ກອງປະຊຸມໃຫຍ່ຄັ້ງທີ III ຂອງໜ່ວຍພັກຮາກຖານ ກຕທ
14/09/2021

    (ສພຊ) ກອງປະຊຸມໃຫ່ຍສະມາຊິກພັກຄັ້ງທີ IIIຂອງໜ່ວຍພັກຮາກຖານກໍາມາທິການການຕ່າງປະເທດ (ກ​ຕ​ທ) ໄດ້ໄຂຂຶ້ນຢ່າງເປັນທາງການໃນວັນທີ 9 ກັນຍາ 2021 ທີ່ຫ້ອງປະຊຸມສະພາແຫ່ງຊາດ​ ໂດຍການເປັນປະທານຂອງສະຫາຍ ສັນຍາ ປຣະເສີດ ຮັກສາການເລຂາໜ່ວຍພັກຮາກຖານ ກ​ຕ​ທ;   ເຂົ້າຮ່ວມກອງປະຊຸມໂດຍສະຫາຍ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງເລຂາ​ຄະນະບໍລິຫານງານ​ພັກ​, ຮອງປະທານສະພາ​ແຫ່ງ​ຊາດ; ມີບັນດາສະຫາຍຕາງໜ້າຄະນະພັກ, ມີຮອງເລຂາໜ່ວຍພັກ, ກໍາມະການໜ່ວຍພັກ, ຜູ້ຕາງໜ້າຈາກຫ້ອງການຊ່ວຍວຽກງານບໍລິຫານພັກສະພາແຫ່ງຊາດ, ຜູ້ຕາງໜ້າຈາກອົງການຈັດຕັ້ງມະຫາຊົນ, ສະມາຊິກພັກສົມບູນ-ສຳຮອງ, ສະມາຊິກພັກອະວຸໂສບຳນານພາຍໃນໜ່ວຍພັກ ແລະ ແຂກຖືກເຊີນ ມີສະມາຊິກພັກພາຍໃນໜ່ວຍພັກທັງໝົດ 23 ສະຫາຍ ຍິງ 9 ສະຫາຍ.

          ກອງປະຊຸມໃຫ່ຍ ຄັ້ງທີ III ຂອງໜ່ວຍພັກຮາກຖານ ກ​ຕ​ທ ໄດ້ຄົ້ນຄ້ວາ, ປຶກສາຫາລື, ແລກປ່ຽນຄຳເຫັນຢ່າງເລິກເຊິ່ງ, ກົງໄປກົງມາ ແລະ ມີຄວາມຮັບຜິດຊອບສູງ ໄດ້ຮັບຮອງເອົາຢ່າງເປັນເອກະສັນບັນດາເນື້ອໃນສໍາຄັນ ເປັນຕົ້ນແມ່ນຮັບຟັງການລາຍງານ ແລະ ຄົ້ນຄ້ວາປະກອບຄຳຄິດຄຳເຫັນໃສ່ຮ່າງບົດລາຍງານການເມືອງ, ທິດທາງແຜນການ ແລະ ຄາດໝາຍສູ້ຊົນຂອງໜ່ວຍພັກຮາກຖານ ທີ່ໄດ້ລາຍງານກ່ຽວກັບການຈັດຕັ້ງປະຕິບັດມະຕິຂອງກອງປະຊຸມໃຫ່ຍ ຄັ້ງທີ II ຂອງໜ່ວຍພັກຮາກຖານ ໃນໄລຍະ 5 ປີຜ່ານມາ ແລະ ກອງປະຊຸມໄດ້ເຫັນດີເປັນເອກະພາບຮັບຮອງເອົາທິດທາງແຜນການ 5 ປີແຕ່ປີ 2021 ຫາປີ 2025;ຮັບຮອງເອົາບົດສໍາຫລວດການນໍາພາຂອງຄະນະໜ່ວຍພັກຊຸດເກົ່າ ເຊິ່ງໄດ້ມີການຕີລາຄາການນໍາພາການເຄື່ອນໄຫວຮອບດ້ານຂອງຄະນະໜ່ວຍພັກ​ຮາກ​ຖານໄດ້ເຮັດໃຫ້ໜ່ວຍພັກຮາກຖານ ກ​ຕ​ທ ມີການເຕີບໃຫ່ຍເຂັ້ມແຂງ ແລະ ຂະຫຍາຍຕົວທັງປະລິມານ ແລະ ຄຸນນະພາບ ຈົນສາມາດເປັນໜ່ວຍພັກປອດໃສ,ເຂັ້ມແຂງ ແລະ ໜັກແໜ້ນ 3 ສະໄໝຕິດຕໍ່ກັນ; ກອງປະຊຸມໄດ້ຮັບຟັງການລາຍງານ ແລະ ການປະກອບຄຳເຫັນຈາກຜູ້ຕາງໜ້າສາມອົງການຈັດຕັ້ງມະຫາຊົນ ເຊິ່ງໄດ້ສະແດງໃຫ້ເຫັນເຖິງຄວາມເປັນເອກະພາບສູງຕໍ່ບົດລາຍງານການເມືອງ, ທິດທາງແຜນການ ແລະ ວຽກງານຮອບດ້ານ ໂດຍສະເພາະແມ່ນບັນດາຜົນສຳເລັດ ໃນການຊີ້ນຳນຳພາຂອງຄະນະໜ່ວຍພັກ, ການຈັດຕັ້ງຜັນຂະຫຍາຍມະຕິກອງປະຊຸມໃຫ່ຍຂອງພັກໃນໄລຍະຜ່ານມາ.

          ພ້ອມນັ້ນ, ຜູ້​ແທນ​ກອງ​ປະຊຸມ​ໃຫຍ່ ​ໄດ້​​ໃຊ້​ສິດ​ປະຊາທິປະ​ໄຕ​ຂອງ​ຕົນ​ ປ່ອນ​ບັດ​​ເລືອກຕັ້ງ​ເອົາ​ຄະນະໜ່ວຍ​​ພັກຮາກ​ຖານ ກ​ຕ​ທ ​ສະ​​ໄໝ​ທີ III ບົນ​ພື້ນຖານ​ຫ​ລັກການ ລວມສູນ​ປະຊາທິປະ​ໄຕ​, ​ຖືກຕ້ອງ​ສອດຄ່ອງ​ກັບ​ມາດຕະຖານ​ເງື່ອນ​ໄຂ​ທີ່​ໄດ້​ກຳນົດ​ໄວ້ ເຊິ່​ງມີ​ຜູ້ອອກຮັບ​ສະໝັກ​ເລືອກ​ຕັ້ງ 7 ສະຫາຍ ຍິງ 3 ສະຫາຍ; ກອງປະຊຸມໄດ້ເລືອກຕັ້ງເອົາຄະນະພັກ ສະໄໝທີ III ຈໍານວນ 5 ສະຫາຍ ຍິງ 2 ສະຫາຍ ແລະ ໄດ້ເປີດກອງປະຊຸມຄັ້ງປະຖົມມະລືກຂອງ​ຄະ​ນະໜ່ວຍພັກ​ຮາກ​ຖານ ຊຸດທີ III ໄດ້ເປັນເອກະພາບເລືອກຕັ້ງ ພັກຊຸດໃໝ່ ເລືອກເອົາສະຫາຍສະຫາຍ ສັນຍາ ປຣະເສີດ ເປັນ​ເລຂາ​ໜ່ວຍ​ພັກຮາກ​ຖານ; ສະຫາຍ ນາງ ວັນດີ ບຸດທະສະວົງເປັນ​ຮອງ​ເລຂາ​ໜ່ວຍພັກຮາ​ກຖານ; ສະຫາຍ ເພັດລາ ທັນທະວົງສາ ເປັນປະທານກວດກາ; ສະ​ຫາຍ ນາງ ນິດແກ້ວ ຄໍາມີ ​ເປັນຮອງປະທານກວດກາ; ສະຫາຍ ພຸດສະດີ ປັນຍາສິດ ເປັນກໍາມະການກວດກາໜ່ວຍພັກ. ພ້ອມນັ້ນ ກໍເລືອກຕັ້ງເອົາຜູ້ແທນສົມບູນ ແລະ ສໍາຮອງຂອງໜ່ວຍພັກຮາກຖານ ເຂົ້າຮ່ວມກອງປະຊຸມໃຫຍ່ຜູ້ແທນຄັ້ງທີ IV ຂອງອົງຄະນະພັກສະພາແຫ່ງຊາດ ຈໍານວນ 17 ສະຫາຍ ແລະ ເລືອກເອົາຜູ້ແທນສົມບູນ ຈໍານວນ 12 ສະຫາຍ, ສຳຮອງ 2 ສະຫາຍ.

           ໃນໂອກາດນີ້, ກອງປະຊຸມໄດ້ຮັບຟັງການໂອ້ລົມຂອງສະຫາຍ ປອ. ນາງ ສູນທອນໄຊຍະຈັກ ເຊິ່ງສະຫາຍໄດ້ຕີລາຄາສູງ ແລະ ສະແດງຄວາມຍ້ອງຍໍຊົມເຊີຍຕໍ່ບັນດາຜົນສໍາເລັດກໍຄືການຊີ້ນຳ-ນຳພາຂອງຄະນະໜ່ວຍພັກຮາກຖານ ກ​ຕ​ທ ໃນໄລຍະ 5 ປີຜ່ານມາ ທີ່ໄດ້ຊີ້ນຳ-ນຳພາສະມາຊິກພັກ, ພະນັກງານແລະ ຍາດໄດ້ຜົນສຳເລັດຫລາຍດ້ານ ເຊິ່ງໄດ້ປະກອບສ່ວນອັນສໍາຄັນເຂົ້າໃນຜົນສໍາເລັດລວມຂອງ ສະພາແຫ່ງຊາດ. ພ້ອມກັນນັ້ນ, ສະຫາຍຍັງໄດ້ໃຫ້ທິດຊີ້ນໍາອັນສໍາຄັນ ຕໍ່ການເຄື່ອນໄຫວນໍາພາຂອງຄະນະໜ່ວຍພັກຊຸດໃໝ່ ແລະ ຕໍ່ຮາກຖານພັກກໍາມາທິການການຕ່າງປະເທດໃນຕໍ່ໜ້າ ໂດຍໄດ້ເນັ້ນໜັກວຽກງານທີ່ໜ່ວຍພັກຈະຕ້ອງໄດ້ສຸມໃສ່ຈັດຕັ້ງປະ​ຕິ​ບັດ​ພາລະ​ບົດບາດ, ສິດ ແລະ ໜ້າທີ່ຂອງຄະນະໜ່ວຍພັກ ກໍຄືການຊີ້ນຳ-ນຳພາຕໍ່ການເຄື່ອນໄຫວວຽກງານຂອງກຳມາທິການການຕ່າງປະເທດໃນ 5 ປີຕໍ່ໜ້າ ພ້ອມທັງເຊື່ອໝັ້ນວ່າ ຄະນະໜ່ວຍພັກຊຸດໃໝ່ ຈະສືບຕໍ່ຊີ້ນຳ-ນຳພາຈັດຕັ້ງປະຕິບັດ ມະຕິຂອງກອງປະຊຸມໃຫ່ຍຄັ້ງທີ III ຂອງໜ່ວຍພັກຮາກຖານກໍາທິການການຕ່າງປະເທດ ກໍ່ຄືການຈັດຕັ້ງປະຕິບັດວຽກງານວິຊາສະເພາະ ໃຫ້​ໄດ້ມີຜົນສໍາເລັດເປັນຢ່າງດີ ເພື່ອປະກອບສ່ວນເຂົ້າໃນກອງປະຊຸມໃຫ່ຍຄັ້ງທີ IVອົງຄະນະພັກສະພາແຫ່ງຊາດທີ່ຈະໄຂຂຶ້ນໃນຕໍ່ໜ້ານີ້.

(ສົມນຶກ ແກ້ວໄຊຍະຈັກ)