຍໃນໜ່ວຍຢ່າງເປັນປົກກະຕິ ແລະ ຮັບປະກັນບໍ່ໃຫ້ເກີດປາກົດການຫຍໍ້ທໍ້ຂຶ້ນພາຍໃນໜ່ວຍພັກ; ສູ້ຊົນສ້າງໜ່ວຍພັກປອດໃສ, ເຂັ້ມແຂງ,ໜັກແໜ້ນ ໂດຍຜັນຂະຫຍາຍຄໍາຂວັນ 2ຂ 1ປ ※ເຂັ້ມແຂງ,ເຂັ້ມງວດ ແລະ ໂປ່ງໃສ§ ຂອງໜ່ວຍພັກຮາກຖານໃຫ້ເປັນອັນລະອຽດ ແລະ ສຶກສາອົບຮົມກໍ່ສ້າງ ແລະ ຂະຫຍາຍໜ່ວຍພັກໃຫ້ໄດ້ທັງປະລິມານ ແລະ ຄຸນນະພາບຖືກຕ້ອງຕາມລະບຽບ, ຫລັກການ, ຂັ້ນຕອນ ແລະ ຄໍາແນະນໍາກ່ຽວກັບການຂະຫຍາຍສະມາຊິກພັກ, ຈະສູ້ຊົນຂະຫຍາຍສະມາຊິກພັກໃຫ້ໄດ້ຫລາຍກວ່າ 60% ຂອງຈໍານວນມະຫາຊົນທັງໝົດພາຍໃນໜ່ວຍ; ປັບປຸງກົງຈັກການຈັດຕັ້ງທີ່ເປັນເສນາທິການຂອງກໍາມາທິການໃຫ້ສອດຄ່ອງຕາມພາລະບົດບາດແລະ ໜ້າວຽກຕົວຈິງ, ປັບປຸງແບບແຜນວິທິເຮັດວຽກ, ການຊີ້ນໍາ-ນໍາພາຂອງໜ່ວຍພັກໃຫ້ຖືກຕ້ອງ ແລະ ເອົາໃຈໃສ່ສ້າງພະນັກງານຕາມຄວາມສາມາດແລະ ຊັບຊ້ອນພະນັກງານໃຫ້ສອດຄ່ອງຕາມຕໍາແໜ່ງງານທີ່ກໍານົດໄວ້; ສ້າງເງື່ອນໄຂໃຫ້ສະມາຊິກພັກ, ພະນັກງານ-ລັດຖະກອນ ໃນຄວາມຮັບຜິດຊອບຂອງຕົນ ໃຫ້ໄດ້ຍົກລະດັບດ້ານທິດສະດີການເມືອງ-ການປົກຄອງ, ວິຊາສະເພາະ ແລະ ພາສາຕ່າງປະເທດ ຢູ່ພາຍໃນ ແລະຕ່າງປະເທດ ຕາມລະບົບໄລຍະສັ້ນ, ໄລຍະກາງ ແລະ ໄລຍະຍາວ ຕາມເງື່ອນໄຂຕົວຈິງ ແລະຕາມການຕົກລົງຂອງຂັ້ນເທິງ;ສືບຕໍ່ຊີ້ນໍາ-ນໍາພາ ແລະ ຊຸກຍູ້ອົງການຈັດຕັ້ງມະຫາຊົນ ໃຫ້ມີການເຄື່ອນໄຫວເປັນປົກກະຕິຕາມກົດລະບຽບ ແລະ ຂໍ້ແຂ່ງຂັນ.

             ກອງປະຊຸມຍັງໄດ້ຮັບຟັງການໂອ້ລົມຈາກສະຫາຍ ສຸບັນ ສະວະບຸດ ເຊິ່ງສະຫາຍໄດ້ກ່າວວ່າ: ໜ່ວຍພັກຮາກຖານຕ້ອງເອົາໃຈໃສ່ຊີ້ນໍາ-ນໍາພາການເມືອງ-ແນວຄິດ, ຕັ້ງໜ້າສຶກສາອົບຮົມສະມາຊິກ​​ພັກໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ມີນ້ຳໃຈຮັກຊາດ, ຮັກລະບອບປະຊາທິປະໄຕ ປະຊາຊົນ, ຮູ້ປົກປັກຮັກສາ ແລະ ເສີມຂະຫຍາຍມູນເຊື້ອອັນດີງາມຂອງຕົນ; ເອົາໃຈໃສ່ປັບປຸງກໍ່ສ້າງພັກໄປຕາມ 5 ຫລັກການ ແລະ 3 ທິດນໍາ,  ໃຫ້ມີຄວາມປອດ​ໃສ, ເຂັ້ມແຂງ,ໜັກແໜ້ນ; ຕັ້ງໜ້າ​ໃນ​ການ​ປັບປຸງ​ແບບ​ແຜນ​ດ້ານ​ການ​ນຳພາ ​ແລະ ​ເອົາ​ໃຈ​ໃສ່​ໃນ​ການ​ປະສານ​ງານ ກັບ​ຄະນະ​ບໍລິຫານງານພັກສະພາແຫ່ງຊາດໃຫ້​ເປັນ​ລະບົບ ​ແລະ ​ຕໍ່​ເນື່ອງ; ຄະນະໜ່ວຍພັກຮາກຖານຕ້ອງເຊື່ອມຊືມ, ກໍາແໜ້ນ ມະຕິກອງປະຊຸມໃຫຍ່ຂອງພັກ ຄັ້ງທີ XI ແລະ ມະຕິກອງປະຊຸມໃຫ່ຍຄັ້ງທີ III ຂອງອົງຄະນະພັກສະພາແຫ່ງຊາດ ພິເສດຕ້ອງກໍາແໜ້ນມະຕິກອງປະຊຸມໃຫ່ຍຄັ້ງທີ II ຂອງໜ່ວຍພັກຮາກຖານ ແລະ ພ້ອມກັນຈັດຕັ້ງຜັນຂະຫຍາຍເປັນແຜນການລະອຽດ; ຕ້ອງເປັນຄັນທຸງເຕົ້າໂຮມຄວາມສາມະຄີເປັນເອກະພາບບົນພຶ້ນຖານແນວທາງນະໂຍບາຍຂອງພັກ, ກົດໝາຍຂອງລັດ ແລະ ມີສິນທໍາໃນການເບິ່ງບັນຫາຕ່າງໆ; ສະມາຊິກພັກແຕ່ລະສະຫາຍ ເຖິງຈະຢູ່ໃນໜ້າທີ່ໃດ, ຕໍາແໜ່ງໃດ ເຖິງວຽກຈະໜັກ ຫລື ເບົາ ກໍຕ້ອງເຮັດສໍາເລັດໜ້າທີ່ຂອງຕົນ ເພື່ອເປັນໄມ້ຫລາວັດແທກຂອງຜົນສໍາເລັດ;  ຕ້ອງປະຕິບັດຕາມມະຕິຄໍາສັ່ງ, ທຸກລະບອບ, ລະບຽບການ, ທຸກຂໍ້ກໍານົດ ຢູ່ພາຍໃນສະພາແຫ່ງຊາດໃຫ້ເຂັ້ມງວດ;ສະມາຊິກພັກເວລາໃດກໍຕ້ອງຕັ້ງໜ້າຝຶກຝົນຫລໍ່ຫລອມຕົນເອງທາງດ້ານຄຸນທາດການເມືອງ, ຄຸນສົມບັດສິນທໍາປະຕິວັດ, ດ້ານວິຊາສະເພາະ, ດ້ານພາສາຕ່າງປະເທດ ແລະ ດ້ານຄຸນນະພາບ.

(ກົງທະນູຄຳ ພິພັດເສລີ)