ຄສຊ ຄຳມ່ວນ ຮ່ວມ​ກັບ​ພາກ​ສ່ວນ​ຕ່າງໆ ມອບເຄື່ອງຊ່ວຍເຫລືອ​ແຂວງ​ຄໍາ​ມ່ວນ
14/09/2021

          ຮ່ວມກັບມູນລະນິທີຊ່ວຍເຫລືອຄົນທຸກຍາກແຫ່ງ ສປປລາວ, ລູກຫລານແຂວງຄຳມ່ວນ ແລະ ພາກສ່ວນທຸລະກິດພາຍໃນນະຄອນຫລວງວຽງຈັນ ມອບໃຫ້ແຂວງຄຳມ່ວນ ເພື່ອນຳໄປມອບຕໍ່ໃຫ້ພາກສ່ວນທີ່ກ່ຽວຂ້ອງ.

            ເຄື່ອງທີ່ນຳມາມອບໃນຄັ້ງນີ້ ປະກອບມີຜ້າອັດປາກ, ເຈວລ້າງມື ລວມມູນຄ່າທັງໝົດ 50 ລ້ານກວ່າກີບ ເຊິ່ງກ່າວມອບໂດຍ ພຣະອາຈານ ພຸດທະສອນ ອ່ອນວົງສາ ຄະນະກັມມາທິການສາທາຣະນູປະການ ສູນກາງອົງການພຸດທະສາສະໜາສຳພັນ ແຫ່ງ ສປປລາວ ແລະ ກ່າວຮັບໂດຍທ່ານ ຄຳໃບ ດຳລັດ ຮອງປະທານສະພາແຫ່ງຊາດ ທັງເປັນສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 12 ແຂວງຄຳມ່ວນ; ມີຮອງປະທານສະພາປະຊາຊົນແຂວງ, ຮອງປະທານກຳມາທິການວັດທະນະທຳ-ສັງຄົມ, ບັນດາ ສສຊ ປະຈຳເຂດເລືອກຕັ້ງ, ຕາງໜ້າຈາກອົງການແນວລາວສ້າງຊາດ, ຕາງໜ້າມູນນິທິ ແລະ ຄະນະຊ່ວຍວຽກຈຳນວນໜຶ່ງເຂົ້າຮ່ວມເປັນສັກຂີພິຍານ.

             ​ໂອ​ກາດ​ດັ່ງ​ກ່າວ, ທ່ານ ຄຳໃບ ດຳລັດ ໄດ້ສະແດງຄວາມຂອບໃຈເປັນຢ່າງຍິ່ງຕໍ່ການຊ່ວຍເຫລືອໃນຄັ້ງນີ້ ທັງ​ໃຫ້​ຮູ້​ວ່າ: ເຄື່ອງຈຳນວນດັ່ງກ່າວ ແມ່ນຈະໄດ້ນຳໄປມອບຕໍ່ໃຫ້ພາກສ່ວນທີ່ກ່ຽວຂ້ອງ ເປັນຕົ້ນແມ່ນຄະນະສະເພາະກິດຂັ້ນແຂວງຄ​ໍາ​ມ່ວນ ເພື່ອນຳໃຊ້ເຂົ້າໃນວຽກງານຕ້ານ ແລະ ສະກັດກັ້ນການລະບາດຂອງພະຍາດໂຄວິດ-19 ໃຫ້ເກີດປະໂຫຍດສູງສຸດ.

(ພາບ:ສອນສັກ, ຂ່າວ:ກົງທະນູຄຳ)