ຄະນະຜູ້ແທນສະຖາບັນກູບາ ເພື່ອມິດຕະພາບກັບນາໆຊາດ ຢ້ຽມຂໍ່ານັບທ່ານຮອງປະທານສະພາແຫ່ງຊາດ
12/04/2018

(ສພຊ) ຕອນເຊົ້າວັນທີ 6 ເມສາຜ່ານມາ ທີ່ສະພາແຫ່ງຊາດ, ສະຫາຍ ເຟນານໂດ ກອນຊາເລສ ໂຢ (Fernando Gonzalez Llort) ວິລະຊົນກູບາ, ສະມາຊິກສະພາ ທັງເປັນປະທານສະຖາບັນກູບາ ເພື່ອມິດຕະພາບກັບນາໆຊາດ ພ້ອມດ້ວຍຄະນະ ໄດ້ຢ້ຽມຂ່ຳນັບສະຫາຍ ສົມພັນ ແພງຄຳມີ ກຳມະການສູນກາງພັກ,  ຮອງປະທານສະພາແຫ່ງຊາດ ໃນໂອກາດທີ່ເດີນທາງມາຢ້ຽມຢາມ ສປປລາວ ຢ່າງເປັນທາງການ ລະຫວ່າງວັນທີ 5-9 ເມສາ 2018 ເພື່ອຢ້ຽມຢາມ ແລະ ຖອດຖອນບົດຮຽນການເຄື່ອນໄຫວວຽກງານສອງອົງການຈັດຕັ້ງມິດຕະພາບຂອງສອງປະເທດລາວ-ກູບາ ທັງເປັນການປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ກູບາ ໃຫ້ນັບມື້ໄດ້ຮັບການພັດທະນາໃຫ້ແໜ້ນແຟ້ນຍິ່ງຂຶ້ນ.

          ສະຫາຍ ເຟນານໂດ ກອນຊາເລສ ໂຢ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງສະຫາຍຮອງປະທານສະພາແຫ່ງຊາດ ພ້ອມດ້ວຍຄະນະ ທັງຕີລາຄາສູງຕໍ່ສາຍພົວພັນຮ່ວມມືທີ່ເປັນມູນເຊື້ອລະຫວ່າງສອງພັກ, ສອງລັດ ແລະ ປະຊາຊົນສອງຊາດກູບາ-ລາວ, ລາວ-ກູບາ ທັງແຈ້ງສະພາບການໂດຍຫຍໍ້ກ່ຽວກັບການພັດທະນາເສດຖະກິດ-ສັງຄົມ ແລະ ການເລືອກຕັ້ງສະພາແຫ່ງຊາດກູບາຊຸດໃໝ່ ຊຸດທີ VI ຂອງກູບາ ທີ່ຫາກໍມີການເລືອກຕັ້ງເມື່ອເດືອນມີນາຜ່ານມາ ແລະ ຈະຈັດກອງປະຊຸມຄັ້ງປະຖົມມະລືກຂອງຕົນຂຶ້ນໃນມໍ່ໆນີ້; ພ້ອມນັ້ນ, ແຈ້ງໃຫ້ຊາບໂດຍສັງເຂບກ່ຽວກັບການເຂົ້າຢ້ຽມຂ່ຳນັບ ແລະ ປຶກສາຫາລືກັບບັນດາສະຫາຍການນຳຂອງ ສປປລາວ ເປັນຕົ້ນແມ່ນສະຫາຍ ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ; ສະຫາຍ ນາງ ສູນທອນ ໄຊຍະຈັກ ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ແລະ ສະຫາຍ ອາລຸນໄຊ ສູນນະລາດ ກຳມະການສຳຮອງສູນກາງພັກ, ເລຂາຄະນະບໍລິຫານຊາວໜຸ່ມປະຊາຊົນປະຕິວັດລາວ ເຊິ່ງໄດ້ມີການປຶກສາຫາລືຫລາຍບັນຫາສຳຄັນທີ່ເຫັນວ່າເປັນປະໂຫຍດໃຫ້ທັງສອງປະເທດກູບາ ແລະ ລາວ.         

ໃນໂອກາດນີ້, ສະຫາຍ ສົມພັນ ແພງຄຳມີ ໄດ້ສະແດງຄວາມຍິນດີຕ້ອນຮັບໃນການມາຢ້ຽມຢາມ ແລະ ເຮັດວຽກ ຢ່າງເປັນທາງການຢູ່ ສປປລາວ ຂອງຄະນະຜູ້ແທນກູບາ ນຳໂດຍສະຫາຍ ເຟນານໂດ ກອນຊາເລສ ໂຢ ຄັ້ງນີ້ ຖືເປັນການປະກອບສ່ວນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອທີ່ມີມາແຕ່ດົນນານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ກູບາ ໂດຍສະເພາະແມ່ນສອງສະພາແຫ່ງຊາດ ໃຫ້ໄດ້ຮັບການເສີມຂະຫຍາຍຢ່າງປະສົບຜົນສຳເລັດ; ພ້ອມນີ້, ສະຫາຍໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນສຳເລັດທີ່ປະຊາຊົນກູບາ ຍາດມາໄດ້ໃນພາລະກິດສ້າງສາພັດທະນາປະເທດຊາດ ແລະ ການເລືອກຕັ້ງຂອງສະພາແຫ່ງຊາດຊຸດທີ VI ເຊິ່ງສະຫາຍປະທານສະຖາບັນກູບາ ເພື່ອມິດຕະພາບກັບນາໆຊາດ ກໍໄດ້ຮັບເລືອກຕັ້ງໃຫ້ເປັນສະມາຊິກສະພາ ເປັນຕົວແທນແຫ່ງສິດ ແລະ ຜົນປະໂຫຍດອັນຊອບທຳຂອງປະຊາຊົນກູບາ ທັງເຫັນດີເປັນເອກະພາບຕໍ່ເນື້ອໃນຕ່າງໆທີ່ສະຫາຍ ເຟນານໂດ ກອນຊາເລສ ໂຢ ທີ່ໄດ້ປຶກສາຫາລືຮ່ວມກັບບັນດາສະຫາຍການນຳຂອງ ສປປລາວ.

ນອກນັ້ນ, ທັງສອງຝ່າຍຍັງໄດ້ປຶກສາຫາລື ແລະ ແລກປ່ຽນບົດຮຽນບາງບັນຫາທີ່ມີຄວາມສົນໃຈໃນຂົງເຂດນິຕິບັນຍັດຕື່ມອີກ ເຫັນໄດ້ວ່າມີບາງອັນກໍມີອັນຄ້າຍຄືກັນ ແລະ ບາງອັນກໍມີຄວາມແຕກຕ່າງກັນ ຈຶ່ງເຫັນດີໃຫ້ມີການແລກປ່ຽນກັບຕື່ມໃນອະນາຄົດ.

(ນາງ ປາກາລັກ ພົມມີໄຊ)